586. පුවක් එෂැණිං 45 - ග්‍රාම නිලධාරීන්ගේ විශේෂ පුහුණුව, ලංකාවේ රොබින් හුඩ්, Full Body Brain සහ එක්සත් පිවිතුරු අලවුඉසි මූල්‍යප්‍රතිලාභ පෙරමුණ…..

"ජාතික ආණ්ඩුව...." ඩේලි මිරර් කාටූනය - අවන්ත ආටිගල

ග්‍රාම නිලධාරීන් 1600කට පත්වීම් ලිපි ප්‍රදානය කිරීමේ උත්සවයක් පසුගියදා අගමැතිතුමාගේ ප්‍රධානත්වයෙන් පැවැත්විණි. දැනට දිවයින පුරා උග්‍ර ග්‍රාම නිලධාරී හිඟයක් පවතින අතර මෙම පත්වීම් ලිපි ප්‍රදානය කිරීමට නියමිතව තිබුණේ මීට මාසයකට ප්‍රථමය. 

මෙම ප්‍රමාදය පිළිබඳව අදහස දැක්වූ රාජ්‍ය පරිපාලන අමාත්‍යාංශයේ පුහුණු කටයුතු භාර අධ්‍යක්ෂතුමා මෙසේ පැවසීය.

"මේ ප්‍රමාදයට හේතුව අපේ පුහුණු කාලය අනපේක්ෂිතව මාසයකින් වගෙ දීර්ඝ වෙච්චි එකයි. ඒකට හේතුව හදිස්සියෙම අපිට උපදෙස් ලැබුන මේ පුහුණුවන ග්‍රාම  නිලධාරීන්ට විශේෂ පුහුණුවක් දෙන්නෙයි කියල බැරිවෙලාවත් ලංකාවෙ ජනාධිපතිකම එහෙම ලැබුනොත් කතා කරන්න එතකොට හැසිරෙන්න එහෙම ඕන කොයි විදිහටද කියල."

"අන්න ඒ විශේෂ පුහුණුව හින්දයි මේ ප්‍රමාදය සිද්ධ වුනේ. ඒත් මට සහතික කරල කියන්නට පුලුවන් අද මේ පත්වීම් ලබපු 1600 දෙනාට අපි ඒ විශේෂ පුහුණුව හරියාකාරව ලබා දීල තියනව ඒ හින්ද මහ ජනතාවට කිසිම විදිහකින් ඉදිරි අනාගතයෙදි බය වෙන්න දෙයක් නැහැය කියල....."

****************

ටං... ටිං.... ටුං....

****************

මහ බැංකුවේ බැඳුම්කර මගඩිය පිළිබඳව දැනට රක්ෂිත බන්ධනාගාරයේ පසුවන අර්ජුන් ඇලෝසියස් මහතා තමන්ට රුපියල් මිලියනයක චෙක්පතක් ලබාදුන් බව හිටපු අමාත්‍ය දයාසිරි ජයසේකර මහතා පිළිගනී. ඒ පිළිබඳව පසුගියදා පැවති මාධ්‍ය හමුවකදී ඔහු මෙසේ අදහස් දැක්වීය.

"ඔව් මම පිළිගන්නව ඇලෝසියස්ගෙන් මට රුපියල් මිලියනයක චෙක් එකක් හම්බ උනයි කියල. මගේ ආරක්ෂක නිලධාරියා ලවා මම ඒ චෙක් එක මාරු කරවගත්ත. ඒකත් ඇත්ත. ඒත් මම ඒ චෙක් එක ගත්තෙ මට වියදම් කරගන්න නෙවෙයි. මාගේ අදහස තිබ්බෙ ඒ සල්ලි දුප්පත් මහජනයා වෙනුවෙන් වියදම් කරන්න. නැති බැරි මිනිස්සුන්ට කන්ඩ බොන්ඩ අරන් දෙන්න. අඳින්ට යමක් අරන් දෙන්ට. ගෙවල් හදාගන්න උදව් කරන්න"

"මම හිතාගෙන හිටියෙ රටේ ඉන්න පෝසත් මිනිස්සුන්ගෙන් ඔය විදිහට සල්ලි අරගෙන දුප්පත් මිනිස්සුන්ට මොනව හරි උදව්වක් කරන්න. අර ඒ කාලෙ එංගලන්තෙ හිටියය කියන්නෙ රොන්බින් හුඩ්..අන්න ඒ වගේ..ඒත් ඒ එක්කම වස වැරැද්දක්නෙ උනේ. මම එතකොට ක්‍රීඩා ඇමතිනෙ. ඔබ තමුන්නාන්සේලාට මතක ඇති අර ක්‍රිකට් ක්‍රීඩකය ලසිත් මාලිංග..."

"ඒ මනුස්සය අර ගිරව් බෙනේද රිලව් බෙනේද කියල කට කැඩිච්චි කතාවක් කියල මෙතන රටේම මිනිස්සු මට රිලාසිරි කියල කියන්න ගත්තනෙ. ඒ කතාවට මගෙ පැනපු මල මාසයක් විතර අල්ලල හිටිය. ඉතිං ඒ අව් අස්සෙ මට ඔය ඇලෝසියස්ගෙ සල්ලි ගැන මෙලෝ සංසාර දෙයක් මතක නැතුව ගියා. ඔන්න ඕකයි ඇත්තටම සිද්ද වුනේ.. නැතුව වෙන වංචාවක් දූසනයක් එහෙම මොකවත් සිද්ද වුනේ නෑ...ඩිස්කේ අම්මට ඩිස්කේඩේ..."

****************

ටං... ටිං.... ටුං....

****************

පාර්ලිමේන්තු මන්ත්‍රීවරුන් 118 දෙනෙකු මහ බැංකු බැඳුම්කර වංචාවට චෝදනා ලබා සිටින අර්ජුන් ඇලෝසියස් මහතාගෙන් මුදල් ලබාගෙන ඇතිබවට බැඳුම්කර කොමිසම් වාර්තාවෙහි සඳහන් වන බව තතුදත් ආරංචි මාර්ග සඳහන් කරති.

මේ පිළිබඳව අදහස් දැක්වූ ඇලෝසියස් මහතා සඳහන් කලේ එසේ හැකි පමණ වැඩි මන්ත්‍රීවරුන් සංඛ්‍යාවකට මුදල් ලබාදෙන ලෙසට තමන්ට උපදෙස් දුන්නේ බැඳුම්කර වංචාවේ මහ මොළකරු විසින් බවයි.

"අර්ජුන් මලේ පුලුවන් තරම් වැඩි මන්ත්‍රීල ගානකට සල්ලි දෙනව. අපේ පාර්ලිමේන්තුවෙ ඉන්න හරක්ට සල්ලි හම්බවෙනවනම් කොහෙං උනත් කමක් නෑ. උඩ පැනල බාර ගන්නෙ. මම දන්නෙ නැද්ද උංගෙ හැටි. මමත් ඕකෙ ඉන්නවනෙ 77 ඉඳලම. පුලුවන් තරම් වැඩි ගානකට සල්ලි දීල ඒ ඔක්කොම මේකට පටලවල තිබ්බම වැඩේ බැරිවෙලාවත් මාට්ටුවෙලා බැලතණ ගහේ රුන්න වගේ උනොත් අපිට වාසියක් ගන්න පුලුවන්. මොකද ඔය කෝක උනත් අන්තිමට විවාද කරන්න එන්නෙ ඔය හරක් මඩුවටනෙ." 

බැඳුම්කර වඤ්චනික මගඩියේ මහ මොළකරු තමාට එසේ පැවසූ බව ඇලෝසියස් මහතා තවදුරටත් පවසා සිටියේය

"මහමොළකරු කියන්නෙ තනිකරම මස්තිෂ්කයක්...ඇඟ පුරා මොළේ...Full Body Brain...." ඇලෝසියස් මහතා අවසාන වශයෙන් පැවසීය.

****************

ටං... ටිං.... ටුං....

****************

මේ අතර අර්ජුන් ඇලෝසියස් මහතාගෙන් මුදල් ලබාගත් මන්ත්‍රීවරුන් 118 දෙනා එකතුවී නව සන්ධානයක් පිහිටුවා ගතයුතුයැයිද අදහස් පලවී ඇත. "එක්සත් පිවිතුරු අලවුඉසි මූල්‍යප්‍රතිලාභ පෙරමුණ" ලෙස හැඳින්වෙන එම සන්ධානයේ ඡන්ද ලකුණ ලෙස මුදල් නෝට්ටු මිටිය ලබාදෙන ලෙස මැතිවරණ කොමිසමේ සභාපතිවරයාගෙන් ඉල්ලාසිටීමටද තීරණය වී ඇත. 

"මැතිවරණ කොමිසමේ සභාපතිතුමා මුදල් නෝට්ටු මිටිය ළකුණ දෙන්න බෑ කිව්වොත් අපි හිතාගෙන ඉන්නෙ අත් දෙකක් හංසයෙක්ගෙ බෙල්ල මිරිකන සීන් එකක් චන්ද ලකුණ විදිහට ඉල්ලන්න. එහෙමත් නැත්නම් බැඳුම්කරේක ෆොටෝ එකක් වුනත් අවුලක් නෑ. අනික අපේ මේ පිවිතුරු අලවුඉසි පෙරමුණ කියන්නෙ ලංකා ඉතිහාසෙ පළවෙනි වරට දේශපාලන පක්ෂ භේදයකින්, ජාති ආගම් කුළ භේදයකින් එතකොට ස්ත්‍රී පුරුෂ භේදයකින් පවා තොරව එකම අරමුණක් වෙනුවෙන් මහජන නියෝජිතයො එකා වගෙ එක්සත් වෙන ප්‍රථම අවස්ථාව"

"මේ පෙරමුණේ ප්‍රධාන සහ එකම අරමුණ මුදල්..මුදල්..මුදල්...දැන් රටක් දියුණු කරන්ට මොනවද ඕන ප්‍රධාන වශයෙන්? මට කියන්න....මුදල් නේද? ඉතිං මුදල් එකම අරමුණ කරගෙන  මහජන නියෝජිතයින්ගෙ මේ එකතුවීම මට ඉස්තීරයි මේ රටේ අනාගත දියුණුවේ නව සන්ධිස්ථානයක් වෙනව..." 

නව පෙරමුණේ මුල් පෙලේ සාමාජිකයෙක් පුවක් එෂැණිං අමතා එලෙස ප්‍රකාශ කලේය.