 |
| අඟහරු ග්රහයා මත කියුරියෝසිටි |
අඟහරු ග්රහයා මත දර පෝරණුවේ පිලිස්සූ අගනා ගඩොල් තියනවයි කියල කියන්නෙ....
මේ අපේ සිතුම් පැතුම් එතකොට මුලු මහත් චින්තන රටාවම නව මානයකට යොමු කරවන මහාර්ඝ සොයාගැනීම කරල තියෙන්නෙ ශ්රී ලාංකිකකයෙක්. අන්න ඒකයි ඒකෙ අවයවය……
(ඒ අවයව කතාවේ පේටන්ට් අයිතිය නැසීගිය මාගේ දයාබර මාමණ්ඩිය සතුයි....අන්න ඒකයි පුතා ඒකෙ අවයවය..උන්දැ ජීවත්ව ඉන්දැද්දි අපෙ උන්දලගෙ මහගෙදර සාලෙ ඔහොම මෙහෙම ඇඳි පුටු දෙකක දිගාවෙලා ගමරට තොරතුරු එතනින් ගියාම කාලගුණ තොරතුරු එහෙම පිළිබඳව බොහොම ගැඹුරින් විස්ලේසනය කරමින් ගතවුනු සැඳෑ කාලවල් මහා රාසියකදි උන්දැ මිනිත්තු තුන හතරකට සැරයක් වගෙ ඔය අවයව කතාව කියනව. අනේ උන්දැට නිවන් සැපම ලැබේවා!)
මේ අසමසම සොයා ගැනිල්ල කරල තියෙන්නෙ ලේසි පාසු පුතයෙක් එහෙම නෙවෙයි. අර දිවඉණ කියන ජාතික සාර සංග්රහයෙ ජෝට්ට පුවක්පක් කලාවේජියෙක් වන කීර්ති පාටකුලසූරිය මහත්තය තමයි ඒ හපනා. යුද්දෙ තිබ්බ කාලෙ ඉරිදා දිවයිනේ ආරක්සක කොලම ලිව්වෙ ඒ මහත්තය. ඒකෙ තිබ්බ තොරතුරු අපේ හමුදාවෙ උසස් නිලදාරීන්ට බොහොමත්ම උදව් වුනාලු යුද සැලසුං එහෙම සකස් කරද්දි. යුද්දෙ ඉවර උනයිම් පස්සෙ මිට්ට කීර්තිමයි එහෙම කිව්වෙ. ඒ හින්ද බොරුවක් එහෙම වෙන්ට බෑ කොහෙත්ම.
ඔය මනුස්සය පත්තරවලට ලිපි ලියන නවතම රටාවක් අඳුන්වල දුන්නු මනුස්සයෙක්.."වර්ණකුළ මෙතඩ්" කියලයි ඒකට කියන්නෙ...හෙහ්...හෙහ්..ඔහෙලට එක පාරටම "වර්ණපාල මෙතඩ්" එක මතක් උනා නේද? ඒ වර්ණපාල මෙතඩ් එකේ නිර්මාතෘ ඇවිල්ල අර කාලයක් උප ඇමතිකමක් එහෙම කරපු මහාචාර්ය විශ්වා වර්ණපාල මහත්තය. වර්ණපාල මෙතඩ් එක ගැන හැමම පාහේ දන්න නිසා මම නැවත කියන්න යන්නෙ නෑ අයන්නෙ ඉඳල හොඳේ?
ඉතිං ඔය වර්ණකුල මෙතඩ් එක කියන්නෙ වාක්ය දෙක තුනක් සිංහලෙන් ලියල ඒකම ඉංග්රීසියෙන් ලියනව එතනම වරහන් දාල... ඒ කියන්නෙ විදින් බ්රැකට්ස් තුල. ඈස් ඇන් එග්සාම්පල් සම්තිං ලයික් දිස්…
පසුගිය බදාදා තම කඳවුරු තුලින් පිටතට පැමිණි ආරක්ෂක හමුදාවෝ කොටි ත්රස්තවාදීන් හට අමතක නොවන පාඩමක් ඉගැන්වූහ. (Past wednesday there camp outcome security forces tigers no forget lesson teached) මල්ටි බැරල් බර අවි යොදා ගනිමින් හමුදාව එල්ල කල මේ අඛණ්ඩ ප්රහාරයට මුහුණදිය නොහැකිව ත්රස්තවාදීහු හිස් ලූලූ අත පළා ගියහ. (Multi barrel heavy weapon used this our army long long attack no facing terrorists head lu lu hand split wented.)
කොහොමද බුවාගෙ වැඩ? අන්න පොර තමයි මේ අඟහරු ගඩොල් හොයාගත්තෙ…Fitting ..isn't it?
මෙන්න මේ මහා පුවක්පක් කලාවේදියා ලියපු ලිපිය....
අඟහරු ග්රහයා මත ගඩොල් තොගයක්
කීර්ති වර්ණකුලසූරිය
අඟහරු ග්රහයා මත ගොඩනැඟිලි ඉදිකරන ගඩොල් තොගයක් තිබී සොයාගෙන ඇතැයි ඇමරිකානු නාසා ආයතනය මුළු ලොවම විශ්මයට පත්කරමින් හෙළිකර ඇත.
කියුරෝසිටි යානාව විසින් මේ ගඩොල් තොගය සොයාගෙන තිබේ.
මේ ගඩොල් වසර බිලියන 3.5 ක් පැරණි බව නාසා ආයතනය කියයි.
මෙය විශ්මය ජනක සොයාගැනීමක් යෑයි නාසා ආයතනය අභ්යවකාශ භූ විද්යාඥ ජෙනිපර් එයිගන්බ්රොaඩ් මහත්මිය පැවසුවාය.
මින් සනාථ වන්නේ අඟහරු ග්රහයා මත ජනාවාස තිබීම බවද ඇය කීවාය.
ඉදිරියේදී කියුරෝසිටි රෝවර් යානාව මෙයට වඩා විශ්මය ජනක තොරතුරු සොයාගනු ඇතැයි බලාපොරොත්තු වන බවද ඇය කීවාය.
මේ තියෙන්නෙ ලිපියත් එක්ක පළවෙච්චි ෆොටෝස් එක...කොහොමද හුදී ජන පහන් සංවේගය උදෙසා මනුස්සය ගඩොල් කෑලි ටික රවුං කරල එහෙම පෙන්නල තියන අපූරුව...වෙරි ගුඩ් මෑන් නෝ?
දැන් ඔය අතිපණ්ඩිත පුවක්පක් කලාවේජියා ඔය ප්රවෘත්තිය ලිව්වෙ මෙන්න මේ ඔරිජිනල් ප්රවෘත්තිය බලාගෙන...
NASA says Mars Curiosity rover discovered organic compounds, which are the ‘building blocks of life’
NASA revealed the scientific discoveries made by the Mars Curiosity rover include organic compounds, which are the "building blocks of life."
Details of the enigmatic discovery, which appear in the journal Science, were revealed in a news conference Thursday.
"We found organic molecules in rocks from an ancient lake bed," said Jen Eigenbrode, research scientist at NASA's Goddard Space Flight Center in Maryland and lead author of one of two new papers on the discovery. "Those organic molecules could have come from life. We don't know that there was ever life on Mars."
So while there was no direct evidence of life, it's still notable the building blocks of life exist, Eigenbrode said, although they could have come from non biological sources.
අර "Building blocks of life" නැත්නම් ජීවයේ තැනුම් ඒකක කියන වචන හතර තමයි අපේ මේ ජීනියස් තුමා ගඩොල් කියල පරිවර්තනය කලේ. මට පොඩි අවුලක් තියෙන්නෙ බිල්ඩිං බ්ලොක්ස් කිව්වම මේ යස්සය මොකද මේක බ්ලොක්ගල් කියල පරිවර්තනය නොකලෙ කියල. සමහරවිට මිනිහ හිතන්න ඇති බ්ලොක්ගල් කියනවට වඩා ගඩොල් කිව්වම පොඩි ගැම්මක් එනවයි කියල.
ඊලඟට අර කියන අඟහරු මත ජනවාස කතාව නම් තනිකරම අතින් දාපු එකක්. එහෙම එකක් ගැන අඩුතරමෙ අංශු මාත්රයක තරම් සඳහනක්වත් අර ඔරිජිනල් වාර්තාවෙ නැහැ.
වැඩේ කියන්නෙ මේ මනුස්සයගෙ මඤ්ඤම පැත්තක තියමුකො. යකෝ සාක්කි දිවයින කියන පත්තර කඩමාල්ලෙ "Building blocks of life" කිව්වහම ඒ කියන්නෙ ගඩොල් ගැන නෙවෙයි කියල තේරුම්ගන්න පුලුවන් උප කර්තෘ කෙනෙක්, විශේෂාංග කර්තෘ කෙනෙක් එතකොට ප්රධාන කර්තෘ කෙනෙක් හිටියෙම නැද්ද? අනේ කාලේ වනේ වාසේ කිව්වලු.
දයාසේන ගුණසිංහ මහත්තය වගෙ පඬිවරයෙක් ආරම්භක කර්තෘත්වය දරපු පත්තරේකට ගිය කල...අඟහරු ගඩොල්පල්ලා කියුරියෝසිටි එකේ ඉස්සරහ හයි කරල තියන අර ගඩොල් එකතු කරන කුල්ලපල්ලා ඇත්තටම දුකයි...
****************
ටං... ටිං.... ටුං....
****************
Meanwhile inside NASA….මේ අතර නාසා ආයතනය ඇතුලේ....
නාසා එකේ අඟහරු පර්යේෂණ ව්යාපෘතියේ ප්රධාන පාලකවරයා කැන්ටිමට ඇවිල්ල කෝපි එකක් බොන්න ලෑස්තිවුනා විතරයි. ඔහුගෙ සහායකය හතිමුනිං දාගෙන දුවගෙන ආව.
"බොස් හරි වැඩක්නෙ වෙලා තියෙන්නෙ…"
"මොකද මනුස්සයො හති දාගෙන? මොකෝ අපේ කියුරියෝසිටි එක අඟහරු පොලීසියෙන් හයි ස්පීඩ් අල්ලලද?" ප්රධාන පාලක වරයා ඇසූයේ හඬනඟා සිනා සෙමිනි.
"බොස්ට ඉතිං හැම එකක්ම විහිලුනෙ…" සහායකය කිව්වෙ නෝක්කඩු ස්වරයෙන්..
"හරි හරි ඒක ගණං ගන්න එපා..කියනවකො කියන්ට ආපු එක.."
"අපි අර කියුරියෝසිටි එකෙන් ගත්තු ෆොටෝ වගයක් ප්රසිද්ද කලානෙ"
"ඔව්..ඉතිං?"
"ඒ ෆොටෝ එකක තියනවලු ගඩොල් "
"ගඩොල් තියනවලු?.....කවුද දැං ඔහොම කතාවක් කියන්නෙ?"
"මේ ශ්රී ලංකා කියල රටක ජර්නලිස්ට් කෙනෙක්…"
"හ්ම්ම් එහෙමද? කියන්නත් බෑ තමයි…"
"ඒ කිව්වෙ බොස්?"
"නෑ මම මේ කිව්වෙ ඔය පෙරදිග රටවල්වල තියෙන්නෙ පුලුවන් අමුතු අද්භූත ශාස්ත්ර එහෙම. මම දැන් අවුරුද්දකට විතර ඉස්සර කියෙව්ව ඒත් ඔය පෙරදිග රටක නාත දෙයියො කියල දෙවි කෙනෙක් මොකක්ද ඒ රටේ දොස්තරලටත් හොයාගන්න බැරිවුනු ලෙඩකට හේතුව තමන්ගෙ බල මහිමයෙන් හොයල දුන්නයි කියල.."
"ආ..හරි හරි බොස්..ඒත් මේ රටම තමයි....ශ්රී ලංකාව..ශ්රී ලංකාව...මට මතකයි"
"අන්න ඒකනෙ කියන්නෙ. මේ ගඩොල් කතාව ඇත්ත වෙන්න පුලුවන්. ෆොටෝවල අපිත් නොදැක්ක ගඩොල් ඔය අද්භූත බල මහිමයට පේන්න පුලුවන්...... "
"ඉතිං අපි දැන් මොකද මේකට කරන්නෙ?"
"හරි අපි මෙහෙම කරමු. ඔය කියන ජර්නලිස්ට්ව අපි පත්කරගමු අපේ අඟහරු ගවේෂණ වැඩ පිළිවෙලේ ජේෂ්ඨ උපදේශකයෙක් විදිහට..."
"මිනිහ එයිද බොස්? මට හිතෙන විදිහට ඒ මනුස්සයට ඒ රටේ ජාතික වීරයෙක් විදිහට සලකනව වෙන්න ඕන. ඇයි දෙයියනේ...අපි මේ මෙච්චර ඩොලර් බිලියන් ගණං වියදං කරල අඟහරුට යානා යවල පොටෝ ගෙන්නගෙන අපේ ඉහලම පෙලේ විද්යඥයින්ටත් බැරිඋනානෙ ඔය ගඩොල් හොයාගන්ට. මේ මනුස්සය මොනතරම් දක්ෂයෙක්ද කියනවනම් ඔෆිස් එකේ මේසෙ ඉඳගෙන යන්තමට ඒ ෆොටෝ එක දැක්ක ගමං කිව්වලුනෙ මෙන්න යකෝ අඟහරු ලෝකෙ ගඩොල් කියල. කොහොම ඔලුවක් තියෙන්න ඕනද එහෙම එක පාරටම කියන්ට...අන්න ඒකයි මම කිව්වෙ මනුස්සය කැමතිවෙයිද දන්නෙ නෑ කියල මෙහෙට ඇවිදිල්ල අපිත් එක්ක වැඩ කරන්ට.."
"හ්ම්ම්ම්..ඒකත් නම් ප්රශ්නයක් තමයි..ආ..හරි මට ඒ ප්රශ්නෙටත් විසඳුමක් මතක් වුනා..අපේ අර ඩොක්ට ගුණපාල ඉන්නෙ.."
"ඔව්..ඉතිං?"
"මට මතක විදිහට ඩොක්ට ගුණපාල ලංකාවෙ කෙනෙක්. අපි කියමු ඩොක්ට ගුණපාලට අර ජර්නලිස්ට්ට පර්සනලි කතා කරල කොහොම හරි කැමති කරවගන්ටෙයි කියල අපිත් එක්ක ජොයින් වෙන්න.."
"ඒක හොඳ අදහසක් බොස්.."
"ඔව්..ඩොක්ට ගුණපාලට දැන්මම පණිවිඩයක් යවන්න පුලුවන් ඉක්මනට ඇවිල්ල මාව හම්බ වෙන්නෙයි කියල..Treat this as a priority one matter Ok? "
"OK Boss...."
"ආ..මේ පොඩ්ඩක් ඉන්නව තව එකක්.."
"ඒ පාර මොකක්ද?"
"අපි අර 2020 අවුරුද්දෙ අඟහරු ලෝකෙට යවන්න හිතාගෙන ඉන්නවනෙ මේ කියුරියෝසිටි වගේම තවත් යානයක්.."
"ඔව්..ඉතිං?"
"වහාම මේ අදම දැනුම් දෙනව ඒ ප්රොජෙක්ට් එකේ වැඩ නවත්වන්නෙයි කියල.."
"මොකක්? වැඩ නවත්තන්ඩ? ඒ මොකටද?"
"ඒ මොකටද කියන්නෙ? 2020 වෙනකල් ඉන්ට බෑ..මට ඉවසිල්ලක් නෑ ඔය අඟහරු ගඩොලක් උඩ දාල අල්ලනකල්.."
"ඉතිං?"
"ඉතිං අපි මේ අවුරුද්ද ඉවරවෙන්ට ඉස්සෙල්ල යවමු අඟහරු ලෝකෙට ටෙන් වීල් ටිපර් එකකුයි, ලෝඩර් එකකුයි.."
"ඒ මොකටද ඒ?"
"ඒ මොකටද අහන්නෙ? ඇයි මනුස්සයෝ අර අඟහරු ලෝකෙ තියෙන ගඩොල් ගොඩ පටවගෙන අරං එන්ටනෙ.....නැතුව ආය වෙන අහවල් දේකටද?"
"හරි හරි මට තේරුනා…"
"තව වැදගත් දෙයක් තියනව. කියුරියෝසිටි එක ඔපරේට් කරන අයට කියනව බොහොම පරිස්සම් වෙන්නෙයි කියල "
"ඇයි බොස් ඒ?.."
"ගඩොල් කෑලි තිබ්බයි කියන්නෙ ඔය කිට්ටුවම හුණු වලකුත් අනිවාර්යයෙන්ම ඇති. කියුරියෝසිටි එක හුණු වලකට එහෙම වැටුනොත් මළ කෙලියක් වෙන්නෙ. ඒ හින්ද කියනව බොහොම පරිස්සම් වෙන්ට කියල…"
"බොස් ඔහොම කියනකොට මට තව දෙයක් මතක් වුනා.."
"ඒ මොකක්ද? "
"ඔතන ගඩොල් කෑලි තියනවනම් ගඩොල් කපපු කට්ටියකුත් ඉන්ට එපාය....කෝ ඒ අය? ""
"ම්ම්ම්..මම හිතන්නෙ මෙහෙමයි...ඔය අනවසරයෙන් ගඩොල් කපන තැනක් වෙන්න ඕන..එකත් එකටම අපේ කියුරියෝසිටි එක එනව දැකල එයාල හිතන්න ඇති අඟහරු පොලීසියෙන් කඩා පනිනව කියල අල්ලගෙන ගිහිල්ල කූඩුවෙ දාන්ට. ඒ හින්ද උං දුවල හැංගෙන්ට ඇති…"
"හරි එහෙම තමයි වෙන්න ඇත්තෙ...මම කියන්නං අපේ ඔපරේටර්ස්ලට කියුරියෝසිටි එක ඔපරේට් කරනකොට බොහොම පරිස්සං වෙන්නෙයි කියල. බැරිවෙලාවත් ඔය ගඩොල් කපන එකෙක් හැප්පිල ඌ මලොත් එහෙම ආය කතා දෙකක් නෑ උං අපේ කියුරියෝසිටි එකට ගහල පෙරලල ගිනි තියල දානව…"
****************
ටං... ටිං.... ටුං....
****************
අඟහරු ග්රහයා මත දක්නට ලැබෙන කිසිදු ගහ කොළකින් තොර ශුෂ්ක පරිසරයට හේතුවන්නට ඇත්තේ කිසිදු පාලනයකින් තොරව හිතුමතේ ගඩොල් කැපීම විය හැකියයි ලෝක පරිසර වේදීහු අනුමාන කරති. පරිසරයට වන හානිය පිළිබඳව කිසිදු තැකීමක් නොකොට ගඩොල් කැපීම දිගටම කරගෙන ගියහොත් නුදුරු අනාගතයේදී පෘථිවිය මතද අඟහරු මත දක්නට ලැබෙන පරිසරයට සමාන පරිසරයක් නිර්මාණය වීමේ දැඩි අවදානමක් ඇතැයිද ඔවුහු බිය පළකරති.
උද්ගතවිය හැකි මෙවන් දැඩි අනර්ථකාරී තත්වයක් පිළිබඳව කල්තබා අනතුරු හැඟවීම වෙනුවෙන් ලෝක පරිසර සංවිධානය විසින් ශ්රී ලාංකික පුවත්පත් කලාවේදී පාටකුලසූරිය මහතා වෙත රන් පදක්කමක් සහ සහතික පත්රයක් පිරිනැමීමට කටයුතු යොදා ඇත.
****************
ටං... ටිං.... ටුං....
****************
ඊයෙ රෑ මම සුපුරුදු ලෙස අපේ උන්දැට කෝල් එකක් ගත්ත. ආගිය තොරතුරු එහෙම කතාකරල පස්සෙදි මම මෙහෙම කිව්ව.....
"මේ මාර වැඩක්නෙ වෙලා තියෙන්නෙ.."
"මොකෝ?"
"ඊයෙද පෙරේදද දිවයින පත්තරේ තියනවනෙ අඟහරු ලෝකෙ ගඩොල් ගොඩක් තියල හම්බ උනාය කියල"
"අඟහරු ලෝකෙ?"
"ඔව්..ඔව්..එහෙ තමයි..අර කියුරියෝසිටි කියල පොඩි වාහනයක් වගෙ එකක් දැන් අවුරුදු හයක් තිස්සෙ අඟහරු මතුපිට එහෙම මෙහෙ ගිහිල්ල පොටෝ ගහනව. පොළව හාරල පස් ගන්නව. පරීක්සන කරනව. එක ජංජාලයයිනෙ. අන්න ඒ කියුරියෝසිටි එකෙන් ගත්තු පොටෝවල තමයි ඔය ගඩොල් කෑලි තිබ්බයි කියන්නෙ.."
"ඕක බොරුවක් නේද?"
"ඔව්..ඔව්...බොරු තමයි..අඟහරු ලෝකෙ කොහෙන්ද අනේ ගඩොල්?...එහෙම වෙන්න විදිහක් නෑ. වෙලා තියෙන්නෙ නාසා එකෙන් නිකුත් කරපු ප්රවෘත්ති වාර්තාව වැරදියට පරිවර්තනය කරල...ඒකයි…"
"ම්ම්..එහෙම වෙන්නත් පුලුවන්...ඒත් මට හිතෙනව ඒ ගඩොල් කතාවෙ ඇත්තක් තියෙන්නත් පුලුවන්ය කියල.."
"මොකක්? පිස්සුද හැබෑටම? ඒ කොහොම ද ඒක ඇත්තක් වෙන්නෙ?" මම ටිකක් සද්දෙං ඇහුව..
"හරි හරි ඕකට කෑගහන්ට ඕන නෑනෙ..අහගන්නකො.."
"මොකක්ද අහගන්නෙ?"
"අර අපි ගේ හදපු කාලෙ මතකද?"
අපි ගේ හැදිල්ල පටන් ගත්තෙ මීට අවුරුදු අටකට වගෙ ඉස්සෙල්ල...ඔව්..2010 අවුරුද්දෙ.
"මතකයි... ඉතිං?"
"ගේ හැදිල්ල පටන්ගෙන මාස දෙකක් වගෙ යද්දි එක දවසක් හවසක ගෙනාපු ගඩොල් ලෝඩ් එකක් නැතිවුනා මතකද?"
"ඔව්..ඔව්..මට මතකයි..අර මුරට හිටපු කොල්ල මහ විකාර කතා වගයක් කිව්වෙ ඇහුවහම.."
"අන්න හරි …"
ඒකාලෙ ගේ හදන තැන රෑට කොල්ලෙක් නතර කරල හිටිය මුරට. කොහොම හරි එක දවසක් හවස ගෙනාපු ගඩොල් ලෝඩ් එකක් උදේ වෙනකොට මිසිං. වොචර් කොල්ලගෙන් ඇහුවම ඌ මහ විකාර කතා වගයක් කිව්ව. ඔය නැතිවෙච්චි ගඩොල් ගොඩ තිබ්බෙ අපි ගෙදර හදන තැන ඉඳල ටිකක් එහාට වෙන්ට. මහ පාර අයිනට වෙන්ට.
කොල්ල කිව්වෙ රෑ ඒ පැත්තෙං මහ බයානක අමුතු අමුතු සද්ද සහ එලි වගයක් දැක්කය, බය හිතුන හින්ද ඌ ඒ පැත්ත පලතෙවත් ගියේ නැතිය, උදේ බලනකොට ගඩොල් ලෝඩ් එක එතන තිබ්බෙ නැතිය කියල. මේක උගෙ බොරුවක් කියල ආය කියන්නත් දෙයක්ය? ඒත් කමක් නෑ එක ගඩොල් ලෝඩ් එකනෙ කියල හිතල අපි ඒක අතෑරල දැම්ම. පොලීසි එහෙම ගියේ නෑ.
"ඉතිං මොකක්ද ඔයා දැං ඔය කියාගෙන එන්නෙ?" මම ඇහුව.
"මම කියන්නෙ අර කොල්ල කියපු කතාව ඇත්ත වෙන්න බැරිද කියලයි."
"ඒ කිව්වෙ?"
"ඒ කිව්වෙ අර ඒකා එලි වගයක් දැක්ක..අමුතු සද්ද ඇහුනයි කියල කිව්වෙ.."
"ඉතිං?"
"ඒ ඔය අඟහරු ලෝකෙං අපේ ගඩොල් ලෝඩ් එක අරගෙන යන්ට ආපු පියාඹන පීරිසියක් වගෙ මොකක් හරි යානාවක් වෙන්ට බැරිද?"
"පිස්සුද අනේ? මොනවද මේ කියන්නෙ?"
"පිස්සු නෙවෙයි. ඔයාම නේද ඔය කොයිවෙලාවෙත් කියන්නෙ අර ඔයාගෙ ප්රියතම ආතර් සී. ක්ලාර්ක් කිව්ව කතාවක්.."
"මොකක්ද ඒ කතාව?"
"The truth is not only stranger than you think, it's even stranger than you can imagine…"
"හ්ම්ම්ම් එහෙමත් එකක් තියනවනෙ...නේ?...ඉතිං ඔයා කියන්නෙ එතකොට අපේ නැතිවෙච්චි ගඩොල් ලෝඩ් එකේ ගඩොල් තමයි ඔය අඟහරු ලෝකෙ තිබිල අර කියුරියෝසිටි එකෙන් පොටෝ ඇල්ලුවෙ කියල නේද?"
"මම එහෙමම කියන්නෙත් නෑ. මම කියන්නෙ එහෙම වෙන්නත් පුලුවන් නේද කියල.."
"හරි හරි ඒක එහෙමමය කියමුකො…..දැන් මොකද ඉතිං මම කරන්න ඕන?"
"මම කියන්නද? අපි නාසා එකට කතා කරල අපේ ගඩොල් ආපහු ඉල්ලමු"
"මොකක්? ආපහු ඉල්ලන්ට?"
"ඔව් ඔය මිනිස්සු ඔය ගඩොල් කෑලි ටික ආපහු ගෙනෙයි එකත් එකටම. එතකොට අපි කියමු ඒ මීට අවුරුදු අටකට කලින් නැතිවෙච්චි අපේ ගඩොල්ය ඒ හින්ද එව්ව අපට ඕනය කියල"
"එයාල කැමති වෙයිද ඒකට? මම මේ කිව්වෙ ගඩොල් ආපහු අපිට දෙන්ට?"
"ආ..මේ අර ලංකාවෙ කවුද ඉන්නව නේද නාසා එකේ ලොක්කෙක්?"
"ඔව් ඩොක්ටර් ගුණපාල... ඉතිං?"
"අපි එයාට කතා කරල විස්තරේ කියමු. එයා මම හිතන්නෙ අපිට උදව් කරයි.."
"හ්ම්ම්ම් බලමුකො එහෙනම්. මම බලන්නම්කො හෙටම ඩොක්ට ගුණපාලගෙ නම්බර් එක හොයාගන්ට…"
"මේ..මේ..ඔයා ඒ හැටි හදිස්සි වෙන්ටත් එපා. මේ ටිකේම මෙහෙට පැල් බැඳගෙන වහිනව. ඔය ගඩොල් ගෙනල්ල මෙහෙ එලියෙ දාල තිබිල නිකං අපරාදෙ වැස්සට දියවෙලා යයි. එහෙම උනොත් අඟහරු ලෝකෙටත් නෑ. නාසා එකටත් නෑ..අපිටත් නෑ.... ඒ හින්ද අපි වැස්ස ටිකක් විතර පායපුවම බලමු.."
