662. ස්නේහයේ සිහිවටන......

ඉහත ඡායාරූපයෙහි දැක්වෙනුයේ කසළ වශයෙන්
බැහැර කරනු උදෙසා මාර්ගයක් අසළවූ කසළ බහාලනයකට
හේත්තු කොට ඇති මංගල ඡායාරූප කිහිපයකි...

"මෙහෙම වෙයි කියල ඔයාට හිතුනද?"

" නෑ."

"මම ඇහුවෙ මේ නිකමටවත්…"

"නෑ නෑ..හීනෙකින් වත් එහෙම හිතුනෙ නෑ…."

"එතකොට ඇයි එහෙම උනේ? "

"මෙහෙමනෙ ..දැං ඒක වෙලා ඉවරයි..."

"ඔව්…."

"ඉතිං එහෙම උනේ ඇයිද කියල හිත කරදර කරගන්න එකේ කිසිම තේරුමක් නෑ.. "

"ඇත්ත…"

"හරි එහෙනං අපි වෙන්ව යමු…"

"අපි ආයෙම දවසක හමුවේවි..මේ විදිහටම නොවුනත්.."

"ඔව්…."

"එදාට ඔයත් වෙනස් වෙලා තියෙයි..මමත් වෙනස් වෙලා තියෙයි…"

"ඔව්…."

"එදාට අපි ආයෙම කෝපි එකක් බොන ගමං අද වගේම ජීවිතය ගැන කතා කරමු…."

"කතා කරල? "

"කතා කරල ආයෙම වෙන්ව යමු…"

ප්‍රේමයේ අම සුවය විඳිමින් සුරත් පටලා ඇවිදගිය මඟ,
ස්නේහයේ මිණි කිරුළ පළඳා ජීවිතය ජයගතිමි සිතු දින,
නොපෑහෙන සිත් දෙකක සිරවී දුක් කඳුළු හෙලනුයේ කුමටද?
සිහිවටන මහමඟ දමා යමු සමඟ රැඳි මහමෙරද හිස් මත,

661. පුවක් එෂැණිං - 59 - පස්ට් ඇනිමසරි පලෝ අප් නොහොත් පෙතම සන්වස්තරේ පසු විපරම...

සාර් හාල් කඩේට පැනීම නොහොත්
ප්‍රසිඩන්ට් ජම්පිං ටු රයිස් බුටික්...

සාර් පත්වෙලා අවුරුද්දකුත් ගියා නෙව..ඒ ගතවෙච්චි අවුරුද්දෙ අපේ සාර් කරපු කියපු දෙවල් ගැන පොඩි පසු විපරමක් කොරන්ට කාලෙ හරි....

1. R.M.V. එකට පැන්නා…මිනිස්සු රස්තියාදු කරවන්නෙ නැතුව වැඩ කරන්නෙ කොහොමද කියල එතන වැඩ කරන අපතයින්ට ඒ ටු ඉසඩ් කියල දීල උං ඔක්කොම නිවැරදි මාර්ගයට ගත්ත. ඊලඟ පාර මං එනකොට සිස්ටං ඔක්කොම අප්ඩේට් වෙලා තියෙන්න ඕන කියල පොඩ්ඩක් සැර මූනක් එහෙම හදාගෙන කිව්ව. අප්පට උඩු දැං බලන්ට එපාය වැඩේ...කිව්වට විස්වාස කරන එකක් නෑ. වාහනයක් ගන්නම ඕන නෑ..ගන්න ඕන කියල හිතුවත් පැය 24 ඇතුලත රෙජිස්ට්‍රේෂන් එක ගෙදරට එනව තැපෑලෙන් ..නිකම්මත් නෙවෙයි...බුලත් කොළේක දවටල..අන්න එහෙමයි අපේ සාර්..R.R.A. විරුවා....M.B.P. සැමදා..

2. හාල් කඩේකට පැනල හාල් ගෝනියක් උඩ ඉඳගෙන හතර අතට කෝල් කරල ඒ වෙලාවෙම හාල් ගණං බැස්සුව සුටුස් ගාල...හමුදාවෙ මේජර් ජෙනරාල් කෙනෙක් යවල අර ඩඩ්ලිගෙ කණට ගැස්සුව. ඒ කරල පොර හංගං හිටපු හාල් ඔක්කොම එළියට අද්දවල මිනිස්සුන්ට නිකං වගෙ දුන්න..අන්න එහෙමයි අපේ සාර්..R.R.A. විරුවා....M.B.P. සැමදා..

3. අන්න අර කොහෙද ඉස්කෝලෙක පිට්ටනියක් හදන්ට කියල සවේන්ද්‍රට කෝල් කරල කිව්ව…හලෝ සවේන්ද්‍ර මෙන්න මේක ගැන පොඩ්ඩක් බලන්නකො කිව්ව එච්චරයි..දවස් දෙකෙං පිට්ටනිය හදල ආමි එකේ කස්ටියයි ගමේ මිනිස්සුයි දෙකට බෙදිල එල්ලේ ගේමකුත් ගැහැව්ව..අන්න එහෙමයි අපේ සාර්..R.R.A. විරුවා....M.B.P. සැමදා..

4. සිංහරාජෙ මැදිං පාරක් කපනවය කියල හාහෝවක් ආව..සාර් ගියා එතනට ඔන් ද ඉස්පොට් පරීක්සනේකට..හොඳට පරීක්සා කරල ඇනලයිස් කරල එහෙම දුන්න තීංදුව..පරිසරේයට කිසිම හානියක් නැතුව පාර කපාපල්ල කියල ආඥාවක් නිකුත් කලා..වැඩේ කෙරුන ඒ විදිහටම ටිප් ටොප් එකට.. 

කොටින්ම  ඒ පාර දැං හදල ඉවර වෙන්ටත් කිට්ටුයි..තවම පාර හදද්දි පරිසර හානියක් කියල වෙලා තියෙන්නෙ පොඩි ඌරු මී පැටියෙකුයි ගැඩවිල්ලු හතර දෙනෙකුයි මැරිල..එච්චරමයි....ඒ ඌරු මී පැටිය උනත් පන්නල දාල උගෙ පන බේරගන්ට එතන වැඩ කරන හමුදාවෙ කට්ටිය ෆුල් ට්‍රයි කරල තියනව හරි ගිහිල්ල නෑ පව්..ඒ ඇරුනම බැලතණ පඳුරු තුනකුයි ගිරිතිල්ල වැල් දෙකකුයි ගැලවිල තියනව...R.R.A. විරුවා....M.B.P. සැමදා..

5. ජනාදිපති වෙච්චි ගමං මහ බැංකු හොරු අල්ලල ලංකාවටෙ ගෙනල්ල හිරේ දම්මනවයි කිව්ව...ආය මොනවද? කොටිම්ම ජනාදිපතිවරන ප්‍රතිපල නිකුත් කරන දවසෙ රෑ දිස්ත්‍රික්ක 25න් 18 ක ප්‍රතිපල කියනකොට එතුමා දිනන බව ෂුවර් වුනා. ඒ වෙලාවෙම ඒ මහ රෑම මට මතක විදිහට 1.45 ද කොහෙද වෙලාව..එතුමාම කාරෙක එලවගෙන ගියා එයා පෝට් එකට සී අයි.ඩී. කට්ටිය හතර  දෙනෙක් දාගෙන යන ගමං ඇඹුල්දෙණිය හන්දියෙ සෙඩ් එකෙං  පෙට්‍රල් ගැහුවෙ එතුමාගෙ අතේ තිබ්බ සල්ලි වලිං....

ඒ කරල එතනම තිබ්බ අර කවුද ගෑණු මනුස්සයෙක් කරන චයිනීස් රෝල් කඩෙන් රෝල් දහයක් අරගෙන අර සී.අයි.ඩී. කට්ටියට දුන්න ප්ලෙන් එකට ගොඩවෙනකල් එයාපෝට් එකේදි එහෙම පොඩි බඩගින්නක් හැදුනොත් කන්ටෙයි කියල..  අන්න නායකයො..ගිහිල්ල එදා රෑම පිටත් කලා සී.අයි.ඩී. කට්ටිය සිංගප්පූරුවට..දවස් දෙකයි ගියේ සී අයි.ඩී. කට්ටිය මහේන්ද්‍රන්වල කුදලාගෙන ආවෙ ආර්.එල් ස්පිට්ල් මහත්තය ලියපු මැකී ගිය දඩමං පොතේ ගෝඹිරයි, පොරමොලයි, හඳුනයි ගමායි තඩි ගහපු ගෝනෙක් තඩලාගෙන එනව වගෙ.

ඇවිල්ල නඩු අහල අච්චු කරල මිනිහ දැං වැලිකඩ මහ උළු ගෙදර පොල් ලෙලි තලනව...මේ වෙනකොට පොල් ලෙලි කිලෝ හාරදාස් තුන්සිය පණස් හයයි ග්‍රෑම් දෙසිය දාහතරක් තලල කියලයි ආරංචිය....R.R.A. විරුවා....M.B.P. සැමදා..

6. ඊගාවට පාස්කු කොමිසම...පාස්කු ප්‍රහාරෙ ගැන සී.අයි.ඩී. එකෙන් පරීක්සන පවත්තල වැරදිකාරයොන්ට දඬුවම් දෙන එක තමයි කරන්නඕන නියම ක්‍රියා පටිපාටිය. අපේ සාර් ඇවිල්ල එහෙම නියමිත ක්‍රියා පටිපාටියට වැඩ කරන කෙනෙක් නෙවෙයිනෙ. එතුමා ඇවිල්ල තියෙන්නෙ සිස්ටම් එක වෙනස් කරන්න. 

ඒ හින්ද එතුමා කලේ ඒ පොලිස් පරීක්සන පැත්තක තියල දැම්ම පාස්කු කොමිසම කියල අටමගලයක්. ඒක ඇවිල්ල අර ඒ කාලෙ රේඩියෝ ජිංගල් එකක් ගියේ..යසපාලිතගෙ වැඩක්..සිනා සාගරයක් කියල ෆිල්ම් ඇඩ් එකක්..අන්න ඒවගෙ සොමි සාගරයක්..

රනිල එක දවසක් ඇවිල්ල හිටංගෙ සරම ගලවනව..හිටං පහුවදා ඇවිල්ල රනිලගෙ කලිසම ඔලුවෙං ගලවනව...ඒ කාලෙ හිටපු ආරක්සක ලේකම් ඇවිල්ල කියනව මම ඒ ගැන දන්නෙ නෑ කියල..හිටපු පොලිස් පති ඇවිල්ල කියනව ජනාදිපති පුරුද්දක් විදිහට බොරු කියනව කියල..බුද්දි අන්සෙ ලොක්ක ඇවිල්ල කියනව මට කිසිම තොරතුරක් ලැබුනෙ නෑ කියල..තනිකර කැඳ හැලියක්...ඒ තිබිල තියන  තත්වෙ හැටියට තුන්සිය ගානක් මැරිල බේරුන එක ලොකු දෙයක්..බොහෝවිට පාස්කු කොමිසමේ තීන්දුවත් ඒකම වෙයි. තිබ්බ විදිහට ඔයින් ගියා ඇති කියල..

ඔන්න ඔහොමයි එතුමා  මේ  පත්වෙලා ගතවෙච්චි අවුරුද්දට රට ගොඩ නඟල තියෙන ආකාරය...තේරුනා නෙවද? 

151 නඟේලි - පියයුරු ඇති කාන්තාව

    නඟේලි පිළිබඳ කතන්දරය සදහට ම වැළලි යන්නට ඉඩ තිබිණ. අහම්බයකින් මුරලි ටී. නම් චිත්‍ර ශිල්පියාට කියවන්නට ලැබුණු කේරළයේ ප්‍රාදේශීය ලේඛනයක් නිසා බොහෝ දෙනෙකුට ඇය පිළිබඳ දැන ගැනීමේ අවස්ථාව උදා වී තිබේ. 

    එම ලිපිය ඔස්සේ පිය නැගූ ඔහුට නඟේලි වසර 100කට පමණ පෙර ජීවත් වූ ප්‍රදේශය සොයා ගැනීමට හැකි විය. චෙර්තලා හී ගම් වැසියන් හා සංවාදයෙන් ඔහු බොහෝ කරුණු අනාවරණය කර ගත්තේ ය. 

    “ඇගේ ගමේ නම මුලච්හිපුරම්. තේරුම ‘පියයුරු ඇති කාන්තාවගේ පුරය’ කියන එකයි. ඈ කළ ශ්‍රේෂ්ඨ පරිත්‍යාගය සිහිකරනු පිණිස ඔවුන් ඒ ගම ඒ ලෙස නම් කර තියෙනවා” මුරලි ටී. පවසයි. 

    මේ කතාව ඉන්දියාවේ නිල වශයෙන් පිළිගත් ‌ඓතිහාසික වාර්තාවන් හී සටහන් වී නොමැත. 

    නමුත් ඈ විසූ ගමේ ගැමියෝ ඉතාමත් ආදර ගෞරවයෙන් ඒ බව සිහි කරති. ඒ පිළිබඳ වාර්තාවන් සකසා කේරළ ඓතිහාසික වාර්තා ගොනුවට ඇතුලත් කිරීම පිණිස රජයට ලබා දීමට මුරලි ටී. බලාපොරොත්තුවෙන් සිටියි. 

කුල ව්‍යුහය වැරගැන්වීම 

    බ්‍රිතාන්‍ය යුගයේ ඉන්දියාවේ තිබූ පාලන ප්‍රදේශ 550න් එකක් වූ ට්‍රැවන්කෝ රාජධානියේ පාලකයා විසින් පියයුරු බද්දක් පැනවෙන ලදී. 

    අඩු යැයි සම්මත ව තිබූ කුල වල කාන්තාවන්ට උඩුකය වැසෙන පරිදි ඇඳුම් ඇඳීමට අවසර නොතිබූ අතර යම් හෙයකින් කෙනෙකු එසේ ඇන්දේ නම් ඒ අයට දැඩි බදු වලට යටත් වන්නට සිදුවිය. 

    “මේ පියයුරු බද්ද පැනවීමේ අරමුණ වුණේ කුල රාමුව තවත් දැඩි කිරීමයි” කේරල, ශ්‍රී ශංකරචාර්ය සංකෘත විශ්ව විද්‍යාලයේ සහයක මහාචාර්යය කෙනෙකු වූ ආචාර්යය කේ. එම්. ශීබා පවසයි. 

    ඇඳුම් පැළදුම් පිළිබඳ සමාජ සම්ප්‍රදාය සැකසී තිබුණේ කුලය පදනම් කරගෙන ය. යමෙකු කුමන කුලයේ කෙනෙකුදැයි හඳුනා ගැනීමට හුදෙක් ඇඳුම පමණක් ප්‍රමාණවත් විය. 

    නඟේලි අයත් වූයේ ඒස්හවා කුලයටයි. තියා, නඩාර් සහ දාලිත් වැනි අනෙකුත් හීන කුල මෙන් ම ඇගේ ප්‍රජාවත් පියයුරු බද්දෙන් බැඳී මිරිකී තිබිණ. 

    නමුදු වර්තමාන ගම් වැසියන් පවසන පරිදි, ඈ බදු නොගෙවා, උඩුකය ආවරණය වන පරිදි ඇඳුම් ඇඳීමෙන් විරෝධතාව ප්‍රකාශ කිරීමට තීරණය කර තිබුණා ය. එය, 1900 ගණන් වල මුල් කාලේ ජීවත් වූ හීන කුල කාන්තාවකගෙන් බලාපොරොත්තු විය නොහැකි මට්ටමේ නිර්භීත පියවරක් විය. 

    “ඈ බදු ගෙවීම ප්‍රතික්ෂේප කරන බව දැනගත් බදු පරීක්ෂක, ඇගේ නිවසට ගොස් නීති විරෝධි ව කටයුතු කිරීම පිළිබඳ දොස් නැගුවා. ඔහුගේ සහචරයින් ඇගේ උඩුකය වැස්ම ගලවා දැමුවා. ඇගේ සැමියාට වේදනාවෙන් බලා සිටිනවා හැර කළ හැකි යමක් තිබුණේ නැහැ. වේදනාවෙන්, ලැජ්ජාවෙන්, දුකින්, කෝපයෙන් පීඩා විඳි නඟේලි වහා ගෙට ගොස් කැත්තක් සහ කෙසෙල් කොළයක් ගෙන ආවා. මේ බදු මේවා නිසානේ, ආ මෙන්න ගන්න! කියූ ඈ තමන්ගේ පියයුරු දෙක ම කැත්තෙන් කපා කෙසෙල් කොළය මතට දැමුවා. ලේ ගලා යද්දී, වේදනා විඳිමින් ඈ සිය සැමියාගේ දෑත මත මිය ගියා. ඔවුන් දෙදෙනාට දරුවන් සිටියේ නැහැ. ඇගේ චිතකය දැල් වුණු දා, සිදු වූ දේත් වියෝ දුකත් දරාගත නොහැකි වුණු සැමියා ද ඒ දැවෙන චිතකයට පැන දිවි තොරකර ගත්තා. මෙම සිදුවීමෙන් කම්පනයට පත්වුණු රජය පියයුරු බදු ක්‍රමය ඉවත් කිරීමට පියවර ගත්තා” 

    ඇගේ ඥාතීන් පසුව මුලච්හිපුරම් හැර ගොස් අසල නගර සහ ගම්මාන වෙත සේන්දු වී තිබුණි. 

පරිත්‍යාගයට නිසි වටිනාකම්

    ඇගේ සොයුරාගේ මී මුණුපුරෙකු වන මනියෙන් වේලු, සිය මී මිත්තණියගේ ශ්‍රෙෂ්ඨ පරිත්‍යාගය වැඩි දෙනෙකු නොදැන සිටීම පිළිබඳ ව බොහෝ සේ කණගාටු වෙයි. 

    “ඈ කටයුතු කළේ පරාර්ථකාමී ව, නිර්භීත ව තමන්ගේ ප්‍රජාව වෙනුවෙන්. ඒ පරිත්‍යාගයේ ඵලය ට්‍රැවන්කෝර් හී සියලුම කාන්තාවන් භුක්ති වින්දා. මගේ මී මිත්තණිය රජාට තමන්ගේ බද්ද අකුලා ගන්න සිද්ධ කළා.” ඔහු පවසයි. 

    වයස්ගත මිනිසෙකු වන මනියෙන් සතුව ඉඩම් නැත. ඔහුගේ දරුවන් ගොවිපලක කම්කරුවන් සේ කටයුතු කරයි. ඒත් ආධාර බලාපොරොත්තු නොවන ඔහුගේ එක ම උවමනාව මේ ඓතිහාසික පරිත්‍යාගය ඉතිහාස පොතේ සටහන් වීම පමණයි. 

    “අපි ඇගේ ලේ ඥාතීන්. අපි ඒ ගැන බොහොම ආඩම්බරයි. අපිට උවමනා එකම දේ ලෝකේ මිනිස්සු ඈ ගැන, ඇගේ පරිත්‍යාගය ගැන තව තවත් දැන ගන්න එකයි. මේ කළාප ඉතිහාසයේ කොටසක ඇගේ නම ලියැවීම සිදුවිය යුතු ඉතාමත් සුදුසු, වැදගත් දෙයක්” ඔහු BBC වෙත පැවසීය. 

    දැනට මුරලි ටී. එම කටයුත්තේ වගකීම සිය කරට ගෙන කටයුතු කරයි. ඔහු ඇයගේ කතාව සිතුවම් තුනකට නගා ඇති අතර ඔහුගේ ‘Amana - The Hidden Pictures of History’ නම් වූ පොතට එම සිතුවම් එකතු කොට තිබේ. 

    2019 වසරේ තිරගත වුනු ‘Aadai - ඇඳුම’ නැමති දමිළ චිත්‍රපටයේ ආරම්භයට නඟේලි පිළිබඳ වාර්තාවක් එක් කර තිබීම විශේෂත්වයකි. වර්තමාන ඉන්දීය කාන්තාව ලබා සිටින භාෂණයේ නිදහස, කැමති පරිදි ජීවත් වීමේ නිදහස ආදිය ඉතාමත් සරළ දේ සේ පෙනුන ද, ඒ්වා අතීතයේ සැඟ වී ගිය අප නොදත් බොහෝ දෙනෙකු ගෙනගිය අරගලයන් හී ප්‍රථිඵල බව එම වාර්තාවෙන් ගම්‍ය කරවයි. 

    උඩරට සමහර කාන්තාවන් උඩුකය නිරුවතින් සිටින පැරණි පිංතූර සමාජ ජාල වල වරින් වර සංසරණය වේ. එම පිංතූර දෙස බලා වික්ටෝරියානු සදාචාරයට යටත් වන්නට පෙර මෙරට කාන්තාව අසීමිත නිදහසක් විඳි බවට කෙනෙකු අර්ථ දක්වයි. නමුදු එම පිංතූර හා සමග ම නිළමේ වරුන්ගේ බිරින්දෑවරු හැට්ට ඇඳ ඔසරියෙන් සැරසී, රන් ආභරණ පැළඳ සිටින පිංතූර ද සංසරණය වන බව සිහිකරගත යුතුය. 

    කෙනෙකු විවේචනය කළ ද, තව කෙනෙකුට අඩනිරුවත හොඳ යැයි සිතෙන්නට පුළුවන. එය වඩා නිදහස් යැයි අර්ථ දැක්වෙන්නට පුළුවන. කෙනෙකුට ඒ නිදහස ලැබීම පිණිස නීතිය දිනා ගැනීමට උත්සහ කළ හැකිය. එය තෝරා ගැනීමකි. නමුදු ඒ සඳහා, සියවසකට පමණ පෙර දුගීකම නිසා නිරුවතින් සිටීම උරුමය වූ දිළිඳු කාන්තාවන් ඒ නිදහසේ ආදර්ශය කොට ඉදිරියට ගැනීම, කෙතරම් සාධාරණදැයි අතීතයෙන් එබී බලා නඟේලිලා දහසක් අපෙන් විමසනු ඔබට ඇසේ ද? ඔවුන්ගේ ලැජ්ජාවෙන් මිරිකුණු මුහුණු ඔබට පෙනේ ද?

BBC සහ වෙනත් මූලාශ්‍ර ඇසුරින්

660. සුබ ගමන් ඩබ්.ඩී….....

කොපි කරල පොත් ලිවිල්ල ගැන හෙණ හාහෝවක් යන මේ දවස්වලම ඩබ්.ඩී. ආරියසිංහ මහත්තය මිය ගිය එක නම් අපූරුම Coincidence එකක් නොහොත් සමපාතයක්...

මට මතක විදිහට අනූගණං වල මුල් කාලෙ වගෙ ඩබ්.ඩී. ආරියසිංහ කියල ගායකයෙක් අමරදේව මාස්ටර්ගෙ ගීත සී.ඩී. එකක් නිකුත් කරල බොහොම කෙටි කාලයකින් ජනප්‍රිය වුනා. සන් ෆ්ලවර් සංගීත කණ්ඩායම තමයි ඒ ගීතවලට සංගීතය සැපයුවෙ…

ඒ කාලෙ ඔය සන් ෆ්ලවර් සමඟ කියල සී.ඩී. ගහන රැල්ලක් ආවනෙ..සන් ෆ්ලවර් සමඟ ගුණදාස කපුගේ..සන් ෆ්ලවර් සමඟ දයාරත්න රණතුංග කියල එහෙම. සන් ෆ්ලවර් සමඟ ඩබ්.ඩී. ආරියසිංහ කියල තමයි අමරදේවගෙ ගීත අඩංගු සී.ඩී. එක නිකුත් වුනේ...

අමරදේව ලොක්ක එක්ක දාගත්ත මොකක්ද වලියකට පලිගනු වස් කේමදාස ගොයිය තමයි කියනව ඩබ්.ඩී.ආරියසිංහ ලව්ව අමරදේවගෙ සිංදු කියෙව්වෙ කියලත් කියනව...මොකද ඒ කියපු ගීත ඔක්කොගෙම සංගීතය කේමදාසගෙ. 

ආරියසිංහ ඒ කාලෙ පොඩි කොල්ලනෙ. නැඟී එන ගායකය..කේමදාස මිනිහට මෙහෙම කියන්ට ඇති..

"අයිසෙ තමුසෙ බය නැතුව ඔය සිංදු කියනව..මමනෙ කියන්නෙ..ඔව්වයෙ මියුසික් මගේ.."

"සර්..මට බය නඩුවක්වත් වැටුනොත් කියල..." ආරියසිංහ එහෙම කියන්ට ඇති...

"නඩුවක් වැටුනොත් මම උසාවියට ගිහිල්ල උත්තර බඳින්නං..."

කොහොමහරි ආරියසිංහ ඒ සිංදු ටිකත් කිව්ව..නඩුවක්  වැටුනෙත් නෑ හැබැයි...සමහරවිට අමරදේව කේමදාසගෙ හැටි දන්න හින්ද ඔන්න ඔහෙ ඕන මඟුලක් කර ගත්තාවෙ කියල නිකං ඉන්න ඇති. 

නැත්නම් නීති උපදෙස් ගත්තම දැනගන්ට ලැබෙන්ට ඇති ගීතයක අයිතිය තියෙන්නෙ ගායකයටද, තනුව නිර්මාණය කරපු සංගීතවේදිහටද එහෙමත් නැත්නම් ගීතය ලියපු පද රචකයටද කියන එක ගැන පැහැදිලි නිර්වචනයක් නැතය කියල..කොහොම හරි ඔය ආරියසිංහ කියපු අමරදේවගෙ ගීත හින්ද ගීතයේ අයිතිය ගැන පුලුල් කතිකාවතක් ඇරඹුනා. මට මතකයක් නම් නෑ අන්තිමට මොකක්ද තීරණය වුනේ කියල.. 

බලාගෙන යනකොට කේමදාස ලොක්කගෙ ඉත්තෙක් වෙලා තියෙන්නෙ ආරියසිංහ...

කේමදාසත් ආය නෑ නයා වගෙ මිනිහෙක් බලාගෙන යනකොට..ඒත් ඉතිං අනික් අතට අමරදේව ගොයිය කේමදාසට මොකක් කරලද ඔය විරසකේ පටං ගත්තෙ කියල හරියකට නොදැන එක පාරටම කේමදාසගෙ ඇඟට ගොඩවෙන එකත් වැරදියි..අමරදේව කියල නෑ ඉතිං ඔක්කොම මිනිස්සුනෙ..

කේමදාසට තව චෝදනා තියනව. මිනිහගෙ පිරිනිවන් මංගල්‍යය දයානන්ද ගුණවර්ධනගෙන් කොල්ල කාපු එකක්ය කියල. කේමදාසගෙ සිවිල් බලයට බයේ දයානන්ද ගුනවර්ධන සද්ද නැතුව හිටියලු..

ගොඩක් මිනිස්සු කපුගේට එතකොට දයාරත්න රණතුංගට එහෙම පස් පඩංගුවෙ බැන්න එහෙම සිංදු කියල එව්ව හෑල්ලු කලාය කියල. කපුගේ මළාට පස්සෙ දවසක මම දැක්ක පත්තරේක ලියල තිබ්බ කපුගේ ඔච්චර කාලයක් සිංදු කියල ලක්ෂ සංඛ්‍යාත රසිකයින් අමන්දානන්දයට පත් කලත් සන් ෆ්ලවර් එක්ක සී.ඩී. එකක් කරල ලැබුණු මුදලින් තමයි යන්තමට ඉන්න හිටින්න ගෙයක් දොරක්වත් හදාගත්තෙ කියල..හරි ඒ කතාව මේ කතාවට අදාල නෑ..මම ඔය නිකමට වගෙ කියල දැම්මෙ.

අද කියන්න යන්නෙ ඩබ්.ඩී.ආරියසිංහ ගැන. ඒ මනුස්සය අමරදේවගෙ සිංදු කියල නමක් හදාගත්තට පස්සෙ බොහොම අපූරු ගීත කීපයක්ම කිව්ව. ඉස්සෙල්ලම මා ළඟටම තව ලංවෙලා..මම සෑහෙන කාලයක් ඒ ගීතයෙ තනුව මගෙ ෆෝන් එකේ රිඟිං ටෝන් එකට දාගෙන හිටිය. එදා මෙදා තුර මම සිංදුවක තනුවක් රිඟිං ටෝන් එක විදිහට දාගෙන හිටියෙ එච්චරමයි.අනික මම දන්න විදිහට ඒ ගීතයට තැනුනු වීඩියෝ එක තමයි ලංකාවෙ ගීතයක් වෙනුවෙන්ම තැනුනු මුල්ම වීඩියෝ එක...වීඩියෝ එකේ ඉන්නෙ සේමිණි ඉද්දමල්ගොඩ සහ රොජර් සෙනෙවිරත්න...

මා ළඟටම තව ළංවෙලා
හිඳින්න නිහඬ නුවන් පියා
මා සීතාවෝ සැතැපෙන නින්දේ
නූපුර හෝ ප්‍රියේ
පා සුළඟිල්ලේ අදනම් අවදි නොවේ
කුසුම් කැකුළ නිදනා තුරා....

සඳගිරි පව්වේ පෙරදා සංසාරේ
සැතපුනුදා දුටු කින්නර පෙම් සිහිනේ
මහලු වෙලා අද සඳ වාගේ
යෞවන රෑ සඳු බලාන උන්නවේ....

කල්පකාල යුග අප අතරින් ගෙවිලා

අපි යමු මේ රෑ අනාගතය සොයලා

නළමුදු සුවඳේ නිදන මලේ..

මට මල් රොනවුල් සුවඳ දැනේ ලදුනේ....

Song : W D Ariyasinghe 
Lyricist : Ajantha Ranasinghe 
Music : Tissasiri Perera 

මේ ආරියසිංහගෙ තවත් අපූරු ගීයක්...

වළාකුළු පෙළින් බසින්න
ඇවිත් මල් ගැබේ නිදන්න
චන්ද්‍ර කුමරියේ කාටද
නුඹගෙ ආදරේ
මට ද ආදරේ..

අසාවී මෙසේ තුන්යම
දිලී තරුකා මල්දම
කියා නෑ තාම හිත රැඳි
සුසුදු ආදරේ..

දේවතාවියක් විලසින
පාන හස කැළුම් නුබ ගැබ
පතා ඉන්නෙමි සඳ වත
නුඹගෙ ආදරේ..
නුඹට ආදරේ

අහස් ගං කුසින් බැසගෙන
මිහිමතට එම්ද කෙලෙසින
රැඳී ඉන්නෙමි සැමදින
අහස් ගං කුසේ
දෙව් ලියක් ලෙසේ..

දේවදාර තුරු පාමුල
තාම මම හිඳිමි තනිවම
දිනාගන්නෙ දෝ කෙලෙසින
නුඹගෙ ආදරේ
නැතිද ආදරේ..

තාරුකා වනේ සරමින
නුඹ නමින් දිලෙමි සැම දින
සදා හිනැහෙමි හිඳගෙන
අහස් ගං කුසේ
නුඹට ආදරේ..

මටද ආදරේ..

නුඹට ආදරේ..

පද: වෛද්‍ය යසනාත් ධම්මික බණ්ඩාර

තනු: නවරත්න ගමගේ

හඬ: ඩබ්ලිව්. ඩී. ආරියසිංහ සහ රශ්මි සංගීතා

මේකත් අර කලින් එව්ව වගේම සිත දැහැන්ගතවෙන ගීතයක්...

තිසර තුඩට තුඩ නඟන්න ඉඩ හරින්න රාධා
මහද සුරත් නෙලුම් කැකුල දැදුරු වෙන්න පාරා
දුනු දියෙන් මිදී මදරද රාව නගන මීපා
ලලිත ලවන සිඹ රඟන්න ඉඩ හරින්න රාධා

කොලොම් වන හිසේ මුවරද
මමන මද පොදින් සීතල
වපුල කලාපේ මංගල 
යහන් සලුව සෝදා
සුසුම් නලින් වියැලෙන්නට 
ඉඩහරින්න රාධා

නියඟලා මලින් සෝබන
කළිඳු ගංතෙරේ වන ගැබ
දියගෙවන පිරුනු උණුසුම
නිවාලන්න රාධා
ලහෝපලු සිහිල හෙල්මැලි 
සඳුන් කල්ක තවරා

ගායනය | ඩබ්ලිව් ඩී ආරියසිංහ 
සංගීතය | විශාරද ගුණදාස කපුගේ 
පද රචනය | රත්න ශ්‍රි විජේසිංහ