353. සඳගිරෙහි, වෘන්දාවෙහි සහ දෙව්දුරු මඬුලු සෙවණෙහි……..

Painting - Raymond Leech

සඳගිරි පව්ව අබියස,

රැයක් එලිවන තුරා වැලපුණ,

සඳකිඳුරියක නොමවන,

පිසදා තෙමුනු දෙකොපුල,

නැඟෙමි මසිතට දිරිගෙන,

හිරු නැඟෙන සඳ පෙර'ඹර.

ගෝපිකා ඇකයෙහිම නැළවෙන,

ක්‍රිෂ්ණාට සමුදුනිමි මදහසින,

හෝපළු මඬුලු සෙවණැළි ද මැඩ,

මාලතී මාලාව පළඳමින,

වෘන්දාව හැරපියා නික්මයන,

වස්දඬුරාව මතක පමණක්ම අරගෙන,

දෙව්දුරු පත්ය සුළඟට සැලෙන,

සකුරාසෝ* කළඹ බිහිදොර අබියස,

නෙතඟ ඉනු කඳුලුදිය වියලෙත,

බලාහිඳිනෙමි නෙතුපිය නොපියාම,

පෙත්මඟ සෙමෙන් පියමංකොට,

නික්මයන ඔබ රුව දෙස,

සඳකිඳුරියමි සඳගිරෙහි වැලපුන,

රාධා ද වෙමි වෘන්දාව අතැරගිය,

නොරිකෝ මි වැළපෙනා ළසොවින,

හදපුරා පිරි සංතාප උසුලන,

* සකුරාසෝ යනු ජපානයේ වසන්තයේ පිපෙනා සදාකාලික ප්‍රේමයේ සංකේතයක් සේ සැලකෙන මලකි. 

Inspiration - බස්සිගේ නික්මන