269. විමලෙගෙ වාංපතුල් කතා 15 - වගා සංග්‍රාමය, පේසාලේ තෙල්,සැවුල් එනෝ සහ ආසියාවේ ආශ්චර්යය.

Google Images

රායිට් කේබිය ගැන ඔය ඇති දැනට.... එහෙනං දැන් ඔන්න සැවුළගෙ කතාව...සැවුල් එනෝ කියල අපෙ උන්දෙගෙ අක්කගෙ පොඩි එකී ඒ දවස්වල ගේ පුරා දුවනව හැංගෙන්ට. ඒ මෙහෙමයි. ඔය අපෙ උන්දැගෙ ගෙවල් ගාවම ..ගාවම කියන්නෙ යාර පණහක් හැටක් මානෙ තිබ්බ සැලූන් එකක්. අර පරණ තාලෙ සැලූන් තිබ්බෙ මතකද ඔහෙලට? පස්වන ජෝර්ජි මහ රජානන්ගෙ වික්ටොරියා මහේසිකාවුන්නාන්සෙගෙ, එතකොට එළිසබෙත් රැජින කුමාරිකාව කාලෙ, ආය ඩී.එස්., ඩඩ්ලි, සර් ජෝන්, දහනායකගෙ ෆොටෝස් එල්ලල බිත්ති පුරා. 

ඔව්වයෙ තිබ්බෙ උළුවස්සෙ මැදක් හරියට වෙන්ට හයි කරපු බාගෙ දොර පලු දෙකක්. වවුල් තටු වගේ හින්ද වවුල් දොරවල් කියලත් කිව්ව. අපි පොඩි කාලෙ කච්චේරිවල එහෙම හයි කරල තිබ්බෙත් එව්ව.

ඒ කාලෙ හිටියෙ දැන් වාගෙ ප්‍රාදේශීය ලේකම්වරු නෙවෙයි නෙව. දිසාපති සහ උප දිසාපතිල.ඔය උප දිසාපති තනතුරු නාමය ආවෙ මට මතක විදිහට 1972 ජනරජ ව්‍යවස්ථාවත් එක්ක. ඊට ඉස්සෙල්ල තිබ්බෙ ප්‍රා. ආ. නි නොහොත් ප්‍රාදේශීය ආදායම් නිලධාරී තනතුර. Divisional Revenue Officer...කෙටියෙන් D.R.O. ආදායම් ගැන විතරක් කියන එක හරි නැහැ කියල හිතල වෙන්ට ඕන උප දිසාපති කියල නම දාන්ට ඇත්තෙ.

එතකල් පෙබරවාරි 4 සමරපු නිදහස් දිනේ එදයිං පස්සෙ වැටුන මැයි 22 ට. පෙබරවාරි 4 ජාතික වීර දිනය උනා. පාර්ලිමේන්තුව ජාතික රාජ්‍ය සභාව උනා. ජා.රා. සභාව කෙටියෙන්. ඉංග්‍රීසියෙන් National State Assembly කෙටියෙන් N.S.A.

නිකම්ම ලංකාව විදිහට තිබ්බ රට ශ්‍රී ලංකා ප්‍රජාතාන්ත්‍රික සමාජවාදී ජනරජය උනා. ඔය නම ගැන කියද්දි මට මතක් වෙන්නෙ අර අලුත් මාලු කතාව. අලුත් මාලු විකිණීමට තිබේ කියල පත අකුරෙං බෝඩ් එල්ලගෙන ඉන්නෙ කුණු වෙච්චි දහ ජරාව විකුණන කාපාළුවො.රටේ නමත් එහෙමම තමා. ප්‍රජාතාන්ත්‍රික සමාජවාදී ජනරජය කියල බෝඩ් එල්ලගන්ට වෙලා තියෙන්නෙ මෙහෙ ප්‍රජාතන්ත්‍රයක්වත් සමාජවාදයක්වත් බෙහෙතකටවත් නැති හින්දනෙ. ඒ තියා ජනරජයකුත් නෑ. ජනරජය කියන්නෙ ජනතාව රජ කරන කියන එකනෙ. එහෙම එකක් කොහෙද තියෙන්නෙ? එතකොට මුලටම තියෙන ශ්‍රී කෑල්ල නැතිවෙලා ගිහිල්ල නං සෑහෙන කාලයක් වෙනව. එතකොට අර මාලු වෙළෙන්දගෙ බෝඩ් එකේ සුප්‍රසිද්ධ කතාව අනුව රටේ නමෙං ඉතුරු වෙන්නෙ ලංකාව කියන කෑල්ල විතරයි. ඇත්තම කිව්වොත් සුද්දගෙ කාලෙ ඉඳල තිබ්බ ඒ නම විතරයි අපිට ගැලපෙන්නෙ. අන්න ඒක තමයි කියන්නෙ ඔය සුද්ද කියන මනුස්සය එහෙම ආවට ගියාට වැඩක් කරන්නෙ නෑ. හොඳට හිතල මතල තමයි මොන දේ කලත් කරන්නෙ...හෙහ්,හෙහ්,

දැං ඔය කඩුගන්නාවෙ ගල විදපු එක බලමු.

" යකෝ තොපි උඩරට උඩරට කියල මැරෙන්ඩ හැදුවට සුද්ද කඩුගන්නාවෙ ගල විදල පාර හදල තොපෙ වල්ගෙ කපල ගත්තෙ නැත්තං තොපි තාමත් කොළ අතු ඇඳගෙන මීමින්නො පාරෙ එළවනව. "

උඩරට මාන්නක්කාරකම ඔලුවට ගහල හිටපු එවුං අපි අතරත් හිටිය. එවුං Cut down to size කරන්ඩ අනික් එවුන් කියන්නෙ ඔහොම.අනික් අතට පාතරට එවුන්ට කියන්නෙ මෙහෙම.

" අනේ බං උඹලට මොකද්ද තියෙන ජාති ජම්මෙ? සුද්දො ගොඩ බැහැපු ගමං ගියා උන්ගෙ *** ලෙව කන්ට. උඩරට අපි තමයි අන්තිම වෙනකල් හරි සිංහල ජාතිය කියන එක යන්තමට හරි රැකගත්තෙ. "

ඔය උඩරට / පාතරට වාද විවාද වලදි මම එක පැත්තකට වත් නෑ. මොකද මගෙ අම්ම උඩරට... අප්පච්චි පාතරට. එතකොට නිල වශයෙන් මම ඇවිල්ල පාත්තයෙක්. ඒත් මම කරන්නෙ ඔය උඩරට-පාතරට වාදබේද වලදි දෙපැත්තටම සපෝට් එක දීගෙන ඉන්න එක. එහෙම උනාම අවුලක් නෑ. කවුරුවත් තරහ වෙන්නෙත් නෑ..

70-77 කාලෙ ආණ්ඩුවෙන් පටන් ගත්ත වගා සංග්‍රාමය කියල එකක්.අපේ ආහාර අපිම වවමු කියල තමයි ඒකෙ තේමාව. දැනුත් ඔය තියෙන්නෙ අපි වවමු, රට නඟමු කියල අන්න ඒ වගෙ.උදේ පාන්දර 5 ට රේඩියෝ එකේ ඒ දවස්වල යනව සෙත් පිරිත්. අර එෆ්. එම්. ,මේ එෆ් එම්..සිරස බිරස , නෙත් එෆ්.එම්. බෙත් එෆ්.එම්. ඒ වගෙ ගෝණි කනක්කුවෙ තිබ්බෙ නෑ රේඩියෝ..ආණ්ඩුවෙ එව්ව විතරයි.ඒත් තිබ්බෙ වෙළඳ සේවය සහ ස්වදේශීය සේවය සිංහලෙන්.ඉංග්‍රීසියෙනුත් චැනල්  දෙකක්ද කොහෙද තිබ්බ. චැනල් ටූ එකේ හැමදාම රෑ හතහමාරට මම අනිවාර්යයෙන් අහපු වැඩ සටහනක් තමයි ටොමී පෙරේරා කරපු බ්‍රිස්ටල් ස්පොර්ට්ස් නිව්ස් රීල්. ඕකෙ තේමාව යන්නෙ මෙහෙමයි.

" Bristol is the ummatched that gives you satisfaction, better taste and fresher flavour ….That's why bristol belongs to the world of today. Once again this is bristol sports newsreel , your daily round up from the world of sports ..I am Tommy Perera…The board of control for cricket today announced the Sri Lankan team for the first world cup to be played during june in England. Anura Tennekoon would lead the team with Michael Tissera as the deputy. Other members would be Ranjith Fernando, David Heyn, Sunil Wettimuny, Mevan Pieris, Tony Opatha, .............."

වෙළඳ සේවයෙ රෑ අටහමාරට ගුවන් විදුලි නාට්‍යයක් යනව. ඉරිදට මොණර තැන්න, සඳුද මුවන් පැළැස්ස, බෘහස්පතින්දට ගුවන් විදුලි රඟ මඬල, ගුවන් විදුලි රඟ මඬලට බොහෝ විට නාට්‍ය ලිවෙ සුගතපාල ද සිල්වා. සිකුරාද හන්දියේ ගෙදර, වජිරා, ඇස් දෙක, තව ලස්සන කතාවක් ගියා මට ඒකෙ නම මතක් වෙන්නෙ නෑ.වලව්වක වංශවත් තරුණයෙක් සහ කුලහීන තරුණියක් අතර ඇතිවන සෙනෙහසක් පිළිබඳව. කෙල්ල දක්ෂ නැට්ටුක්කාරියක්. කෙල්ලගෙයි කොල්ලගෙයි නම් දෙක නම් මතකයි. මුතූ සහ මොරපාතොට අප්පො.චරිත දෙකට කටහඬ දුන්නෙ කරුණාරත්න අමරසිංහ සහ නිරංජලා සරෝජිනී.ගිම්හාන ගීතයත් තව ලස්සන කතාවක්.

හරි, 70-77 කාලෙ ගැන ඔය මදැයි. පඳුරු තලනවයි කියල ආය මෙහෙමත් ඉතිං ...නැද්ද?...ඒ කාලෙ ගැන ආයම ලියන්නම් වෙනම. වගා සංග්‍රාමය. උදේම රේඩියෝ එකේ යන දේශාභිමානී ගීත. අම්මාපල්ල ඒ ගීත ඇහෙනකොට උදැල්ලක් අරගෙන ගිහිල්ල හිස හැරුනු අතේ කොටාගෙන කොටාගෙන යන්න හිතෙනව. ඇඟේ මස් නලියනව. " උදළු අරං වරෝ, නගුල් අරං වරෝ, රට නඟන්න වරෝ.." ඔය එකක්.

" සොඳුර මට සමු දෙන්න..සමු දෙන්න...සොඳුර මට සමු දෙන්න සමු දෙන්න, ඈත ගමේ සරු පස පෙරලන්නට මා යනවා හෙට උදෑසනේ. සොඳුර මට සමුදෙන්න සමු දෙන්න,සොඳුර මට සමු දෙන්න,සමු දෙන්න, "

ඔය සොඳුර මට සමුදෙන්න කිව්වෙ ඩී.ඩී. ගුණසේනද කොහෙද...

අබේවර්ධන බාලසූරිය කිව්වෙ මෙහෙම " ගංගා එන්නකෝ ගංගා..මං බලාන ඉන්නේ ඔබ එනතුරු ගංගා. "

ඒ ගංගා කිව්වෙ කෙල්ලෙක් ගැන එහෙම නෙවෙයි..මහවැලිය ගැන. පේසාලෙ ඛනිජතෙල් හම්බ උනාය කියල මහ විසාල නාඩගමක් නැටුව ආණ්ඩුවෙන් මයෙ හිතේ 75 වගෙ වෙන්න ඕන. රෝහණ බැද්දගේ කිව්ව ඒ ගැන මෙහෙම

" හා යමං පුතා හෙමින් හෙමින් හපුතලේ කන්ද නඟිනවා. මහන්සියට කවි සීපද සින්දු කියනවා හෙමින් හෙමින් හපුතලේ කන්දනඟිනවා. "

ඕකෙ මෙහෙම කෑල්ලකුත් තිබ්බ. …..

" පේසාලෙන් තෙල් උනලා අපේ රටේ වාහන වැඩ පලක් තැනෙනවා. පේසාලේ තෙල් ගහලා අපේ කොල්ලො රූංගාලා එහෙ මෙහෙ යනවා. හා යමං පුතා හෙමින් හෙමින් හපුතලේ කන්ද නඟිනවා. "

ඔය තෙල් හම්බ උනාය කියල අහස පොළව නුහූලන බොරුවක් කරල තියෙන්නෙ. ආණ්ඩුව පෙරලුනාම එළිවෙච්චි විදිහට ඒ දවස්වල හිටියෙ කර්මාන්ත සහ විද්‍යා කටයුතු ඇමති විදිහට ටී.බී. සුබසිංහ මහත්මය. එයා සමසමාජ. ඛනිජ තෙල් සංස්ථාවෙ සමසමාජ වෘත්තීය සමිතියෙ නායකයෙක්ලු ඔය පේසාලෙන් තෙල් ඉනුවයි කියන ගජ බින්නෙ මූලාරම්භකය. අර මැස්ස එලවන්ට රජ්ජුරුවන්ට කඩුවෙන් කොටපු වඳුරගෙ පරම්පරාවෙ කෙනෙක් වෙන්න ඕන එකත් එකටම ඔය මනුස්සය.

ජේ. ආර්. ගෙ ඇට අට, චන්ද්‍රිකාගෙ 3.50හේ පාන්, උන්දැගෙම අවුරුද්දක් ඇතුලත විධායක ජනාධිපති ක්‍රමය අහෝසි කිරීම වගෙ වංචනික ඡන්ද පොරොන්දුවක් නොවුනට පේසාලෙ තෙල් කේස් එකත් මිනිස්සු ගොනාට අන්දවන්නට දේශපාලකයන් එදා ඉඳලම දරන උත්සාහයෙ තවත් එක් කඩ ඉමක්.

හරි දැනට ඇති ඒ පඳුරු තැලිල්ල. ආපහු යමු බලන්ට උඩහට...හරි කොතනදිද අපි කැලේ පැන්නෙ..ම්ම්ම්ම්ම්...හරි මේ තියෙන්නෙ..සැවුල් එනවෝ කියල අපෙ හාමිනේගෙ අක්කගෙ පොඩි එකී ගේ පුරා දුවනව හැංගෙන්ට තැනක් හොය හොය. ඒක වෙන්නෙ මෙහෙමයි. අපෙ උන්දැගෙ අප්පච්චි ගිහිල්ල බාබර්ව එක්කල එනව ගෙදර. පොඩි එකීගෙ කොණ්ඩෙ කප්පවන්ඩම. මිදුලෙ උස පුටුවක් තියල රෙද්දක් එහෙම බෙල්ල ගාවට ගැට ගහල බාබර් උන්නැහැ පොඩි එකීගෙ කොණ්ඩෙ කපනව. ඕකිට පොඩි කාලෙ හෙන කුචි. එහාට ඇඹරෙනව මෙහාට ඇඹරෙනව. ඒකයි අර අප්පච්චි ගිහිල්ල බාබර් එක්ක එනකොට " සැවුල් එනවෝ බුදු බුදු අම්මෝ " කියල ගේ මුලුක්කාදියෙ දුවන්නෙ. බාබර්ට අප්පච්චි කියන්නෙ සැලූන් කියල හින්ද පොඩි එකී කියන්නෙ සැවුල් කියල.

ඔය කොණ්ඩෙ කපනකොට කුචි වැඩේ පොඩි කාලෙ මටත් තිබ්බ. ඒ කාලෙ ඔය ඉලෙක්ට්‍රික් හෙයාර් ක්ලිපර්ස් තිබ්බ එකක් නෑ. ලෑන්ඩ් මාස්ටර් එකක් වගෙ අඬු දෙකක් තියන කොණ්ඩෙ කපන මැෂිමක් විතරයි තිබ්බෙ. ඉතිරි හරිය ඉතිං කතුරෙන්ම තමයි.

සැලූන් එක්ක පොඩි කාලෙ ඉඳලම මගෙ තිබ්බෙ බොහොම කිට්ටු ආශ්‍රයක්. ඒ මොකද කියනවනම්……... ඒ මොකද කියනවනම්..ඔය වචන සෙට් එක නිතරම පාවිච්චි කරපු අපේ රටේ නායකයෙක් හිටිය. කවුද දන්නවද? ඩී. එස්. සේනානායක මහත්මය. ලංකාවෙ පළවෙනි අහමැති තුමා.

ඒ කාලෙ චිත්‍රපටි බලද්දි ෆිල්ම් එක පටන් ගන්ට ඉස්සරවෙලා ජාතික කොඩිය දානව ස්ක්‍රීන් එකේ. ඒ වෙලාවෙ නැඟිටල පුටුව උඩ නැඟල සීරුවෙන් ඉන්න ඕන. ඊට පස්සෙ දානව රජයේ චිත්‍රපට අංශයෙ ( Government Film Unit නොහොත් G.F.U. ) එක එක වාර්තා වැඩසටහන්. එව්වයෙ තමයි ඔය පරණ සීන් කෝන් තියෙන්නෙ. ඩී.එස්. ගල් ඔය ව්‍යාපාරෙ විවෘත කරද්දි කරපු කතාව. පළවෙනි පාර්ලිමේන්තුව අමතල කරපු කතාව. ඔය වගෙ නොයෙක් එව්ව.එස්.ඩබ්.ආර්.ඩී. ගෙ අවමඟුලත් පෙන්නුව මට මතකයි. ඇපලෝ 11 හඳට ගිය එකත් පෙන්නුව. ඒ නම් අමරිකානු තානාපති කාර්යාලෙ අනුග්‍රහයෙන්. නීල් ආම්ස්ට්‍රෝං සහ එඩ්වින් ඕල්ඩ්‍රින් පාවෙවී වගෙ හඳේ ඇවිදින විදිහ බලල අපිට හරිම තන්තෝසයයි ඉතින්. ගෙදර ඇවිල්ලත් මිදුල පුරා මම ඒ වගෙ ඇවිද්ද...හෙහ්,හෙහ්,

හරි ආපහු සැලූන් ගැන. මෙතෙක් කාලෙකට මම ගෙදරදි රැවුල කපල නෑ කියල කිව්වොත් ඔහෙල පිළිගන්නවද? ඔය එහෙන් මෙහෙන් තැන් තැන් වල එන රැවුල්ගස් කපනව නම් තමයි. ඒත් සම්පූර්ණ රැවුල බෑමකට මම අනිවාර්යයෙන් යන්නෙ බාබර් සාප්පුවකට. ඒකයි මම කිව්වෙ බාබර් සාප්පු සමඟ මගේ ඇසුර බොහොම දුරදිග ගිය එකක්ය කියල.ඔය සම්බන්දවම පොඩි පලහිලව්වකුත් තියනව මගෙ.. ආය ඔහෙලට ඉතිං කිව්වම මොකද? හරි ඒ කතා ඔක්කොම වෙනම ලියන්නං මගේ කරණවෑමි කතා කියල.

රයිට් ආයම බලමු මේ පැටලුම ලෙහාගන්ට. දැං කියන්ට ඕන මොකක්ද? පිළිස්සූ කුකුළකු නිසා අහිමි වු මගේ ආදරය...එතකොට ඒ කේස් එකට සම්බන්දයි මගෙ යාලුව අජිත්.අජිත් සම්බන්ද වෙන්නෙ මෙහෙමයි. කොහොමද? අජිත්ගෙ නෑනා ..මාමගෙ දුව තමයි ඔය කතාවෙ ප්‍රධාන චරිතය. අපි දාමු නමක් ..මොකක්ද හොඳ?..ම්ම්ම් අසෝකා කියමුකො.

පිළිස්සූ කුකුළගෙ කතාව කියන්ට ඉස්සෙල්ල පසුබිම විදිහට අජිත් ගැන කියන්ට ගිහිල්ල තමයි කේබියයි, ගර්ත් මැනිල්ලයි,ස්පිල් කුම් කෝස්වේ එකයි රටේ නැති ඔක්කොම ඇදිල ආවෙ. රයිට් එහෙනම් ඉන්ටලාකො අජිත් ගැන එක කතාවක් කියන්නං වෙන මොකටවත් නෙවෙයි මිනිහ කොහොම කෙනෙක්ද කියල අඳුන්වල දෙන්න. විනෝදස්වාද කටයුතු නොහොත් එන්ටර්ටේන්මන්ට් අපිට ඒ දවස්වල බොහොම හිඟයි. ඉතිං හදිස්සියෙන් වත් නාට්‍යයක් එහෙම අහල පහල පෙන්නනව කියල ආරංචි උනොත් අපි ඉතිං පිස්සු බල්ලො වතුර හොයං යනව වගෙ තමයි හොයාගෙන යන්නෙ.

ඔන්න ඉතිං අපි හිටපු හරියට කිලෝ මීටර් විස්සක් වගෙ එහා රාජ කපුරු පෙන්නනව කියල ආරංචියක් ආව. දන්නවනෙ නේද රාජ කපුරු නාට්‍යය. ඒ කාලෙ මාර විදිහට ජනප්‍රිය උනා. විශේෂයෙන්ම ඒකෙ සිංදු.." සුවඳ සබන් ඇඟ ගාලා හායි හායි, කුඹුකෙ ළිඳෙන් දිය ඇදලා නාලා...හැඩ වැඩ වෙන්න ඔයා..ලස්සන සළු පළඳා එනවා ඔබව සොයා..." රවීන්ද්‍ර යසස් කුමානායක ඒ ගීතය ගායනා කරන්නෙ. ජගත් චම්පික බෙනරගම කියන්නෙ රවීන්ද්‍ර යසස්ගෙ මස්සිනා. මේ පහුගිය බස්නාහිර පළාත් සභා ඡන්දෙදි ඔය දෙන්නම ඡන්දෙ ඉල්ලුව ජෙනරල් ෆොන්සේකගෙ පක්ෂෙන්.

ඔය නාම යෝජනා දෙන කාලෙ ජගත් චම්පික ප්‍රධාන චරිතයක් රඟපෑව ස්වාධීන රූපවාහිනියෙ ගිය පබසරා ටෙලි නාට්‍යයෙ. හරියටම නාම යෝජනා බාර දීල දවස් ඕනනම් දෙකක් යන්ට ඇති. මෙන්න පබසරා නාට්‍යයෙ ජගත් චම්පික රඟපාපු චරිතය ( ඒ චරිතයෙ නම නලින්ද ) අතුරුදන් උනා. ඒ නාට්‍යයෙ මිනිහ කලේ කුකුල් ව්‍යාපාරයක්. බිත්තර විකුණන්ට කියල බයිසිකලේ පෙට්ටියත් බැඳගෙන ගිය මනුස්සය මෙන්න එක පාරට අන්තර්ධාන උනා. පබසරා අපි මෙහෙ හැමදාම බැලුව. මම මෙහෙ ඉන්නෙ යාලුවෙක් එක්ක එපාර්ට්මන්ට් එකක් ෂෙයාර් කරගෙන කියල මම කලින් කිව්වනෙ. ඒ යාලුව එක්ක මම කිව්ව " මොකද බං අර නලින්දට උනේ? හරිම අස්වාභාවිකයිනෙ ඒ යකා අතුරුදන් වෙච්චි විදිහ.." යාලුවටත් දෙන්න උත්තරයක් තිබ්බෙ නෑ. සතියකට වගෙ පස්සෙ පත්තරෙන් මේ මනුස්සය චන්දෙ ඉල්ලනවයි කියල දැක්කම තමයි ඔන්න වෙලා තියෙන්නෙ මොකක්ද කියල මීටර් උනේ...හෙහ්, හෙහ්,

ආසියාවේ ආස්චර්යයනෙ..ඔව්ව බලාපොරොත්තු වෙන්ට වෙනව..ඔව්ව සුලු දේවල්...

ඒත් ආණ්ඩුවට විරුද්ධව ඡන්දෙ ඉල්ලන්ට තරම් කොන්ද පණ තිබ්බ කලා කාරයො හැටියට රවීන්ද්‍ර යසස්, ජගත් චම්පික සහ තව එක්කෙනෙක් ඉන්නව නලීන් ප්‍රදීප් උඩවෙලට අපේ ගෞරවය මේ වෙලාවෙ පිරිනමන්නම ඕනෙ.

ප. ලි. - අපෙ උන්දැගෙ අප්පච්චි, මගෙ මාමණ්ඩි පහුගිය ජූනි පළවෙනිද අභාව ප්‍රාප්ත උනා. මට අවසාන කටයුතු වලට සහභාගි වෙන්ට උනේ නෑ. උන්දැ මියෑදුනෙ පිළිකාවක් කරන කොටගෙන නිසා දවස් දෙකක් ඇතුලත අවසාන කටයුතු කලා. මෙහෙ වැඩ රාජකාරිත් එක්ක ඒ හදිස්සියෙ මට නිවාඩු ගන්ට පුලුවන් උනේ නෑ. මගෙ නැන්දම්මගෙ මළ ගෙදරට සහභාගි වෙන්ටත් මට බැරිඋනා. එතකොට මම මෙහෙ ඇවිල්ල මාස හතරයි. ඒ නිසා ඒකත් මඟ ඇරුන. මොනව කරන්නද? ජීවිතේ හැටි එහෙම තමයි.