686. බ්ලොග් හමුවට යන අතරමඟ...

ගිණිගත්හේන බස් නැවතුම්පල....

අර බෝ මලු සීන් එකේ ඉතිරි කොටස ලියල දාන එක දවස් දෙක තුනකට කල්දාන්ට වෙනව මයි පෙන්ස්.. ඒ මොකද කිව්වොත් හක්බෙල්ලාවක බක් පෝයදවසෙ අති උත්කර්සවත් අයුරින් පැවැත්වුනු අපේ මිඩ්ල් ඒජස් (මධ්‍ය කාලීන) බ්ලොග් ගෙට්ටුගෙදර් එක ගැන ඉස්සෙල්ල ලියමුයි කියල මම කල්පනා කලා..

මම මේ යන්නෙ ඔය මංජුලය ඕගනයිස් කරපු බ්ලොග් හමු වලින් තුන්වෙනි එකට..කලින් දෙපාරමත් වගේම මේ ගමනත් මම ගියෙ නාවලපිටියට හවස 2.20 ට පේරාදෙණියෙන් කෝච්චියක තියනව. ඒකෙ නාවලපිටියට ගිහිල්ල එතනිං ගිණිගත්හේනට බස් එකේ ගිහිල්ල එතනිං හැටන් වල ඉඳල අවිස්සාවේල්ලට හරි කොළඹට හරි යන බස් එකක නැඟල..

මම ගියෙ පහුගිය 4 වෙනිදනෙ..පහුවදා පෝය ඒ වගේම ඉස්කෝල නිවාඩු..මම ගිය පෙට්ටියෙ බාගෙට බාගයක් හිටියෙ ඉස්කෝල කොල්ලො කෙල්ලො..බහුතරයක් හයි ස්කූල් කෙල්ලො..උං බොහොම සන්තෝසෙං සින්දු කිය කිය ගියා..

මටත් ඉතිං මතක් උනා අපි ඉස්කෝලෙ  3, 4, 5, 6 වගෙ පංතිවල ඉන්නකොට නිවාඩු දෙන දවසට අම්මගෙං කීය කීය හරි ඉල්ලං ඇවිල්ල (ඒ කාලෙ මම හිතන්නෙ උපරිම රුපියල් පහක් වගෙ..අපොයි ඒ ගාන හොඳටම ඇති..) අලියා බීම, කේක්, බිස්කට් එහෙම ගෙනල්ල පංති භාර මැඩම්ට හරි සර්ට එතකොට අපිට ඒ ඒ විෂයයන් උගන්නපු ගුරු මණ්ඩලේට පිළිගන්වල අපිත් අන්තිමට ඉතුරු වෙන එව්ව කෑව බිව්ව...අන්තිමට පොඩි සිංදුවක් දෙකක් එහෙමත් කියල..නාට්‍යයක කෑල්ලකුත් කරල විවිධ ප්‍රසංගයකුත් තිබ්බ..එදවස එසේ විය...

එදා ඒ කියන්නෙ පහුගිය  අඟහරුවාද කොහොම හරි  මම කෝච්චියට නැග්ග වෙලාවෙ ඉඳල වහිනව..ඒ මදිවට ජනෙල් බාගෙට බාගයක් හරියට වැහෙන්නෙ නෑ..ඒ කියන්නෙ අයිනෙම සීට් එකේ ඉන්න මනුස්සය බාගෙට නාලයි කෝච්චියෙන් බහින්නෙ..එදා කෝච්චිය හොඳටම පරක්කුයි....හවස හතරට වගෙ ගිණිගත්හේනට යන්ට තියන එක එදා ගියේ පහටත් කිට්ටු කරල..

මම හාහා පුරා කියල ඔය මංජුලයගෙ පොට් එකට යන්ට ඕකගෙං විස්තර අහද්දි පොර කිව්ව "අයියෙ... මේ... එනකොට හොඳ බ්ලැන්කට් එකක්නම් අරං වරෙං මතක ඇතුව හොඳේ..මෙහෙ රෑට අම්බානක සීතලයි..."  කියල.. මට ඔන්න ගිණිගත්හේනට ගියාම තමයි මතක් උනේ අඩේහ් බ්ලැන්කට් එකෙක් ගේන්ට අමතක උනා නේද කියල..ඒ වෙන කොටත් වැස්ස..පස්සෙ ගිණිගත්හේන ටවුමෙ පොඩ්ඩක් ඇවිදල රෙදි කඩේකිං බෙඩ් ෂීට් එකකුත් ගත්ත බ්ලැන්කට් එක වෙනුවට..

ඊගාවට කොළඹ පාරට ඇවිල්ල නැග්ග හැටන් - කොළඹ  බස් එකක..කිතුල්ගල හරියට යනකොට වහින්ට ගත්ත පැල් බැඳගෙන..ආ..ඊට කලින් ගිය පාර මංජුලයගෙ බ්ලොග් හමුවට යද්දි මට ගිණිගත්හේනෙදි වෙච්චි සීන් එකක් කියල ඉන්නම්කො....

මම මහවැලියෙ වැඩ කරද්දි එකට වැඩ කරපු යාලුවන්ගෙන් සීයට අනූවක්ම ගම ඇහුවොත් එක්කො ගිනිගත්හේන, එක්කො කිතුල්ගල, එක්කො ලක්ෂපාන, එක්කො මස්කෙළිය, එක්කො කොටගල, එක්කො තලවකැලේ...එහෙම උනේ ඒ කාලෙ මම ඔය කියන්නෙ 1984 කාලෙ වගේ..මහවැලි ඇමති ඇවිල්ල හිට ගාමිණී දිසානායක..ඒ හින්ද නැචුරලි නුවරඑළිය - මස්කෙළිය ආසනෙන් තමයි බහුතරය මහවැලියට ගත්තෙ..

ඊගාවට බහුතරය හිටියෙ ගාල්ල, මාතර, අම්බලන්ගොඩ, බටපොල පැත්තෙන්..එහෙම උනේ ඒ කාලෙ හිටපු යූ.ඇන්.පී. ගාල්ල දිස්ත්‍රික් සංවිධායකය ඇවිල්ල ගාමිණීගෙ යාවජීව බොක්ක..ජගත්සේන..

ඉතිං ඔය ආපු  මා එක්ක හිටපු එක යාලුවෙක්ගෙ ගම හැබ්බෑකන්ද..ගිනිගත්හේනෙ ඉඳල ලක්ෂපාන පාරෙ යන්ට ඕන මට මතක විදිහට..ඉතිං ගියපාර මම හක්බෙල්ලාවක යන්ට ගිනිගත්හේන හන්දියෙ බස් එකක් එනකල් ඉන්නකොට ඔන්න මම දැක්ක කට කපල පුරවල බස් එකක් යනව හැබ්බෑකන්ද කියල..

මට එක පාරටම මතක් උනේ අර මගෙ හැබ්බෑකන්දෙ යාලුව..මිනිහගෙ නම විපුලසිරි..හැබැයි වැඩිකල් මහවැලියෙ හිටියෙ නෑ..එන්.ඩී.ටී. මිකැනිකල් කෝස් එකට සිලෙක්ට් වෙලා ඒ දවස්වලම වගෙ අස් වෙලා ගියා..පස්සෙ පිළිමතලාවෙ අපෙ මහගෙදර ගාවමනෙ යටිනුවර සී.ටී.බී. ඩිපෝ එක තියෙන්නෙ..90/91 කාලෙ විතර විපුලසිරි යටිනුවර ඩිපෝ එකේ වැඩකරනව කියල ආරංචි වෙලා මම ගිහිල්ල මිනිහව හම්බ උනත් එක්ක..

ඉතිං අර ගිණිගත්හේනෙදි හැබ්බෑකන්ද බස් එක දැකල මට විපුලයව මතක් උනාය කිව්වනෙ.. ඔන්න ඒ එක්කම ආව අවිස්සාවේල්ල බස් එකක්..ඒකෙ මම දනිපනි ගාල එල්ලුනා හක්බෙල්ලාවක යන්ට..

නැඟල සීට් එහෙක ඉඳගත්තත් මගෙ කල්පනාව තිබ්බෙ විපුලයා ගැන.."ටිකට් ගන්න ටිකට් ගන්න.." කොන්දොස්තරයා මා ගාවට ආව...."හැබ්බෑකන්ද එකක්.."  මට ඉබේම කියවුනා.."මේක හැබ්බෑකන්දට යන්නෙ නෑ..බහින්න බහින්න...." ඒ යකා එහෙම කියල බෙල් එක ඇද්දා..එතකොටයි මට හරි සිහිය ආවෙ.."නෑ..නෑ..මට යන්ට ඕන හක්බෙල්ලාවකට..."  මම විගහට එහෙම කිව්ව..ඇති කලබලේට ගොම්බෙල්ලාවක කියල කියවුනේ නැතුව..පස්සෙ මට එහෙම හිතුනා...

හරි දිගටම ලිව්වොත් බොලාට කියවන එකත් එපාවෙයි...දැනට ඇති..

ගූගල් මැප් එකේ නිල් බෝලය පැනීම, බුදු පිළිමය පහුවීම, දියෙස් අයියගෙ ලැවරිය කඩේ, උරුහම් බෑමට ක්ෂණික ප්‍රතිචාර දක්වන බාප්පා යනාදී කරුණු කාරණා පිළිබඳව වැඩිමනත් විස්තරද  සමඟ  බ්ලොග් හමුවේ රසාලිප්ත තොරතුරු අටෝරාසියක් අද හෙටම  මීලඟ පෝස්ට් එකෙන් බලාපොරොත්තු වන්න...

ස්තූතියි...