538. From The Big Bad Wolf To Lone Wolf………….

ශිශිර සෘතුවෙහි පතිත හිම මත පසුවන වෘකයින්
තිදෙනෙක් ඉහත ඡායාරූපයෙහි දැක්වේ.
(Google Images)

මේ දවස්වල The big bad wolf නොහොත් දැවැන්ත නපුරු වෘකයා ලංකාවට ඇවිල්ල පැලපදියම් වෙලා ඉන්නව. ඒ සතා ආපහු යනවයි කියන්නෙ මේ පාළොස් වෙනිදද කොහෙද. 

දුහුණන් දැනුම් උදෙසා පවසන වගනම්.....බිග් බෑඩ් වුල්ෆ් නමින් හැඳින්වෙන්නෙ අන්තර්ජාතිකව සුප්‍රසිද්ධ පොත් ප්‍රදර්ශනයක් සහ සල්පිළක්. අවුරුදු අටකට ඉස්සෙල්ල මැලේසියාවෙ පටන් ගත්තු මේ පොත් සල්පිළ දැනට තායිලන්තය සහ ඉන්දුනීසියාවෙ වාර්ෂිකව වගෙ පැවැත්වෙනව. ලංකාවට වෘකයා සම්ප්‍රාප්ත වුනේ මේ පළමු වරට.

මැලේසියාවෙ එහෙම ඔය පොත් සල්පිලේ පොත් විකුණන්නෙ මෙහෙමලු. එක එක ප්‍රමාණ හතර පහකින් කාඩ්බෝඩ් පෙට්ටි තියනවලු. ප්‍රමාණය විසාල වෙන්ට විසාල වෙන්ට එව්වයෙ මිල වැඩියි. පොත් ගන්ට එන අයට තියෙන්නෙ තමන් ගන්න හිතාගෙන ඉන්න පොත් ප්‍රමාණය අනුව ගැලපෙනවයි කියල හිතන පෙට්ටියක් අරගෙන ගිහිල්ල ඒකට පොත් දාගන්න එක. පෙට්ටිය පිරුනම පියන් වැහුව. පිටවෙන දොරටුවට පෙට්ටියට සල්ලි ගෙවපු බිල පෙන්නුව. එළියට ආව. 

ලංකාවෙ හැබැයි ඒ ක්‍රමේ තිබ්බෙ නෑ. එහෙම තිබ්බනම් තියෙයි රුපියල් පන්දාහෙ පෙට්ටි, අටදාහෙ පෙට්ටි, දහදාහෙ පෙට්ටි එහෙම. සිරි ලාංකිකයින්ගෙ හැටි සොබාව දන්න හින්ද මම හිතන්නෙ සංවිදායකයො පෙට්ටි මෙතඩ් එක මෙහෙට හරියන්නෙ නැතය කියල තීරණය කරන්ට ඇති.

අර පොත් පෙට්ටි කතන්දරේට ඌණ පූරණයක් එකතු කරන්ට උවමනයි. ඔය පොත් පෙට්ටි කතාව මට මතක විදිහට ඉස්සෙල්ලම මම කියෙව්වෙ අපේ පැතුමගෙ බ්ලොග් එකේ. දන්නවනෙ අර පැතුමා නේ? පැතුමයි කියන්නෙ අපේ දැනට නොකඩවා ලියන ජේෂ්ඨම වියුණු රචකයා....පැතුමට "ශ්‍රේෂ්ඨ ජේෂ්ඨයා" කියල ගෞරව නාමයකුත් දුන්න අපේ අභාවප්‍රාප්ත චිචාරක තුමා......

හරි පොත් පෙට්ටි කතාවෙ ඌණ පූරණය මෙහෙමයි. පැතුම කියනව එහෙම පොත් පෙට්ටි සිනාරියෝ එකක් මැලේසියාවෙ තිබ්බෙ අවුරුදු දෙකකට සැරයක්ලු. ඒ අතර එන ඕල්ටර්නේටිව් අවුරුද්දෙ සල්පිල පැවැත්වෙන්නෙ මෙහෙ තිබ්බ සාමාන්‍ය නෝමල් ක්‍රමේටමලු. 

ඒ කියන්නෙ සම් ටයිම්ස් ලබන අවුරුද්දෙ පොත් පෙට්ටි මෙතඩ් එක සිරි ලංකාවටත් එන්න පුලුවන්. ඒ හින්ද පුස්තකකාමී (ඉංග්‍රීසියෙං නම් Bibliophiles) උදවිය දැං ඉඳලම දඩාර් සයිස් දැවැන්ත පෙට්ටි සූදානම් කරගත්තොත් කෝකටත් හොඳයි. ඔය සීතකරණ, වොෂිං මැෂින් වගෙ එව්ව ගෙනාපු පෙට්ටි තියනවනම් එළ ද බ්‍රා...

ඉතිං ඒ බිග් බෑඩ් වුල්ෆ් කතන්දරේ මෙතෙකින් අවසානයි. දැන් දෙවෙනි කතාව. මගෙ ජීවිතේ ඔය අහඹු සම්පාත සිදුවීම ඒ කියන්නෙ ඉංග්‍රීසියෙන් අපි ඔය Coincidence කියන්නෙ. අන්න එව්ව බොහොම බහුලයි. එහෙම දෙයක් මේ පාරත් වුනා. 

ඒ කියන්නෙ ඔය බිග් බෑඩ් වුල්ෆ් තුමා ලංකාවට සැපත් වෙද්දි මම කියව කියව හිටියෙ ජෝඩි පිකෝ කියන අමරිකානු ලේඛිකාවගෙ ලෝන් වුල්ෆ් නම් නවකථාව. ජෝඩි පිකෝ කියන්නෙ එකිනෙකට හාත්පසින්ම වෙනස් විවිධ මානයන් ඔස්සේ කථා ගෙතීමට සමත් බොහොම දක්ෂ ලේඛිකාවක්.

ජෝඩි පිකෝගේ ලෝන් වුල්ෆ් නවකථාව
ඉහත ඡායාරූපයෙහි දැක්වේ
(Google Images)

කතාව ගෙතෙනුයේ ලූක් වොරන් නම් සත්වෝද්‍යාන භාරකරුවෙක් වටා. කුඩාකල සිටම සතුන්ට දැඩි ආදරය දක්වන ලූක්ගෙ විශේෂ අවධානයට ලක් වෙන්නෙ වෘකයින්. වෘකයින් දුරින් සිට නීරීක්ෂණය කිරීමෙන් ඔවුන්ගේ සැබෑ ගතිගුණ හඳුනාගැන්මට නොහැකියයි දැඩිලෙස විශ්වාස කරන ලූක් වරක් කැනඩාවෙ මහ වනයක වෘක රැළක් සමඟ වසර දෙකකට ආසන්න කාලයක් ගත කරනවා. 

මේ ලෝන් වුල්ෆ් පොතෙන් එක් පරිච්ඡේදයක්......

වෘකයින් රැළක ක්‍රියාකාරිත්වය බොහෝ විට මාෆියා සංවිධානයේ ක්‍රියාකාරිත්වයට සමානය. මාෆියා සංවිධානයේ පරිදිම වෘක රැළකද සියළු සාමාජිකයින් හට යම් නියමිත කාර්ය භාරයක් ඇත. එළෙසම ඒ සියළු සාමාජිකයෝ තමනට නියමිත කාර්යය නොපිරිහෙලා ඉටු කල යුතුය. අනෙකුත් සාමාජිකයෝ ද එලෙස ඔවුන් තමන්ට නියමිත කාර්යය ඉටු කරනු ඇති බවට අපේක්ෂා කොට සිටින්නෝය.

රැළෙහි නායක පදවිය උසුලන ප්‍රධානියා නොහොත් ඇල්ෆා වෘකයා පිළිබඳව අප සැම අසා ඇත. ඇල්ෆා වෘකයා යනු රැළෙහි උත්තරීතර පාලකයාය. රැළෙහි සාමාජිකයින් වන්නාවූ අනෙකුත් වෘකයින්ගේ ආරක්ෂාව ඔහු හෝ ඇයගේ වගකීම වේ. ඔවුන් සංචරණය කල යුත්තේ කුමන ප්‍රදේශයන්හිද ආහාර පිණිස ඔවුන් දඩයම් කල යුත්තේ කුමන සතුන්ද එමෙන්ම දඩයම් කල යුත්තේ සතුන් කී දෙනෙක්ද යන්න පිළිබඳව අවසාන තීරණය ගනු ලබන්නේ ඇල්ෆා වෘකයා/වෘක ධේනුව විසිනි.

වෘක රැළෙහි අනාගත අභිවෘද්ධිය උදෙසා සියළුම තීරණ ගනු ලබන්නේ ඇල්ෆා වෘකයා/වෘක ධේනුව විසිනි. එබැවින්ම රැළෙහි විනය මනාලෙස පවත්වා ගැනීමේ රාජකාරියෙන් ඔහු සපුරාම නිදහස් වේ. රැළෙහි විනය පවත්වාගැනීම භාරවූවකුට නිතර විනය විරෝධීව හැසිරෙන රැළෙහි අනෙකුත් සාමාජිකයින් හට දඬුවම් කිරීමට සිදුවීම වැළැක්විය නොහැක. 

මෙසේ දඬුවම් කීරිමේදී ප්‍රචණ්ඩ සටන් පවා සිදුවීමට ඇති ඉඩ ප්‍රස්ථාවද සුළු කොට තැකිය නොහැක. මෙම ප්‍රචණ්ඩ සටන් වලදී පූර්ණ අකර්මණ්‍යතාවයට හෝ අවසාන වශයෙන් ජීවිතක්ෂයට පත්වීමේ අවදානමද සුළුකොට තැකිය නොහැක. එබැවින් රැළෙහි විනය පවත්වා ගැනීමේ කාර්යය භාරවන්නේ වෙනත් වෘකයෙකුට හෝ වෘක ධේනුවකටය.

එම වගකීම පැවරෙනුයේ රැළෙහි ධූරාවලිය (Hierarchy) අනුව දෙවන ස්ථානයෙහි වගකීම දරන්නාටය. නැතහොත් බේටා වෘකයාටය. ඔහුගේ කාර්ය භාරයඅඩුවැඩි වශයෙන් බලාත්මක කරවන්නකුගේ (Enforcer) කාර්ය භාරයට සමානය. බොහෝ විට හොඳින් වැඩුණු ශක්තිමත් පිරිමි සතකු වන බේටා වෘකයා වියයුතු පරිදිම ඉතා රෞද්‍ර ගතිපැවතුම් වලින් යුක්ත වූවෙකි. 

රැළෙහි අනුත්තර නායකයාට ඔබ අනවශ්‍ය පරිදි කිට්ටුවුවහොත් ඔහු ඔබ වෙතට එක්පැහැර කඩා වැද ඔබගේ උගුරු දණ්ඩ ඔහුගේ ශක්තිමත් හනු යුවල භාවිතා කොට කඩා දැමීමට එක් මොහොතක් හෝ නොපැකිළෙනු ඇත. ඔහු එවන් අවස්ථාවකදී අභාග්‍යසම්පන්න පරිදි මියගියද රැළෙහි කිසිවකුට ඒ බරපතල ප්‍රශ්ණයක් නොවනු ඇත. ඔහුගේ තැන ගැනීමට නොපැකිල ඉදිරිපත්වන එමන්ම කාය ශක්තියෙන් අනූන සහ සුදුසු පරිදි රෞද්‍ර වෘකයින් බොහෝ දෙනෙකු රැළෙහි සිටින්නාහ.

වෘක රැළෙහි ධූරාවලියෙහි තෙවැන්නා වනාහී පරීක්ෂකයාය (Tester). ඔහු ස්වභාවයෙන්ම කිසිවකු කෙරෙහි විශ්වාසය නොතබන අතර නිතොර සියල්ල සහ සියල්ලන් සැක කරන්නෙකි. වෘක රැළ අභ්‍යන්තරයෙහි හෝ ඊට පරිබාහිරව කිසියම් නුපුරුදු එනම් මින් පෙර නොවූ වීරූ යමක් සිදුවන්නේ යයි ඔහුට/ඇයට හැඟී ගියහොත් ඒ කෙරෙහි පූර්ණ අවධානය යොමු කරමින් ඔහු /ඇය ඒ අසළම ගැවසෙනු ඇත. කුමන හෝ අවදානමක් පිළිබඳව දැනුනු වහාම ඒ පිළිබඳව නායකයා දැනුවත් කීරිම ඔහුගේ වගකීමකි.

පරීක්ෂකයාගේ සංවිභාගශීලීභාවය (Investigative tendencies) රැළෙහි සුරක්ෂිතතාව උදෙසා බොහෝ වැදගත් වනු ඇත. එළෙසම රැළෙහි තත්ව පාලක (Quality control) කාර්යයද ඉටු කරනුයේ ඔහු හෝ ඇය විසිනි. 

රැළෙහි යම් සාමාජිකයකු තමනට නියමිත කාර්ය භාරය ප්‍රශස්ත ලෙස ඉටු නොකරන්නේනම් ඔහුට හෝ ඇයට තම ප්‍රකෘති හැකියාව (Mettle) ඔප්පු කිරීමට අනිවාර්යයෙන් සිදුවන අවස්ථාවක් නිර්මාණය කිරීමට ආරක්ෂකයා නොපැකිලේ. බොහෝවිට සැකයට භාජනය වන සාමාජිකයාහට රැළෙහි බලාත්මක කරවන්නා නොහොත් බේටා වෘකයා සමඟ සටනකට එළඹීමට සිදුවනු ඇත. මෙවන් සටනකදී එම සාමාන්‍ය සාමාජිකයා එක පැහැර පොළොව මත හෙලා පරාජය කිරීමට බලාත්මක කරවන්නා අසමත් වුවහොත් ඔහු තව දුරටත් තම තනතුර දැරීමට කිසිදු අයුරකින් සුදුස්සකු නොවේ.

Diffuser නොහොත විසරකයා හට රැළෙහි නියමිත කාර්ය භාරය ඔහුගේ ඇයගේ නමින්ම ගම්‍යවන පරිදි විසිරවීමයි. ඔමේගා ලෙසද බොහෝවිට හැඳිවෙන විසිරකයා රැළෙහි ධුරාවලියෙහි පහත්ම ස්ථානය දරන්නාලෙස බොහෝ කලක් සැලකුනු නමුදු ඔහු/ඇය කාර්ය රැළෙහි අභිවෘද්ධිය උදෙසා ඉතා වැදගත් කාර්යභාරයක් ඉටුකරන බව මනා සේ පැහැදිලිය. 

මාෆියා සංවිධානයක ශරීරයෙන් කුඩා සහ ඝන කාචවලින් හෙබි උපැස් පැළඳි නීතිඥයා ඉටු කරන කාර්ය භාරය එනම් සංවිධාන ධුරාවලියෙහි ඉහළ ස්ථානයන්හි සිටින්නන් අතර බොහෝවිට ඇතිවන මත ගැටුම් සහ කලහකාරී අවස්ථාවන් සමනය කිරීමේ කාර්ය භාරය වෘක රැළෙහි ඉටු කරනුයේ විසිරකයා විසිනි.

උදාහරණයක් ලෙස වෘකයින් දෙදෙනෙකු පොර වැටෙද්දී විසිරකයා ඔවුන් මධ්‍යයට පනිමින් එහා මෙහා දුවමින් විසුළු සහගත රංගනයක් යෙදේ. කෝපයෙන් ගිණියම්ව සටනෙහි යෙදීමට සූදානම්ව එකිනෙකා වෙත දත් විළිස්සා සිටිනා පසමිතුරන්ගේ කෝපාග්නිය නිවීයාමට බොහෝවිට විසිරකයාගේ මේ උසුළු විසුළු හේතුවනු ඇත. අනතුරුව සටන් කාමීහු සටන අත්හැර සාමකාමීව විසිර යන්නාහ.

සත්‍ය වශයෙන්ම විසිරකයා වනාහී රැළෙහි සාම දූතයාය. විසිරකයකු නොමැතිව වෘක රැලකට පැවතිය නොහැක. ස්වභාවයෙන්ම රෞද්‍ර ගතිගුණ ඇති වෘකයෝ එවන් අවස්ථාවක නිරතුරුව එකිනෙකා කා කොටා ගැනීමෙන් කල් ගත කරනු ඇති බව නිසැකය.

මාෆියා සංවිධානයක ක්‍රියාකාරිත්වය පිළිබඳව ඔබට බොහෝ ගැටළු තිබිය හැක. බොහෝවිට ඔබ ඔවුන් දැඩිලෙස පිළිකුල් කරනවාද විය හැක. 

එහෙත් ඔබ එකහෙලා පිළිගතයුතු සත්‍යයක් ඇත. එනම් මාෆියා සංවිධානයක කාර්යක්ෂම ක්‍රියාකාරිත්වයට ඔවුන්ගේ මනා සංවිධාන ව්‍යුහය, සෑම සාමාජිකයෙක්ම ධුරාවලියෙහි තමනට හිමි ස්ථානය කිසිදු ප්‍රශ්න කිරීමකින් තොරව පිළිගැනීම මෙන්ම සෑම සාමාජිකයෙක්ම තමන්ට පැවරුණු කාර්ය භාරය තම ශක්ති මට්ටමේ පරිදි නොපිරිහෙලා ඉටු කිරීමද හේතුවේ. 

මාෆියා සංවිධානයක සාමාජිකයෝ තම සංවිධානයේ අභිවෘද්ධිය උදෙසා සහ එමෙන්ම තම සහෝදර සමාජිකයින් උදෙසා ජීවිතය පරිත්‍යාග කීරිමට හෝ මොහොතකුදු නොපැකිලෙන්නෝය.

වෘකයින් රැළක් මාෆියා සංවිධානයක් හා සමවීමට තවත් හේතුවක් ඇත. 

එනම් ඔවුන් දෙපාර්ශ්වයටම තම සංවිධානය හෝ රැළ ලොවෙහි අන් සියල්ලටම වඩා වැදගත් මෙන්ම උතුම් ද වන්නේය.

503. Abandon all hope ye who enter here - මෙහි ඇතුළු වන්නෝ සියළු අපේක්ෂාවන් අත්හැර ගතයුත්තෝය.

13 වන සියවසේ විසූ සුප්‍රසිද්ධ ඉතාලි ජාතික  කවියකු
වන ඩන්ටේ ඇලිගියරි විසින් රචිත Divine comedy
නම් කාව්‍යයෙහි නිරයට ඇතුළුවන ප්‍රධාන දොරටුව 
ඉහලින් මෙසේ සඳහන් වන බව කියවේ.

"Q & A" පොතේ පරිවර්තනයෙ දෙවෙනි කොටසක් ගැන මගෙ හිතේ ඇත්තටම තිබ්බෙ නෑ. 

ඒත් එක්කම අපේ නිර්මාණි ගැන මගේ හිතේ තියෙන්නෙ ලොකු ගෞරවයක්. ඒ හින්දම නිර්මාණිගෙ බලවත් ඉල්ලීම කරන කොටගෙන සහ වෙනත් සහෘදයින් කීප දෙනෙකුගෙම ඉල්ලීම්ද සලකා බලා ඔන්න එහෙම එකකුත් කරන්ට වුනා.

****************************************

පළමු කොටස

පොලිස් පරීක්ෂක ගෝඩ්බෝලේ මැදිවියේ පසුවන්නෙකි. බැලූ බැල්මට ඔහු සතළිස් වියෙහි මැද භාගයේ පසුවන්නෙකැයි අනුමාන කල හැක. කෙස් වියැකෙමින් තිබූ ඔහුගේ හිස සහ ඝනව වැඩුණු උඩු රැවුලෙන් යුතු මහත්වූ මුහුණ නිරතුරු රත්පැහැයෙන් දිලුනේ කවුළු සියල්ල තර කොට වසා තිබූ හෙයින් සුළං රැල්ලකුදු හමා නොආ පොලිස් ස්ථානය තුලවූ දැඩි දාහය හේතුකොටගෙන විය යුතුය. තැනින් තැන පැලී කඩතොළුවූ පොලිස් ස්ථානයේ සිමෙන්ති පොළව මත ශබ්ද නැඟෙන ලෙස බරට පියවර තබා ඇවිදීමට ප්‍රියකල ගෝඩ්බෝලේ හැඳ හුන් කාකි කළිසමෙහි ඉණට ඉහළින් ඔහුගේ විශාල උදරය ඉදිරියට නෙරා එල්ලී තිබිණි.

"මේ කාලකන්නි මැස්සො…. මළ කරදරයක්නෙ මේක…. දෙයියන්ගෙ නාමෙට...." 

එසේ බිරුසන් දෙමින් ඔහු තම මහත් නාසය මත වසන්නට තැත් කල කළු පැහැති විශාල මැස්සෙකුට සුරතින් පහරක් එල්ල කලේය. නිරුපද්‍රිතව ඉගිල ගිය මැස්සා ගෝඩ්බෝලේගේ හිස වටා සරන්නට වූයේය.

ගෝඩ්බෝලේ අද කෙළසකවත් සුහද මනෝභාවයකින් (In a good mood) නොසිටින බව උදෑසන හිරු එළිය මෙන් සුපැහැදිලිය. ඔහුගෙ හිස වටා නිරතුරු සරන මැස්සෝ ඔහුට මහත් හිරිහැරයකි. එලෙසම පොලිස් ස්ථානය තුල පවතිනා අධික උණුසුම ඔහුට මහත් කරදරයකි. දහදිය බිඳු වැලක් ඔහුගේ හිස් මුදුනෙන් ඇරඹ මහත්ව එල්ලා වැටෙනා කොපුල් තල මතින් පහතට ගලා යන්නේය. ඔහු දැඩි නොඉවසිල්ලෙන් සුරත ඔසවා ඒ දහදිය කමිස අතෙන් පිස දමන්නේ "Bloody hell" යනුවෙන් තොල මතුරමිනි.

"ඔක්කොමත් හරි අයිසෙ තමුසෙගෙ නම තමයි වැඩේ..මොන ජාතියෙ නමක්ද ඕයි ඒක?" මැස්සන්ට සහ දහදියට වඩා ඔහුට මගේ නම හිරිහැරයක් වී ඇති සෙයකි. "රාම් මොහොමඩ් තෝමස්.....යකාගෙ නමක්නෙ ඕයි ඒක..මගෙ ජීවිතේට මම ඔහොම නමක් ඔය ඇහුවමයි. ඉන්දියාවෙ තියෙන ඔක්කොම ආගම්වලට සම්බන්ධ නම් අයිසෙ ඒ නමේ තියනවනෙ. එකත් එකටම තමුසෙගෙ අම්මට හරියටම ෂුවර් නැතිවෙන්ට ඇති තමුසෙගෙ තාත්ත කවුද කියල..හහ්,හහ්.හා..." යලිත් දෙකන්සෙන් ගලන දහදිය පිසිමින් ගෝඩ්බෝලේ මහහඬින් සිනාසුණේය.

මම ඒ අපහාසය නෑසුනාක්මෙන් නිහඬව පසුවීමට තීරණය කලෙමි. මගේ නම පිළිබඳව මීට වඩා දරුණු අපහාසයන්ට මම කුඩා කල පටන්ම මුහුණදී ඇත්තෙමි.

පොලිස් ස්ථානයේ චෝදනාගාරයේ දොරටුව දෙපස මුර කාවලෙහි නියුතු පොලිස් භටයින් දෙදෙන නහයට කෙලින් ඉදිරිය බලාගත්වනම සීරුවෙන් පසුවන්නේ පිළිම පරිද්දෙනි. චෝදනාගාරය තුල යම් උසස් නිලධාරියෙකු හිඳින බවට ඒ නිසැක සාක්ෂියකි. හෝරා දෙකකට පමණ පෙර ඔවුන් මගේ සිරකුටිය ඉදිරිපිට බුලත්විට සපමින් අසභ්‍ය විහිළු පවසමින් මහ හඬින් සිනාසෙමින් නිවී සැනසිල්ලේ පසුවූවෝ වෙති. ඔවුන් පසුවන අපහසු ඉරියව්ව දුටු මගේ මුවඟට යම්තමට සිනහවක් නැඟිනි. ඒ දුටු එක් පොලිස් භටයෙක් මුහුණේ ඉරියව්ව වෙනස් නොකොට ඔහුට හැකි අයුරු මදෙස රවා බැලීය.

චෝදනාගාරයෙහි දොර ඉහලින් හින්දි මරාති සහ ඉංගිරිසි යන භාෂා ත්‍රිත්වයෙන්ම චෝදනාගාරය යනුවෙන් ලොකු අකුරින් ලියූ නාම පුවරුවක් එල්ලා ඇත. ඒ දුටු වහාම මගේ මතකයට පැමිණියේ මා කුඩාකල හැදී වැඩුනු කතෝලික දේවස්ථානයෙහි ප්‍රධාන පියතුමා එකල මට ඉගැන්වූවකි. එනම් නිරයේ ප්‍රධාන දොරටුව ඉහලින් ශෛලමය පුවරුවක කොටා ඇතැයි සැලකෙන වාක්‍යයකි. "Abandon all hope ye who enter here" එනම් "මෙහි ඇතුළු වන්නෝ සියළු අපේක්ෂාවන් අත්හැර ගතයුත්තෝය" යන්නයි.

චෝදනාගාරයෙහි දොර විවරකල ගෝඩ්බෝලේ මා එතුලට තල්ලු කලේය. එතුල එක් බිත්තියක සවිකල වර්තමාන වසරෙහි මුම්බායි නාගරික බල ප්‍රදේශය තුල සිදුවූ ඝාතන, පැහැරගෙන යෑම්, ආයුධ සන්නද්ධ මංකොල්ලකෑම් වැනි භයානක ලෙස වර්ගීකරණය කොට ඇති අපරාධ පිළිබඳ සවිස්තරව සඳ හන් විශාල ප්‍රස්ථාරයක් ඉදිරියේ සිටගෙන සිටිනා පුද්ගලයින් දෙදෙනෙකි. මම එක්වනම ඉන් එක් පුද්ගලයෙක් හඳුනා ගතිමි. ඔහු ඒ තීරණාත්මක දිනයෙහි එනම් මා ඉදිරිපත්වූ ප්‍රශ්න විචාරාත්මක වැඩ සටහන රූපගතකල දිනයේ එහි එනම් ඒ රූපගත කිරීම සිදුවූ මැදිරිය තුල අසුන්ගෙන සිටියේය. ගැහැණියක නැතහොත් රොක් ගායකයකු විලස දිගැති කෙසින් යුතු ඔහු හෙඩ්ෆෝනයක ආධාරයෙන් ප්‍රශ්ණ විචාරාත්මක තරඟය මෙහෙයවූ පුද්ගලයාහට නිරතුරු උපදෙස් දුන් බවද මට රහසක් නොවීය.

ඔහු සමඟ හුන් අනෙකා මම නොදත්තෙමි.සම්පූර්ණයෙන් මුඩුකල හිසකින් යුතුවූ ඔහු සුද්දෙකි. හෙතෙම නීලලෝහිත පැහැ (Mauve colored) කෝට් එකකින් සහ රඹපැහැ (Orange colored) ටයි පටියකින් සැරසී හුන්නේය. දාස්දෙන මෙවන් උණුසුම් කාලගුණයක ටයි පලඳින්නේ සහ කෝට් අඳින්නේ සුද්දන්ම පමණි. එසේ ඕනෑම කාළගුණයක නොවරදවා ටයි කෝට් පළඳින්නකු මගේ මතකයට පැමිණියේ නිරායාසයෙනි. කලක් මා සේවය කල ඕස්ට්‍රේලියානුවකු වූ කර්නල් ටේලර් මහතා ද එවැන්නෙකි.

දුහුවිලි බැඳුණු සිවිලිම් පංකාව උපරිම වේගයෙන් ක්‍රියාකරන්නේ වී නමුදු කිසිදු කවුළුවකින් තොරවූ චෝදනාගාරයෙහි තුල රජයන දැඩි උෂ්ණත්වය මඳකින් හෝ සමනය කිරීමට ඒ සමත්වූයේ නොවේ. බොහෝ කලකට ඉහත සුණු පිරියම් කලේයයි සිතිය හැකි කිලිටි බිත්තිවලින් නිකුත්වන හුස්ම සිරකරවන සුළු දාහය පිටත යා නොහී සතර දෙසින්ම වැසුණු කුඩා කුටිය තුලවී සිරවී කරකැවෙන්නේ මුළු සිරුරම ගිණියම් කරවමිනි.

කුටිය තුල වූයේ මළකෑ කුඩා යකඩ මේසයක් සහ ඒ වටා අපිළිවෙලට තැබුණු යකඩින්ම තැනුනු පුටු තුනක් පමණකි. මේසයට හරියටම ඉහලින් කුටිය හරි මැදින් ඒ හරහා දිවෙනා දැවමුවා බාල්කයකින් එල්ලුනු ඇළුමිනියම් ආවරණයකින් යුතු විදුලි බුබුලක් විය.

මාද කැඳවාගෙන ඔවුන් අසලට ගිය ගෝඩ්බෝලේ සුද්දාහට මා හඳුන්වා දුන්නේ තම සුරතල් සිංහ පෝතකයා නරඹන්නන්ට හඳුන්වා දෙන සර්කස් හිමි කරුවකු විලසිනි.

"සර් මේ තමයි රාම් මොහොමඩ් තෝමස්"

සුද්දා කලිසම් සාක්කුවකින් ඉවතට ගත් ලේන්සුවකින් නළලේ දහදිය පිසින අතර මදෙස හෙලූයේ ඔහුගේ විසිත්ත කාමරයේ දිලිසෙන පොළව මත හිඳ අහම්බෙන් නෙත ගැටුනු හැකරැල්ලකු දෙස හෙලන අයුරු නොපහන් බැල්මකි.

"හා...හා..හා..මෙයා තමයි එතකොට අපේ මේ සුප්‍රසිද්ධ කෝටිපතියා..මම අහපු විදිහට නම් බලාපොරොත්තු වුනේ මීට වඩා ලාබාල කොලුවෙක්"

මම නළල රැලිකොටගත් වනම ඔහුගේ වචන උච්ඡාරණයෙන් ඔහු කුමන ජාතිකයෙක්දැයි නිර්ණය කොටගැන්මට උත්සාහ කළෙමි. අග්‍රාහි ටජ්මහල් මාළිගයෙහි සංචාරක මඟ පෙන්වන්නකු ලෙස කටයුතු කල කාලසීමාව තුල මම සංචාරකයින්ගේ වචන උච්ඡාරණයෙන් ඔවුන් කුමන රටක වැසියන්දැයි නිවැරදිව නිගමනය කිරීමට උගත්තෙමි. සාර්ථක මඟ පෙනවන්න්කු වීමට එමෙන්ම වැඩි මුදලක් උපයාගැන්මට එවන් හැකියාවක් අත්‍යාවශ්‍යය.

සුද්දාගේ නහයෙන් නිකුත්වන උච්ඡාරණය අනුව ඔහු අමරිකානුවකු බව මම තීරණය කලෙමි. බෝල්ටිමෝර් සහ බොස්ටන් වැනි අමරිකානු නගරවාසීන් ටජ්මහල් නැරඹීමට පැමිණ මා හා දොඩමළුවූයේද මෙවන් නාසික උච්ඡාරණයකිනි. මේසය වටා වූ පුටු තුනෙන් එකක් තමා වෙතට ඇදගත් සුද්දා එහි අසුන් ගත්තේ කකුලක් පිට කකුලක් දමා ගනිමිනි. ඇස් කෙවෙණි තුල ගැඹුරින් පිහිටි නිල් පැහැති ඇස් යුවලකින් සහ ලා රත් පැහැති විශාල නාසයකින් යුතු ඔහුගේ මුහුණෙහි තැනින් තැන නිල් පැහැ කුඩා ලේ නහර මතුව ඇත්තේ දිරාගිය පත්‍රයක නාරටි ලෙසිනි.

"හෙලෝ…." සුද්දා කෙලින්ම මගේ මුහුණ දෙස බලා මා ඇමතීය. "මගේ නම නීල් ජොන්සන්. මම තමයි නිව් ඒජ් ටෙලිමීඩියා ආයතනයෙ නියෝජිතය. නිව් ඒජ් ටෙලිමීඩියා ආයතනය තමයි මේ ප්‍රශ්ණ විචාරාත්මක තරඟය සංවිධානය කලේ. මේ තමයි බිලී නන්ද. ඒ වැඩ සටහනේ නිෂ්පාදකයා"

මම නිහඬවම පසුවූයෙමි. ඔබගේ විසිත්ත කාමරයේ ගෙබිම මත හදිසියේ හමුවන හැකරැල්ලෝ කථා නොකරන්නෝය. විශේෂයෙන්ම ඉංගිරිසියෙන් කථා නොකරන්නෝය.

මද වේලාවක් මදෙස බලාසිටි සුද්දා නන්ද දෙසට හැරුනේය. "මේ මනුස්සයට ඉංග්‍රීසි තේරෙනව නේද නන්ද?" 

"ඔහෙට පිස්සුද හැබෑටම නීල්? මොනවද මේ අහන විකාර? මේ මිනිහ ඔය කොහෙද අහු මුල්ලක තියෙන රෙස්ටුරන්ට් එකක වේටර් කෙනෙක්. ඉතිං එහෙම කෙනෙක් ඉංග්‍රීසි දන්නවයි කියල හිතන්නෙ කොහොමද?"

පොලිස් ස්ථානය වෙත වේගයෙන් ලඟාවන සයිරනයක හඬින් අපගේ අවධානය බිඳ වැටිනි. ඒ සමඟම දොර විවරකොටගෙන පැමිණි පොලිස් භටයෙක් ගෝඩ්බෝලේගේ කණට කොඳුරා යමක් පවසා එසැණින් යලි පිටව ගියේය. ඒ පසුපස ඉක්මන් ගමනින් කුටියෙන් නික්ම ගිය ගෝඩ්බෝලේ යලි පැමිණියේ උසස් පොලිස් නිලධාරියකුගේ නිල ඇඳුමින් සැරසුනු නූස් සහ එමෙන්ම ඉතා ස්ථුල තැනැත්තකු කැටුවය.

ජොන්සන් වෙතට ගොස් තම කහපැහැ දසන් පෙන්වමින් සිනාසුනු ගෝඩ්බෝලේ අමුත්තා හඳුන්වා දුන්නේය. "මිස්ටර් ජොන්සන්... මේ අපේ පොලිස් කොමසාරිස් මහත්මයා"

හිඳ හුන් අසුන පසුපසට කරමින් ජොන්සන් නැඟී සිටියේය. "ආපු එකට බොහොම ස්තූතියි කොමසාරිස් මහත්මයා. මම හිතන්නෙ ඔබ මේ බිලීව නම් දැනටම දන්නවා" කොමසාරිස්තුමාට අසුනක් දක්වමින් ජොන්සන් නැවත හිඳගත්තේය.

"ඔව්.." කොමසාරිස්තුමා හිස සොලවා එකඟ වෙමින් පැවසීය. "ස්වදේශීය කටයුතු බාර ඇමතිතුමා මට ටෙලිෆෝන් කරල විස්තරේ කියපු ගමන්ම තමයි මම මේ ආවෙ"

"ආ..හරි හරි අපේ ලොක්ක මිස්ටර් මිකයිලෝව්ගෙ බොහොම පරණ යාලුවෙක් ඇමති තුමා"

"ඉතිං මහත්වරුනි….. මගෙන් මොනවද ඔහෙලට කෙරෙන්න ඕන?"

"කොමසාරිස්තුමා මට ඔබගේ උදව් ඕන W3B සම්බන්ධව"

"W3B?...ඈ????.... ඒ මොකක්ද ඒ?"

"W3B කියන්නෙ කොමසාරිස් තුමා Who will win a Billion කියන එක කෙටියෙන්. වෙන විදිහකට කිව්වොත් ඒ වාක්‍යයෙ මුල් අකුරු"

"හරි හරි ඒක හරිය කියමුකො…. ඉතිං මොකක්ද ඔය W3B කියල කියන්නෙ? අන්න ඒක කියල ඉමු ඉස්සෙල්ලම...."

"මේක මේ ටෙලිවිෂන් ප්‍රශ්න විචාරාත්මක තරඟයක්. අපි මේ වැඩ සටහන පටන් ගත්තෙ මාස කීපෙකට ඉස්සෙල්ල. අපේ ආයතනය දැනට රටවල් තිස්පහක මේ වැඩ සටහන ක්‍රියාත්මක කරනව. ඔබතුමා දැක්කෙ නැද්ද අපි මුලු මුම්බායි නගරය පුරාම මේ ප්‍රෝග්‍රම් එක පටන් ගන්න ඉස්සෙල්ල මේ ගැන ප්‍රචාරය කරල බිල් බෝඩ්ස් ගැහුවනෙ"

"ම්ම්..එහෙම ගැහුවනම් මට ඒ හැම එකක්ම මිස් වෙලා වගේ. කොටින්ම මම මේ ඔහොම එකක් ගැන ඇහුවමයි. හරි ඒක ඕන නෑ. ඇයි ඉතිං ඔය බිලියනයක්ම තෑගි දෙන්නෙ?"

"කොමසාරිස්තුමා ඔබ "Who wants to be a millionaire" ප්‍රෝග්‍රම් එක බැලුවද? "

"අපොයි ඔව්.." කොමසාරිස්තුමා මහ හඬින් සිනාසුණේය. "කවුන් බනේගා ක්‍රෝර්පති. හප්පච්චියේ ඒ ප්‍රෝග්‍රම් එක මේ ඉන්දියාව පුරාම මහ පිස්සුවක් වගේ උනානෙ. කිව්වම මොකද අපේ ගෙදර ඔය ප්‍රෝග්‍රම් එක ටීවී එකේ ප්‍රචාරය වෙන වෙලාවට මීයට පිම්බවගේ. ගෙදර බඩු මුට්ටු ඔක්කොම උස්සගෙන ගියත් කවුරුවත් දන්නෙ නෑ. මම හිතන්නෙ මම පොලිස් කොමසාරිස් හින්දම බඩු මුට්ටු බේරුනා මිසක.. " කොමසාරිස් තුමා යලිත් මහ හඬින් සිනාසුනේය.

"ඉතිං මට කියන්න ඇයි ඔබ තුමා හෝ ඔබතුමාගෙ පවුලෙ කට්ටිය ඒ ප්‍රෝග්‍රම් එක ඔච්චර ආසාවෙන් බැලුවෙ?"

"වෙන මොකක් හින්දද? ඒ ප්‍රෝග්‍රම් එක එච්චරම ඉන්ටරෙස්ටිං හින්ද"

"හරි එහෙනං මට කියන්න. අන්තිම තෑග්ග මිලියනයක් වෙනුවට දහදාහක් වගෙ උනානං ඔය ප්‍රෝග්‍රම් එක ඔච්චරම ඉන්ටරෙස්ටිං වෙයිද?"

"ම්ම්ම්ම්..නෑ මම හිතන්නෙ…"

"අන්න හරි ...ඔබතුමා දන්නවද මේ ලෝකෙ මිනිස්සු වැඩිපුරම කිතිකවන දේ එහෙමත් නැත්නම් මිනිස්සුන්ගෙ ලොකුම ඔබ්සෙෂන් එක මොකක්ද කියල. ඒ වෙන මොකවත් නෙවෙයි සල්ලි. හුඟ දෙනෙක් හිතාගෙන ඉන්නව ඒ සෙක්ස් කියල. නෑ ඇත්තම කිව්වොත් සල්ලි...ඉතිං ලැබෙන අවසාන ත්‍යාග මුදල ලොකු වෙන්න වෙන්න ප්‍රේක්ෂකයින්ගෙ පිස්සුව වැඩිවෙනව. ඔබ්සෙෂන් එක තවත් විශාල වෙනව"

"හරි හරි මට තේරුණා. ඉතිං කවුද ඔයාලගෙ ඔය ප්‍රෝග්‍රම් එක මෙහෙයවන්නෙ? මම කිව්වෙ මේ ප්‍රශ්ණ අහන්නෙ?"

"අපි ඒකට ගත්තෙ ප්‍රේම් කුමාර්.."

"කවුරු? ප්‍රේම් කුමාර්? අර දෙකයි පණහෙ චිත්‍රපටිවල රඟපාන නළුව? මම නම් කොහොමට වත් හිතන්නෙ නෑ ඒ මනුස්සය හරි යයි කියල...අනික කලින් අර ක්‍රෝර්පති ප්‍රෝග්‍රම් එක කලේ අමිතාබ් භච්චන් නේද? මේ යකා අමිතාබ්ගෙ අහලකින් වත් තියන්න පුලුවන්ද?"

"හරි හරි ඒ ගැන ඔබතුමා හිත අමාරුකර ගන්න එපා. ප්‍රේම් කුමාර් බොහොම අපූරුවට වැඩේ කරයි. අනික අපිට මිනිහව ගන්නම උනා. නිව් ඒජ් ටෙලිමීඩියා එකේ ඉන්ඩියන් හවුල් කම්පනි එකේ කොටස් සීයට විසිනමයක් තියෙන්නෙ එයාට…"

"හරි හරි මට තේරෙනව වැඩේ වෙන විදිහ...හෙහ්,හෙහ්....හරි දැන් එහෙනං මට කියන්න.කොහොමද මේ අපේ ....මොකක්ද මිනිහගෙ නම? ආ..රාම් මොහොමඩ් තෝමස් ...කොහොමද මිනිහ මේකට සම්බන්ධ වෙන්නෙ?"

"පහුගිය සුමානෙ අපි පටිගත කලා අපේ පහළොස්වෙනි ප්‍රෝග්‍රම් එක. ඒකෙ එක තරඟකාරයෙක් මේ රාම් මොහොමඩ් තෝමස්.."

"ඉතිං?"

"ඉතිං කියන්නෙ කොමසාරිස් තුමා මීට කලිං කවදාවත් නොවිච්ච දෙයක් එදා වුනා"

"ඒ මොකක්ද?" කොමසාරිස් තුමාගේ දෑස් විසල් විය.

"ඒ මොකක්ද කියන්නෙ මේ මනුස්සය ප්‍රශ්න දොළහටම හරියටම උත්තර දීල රුපියල් බිලියනයක් දිනාගත්ත"

"මොකක්?..." කොමසාරිස් තුමා හිඳහුන් අසුනින් උඩ පැන නැඟිට්ටේය. "ඔහෙල මට විහිළු කරනවද?"

"විහිළුවක් නෙවෙයි කොමසාරිස් තුමා. මේ සම්පූර්ණ ඇත්ත මම කියන්නෙ. අපිත් ඔබතුමා වගේම පුදුමවුනා. මේ මෙතන ඉන්න කොළුවා ලෝක ඉතිහාසෙ ලොකුම තෑගි මුදල දිනාගත්ත. මේ වැඩසටහන තවම අපි ප්‍රචාරය කලේ නෑ. ඒ හින්ද වැඩි දෙනෙක් ඒ ගැන දන්නෙ නෑ. ඒත් ඒක තමයි ඇත්ත"

"හරි ඉතිං මොකක්ද ප්‍රශ්නෙ? ඔහේලම කියනවනම් ඔහේලම පිළිගන්නවනම් මේ යස්සය රුපියල් බිලියනයක් දිනුව කියල ඔහෙල අදහන දෙයියන්ගෙ නාමෙට ඒ ගාන ඒ මනුස්සයට දීල දානව. එච්චරයිනෙ වෙන්ට ඕන. එතකොට වැඩේ අහවරයිනෙ"

ජොන්සන් මද වේලාවක් කොමසාරිස් දෙස එක එල්ලේ බලා සිටියේය. ඉක්බිති ඔහු කථා කලේ පහත් හඬකිනි. 

"කොමසාරිස් තුමා....මේ....බිලීටයි මටයි ඔබතුමා එක්ක පෞද්ගලිකව පොඩ්ඩක් කතා කරන්න පුලුවන්ද?"

501. How Many Zeroes Are There In A Billion? Someone Please Tell Me Quickly Because I Have Just Won A Billion Rupees....

Slumdog Millionaire චිත්‍රපටයේ රඟන
දේව් පටේල් සහ අනිල් කපූර්

ඔවුහු මා අත් අඩංගුවට ගත්හ. සමාවන්න පළමුව ඔවුහු යනු කවරහුද යන්න මවිසින් පැහැදිලි කල යුතුය. ඔවුහු යනු පොලිස් නිලධාරීහුය.

වඩාත් පැහැදිලිව පැවසුවහොත් වංචා විමර්ශන ඒකකයේ පොලිස් නිලධාරීහුය. ඔවුහු මා අත් අඩංගුවට ගත් හේතුව ඇසුවහොත් ඔබ විශ්මයට පත්වනු නිසැකය. ඔවුහු මා අත් අඩංගුවට ගත්තේ සාමාන්‍ය දැනුම ප්‍රශ්ණ විචාරාත්මක තරඟයකට ඉදිරිපත්වීම හේතුකොටගෙනය. නැත. එසේ පැවසීම නිවැරදිම නොවේ. මම එම ප්‍රශ්ණ විචාරාත්මක තරඟයට ඉදිරිපත්වූ බව සැබවි. එහෙත් ඔවුන් මා අත් අඩංගුවට ගත්තේ හුදෙක් එසේ ඉදිරිපත් වීම නිසාම නොවේ. ඉදිරිපත්ව සියළුම ප්‍රශ්ණ වලට නිවැරදි පිළිතුරු සැපයීම හේතු කොටගෙනය. 

තව දුරටත් පැහැදිලි කලහොත් එසේ කොට සියළුම ප්‍රශ්ණ වලට නිවැරදි පිළිතුරු සපයන්නට සමත්වන ජයග්‍රාහකයාට හෝ ජයග්‍රාහිකාවට ප්‍රදානය කරන බවට එහි සංවිධායකයින් සපථ කල මහා ත්‍යාගයට හිමිකම් පෑම හේතු කොටගෙනය. එම පොරොන්දු ප්‍රකාර මහා ත්‍යාග මුදල කොපමණදැයි ඇසුවහොත් එසේ සංවිධායකයින් පොරොන්දු ත්‍යාගය ප්‍රදානය කිරීම පසෙක තබා මා අත් අඩංගුවට ගැනීමට පොලීසිය හා එක්ව කුමන්ත්‍රණය කිරීම පිළිබඳව ඔබ කිසිසේත්ම විශ්මයට පත් නොවනු ඇත.

එසේය මා පිය සහෘදය, ඒ මවිසින් ජයග්‍රහණය කල ත්‍යාග මුදල රුපියල් කෝටි සියයකි. නැතහොත් ඔබ සැමට සුපුරුදු වදනින් පැවසුවහොත් රුපියල් බිලියනයකි.

පොලිස් නිලධාරීහු මා අත් අඩංගුවට ගැනීමට පැමිණියේ මධ්‍යම රාත්‍රියද පසුව අවම වශයෙන් හෝරා දෙකක් තුනක් හෝ ඉක්ම ගිය පසුවය. ඒ වනාහී මගේ ලෑලි ගැසූ කුඩා කුටිය එළිපත්තේ කෙළිදෙලෙන් පසුවන අයාලේ යන සුනඛයින් පවා සුපුරුදු ලෙස අළුයම් යාමයෙහි කොහේ හෝ අතුරුදන් වූ ඉක්බිතිය. එබැවින් පොලීසිය මා සොයා පැමිණෙන කල්හි මා වෙනුවෙන් හඬ නැඟීමට මා වෙනුවෙන් විරෝධය පාන්නට අවම වශයෙන් සුනඛයෙක් හෝ මගේ ලෑලි ගැසූ කුඩා කුටිය අවට නොවීය.

ඔවුහු පළමුව පා පහර දී මගේ කුටියේ ලෑලි දොර බිම දැමූහ. ඇත්ත වශයෙන්ම එසේ බලහත්කාරකම් කිරීමට කිසිදු අවශ්‍යතාවයක් නොවීය. ඔවුහු දොරට තට්ටු කොට කථා කලේවී නම මම කිසිදු විරෝධයකින් තොරව පිටතට පැමිණෙන්නෙමි. එලෙසම ඔවුනට මා අත් අඩංගුවට ගැන්මට අවශ්‍ය බව පැවසූයේ නම් මම වදනකින් හෝ එරෙහි වීමට උත්සාහ නොකොට ඔවුන් සමඟ පොලීසිය වෙත යන්නට තීරණය කොට සිටියෙමි. ඇත්ත වශයෙන්ම මම ඔවුන් අපේක්ෂාවෙන් පසුවුණෙමි.

එහෙත් පොලිස් නිලධාරීන් ක්‍රියාකරන අන්දම ඔවුන්ටම ආවේණික ක්‍රමවේදයකි. හැකි සෑම අවස්ථාවකදීම තම බල පරාක්‍රමය ප්‍රදර්ශනය කිරීම ඔවුන්ට බලවත් ප්‍රීතියක් ගෙන දෙන්නක් බව මම පළමෝත අත්දැකීමෙන් දනිමි.

එසේ හෙයින් ඔවුහු පළමුව මගේ කුටියේ ලෑලි දොර පාපහර දී බිම හෙලූහ. දෙවනුව මගේ දෑතට විලංගුලා, වහලය මත කරකැවෙමින් දිදුලන රක්ත වර්ණ ආලෝකයෙන් හාත්පස ඒකාලෝක කරමින් ගෙමිදුල මධ්‍යයේ නතරකොට තිබූ ජීප් රිය වෙත මා රැගෙන ගියෝහ. මගේ කුටිය අවට ඇසට අසුවන මානය තෙක් පැතිරගිය නානාවිධ ද්‍රව්‍ය වලින් නිමැවුනු පැල්පත් සමූහයෙහි ඒ වනවිටත් නිදි නොමැතිව සහස් සංඛ්‍යාත මිනිසුන් සමූහයක් වූ බවට මම කිසිදු සැකයකින් තොරව දැනහුන් නමුදු ඒ කිසිවකු අවම වශයෙන් මා වෙනුවෙන් වදනකිනුදු  විරෝධයක් නොපෑහ.

මගේ අසල්වාසින් කිසිවකු මා වෙනුවෙන් එසේ ඉදිරිපත් නොවී තම නිවෙස් තුලම හිඳ අඳ ගොළු බිහිරන්සේ මුනිවත රැකියද ඔවුන් නරුමයින් ලෙස හැඳින්වීමට යුහුසුළු නොවන ලෙස මම ඔබගෙන් කාරුණිකව ඉල්ලා සිටින්නෙමි මා දයාබර පාඨකය. පොලිස් නිලධාරීන් රක්ත වර්ණ ආලෝකයෙන් දිදුලන ජීප්රියාරූඪව පැමිණ කිසිවකු හෝ අත්අඩංගුවට ගෙන රැගෙන යාම අප වසන ධරාවි පෙදෙසේ ඉතා සුලභ සංසිද්ධියකි.

එලෙසම පොලිස් නිලධාරීන් විසින් අත්අඩංගුවට ගන්නෙකු වෙනුවෙන් විරෝධය පෑම සපුරාම නිශ්ඵල ක්‍රියාවක් බව මගේ අසල්වාසීහු අත්දැකීමෙන්ම දනිති. ඊට අමතරව එසේ විරෝධය පෑම බොහෝවිට අත්අඩංගුවට පත්වන්නාගේ තත්වය තව දුරටත් අනතුරුදායක කරවීමටද හේතුවිය හැක. එසේ හෙයින් එදින පොලිස් නිලධාරීහු පැමිණ මා විලංගු ලා රැගෙන යද්දී ඒ පිළිබඳව තමනට හැකි පමණ හෝ විරෝධය පෑවේ මගේ කුටිය අසල වූ ඉපැරණි සියඹලා ගසෙහි මට මතක ඇති කාලයේ පටන් පදිංචිව හුන් මහළු බස්සා පමණි.

යථාර්තය එසේ වුවද පොලිස් නිලධාරීන් මා අත් අඩංගුවට පැමිණි කල්හි මගේ නිර්දෝෂිත්වය ඔවුනට හැඟවීමට යම් ක්‍රියාමාර්ගයක් මවිසින් ගත යුතු විනිදැයි මම බොහෝ විට කල්පනා කරමි. විරෝධය පෑම පසෙක තිබියේවා මා අත් අඩංගුවට ගැනීමට හේතුව පිළිබඳව හෝ ඔවුන්ගෙන් විමසීමක් කල බවක් මගේ මතකයෙහි නොමැත.

බොහෝවිට අප වැන්නවුන් එසේ නිහඬවම පොලීසියට එසේත් නැතහොත් නීතියට අවනත වන්නේ යම් ප්‍රබල හේතුවක් නිසා විය යුතුය. එසේය. මම ඒ පිළිබඳව බොහෝ ගැඹුරින් කල්පනා කොට ඇත්තෙමි. මේ මිහිකත මත ඔබගේ පැවැත්ම පවා නීති විරෝධී වන්නේනම් ඔබට සිදුවන්නාවූ යම් අසාධාරණයක් පිළිබඳව ප්‍රශ්න කිරීමට හා/හෝ  ඊට ඔබගේ විරෝධය ප්‍රකාශ කිරීමට ඔබට හිමිකමක්, අයිතියක් හෝ බලයක් ඇත්ද?

ඔබ ආසියාවේ විශාලතම නාගරික මුඩුක්කුවෙහි දිවිගෙවන, රාත්‍රියෙහි නිදාගැන්මට පමණක් භාවිතා කරන නිවස යයි හඳුන්වන අල්ලක් වන් වපසරියට පවා කිසිදු රජය පිළිගන්නා නීත්‍යානුකූල  හිමිකමක් නොමැති, මතකයෙහි ඇති කලෙක පටන් දරිද්‍රතාවයෙහි පත්ලෙහි ගැලී අනන්තවූ දුක්ඛ දෝමනස්සයන් විඳිමින් එයින්ම පත්තියම්වූ මිනිස් සත්වයකු වන කල්හි ඔබගේ අයිතිවාසිකම් සහ හිමිකම් පිළිබඳව කථා කිරීමට ඔබට ධෛර්යයක් උපදින්නේ කෙලෙසද?

එළෙසම මේ දුර්භාග්‍යය මවෙත කැඳවා ගන්නා ලද්දේ මවිසින්ම බවට අදහනා වැඳ නමස්කාර කරනා සියළු දෙවි දේවතාවන්ගේ නාමයෙන් දිවුරා පැවසීමට සූදානම් මගේ මිතුරන් සහ අසල් වාසීන් ඔබට අවශ්‍යනම් සහස් සංඛ්‍යාතව සොයාගත හැකිවනු ඇත.

"ඔය මිනිහට අපි අනන්ත කිව්ව. ඔය කෙහෙල්මල් ප්‍රශ්න අහන තරඟෙට යන්ට දඟලනකොටම අපි කටේ කෙල හිඳෙනකල් කිව්ව. කෝ ඇහුවද? ඔය කර ගත්තෙ ගිහිල්ල..ඕක තමයි අපි කිව්වෙ එදා ඉඳලම………"

මගේ වියපත් අසල් වැසියෝ තම පැසුණු හිස් ඉහළට සහ පහළට සෙමෙන් සොළවමින් ඔවුනට සවන් දීමට සූදානම් ඕනෑම පුද්ගලයකු හා කිසිදු සැකයකින් තොර ස්වරයකින් පවසනු ඇත.

ඔවුන්ගේ වැටහීම අනුව මවිසින් කිසිදා සමාව නොලැබෙනා වරදක් කොට ඇත. එනම් ධරාවී වාසී තුන්වන පන්තියේ පුරවැසියකු කිසිදා අතික්‍රමණය කල නොයුතු ශුද්ධ වූ තහනම් රේඛාවකින් එපිටට මා පය තබා ඇත.

මුම්බායි තදාසන්න මත්පැන් අලවිහලක වේටර්වරයකු වූ මට මුළු මහත් ඉන්දියාව පුරා විකාශය වන රූපවාහිනී ප්‍රශ්ණ විචාරාත්මක තරඟයකට ඉදිරිපත්වීමට පමණ ධෛර්යයක් ලැබුනේ කෙලෙසකද? එලෙස ධෛර්යක් තිබියේවී නමුදු එවන් කාර්යයකට නිර්භයව ඉදිරිපත්වීමට පමණ ඔහුට ඒ පිළිබඳව ඇති දැනුම කවරේද? 

"මොන පිස්සුද මේ මනුස්සය ජීවිතේට ඉස්කෝලෙකට ගිහිල්ල නෑ. පොතක් කියවන්න දන්නෙ නෑ. අඩුම ගානෙ පත්තරයක්වත් නොකියවන මනුස්සයෙකුට පුලුවන්ද ඔය වගෙ තරඟෙකට ගිහිල්ල අඩුම ගානෙ ප්‍රශ්ණ දෙකකටවත් උත්තර දෙන්න? මොන විකාරද?"

මා ඉදිරිපිට නොවූවද මගේ ආපන ශාලාවේ මා හා එකම රැකියාවෙහි යෙදෙන මගේ සගයින් එකිනෙකා හමුවූ කල්හි එලෙස මා පිළිබඳව පවසන බව මම දැන සිටියෙමි. ඔවුන්ගේ වැටහීම අනුව වේටර්වරුන් අත් පා සතර පමණක් භාවිතා කල යුතුය. හිස් කබල තුල පිහිටි මොළය නම්වූ අවයවය භාවිතා කිරීම ඔවුනට සපුරා තහනම්ය.

ආපන ශාලාවේ මගේ සගයින් කිසිවකු මා මුහුණ දුන් ප්‍රශ්ණ විචාරාත්මක තරඟය නරඹන්නට නොපැමිණීම ඇත්තෙන්ම අභාග්‍යයකි. මවිසින් සියළු ප්‍රශ්නයන්ට පිළිතුරු දුන් ආකාරය දුටුවේනම් ඔවුන් දැඩි විශ්මයට පත්වනු නිසැකය. සත්‍ය වශයෙන්ම එදින මගේ පිළිතුරු දීම වඩාත් නිවැරදිව පවසන්නේනම් එදින මගේ අසාමාන්‍ය භාග්‍යය පිළිබඳව මමද තවමත් විශ්මයට පත්ව සිටින්නෙමි.

එම වැඩ සටහන විකාශය වන්නට නියමිතව ඇත්තේ ඉදිරි සතිය තුලදීය. වැඩ සටහන තවමත් විකාශය නොවූවද මවිසින් යම් සැළකියයුතු පමණ මුදලක් ජයග්‍රහණය කොට ඇති බව මා සේවය කරන මත්පැන් හලෙහි කණින් කොණින් පැතිර ගියේ විදුලි වේගයෙනි. මගෙන් ඒ පිළිබඳව විමසූ කිසිවකුහට මම එක එල්ලේ පිළිතුරක් නොදුන්නෙමි.

එහෙත් මගේ දෙකට දෙවාරමේ පිළිතුරු පිළිබඳව රහසේ රැස්ව සාකච්ඡා කල මගේ සගයින්ගේ ඒකමතික නිගමනය වූයේ මවිසින් යම් සැළකිය යුතු මුදලක් ජයග්‍රහණය කොට ඇති බවය. ඒ අනුව ඔවුහු දින තුනකට ප්‍රථම මා වෙනුවෙන් මගේ ජයග්‍රහණය සැමරීමේ සාදයක් සංවිධානය කළෝය. මත්පැන්හල රාත්‍රියේ වසා දැමුණු පසු ඇරඹි සාදය පසුදා හිරුනැඟෙන තෙක් පැවතිණි.අප සියල්ලන්ම සිතැඟි පරිදි රස මසවුලෙන් සන්තර්පනය වූයෙමු. මත්පැන් පානය කලෙමු. එකිනෙකා වැළඳගෙන නර්තනයෙහි යෙදුනෙමු.

අළුයම් කාලයේදී සිහිසුන්ව මේසයක්ද පෙරලාගෙන ඇදවැටීමට මොහොතකට පෙර අපගේ වයස්ගත ප්‍රධාන බාර්ටෙන්ඩර්වර්යා ඔහුගේ තරුණ දියණිය පිළිබඳව විවාහ යෝජනාවක් මවෙත ඉදිරිපත් කලේය. කිසිම විටෙක මුහුණෙහි සිනාවක් දැකිය නොහැකි අපගේ කළමණාකාරවරයා පවා එදින මා හා යන්තමට සිනාසුනේය. සාදය අතරමඟදී මා ඔහුගේ කාර්යාලයට කැඳවූ හෙතෙම පසුගිය මස හිඟ වැටුප් මුදල මා අත තැබීය. එලෙසම ඔහු එදින වෙනදාමෙන් "කාලකණ්නියා" හෝ "පිස්සු හුටං" යන වදනින් මා ආමන්ත්‍රණය නොකලේය.

එහෙත් මේ මොහොතේ ගෝඩ්බෝලේ ඊටත් වඩා බොහෝසේ අප්‍රසන්න නාමකරණයෙන් මා අමතමින් පසුවන්නේය. අඩි දහය x අඩි හයක ප්‍රමාණයේ කුටියක පොළව මත මම එරමිණිය ගොතාගත්වනම පසුවන්නෙමි. දැඩිසේ මළ බැඳුනු යකඩ දොරකින් සහ කුඩා කවුළුවකින් සමන්විත මේ කුඩා කුටිය තුල පවත්නා දැඩි උණුසුම කෙසේවත් ඉවසිය නොහැක. 

බොහෝවිට මේ කුටියේ පූර්ව වාසියාගේ පයට පොඩිවී ගියේ යයි විශ්වාසයෙන් යුතුව උපකල්පනය කල හැකි කහ පැහැ අඹ කැබැල්ලක් මා ඉදිරියේම ගල් අතුල කිලිටි පොළව මත දක්නට ඇත. ඒ වෙත ලඟාවූ අඳුරු රතු පැහැති විශාල කැරපොත්තෙක් ඒ මත නැඟී තටු විදහා පියාඹන්නටදෝ සූදානම් විය. මම ඇසි පිය නොහෙලා කැරපොත්තා දෙස බලා සිටියෙමි. අද අළුයම අත් අඩංගුවට පත්වූ මොහොතේ පටන් කිසිදු ආහාරයක් නොලැබුනු හෙයින් මගේ කුසෙහි සාගිනි හැඟීම් අවදිවන්නට පටන්ගෙන ඇත.

තව නොබෝ වේලාවකින් මා යලි ප්‍රශ්න කරනු පිණිස චෝදානාගාරය වෙත රැගෙන යන බව මට මීට අඩ හෝරාවකට පමණ ප්‍රථම දැනුම් දෙනු ලැබීය. තවත් හෝරාවකට පමණ පසු කිසිවකු සිර කුටිය වෙත ලඟාවන පියවර හඬින් මම දෑස් විවර කළෙමි. ඉන්ස්පෙක්ටර් ගෝඩ්බෝලේ සිර කුටිය ඉදිරිපිට මදෙස කෝපාවිෂ්ඨ දෙනෙතින් යුතුව බලා සිටියේය. 

ඔහු දෙස මොහොතක් බලා සිටි මම දෙනෙත් පහතට යොමුකොට තැලුනු අඹ කැබැල්ල දෙසට යොමු කලෙමි. රතු අඳුරු පැහැති කැරපොත්තා තවදුරටත් ඒ මත නොවීය. 

"හ්ම්ම්ම්..ඌ ගිහිල්ල යන්ට.." මම සෙමෙන් පැවසුවෙමි. 

"මොකක්ද කිව්වෙ?" ගෝඩ්බෝලේ  බිරුසන් දුන්නේය. 

මම මුවින් නොබැන පහතට හරවාගත් දෙනෙතින් යුතුව පසුවීමි.

"හ්ම්ම්ම්..එනව එළියට..අපිට තියෙන වැදගත් දෙයක් සාකච්චා කරන්ට...තමුසෙ මේ ගිය සුමානෙ ප්‍රශ්න දොළහකට හරියට උත්තර දුන්නලු නේ? හරි යමු මම පටන් ගන්නං දහතුන්වෙනි ප්‍රශ්නෙ ඉඳල... මම අහන ප්‍රශ්න වලටත් හරි උත්තර දුන්නොත් තමුසෙ ගොඩ ….."

ගෝඩ්බෝලේ එසේ පවසා මහ හඬින් සිනාසී සාක්කුවෙන් ගත් යතුරකින් අගුල විවෘත කොට සිර කුටියෙහි දොර විවර කලේය.

"Slumdog Millionaire"  චිත්‍රපටයට පාදකවූ
විකාස් ස්වරූප් ලියූ "Q & A " නම් නවකථාව

විකාස් ස්වරූප්

489. The Assault On Renfro Home - 2 - Operation Cover Up

An Ambulance  At A Crime Scene - Google Images

රෙන්ෆ්‍රෝ නිවසේ ඉදිරි දොරටුව වෙත සන්සුන්ව ගමන්කොට සීනුව නාදකොට මහළු යුවල අවදිකොට තමන් පොලිස් නිලධාරීන් බව හඳුන්වා දී තමන්ට අවශ්‍ය වන්නේ මත්ද්‍රව්‍ය ජාවාරමක් සම්බන්ධයෙන් රෙන්ෆ්‍රෝ යුවලගෙන් ප්‍රශ්ණ කිරීමට සහ ඉක්බිති නිවෙස සෝදිසි කිරීමට පමණක් බව ආචාරශීලීව පහදා දීම වෙනුවට SWAT කණ්ඩායම ක්ෂණිකව ආක්‍රමණය ඇරඹූයේ හොඳින් සම්බන්ධීකරණය කල මෙහෙයුමක් මඟින් එකම වේලාවට ඉදිරිපස සහ පසුපස දොරවල් බිඳ හෙලීමෙනි.

සියල්ල සිදුවී අවසාන වූ පසු පැවති පරීක්ෂණයේදී ඔවුහු දොරවල් බිඳ හෙලීමට පලමු රෙන්ෆ්‍රෝ යුවලට දොර විවර කරන ලෙස කිහිප වරක් දැනුම් දුන් බව පැවසූ නමුදු ඒ අමූලික අසත්‍යයක් බව පැහැදිලිවිය. රෙන්ෆ්‍රෝ යුවල ඒ වනවිට උඩුමහලේ ඔවුන්ගේ නිදන කාමරයෙහි ගැඹුරු නින්දක ගැලී උන්නෝය. ශීතල රාත්‍රියක හිමිදිරි උදයේ තුනේ කණිසමට ජීවිතයේ සත්වන දශකයේ පසුවන මහළු යුවලකගෙන් ඔබට අපේක්ෂා කල හැක්කේ අන් කවරක්ද? ආක්‍රමණය ආරම්භවනතුරු ඔවුහුතම නිවස වටලා ඇති බවට සිහිනයකිනුදු නොදත්තෝය.

අනුයාත තත්පර හැටක කාලය තුල සිදුවූයේ කුමක්ද සහ එම සිදුවීම් පෙළෙහි කාලානුක්‍රමය පිළිබඳ නිරවුල් පැහැදිලි එකඟතාවයකට පැමිණීමට මාස තුනක පමණ කාලයක් ගතවිය.

කෙසේ හෝ මෙහෙයුම වෙනුවෙන් ප්‍රථමයෙන් තම ජීවිතය පූජා කලේ ස්පයික් නමැති දොළොස් හැවිරිදි කහ-දුඹුරු පැහැති ලැබ්‍රඩෝර් වර්ගයේ සුනඛයාය. රෙන්ෆ්‍රෝ නිවසෙහි සුරතල් සුනඛයින් දෙදෙනෙකු වූ බව මම ඔබට මින් පෙර පැවසුවෙමි. ඉන් මුළුතැන්ගෙයි ගෙබිම මත පුරුද්දක් වශයෙන් රාත්‍රියට නිදාගත් ස්පයික්ගේ ශ්‍රවණ මට්ටම අධික වයස්ගතභාවය නිසාම කිසිසේත්ම සතුටුදායක තත්වයක නොවීය. එහෙත් තමන්ට අඩි කිහිපයකට එපිටින්වූ කුස්සියේ දොර මහ හඬක් නඟමින් බිඳ වැටෙනු ඔහුගේ අර්ධ බිහිරි දෙසවනට පවා හොඳින් ඇසිණ.

ස්පයික් විසින් සිදුකරන ලද මාරාන්තික වරද නම් වහා නැඟීසිට බිඳ වැටුනු දොර මතින් මුළුතැන්ගෙයට ඇතුළුවූ ආක්‍රමණිකයින් වෙත කඩා පැන මහ හඬින් බිරීමට පටන් ගැනීමයි. එකෙණෙහිම හොඳින් ඉලක්කය ගෙන නිකුත්වූ මිලිමීටර නවයේ අර්ධ ස්වයංක්‍රීය පිස්තෝල උණ්ඩ තුනකින් ස්පයික්ගේ දොළොස් වසරක් මිහිමත ගෙවූ කාලය එසැණින් අවසන්විය.

මේ වනවිට ඉහළ මහලේ ස්පයික්ගේ ස්වාමියාවූ ඩග්ලස් රෙන්ෆ්‍රෝ මහතා පහත මහළෙන් නිකුත්වන භයානක ශබ්ද කරනකොටගෙන නින්දෙන් අවදිවූයේ තම සයනය අසලම වූ කබඩයේ ලාච්චුවක් විවෘත කොට එතුලින් තම ආරක්ෂාව සඳහා මිලදීගෙන තිබූ තුවක්කුව සුරතට ගනිමින් සිටියේය. ඔහු සතුව වසරකට දෙවරක් පාත්තයින් දඩයම උදෙසා යොදා ගන්නා බෝර 12 කාණු දෙකේ තුවක්කුවක්ද වූ නමුදු එය මෙවේලේ වූයේ නිදන කාමරයට යාබද කාමරයේ අල්මාරියක් තුලය.

රෙන්ෆ්‍රෝ නිවෙස ආක්‍රමණය සඳහා පූර්ණ SWAT ඒකකයක් යොදාගැනීම සාධාරණීකරණය කරනු උදෙසා නගරයේ පොලිස් ප්‍රධානියා පසුව පුවත් පත් සාකච්ඡාවකදී එකහෙලාම පැවසූයේ ඩග්ලස් රෙන්ෆ්‍රෝ නවීන ආයුධවලින් සන්නද්ධව සිටිනා බවට ඔවුන්ට ඉතා විශ්වාසදායක තොරතුරු ලැබී තිබුණු බවකි.

නිදන කාමරයෙන් ඉවතට පැමිණ උඩු මහලේ ශාලාවට පිවිසි ඩග්ලස්ට දක්නට ලැබුනේ අඩ අඳුරේ පියගැටපෙල තරණය කරමින් උඩුමහලට පිවිසීමට තැත්කරනා කලු පැහැ ඇඳිමින් සැරසුණු ඡායාවන්වන් රූ සමූහයකි. දෙවරක් වියට්නාම් යුද පෙරමුණෙහි සටන්කොට අත්දැකීම් බහුල කෘතහස්තයකුවූ (Veteran) ඩග්ලස් ක්ෂණිකව පොළව මත දිගාවූයේ තරප්පු පෙළ මතවූ අඳුරු සෙවණැළි ඉලක්කකොට වෙඩි තබන්නට වූයේය.

එසැණෙන් කාලවර්ණ ආක්‍රමණිකයෝද ප්‍රතිප්‍රහාර එල්ල කරන්නට වූහ. වෙඩි හුවමාරුව ඉතා කෙටි වූ නමුදු ඒ සමඟ මාරාන්තිකද වූයේය. ඩග්ලස්ගේ යටිබාහුවට සහ උරහිසට වෙඩි වැදිණි. කීස්ලර් නම් පොලිස් භටයාගේ ගෙලට වෙඩි වැදුනු අතර ඒ ඩග්ලස් විසින් තබන ලද වෙඩි පහරකිනැයි පසුව චෝදනා කෙරිණි. අන්දමන්දව කෑගසමින් තම සැමියා පසුපස දුව ආ රෙන්ෆ්‍රෝ මහත්මියට තෙවරක් මුහුණට සහ සිව් වරක් පපුවට වෙඩි තබන ලදී. ඇය එම ස්ථානයේදීම ඇද වැටී අවසන් හුස්ම හෙළුවාය. රෙන්ෆ්‍රෝ යුවල සමඟ ඔවුන්ගේ නිදන කාමරයේ වූ ෂ්නවුසර් වර්ගයේ අනෙක් සුරතල් බල්ලාද වෙඩි තබා ඝාතනය කරන ලදී.

ඩග්ලස් රෙන්ෆ්‍රෝ සහ කීස්ලර් වහාම රෝහලට ඇතුල්කරන ලදහ. රෙන්ෆ්‍රෝ මහත්මියගේ මළසිරුර නාගරික මෘතශරීරාගාරයට ගෙන යන ලදී. විශ්මයෙන් විවරවූ දෑසින් යුතු අසල්වැසියෝ රතු සහ නිල් පැහැ භ්‍රමණය වන විදුලි ආලෝකයන් විහිදුවමින් ගිලන් රථ තුවාල කරුවන් රැගෙන රෝහල කරා ඉගිලයනු බලා සිටියේ තම දෑස් අදහා ගත නොහෙන පරිද්දෙනි.

පොලිස් අපරාධ පරීක්ෂණ ඒකකය හෝරා කිහිපයක් ගතකොට රෙන්ෆ්‍රෝ නිවසෙහි වූ සියළු සාක්ෂි තමන් භාරයට ගත්හ. ඒ අතර රෙන්ෆ්‍රෝ දෙමහල්ලන්ගේ ලැප්ටොප් පරිගණක යන්ත්‍රද විය. තවත් හෝරා දෙකක් ගතවීමටද පෙර එනම් එදින හිරු උදාවට ද පෙරාතුව ඔවුහු රෙන්ෆ්‍රෝ යුවල සතු පරිගණක යන්ත්‍ර කිසිදිනෙක අන්තර්ජාල මත්ද්‍රව්‍ය ජාවාරමක් සඳහා යොදාගෙන නොමැතිබවට කිසිදු සැකයකින් තොරව ස්ථිර කොට ගත්හ. ඔවුනට ඉතා පැහැදිලිව බරපතල වැරදීමක් වී ඇති බවට කිසිදු සැකයක් නොවූ මුත් වරද පිළිගැනීමක් පිළිබඳව ඔවුහු සිහිනෙනුදු නොසිතුවෝය. තමන්ගේ වරද වසා ගැනීමේ මෙහෙයුම හෙවත් "ඔපරේෂන් කවර් අප්" එසැණින් දියත්විනි.

එහි පළමු පියවර වශයෙන් SWAT ප්‍රහාරක බලකායේ අණදෙන නිලධාරියා රෙන්ෆ්‍රෝ නිවස ඉදිරියේදීම රූපවාහිනී වාර්තාකරුවන් අමතා ප්‍රකාශයක් කරමින් රෙන්ෆ්‍රෝ යුවල මත්ද්‍රව්‍ය බෙදාහැරීමෙහි දීර්ඝ කාලයක සිට නිරතව සිටි බවට ප්‍රබල සාක්ෂි ඔවුන් සතුව පවතින බවත් ඩග්ලස් රෙන්ෆ්‍රෝ නවීන ගිණි අවියකින් වෙඩි තබා රාජකාරියෙහි නිරතව හුන් පොලිස් නිලධාරීන් සාහසික ලෙස ඝාතනය කීරිමට තැත්කල බවත් එකහෙලා පැවසීය.

රෙන්ෆ්‍රෝ මහතා සැත්කම් කිහිපයකට භාජනය කරන ලදී. වෙඩි වැදීමෙන් පුරා පැය හයකට පසු පියවි සිහිය ලැබූ රෙන්ෆ්‍රෝ මහතාට පළමු වරට ඔහුගේ ප්‍රියාදර බිරියගේ අභාවය පිළිබඳව දැනුම් දෙන ලදී. ඒ සමඟම ඔහුගේ නිවසට කඩා වැදුණු ආගන්තුකයින් වනාහී සත්‍යය වශයෙන්ම පොලිස් නිලධාරීන් බවද ඔහුට සැලකෙරිණ.

බොහෝ වේලාවක් හිස දෙපසට සොළවමින් ඔහු හැඟවූයේ තමා ඒ පිළිබඳව කිසිවක්ම දැන නොසිටි බවකි. සත්‍යය වශයෙන්ම ඔහු සිතා සිට ඇත්තේ ඔවුන් ඔහුගේ නිවස ආක්‍රමණය කරන්නට තැත්කරනා ආයුධ සන්නද්ධ අපරාධකරුවන් කණ්ඩායමක් බවය.

488. Running Away From Bill & The SWAT Assault On Renfro Home

John Grisham

මම අර බැඳල එහෙම කුවාටර්ස්වල ගෙවපු කාලය ගැන මීට කලින් බොහොමයක් විස්තර ලියල තියනව ඔබ තමුන්නාන්සෙලාට මතක ඇති නේද? ඔන්න ඒ කාලෙ අපේ ඔෆිස් එකට ආව සුද්දෝ දෙන්නෙක්. නෑ..නෑ..මඟ වැරදිල ආපු එවුං එහෙම නෙවෙයි. 

මම ඔය ඒ කාලෙ වැඩ කරපු ගොවි ජනපදේ ඇවිල්ල ඩී.එස්. මහත්තය නොහොත් කැලෑ ජෝන් මහත්තය කෘෂිකර්ම ඇමති කාලෙ පිහිටවපු එකක්. ඒ කියන්නෙ ශ්‍රී ලංකාවට නිදහස හම්බවෙන්ටත් කලිං. ඒ කියන්නෙ 1938-1942 වගෙ කාලෙ. ඉතිං 1998 වගෙ වෙනකොට ඔය ගොවි ජනපද පිහිටවල අවුරුදු 60 වගෙත් වෙන්ට ආව. බොහොමයක් ඇල වේලි පාලම් බෝක්කු එහෙම ඒ වෙනකොට කැඩිල බිඳිල ජරාවාස වෙලා ගිහිල්ල. 

ඒ හින්ද ඔන්න ඒ කාලෙ ආව මහා වැඩ පිළිවෙලක් පුනරුත්ථාපන වැඩ පිළිවෙල කියල. ඒ කියන්නෙ අර කැඩිල බිඳිල ගිය ඇළ වේලි ප්‍රතිසංස්කරණය කරල එව්වයෙ නඩත්තුව ගොවි සංවිධාන වලටම භාර දෙන්ට. ඔව්වට ආධාර හම්බවුනේ යුරෝපා ආර්ථික ප්‍රජාව නොහොත් ඊ.ඊ.සී. නොහොත් European Economic Community එකෙන්.

ඉතිං ඔය සල්ලි හරියට වියදං වෙනවද?, එතනිං ගිහාම එව්ව යොදවන්නෙ ඒ නියමිත වැඩේටමද? කියල හොයල බලන්ට එංගලන්තෙන් එවල තිබ්බ සුද්දො දෙන්නෙක් මෙහාට. ඒකෙං ව්‍යාපෘති අධ්‍යක්ෂ නොහොත් ප්‍රොජෙක්ට් ඩිරෙක්ටර් බ්‍රිතාන්‍ය ජාතිකයෙක් උනාට පොරගෙ මුල් ගම් පළාත් ඇවිල්ල හිට මේ ජැමෙයිකාවෙ. අර කවුද පුකට පැට්‍රෝල් ගහපු බල්ල වගෙ දුවන පොර..ආ..උසේන් බෝල්ට්..අන්න ඒ ගොබිලගෙ රටේ. ඒත් බෝල්ටිය හෙන කලු උනාට අපිට ආපු ප්‍රොජෙක්ට් ඩිරෙක්ටර් ගොයිය කලු නෑ. සුදුමත් නෑ. ඒ දෙක අතරමැද පාටක්. බොහොම ලස්සනයි. කොණ්ඩෙ විතරක් ක්‍රේල්. මම හිතන්නෙ පොරගෙ අම්ම සුද්දියක් හරි මොකක් හරි සීන් කෝන් එකක්. හරි මට දැන් මේ කියන්ට ඕන කලේ පොර ගැන නම් නෙවෙයි. ඒ එක්ක ආපු අනික් සුද්ද ගැන. නම විලියම්. ඒ කියන්නෙ බිල්. බිල්ට පැවරිල තිබ්බ රාජකාරිය තමයි ඔය ගොවි සංවිධාන නඟා සිටුවීමේ කටයුතු පිළිබඳ හොයල බලල ඒ අවශ්‍ය නිර්දේශ ඉදිරිපත් කරන එක.

ඉතිං ඔෆිස් එකේ ඉඳල ඔය වැඩේ කරන්ට බෑනෙ. ගම්පුරා ගිහිල්ල ගොවි මහත්වරු හම්බවෙලා එයාල එක්ක සාකච්ඡා කරල ඒ ප්‍රශ්ණ ගැටළු හඳුනගෙන එව්වට අවශ්‍ය ප්‍රතිකර්ම යොදන්ට එපාය. ඉතිං සුද්ද කොහොමද අපේ ජානපදිකයො එක්ක කතා කොරන්නෙ? ඒ පාර අපේ ලොක්ක මට පැවරුව ඒ රාජකාරිය. ඒ කිව්වෙ සුද්දගෙ බාසා පරිවර්තකය හැටියට කටයුතු කොරන්ට. මමත් ඉතිං ඉබ්බ දියට දමනකොට ඇන්නෑවෙ කිව්වැහෙ සුද්දත් ඉස්සර කරගෙන මාස තුන හතරක් ගම මුලුක්කාදියෙ ඇවිද්ද. කොළඹිං වෙනම එවල තිබ්බ සුද්දන්ගෙ ගමනාගමනයට නිසාන් ෆෝ වීල් ඕෆ් රෝඩ් දෙක තුනක්. එව්ව එකක මායි සුද්දයි ඉතිං උදේ පටං ගත්තම හවස් වෙනකල් ඇවිදිනව. එහෙම යද්දි මරු සීන් වුනා..හෙහ්,හෙහ්, කියල වැඩක් නෑ. එව්ව ගැන පස්සෙ ලියන්නංකො. 

ඉතිං රෑට රෑ වෙලා ආපහු ආහම අපේ සර්කිට් එකට ගිහිල්ල සුද්ද  ගානෙ බියර් දෙකක් විතර වෙන්ට ගහලත් එක්කයි මම ගෙදර යන්නෙ. බොහොමයක් වෙලාවට මම ගෙදර යනකොට අපේ ප්‍රියම්බිකා තොමෝ මල පැනල ඔලුවෙ ඉඳං පෙරවගෙන නිදි...හෙහ්,හෙහ්, 

ආ..මේ සුද්ද ගැන තව එකක් කියන්න ඕන. ඔය මනුස්සයට ලොකුවට ඕනකම තිබ්බ අපේ ස්ටාෆ් එකේ අය එක්ක සාකච්ඡා කරල අදහස් ලබාගන්ට. මිනිහ නිතරම කිව්වෙ ගොවියො එක්ක සෑහෙන කාලයක් වැඩ කරපු අය විදිහට අපේ කට්ටියගෙ අදහස් මිනිහට ගොඩක්ම වැදගත්වෙනව කියල. කතාවනම් සම්පූර්ණ ඇත්ත. ඒත් කොහේ අදහස් ලබාගන්ටද? සුද්දගෙ ඡායාව ඈත පේනකොට අපේ එවුං පණ කඩාගෙන දුවන්නෙ පිස්සං කොටුවට බෝම්බ දැම්ම වගෙ. හෙහ්..ඒ සීන් එක ගැනත් පස්සෙන් පහු දවසක ආයෙම ලියන්නංකො හොඳද? දැං එමු ප්‍රස්තුත කථාවට.

මම අර ඕස්ට්‍රේලියන්ස්ල නොසිතූ වීරූ පරිදි දිනපු පූනේ ටෙස්ට් තරඟය ගැන ලියද්දි කිව්ව නේද මගේ ප්‍රියතම ලේඛකයෙක් ගැන. මතකනෙ... ජෝන් ග්‍රීෂම්...ජෝන් ග්‍රීෂම් මම හඳුනාගත්තෙ ඔය කලින් කියපු සුද්ද ඒ කිව්වෙ බිලා හින්ද. බිල් ඇවිල්ල ජෝන් ග්‍රීෂම්ගෙ හොඳ පාඨකයෙක්. පොර ගාව තිබ්බ ග්‍රීෂම්ගෙ පොත් හත අටක්ම. මමත් එව්ව ඉල්ලගෙන කියෙව්ව. ආය මොනවද? කියවපු ගමං මම ඇඩික්ටඩ්. ටෝටලි ඇන්ඩ් කම්ප්ලීට්ලි.

එදා ඉඳල මම ග්‍රීෂම්ගෙ පොත් ඔක්කොම වගෙ හොයාගෙන කියෙව්ව. බිල්ගෙන් හම්බවෙලා මම මුලින්ම කියෙව්වෙ "ද පාර්ට්නර්". ඉතිං මේ සතිදෙකකට වගෙ ඉස්සර මම ගත්ත ග්‍රීෂම්ගෙ අලුත් පොතක්. අලුත් කිව්වට ඒක මේ 2015 නිකුත් වෙච්චි එකක්. ෆිල්ම් එකකුත් ගහල තියනවලු. නම ඇවිල්ල "ද රෝග් ලෝයර්"

"රෝග් ලෝයර්" මම කියල ඉවර වුනේ ඊයෙ. ඉතිං මට හිතුන ඒ පොතෙන් පොඩි කොටසක් පරිවර්තනය කරල ඔබ තමුන්නාන්සේලාගේ පහන් සංවේගය උදෙසා බ්ලොග් එකේ දැම්මනම් ආය අහවල් දෙයක් වෙනවද? කියල. හෙහ්,හෙහ්, ග්‍රීෂම්ගෙ පොත් මම දන්න විදිහට තවම පරිවර්තනය වෙලා නෑ සිංහලට. ස්ටීවන් කිං සහ කෙන් ෆොලේ කියන්නෙ ඒත් මම බොහොම ප්‍රියකරන තවත් ලේඛකයො දෙන්නෙක්. එයාලගෙත් මම දන්න තරමට තවම පොත් සිංහලට පරිවර්තනය වෙලා නෑ.

Rogue Lawyer  By John Grisham

මෙතන ඉඳල එහෙනම් ඔන්න "රෝග් ලෝයර්".....

ඒ ඛේදවාචකය, ඒ අහස පොළව නුහූලන මහා අපරාධය සිදුවූයේ මෙළෙසය.

මගේ සේවාදායකයෝ එනම් ඩග්ලස් රෙන්ෆ්‍රෝ මහතා සහ එම මහත්මිය පසුගිය වසර තිහකට අධික කාලයක් මුලුල්ලේ ඉතා ප්‍රීතිමත් සහ නිහඬ දිවියක් ගෙවූයේ නගරයේ නිරන්තර කළබලකාරිත්වයෙන් මදක් ඉවත්වූ හරිත වර්ණ වනස්පතීන්ගෙන් සෙවණ ලද පටු මඟක් අසලවූ දෙමහල් නිවසකය. තම අසල්වැසියන් හා සමඟ නිරතුරු සුහදව කටයුතු කල, සමාජ සේවාවන් සහ පල්ලියේ කටයුතුවලදී කිසිදු පැකිළීමකින් තොරව වහා ඉදිරිපත්වූ ඔවුහු ප්‍රීතිමත් සහ ප්‍රියමනාප මහළු යුවලක් වූවෝය.

වයසින් සත්වන දශකයේ මුල් වසර කීපයෙහි වූ රෙන්ෆ්‍රෝ දෙමහල්ලෝ දරුවන්, මුණුබුරන් සහ සුරතල් බල්ලන් දෙදෙනෙකුගේ ආදර සැළකුම් ලැබූ සහ ඊට අමතරව ෆ්ලොරිඩාවෙහි ටයිම් ෂෙයාර් නිවසක (සටහන 1 බලන්න) හිමිකාරත්වය ද දැරූවෝ වූහ. කිසිදු ණය බරකින් පීඩා නොවිඳි ඔවුහු තම ණයවර කාඩ්පත් සෑම මසකම අවසානයේදී පුරුද්දක් වශයෙන් සම්පූර්ණයෙන්ම ගෙවා දැම්මෝය.

ඩග් අක්‍රමවත් හෘද ස්ඵන්දනයෙන් පීඩා විඳිමින් සහ ඔහුගේ බිරිඳ කිටී පියයුරු පිළිකාවකින් සුවය ලබමින් හුන් නමුදු ඔවුහු ඒ හැරුණුකොට ඔවුන්ගේ වයස හා සළකා බලන කල සතුටුදායකයැයි පැවසිය හැකි සෞඛ්‍ය තත්වයක පසුවූහ. පුරා වසර දහතරක කාලයක් හමුදාවේ සේවයකල ඩග් ඉන් අනතුරුව වෛද්‍ය උපකරණ බෙදා හැරීමේ ව්‍යාපාරයක නිරතවූ අතර කිටී රැකියාව කලේ රක්ෂණ සමාගමක රක්ෂණ අයදුම්පත් අගයන්නියක ලෙසය. මහළු වයසේ ක්‍රියාශීලී ජීවිතයක් ගත කරනු උදෙසා ඇය අසලවූ රෝහලේ ස්වේච්ඡා සේවයෙහි නිරතවූ අතර ඔහු නිවස ඉදිරිපිටවූ මල් පාත්තිවල කටයුතු කිරීමට අමතරව නාගරික ක්‍රීඩා පිටියෙහි ටෙනිස් ක්‍රීඩාවෙහි නිරතවිය.

ඔවුන්ගේ දරුවන් සහ මුණුබුරන්ගේ බලවත් ඇවිටිල්ල පරිදි ඔවුහු ලැප් ටොප් පරිගණක දෙකක් මිළදී ගත් නමුදු බොහෝවිට ඒවා අක්‍රියව ඔවුන්ගේ සාලයෙහි මේසයක් මත විය.

ඔවුන්ගේ අසල්වැසි නිවසට ඔවුන් ඒ ප්‍රදේශයේ පදිංචියට පැමිනි පසු අවම වශයෙන් දස වරක් හෝ දොළොස්වරක් පමණ නව පදිංචිකරුවන් පැමිණි අතර එහි වර්තමාන පදිංචි කරුවෝ අසල්වැසියන් හා කිසිදු සුහද ඇසුරකට මැලිවූහ. ඔවුන්ගේ යොවුන් වියේ පසුවූ ලාන්ස් නම්වූ පුත්‍රයා තම කාලයෙන් වැඩි කොටසක් ගෙවා දැමූයේ තම කුටියෙහි දොරගුළුලාගත් වනම පරිගණක ක්‍රීඩාවන්හි නියැලෙමිනි. ඒ අතරම ඔහු අන්තර්ජාලය භාවිතයෙන් මත්ද්‍රව්‍ය මිළදී ගැනීමේ සහ බෙදා හැරීමේ ව්‍යාපාරයකද නිරත වූයේය.

තම නීතිවිරෝධී ක්‍රියාකාරකම් සඟවනු පිණිස ලාන්ස් තම මත්ද්‍රව්‍ය බෙදාහැරීම් කටයුතු උදෙසා රෙන්ෆ්‍රෝ යුවලගේ රැහැන් රහිත අන්තර්ජාල සම්බන්ධතාවය අනවසරයෙන් භාවිතා කල අතර පරිගණක ක්‍රියාකාරිත්වය පිළිබඳ අ යන්න හෝ දැන නොසිටි රෙන්ෆ්‍රෝ දෙමහල්ලෝ ඒ පිළිබඳව හාංකවිසියක් හෝ නොදත් බව වෙසෙසින් කිවයුතු නොවේ.

පරිගණක පිළිබඳ මහළු යුවලගේ දැනුම පරිගණකය ක්‍රියාත්මක කීරිම සහ ක්‍රියාවිරහිත කිරීම, ඊ-මේල් පණිවිඩ යැවීම සහ ලබා ගැනීම, එදිනෙදා ගෙදර දොර අවශ්‍යතා මිලදී ගැනීම සහ කාළගුණ තත්වය පිළිබඳ දැනගැනීමට සීමාවිය. ඉන් ඔබ්බට පරිගණක තාක්ෂණය ක්‍රියාකරනුයේ කෙසේද හෝ ඉන් ලබාගතහැකි ප්‍රයෝජන පිළිබඳව ඔවුන් කිසිවක් නොදැන සිටියා පමණක් නොව ඒ පිළිබඳව ඔවුන්ගේ කිසිදු උනන්දුවක්ද නොවීය. එසේ හෙයින් පරිගණක මුරපද හෝ ආරක්ෂක ක්‍රමෝපායන් පිළිබඳව ඔවුන්ගේ දැනුම පිළිබඳව වෙසෙසින් පැවසිය යුතු නොවේමය.

මේ අතර ප්‍රාන්ත පොලිස් නිලධාරීහු අන්තර්ජාලය ඔස්සේ සිදුවන මත්ද්‍රව්‍ය ජාවාරම් මැඩපැවැත්වීමට දැඩි ක්‍රියාමාර්ග ගැනීමට තීරණය කළෝය. ඒ අනුව අන්තර්ජාල මත්ද්‍රව්‍ය ජාවාරමට සම්බන්ධ අයි.පී. ලිපිනයන් පිළිබඳව සොයා බැලූ ඔවුනට රෙන්ෆ්‍රෝ නිවසෙහි අයි.පී. ලිපිනය හරහා එක්ස්ටැසි නම් ප්‍රබල මත්ද්‍රව්‍යය විශාල ප්‍රමාණයක් බෙදා හැරෙන බව පැහැදිලිවිය. ඒ අනුව රෙන්ෆ්‍රෝ නිවස ඉලක්ක කොට මහා පරිමාණ SWAT මෙහෙයුමක් දියත් කිරීමට තීරණය කෙරිනි.

නිවස සෝදිසි කරනු සඳහා සහ ඩග්ලස් රෙන්ෆ්‍රෝ අත් අඩංගුවට ගනු සඳහා වන වරෙන්තු දෙකකින් සන්නද්ධ වූ SWAT බලකාය (සටහන 2 බලන්න) පැහැදිලි අහස පුරා තාරකා දිදුලමින් බැබලෙන එක් නිසල රාත්‍රී යාමයක හිමිදිරි උදෑසන 3.00 කණිසමට තම මෙහෙයුම ආරම්භ කළෝය. කෙව්ලාර් උඩුකය වැසුම්, (සටහන 3 බලන්න), කැමූෆ්ලාජ් නිලඇඳුම්, දෙවන ලෝක යුද්ධ සමයේ ජර්මානු පැන්සර් යුද ටැංකි භටයින් භාවිතා කල කලු පැහැ හෙල්මට්වලට සමාන හෙල්මට්ස්, නිශා දෘෂ්ඨි ආරක්ෂක අක්ෂි ආවරණ (Night Vision Goggles) රේඩියෝ පණිවිඩ හුවමාරු යන්ත්‍ර, අර්ධ ස්වයංක්‍රීය පිස්තෝල, ඇසෝල්ට් රයිෆල, දණහිස් ආරක්ෂක ආවරණ ආදියෙන් සමන්විත පූර්ණ යුද ඇඳුමින් සැරසුනු SWAT බලකායේ නාගරික පොලිස් නිලධාරීහු අට දෙනෙක් මහළු රෙන්ෆ්‍රෝ මහතා මහත් ආදරයෙන් සාත්තුකල මල් පාත්ති මතින් බඩගාමින් සෙමෙන්  නිවසට ආසන්න වූයේ ඕනෑම හදිසි අවස්ථාවකට මුහුණ දීමට එකහෙලාම සූදානම්වය. 

ඔවුන්ගෙන් සිව්දෙනෙකු රසායනික අවි ප්‍රහාරයකදී යොදා ගන්නා ආරක්ෂක රබර් මුහුණු වැසුම් පැලඳ සිටි අතර සෙස්සෝ කළු තීන්ත මුහුණ පුරා තවරාගෙන උන්නෝය. දෙදෙනෙකු අත මහත් හඬක් සහ ආලෝකයක් නංවමින් පුපුරාගොස් සතුරා මිනිත්තු කිහිපයකට අන්ද මන්ද කරනව තෝන්තු කාරක බෝම්බ (Flash Bang Stun Grenades) වූ අතර තවත් දෙදෙනෙකු අත රෙන්ෆ්‍රෝ නිවසේ දොරවල් බිඳ දැමීම සඳහා අවශ්‍ය යදඬු (Battering Rams) විය.

ඔවුහු වචනයේ පරිසමාප්ත අර්ථයෙන්ම යුද කාමී රණශූරයින් වූහ. ඔවුන්ගෙන් බහුතරයක් අප පසුව දැනගත් පරිදි මෙවන් අවස්ථාවක ක්‍රියාකලයුතු ආකාරය පිළිබඳ කිසිදු පුහුණුවක් නොලත් ආධුනිකයින් වුවද මෙවන් මෙහෙයුමකට සහභාගීවීමට අවස්ථාව ලැබීම පිළිබඳව ඉමහත් උද්‍යෝගයෙන් පසුවූහ. එම කණ්ඩායමෙන් අවම වශයෙන් සය දෙනෙක් මෙහෙයුමට පෙර අවශ්‍ය ශක්තිය ලබාගැන්මට සහ එම අළුයම හෝරාවෙහි අවදිව සිටීම උදෙසා කැෆේන් අධික ප්‍රමාණයක් අඩංගු ශක්ති ජනක පානයන් ඖෂධ අඩංගු දියරයන් පානය කල බව පසුව පිළිගත්හ.

රෙන්ෆ්‍රෝ නිවසේ ඉදිරි දොරටුව වෙත සන්සුන්ව ගමන්කොට සීනුව නාදකොට මහළු යුවල අවදිකොට තමන් පොලිස් නිලධාරීන් බව හඳුන්වා දී ඔවුන්ට අවශ්‍ය වන්නේ හුදෙක් මත්ද්‍රව්‍ය ජාවාරමක් සම්බන්ධයෙන් රෙන්ෆ්‍රෝ යුවලගෙන් ප්‍රශ්ණ කිරීමට සහ ඉක්බිති නිවෙස සෝදිසි කිරීමට බව ආචාරශීලීව පහදා දීම වෙනුවට SWAT කණ්ඩායම ක්ෂණිකව ආක්‍රමණය ඇරඹූයේ හොඳින් සම්බන්ධීකරණය කල මෙහෙයුමක් මඟින් එකම වේලාවට ඉදිරිපස සහ පසුපස දොරවල් බිඳ හෙලීමෙනි.

සියල්ල සිදුවී අවසාන වූ පසු පැවති පරීක්ෂණයේදී ඔවුහු දොරවල් බිඳ හෙලීමට පලමු රෙන්ෆ්‍රෝ යුවලට දොර විවර කරන ලෙස කිහිප වරක් දැනුම් දුන් බව පැවසූ නමුදු ඒ අමූලික අසත්‍යයක් බව පැහැදිලිවිය. රෙන්ෆ්‍රෝ යුවල ඒ වනවිට උඩුමහලේ ඔවුන්ගේ නිදන කාමරයෙහි ගැඹුරු නින්දක ගැලී උන්නෝය. ශීතල රාත්‍රියක හිමිදිරි උදයේ තුනේ කණිසමට ජීවිතයේ සත්වන දශකයේ පසුවන මහළු යුවලකගෙන් ඔබට අපේක්ෂා කල හැක්කේ අන් කවරක්ද? ආක්‍රමණය ආරම්භවනතුරු ඔවුහුතම නිවස වටලා ඇති බවට සිහිනයකිනුදු නොදත්තෝය.

සටහන 1 - 

ටයිම්ෂෙයාර් (හෝ සමහරවිට වැකේෂන් ඕනර්ෂිප්) යන වදනින් හැඳින්වෙනුයේ විශේෂිත හිමිකම් සහ භාවිතා කිරීමේ අයිතීන් සහිත දේපලකි. බොහෝවිට නිවාඩුවක් ගතකිරීමට උචිත සහාධිපත්‍යය ඒකකයන් (Resort condominium units) වන මේ වර්ගයේ නිවෙස් සඳහා බහුවිධ පාර්ශ්වයන්ට එක් නිශ්චිත කාල සීමාවක් තුල දේපල භාවිතා කීරිමේ අයිතිය ඇත. (උදා - වර්ෂයේ එක් නියමිත දිනයක සිට සතියක හෝ සති දෙකක කාලයක් සඳහා) පාර්ශ්වීය අයිතිය මත (Partial Ownership), බද්දට ගැනීම මත, හෝ භාවිතා කිරීමේ අයිතිය (Right to use) මත දේපල පරිහරණය කල හැකි අතර අවසාන ක්‍රමයේදී භාවිතා කරන්නාහට දේපල සඳහා කිසිදු හිමිකමක් නැත.

සටහන 2 - 

SWAT (Special Weapons And Tactics) යනු එක්සත් ජනපදයෙහි විශේෂිත හමුදා ආයුධ සහ උපක්‍රම භාවිතා කොට නීතිය සහ සාමය රැකීම සඳහා පිහිටුවන ලද සුවිශේෂී ඒකකයින් හැඳින්වීමට යොදාගන්නා වදනකි. 1960 දශකයේදී කළහකාරී පිරිස් පාලනය කිරීම සහ ප්‍රචණ්ඩ අපරාධකරුවන් මර්දනය කිරීම උදෙසා මුලින්ම ඇරඹුනු SWAT කණ්ඩායම් සංඛ්‍යාව මෙන්ම ඔවුන් යොදවාගන්නා වාර ගණනද 80 සහ 90 දශකයන්හි මෙන්ම කුප්‍රසිද්ධ සැප්තැම්බර් 11 සිද්ධියෙන් අනතුරුව සීග්‍රයෙන් වර්ධනය විය. වසර 2005 වන විට අමරිකා එක්සත් ජනපදයේ SWAT කණ්ඩායම් වාර්ෂිකව අවස්ථාවන් 50,000 කදී පමණ යොදාගන්නා අතර ඒ බහුතරයක් විශේෂයෙන්ම මත්ද්‍රව්‍යයන්ට අදාල සෝදිසි කීරිම් උදෙසාය. අනෙකුත් රටවල්ද එක්සත් ජනපදය ආදර්ශයට ගනිමින් ස්වකීය අතුරු හමුදා පොලිස් ඒකක (Para-military Police Units or PPUs ) පිහිටුවා ඇති අතර ඒවාද බොහෝවිට SWAT  යන නාමයෙන් හැඳින්වේ.

සටහන 3 - 

කෙව්ලාර් වෙස්ට් - වෙඩි නොවදින කබායක් ලෙස සරළව හැඳින්විය හැකි කෙව්ලාර් උඩුකය වැස්මෙන් කෙරෙනුයේ ගිනි අවියකින් පිටවූ උණ්ඩයක වේගය සහ එමෙන්ම විනිවිද යාමේ හැකියාව බාලකොට එයින් ඇතිකල හැකි හානිය අවම කිරීම හෝ සම්පූර්ණයෙන් වැළැක්වීමයි. බෝම්බයක් වැනි ස්ඵෝඨන උපකරණයකින් නිකුත්වන සිරුරට හානිකර යමක් (Projectile) වැළැක්වීමටද ඊට හැකියාව ඇත.