404. එෂැණිං පුවක් 12 - අයදුම්පත් භාරදීමේ නවතම ක්‍රමවේදය සහ මහා සංඝරත්නයේ මධ්‍යාංගුලික පාරමිතාව

මධ්‍යාංගුලික පාරමිතාව පුරන මහා ෂංඝරට්නේ

රජයේ ආයතනයකට අයදුම්පත්‍රයක් භාරදීමේ නවතම නොවරදින ක්‍රමවේදයක් හඳුන්වාදීමේ මාධ්‍ය හමුවක් ඊයේ පැවැත්විණි.. එම මාධ්‍යය හමුවේදී කරුණු දැක්වූ පෙරටුගාමී සමාජවාදී පක්ෂයේ හිටපු මන්ත්‍රීවරයෙක් පලකල අදහස් අනුව ඕනෑම අයදුම්පත්‍රයක් භාරදීමේදී පහත සඳහන් පියවර අනුගමනය කල යුතුය. 

1. අයදුම්පත්‍රය භාරදිය යුතු ආයතනය ඉදිරිපිට අයුතු ජන රාශියක් සංවිධානය කිරීම.

2. එම උද්ඝෝෂකයින් ලවා පළමුව සටන් පාඨ කියවීමෙන් එම ආයතනයෙහි සේවය ලබාගැන්මට පැමිණෙන සෙසු මහජනයා බියෙන් ත්‍රස්ත කොට පළවා හැරීම.

3. අයදුම්පත භාරදීමට අවම වශයෙන් දෙසියයකට නොඅඩු අයුතු ජනරාශී සාමාජිකයින් පිරිසක් ආයතනයට ඇතුලු වීම. 

4. ආයතනයට හැකි පමණ අලාභහානි කිරීම. විශේෂයෙන් විශාල වීදුරු වැනි දේ ඇත්නම් ඒවා කඩාබිඳ දැමීම.

5. පොලීසියෙන් කෙසේ හෝ ගුටි අන්නවාගෙන ඒ ඡායාරූප හැකිපමණ ප්‍රසිද්ධ කොට අනුකම්පාව ලබා ගැනීමට උත්සාහ කිරීම.

ටං.....ටිං....ටුං...............

මෙහිදී තව දුරටත් අදහස් දැක්වූ ඒ මහතා පැවසූයේ තම පෙරටුගාමී පක්ෂය මෙම පස් වැදෑරුම් අයදුම්පත් භාරදීමේ සේවාව ඉතා සුලු මුදලක් අයකොට රැකියා හෝ වෙනත් ඕනෑම අයදුම්පතක් රජයේ ආයතනයකට භාරදීමට අපේක්ෂා කරනා අයෙකුට ලබාදීමට සූදානමින් සිටින බවයි. 

"දැන් මෙහෙම හිතන්න. ඔබේ නම ජොංකොලොස් කියල කියමු. ඔබට ඕනෙ රැකියා අයදුම්පතක් ඉදිරිපත් කරන්ට කාලගුණ විද්‍යා දෙපාර්තමේන්තුවට. අපිට ඒ බව දැනුම් දුන්නම අපි සංවිධානය කරනව අයුතු ජන රාශියක් කාලගුණ විද්‍යා දෙපාර්තමේන්තුව ඉස්සරහ, කාගෙද මේ බල වේගේ.......ජොංකොලොස්ගෙ...බලවේගේ..දියව්..දියව් දියව්..දියව්..රැකියාවක්.....ජොංකොලොස්ට..ඔහොම උද්ඝෝෂණය කරනව එතන ඉස්සරහ. ඊට පස්සෙ අයදුම්පත භාරදෙන්ට යනකොට අපි දෙසීයක් විතර ඔබත් එක්ක එනව වීදුරු එහෙම තියනවනම් එව්ව කඩාගෙන කාර්යාලය ඇතුලට.මෙහෙම කලාම රැකියාව ලැබෙන එක සහතිකයි. දැන් අපි මේ අනුගමනය කරපු ක්‍රියාමාර්ගය හින්ද අපේ අතිගරු නායක මහත්තයට පුරවැසි කම ලැබෙන එක සහතිකයි වගේම තමයි ඔබේ රැකියාවත් ලැබෙන එක සහතිකයි."

ටං.....ටිං....ටුං...............

මේ අතර මෙම පුරවැසි අයදුම්පත් භාරදීමේ මහෝත්සවය හා සමගාමීව පැවති උද්ඝෝෂණයේදී එක්තරා මහා ෂංඝරට්නේ කෙනෙක් මැදඟිල්ල ඔසවා පෙන්වීම පිළිබඳව කරුණු දක්වන පෙරටුගාමී චීවරදාරී සංගමය මෙසේ පවසයි. 

"මේ සිද්ධිය ගැන මේ හැටි ආන්දෝලනයක් ඇති කරන්නෙ ඇයි කියල අපිට තේරුම් ගන්න අමාරුයි. මේ හස්ත සංඥාව නැත්නම් ඉරියව්ව විනය විරෝධී එකක් නෙවෙයි. මේක ඇත්තටම කිව්වොත් පාරමිතාවක්. බුදු හාමුදුරුවො පවා මේ හස්ත සංඥාව දක්වල තියනව. නැත්නම් පාරමිතාව පුරල තියනව. දැන් අංගුලිමාල කතාවෙ තියෙන්නෙ මෙහෙමනෙ."

එකල ඒ අඟුල්මල් නම් මනුෂ්‍යඝාතක රාක්ෂස තෙමේ මිහිකත වෙවුල්වමින් සුරතෙහිවූ මහත් කගපත තම අවුල්වැ ගිය කෙසින් පිරි හිස වටා සිසාරවමින් මහණ ඔහි සිටුව තා නසන්නට ඔහි සිටුව යනුවෙන් මහත් හඬින් ඝර්ජනා කරමින් දිව එන කල්හි බුදුන් වහන්සේ නිර්භයවැ සිටි පියවර සිට නොබා උහු කෝපදීප්ත්‍ර නේත්‍ර යුග්මය දෙස එක එල්ලේ බලා මුව කෙළවරකින් මන්දස්මිතියක් නඟාලාපියා තම සුරතෙහි මධ්‍යාංගුලිකාව පමණක් ඔසවාලාපියා ඉතිරි අංගුලිකා සතර නවාලාපියා සුරත ඔසවා ඉහළ පහළ යවාලාපියා දැක්වූ සේක.

එසඳ බුදුන් වහන්සේගේ මේ සංඥාව දැක දෑස් අදහාගත නොහුණු අංගුලිමාලයෝ එතන්හිම හිටි පියවරම නතර වූවාහු බුදුන් වහන්සේ දෙස දෑස් හයා බලා සිටියෝය. එවිට මේ නම් මූ දමනය කීරිමට මහඟු අවස්ථාවෙකැයි හැඟුනු බුදුන් වහන්සේ අට ඉස්බක් අහසට පැණ අඟුල්මල්හුගේ දක්ෂිණාංශය අප්‍රාණිකවැ මිහිකත මත ඇද වැටෙන පරිදි වම් පාදයෙහි මහ පටැඟිල්ලෙන් අංගුලිමාලයාගේ ගෙලෙහි දකුණු පස වූ දක්ෂිණ පක්ෂඝාත නිලය තෙරපා ඒ ඝෝරතරවූ අංගුලිමාල තෙම දමනය කොට වදාළෝය.