Thursday, May 5, 2016

410. මකුළුහුයක රැඳි පිණිබිඳු...........

Google Images
ඔබ මෙතෙක් ජීවිතයෙහි දැකඇති ඉතාම චමත්කාර ජනක හිරු බැසයෑම දුටුවේ කොහේදීද? ඔබට ඒ පිළිබඳව ස්ථිර විශ්වාසයක් නැත්තේ නම් නැතහොත් එවැන්නක් දුටු බවක් මතකයෙන් ගිලිහීගොස් ඇත්තේනම් මගේ මතකයෙහි රැඳී ඇති එවන් චිත්තාකර්ෂණීය හිරු බැසයෑම් කිහිපයක් පිළිබඳව ඔබට විස්තර කිරීමට මට අවසර,

අස්තගතවීමට ආසන්න මළහිරු බටහිර ක්ෂිතිජයෙන් පහළට ගිලී යාමට ඉතාම අකමැත්තෙන් වුව සූදානම් වන අයුරක් ඔබට පෙනේ. එක් නිමේෂයකදී මුළු මහත් අවරගිර දිදුලනුයේ ජම්බූල, රක්ත සහ ලෝහිත යන වර්ණයන්ගෙනි. මේ ඇත්තෙන්ම සූර්ය දිව්‍ය රාජයාණන් දසත ඝනාන්ධකාරයෙහි ගිල්වා නික්ම යාමට ප්‍රථම තම සියළු තේජෝ බල පරාක්‍රමයන් අවසාන මොහොතේ ප්දර්ශනය කරන අවස්ථාවක් ලෙස ඔබට නිසැකව හැඟෙනු ඇත.

ඔබ සැළකිය යුතු කාලයක් වියලි කලාපයෙහි දිවිගෙවා නැත්තේනම් මා සහෘදය, මා ඉහත විස්තර කල ආශ්චර්යය ඔබ දෙනෙත් අභියස දිග හැරෙනු දැකගැනීමේ භාග්‍යය ඔබට අහිමිවන්නට බොහෝ දුරට අවස්ථාව ඇතිබව මගේ අවංක අදහසයි. 

එලෙසම ඔබ වියලි කලාපයෙහි ඔබේ මුලු දිවියම ගතකලෙකු වුවද ඔබට නිරතුරු වටාපිටාව දෙස යොමුවූ තියුණු ඇස් යුවලක්, ඔබගේ එළිපත්තෙන් ඔබ්බෙහි සෑම මොහොතකම සිදුවන ස්වභාව ධර්මයේ අපූර්වතම විශ්මයජනක ක්‍රියාකාරකම් කෙරෙහි යොමු වූ ඇස් යුවලක් නොමැත්තේනම් එසඳද මා හිතවත / හිතවතිය ඔබට මේ මන බඳිනා දසුන මඟ හැරෙනු ඒකාන්තය.

ස්වභාව ධර්මයේ ආශ්චර්යයන් දැක විශ්මයෙන් පාෂාණීභූත වන්නට ඔබ දවසේ වැඩි කාලයක් මිහිදුම් සළු හිස දවටාගත් උත්තුංග ගිරිශිඛර නැරඹීමට නුවරඑළියට යා යුතු නැත. නැතහොත් වසර මුලුල්ලේ හිරු එළියෙන් නැහැවෙමින් දිදුලන හික්කඩුවේ මුහුදු වෙරළට යා යුතු ද නැත.එසේත් නැතහොත් ඉර සේවය නමින් ලොව පුරා සුප්‍රසිද්ධ ඒ අද්වීතීය සංසිද්ධිය නරඹනු උදෙසා ශ්‍රී පාදස්ථානයට නැඟිය යුතු ද නැත.

බොහෝවිට ඔබගේම ගෙමිදුලින් මඳක් ඔබ්බෙහි අවට පරිසරය කෙරෙහි යොමුවූ විමසුම් දෑසින් යුතුව නිවී සැනසිල්ලේ මද වේලාවක් ඇවිදයාම හෝ එසේත් නැතහොත් ඔබගේ කුටියෙහි කවුළු පියන්පත් හොඳින් හැරදමා එතුලින් අවට නැරඹීම මේ සඳහා උදක්ම ප්‍රමාණවත්ය. "අහෝ, කෙතරම් මනස්කාන්ත දසුනක්ද මා නෙතු අබියසම මෙතෙක් සැඟව තිබුනේ" යනුවෙන් ඔබ ඔබටම හීන් හඬින් කොඳුරාගන්නවාට මා හිතවත / හිතවතිය, මෙන්න කැට.

දශක තුනකට පමණ පෙර මගේ ජීවිතයෙහි අරුණෝදයෙහි මම උතුරුමැද පළාතේ නැගෙනහිර මායිම අසල වියලි කලාපීය මහ වන මැද අර්ධ රාජ්‍ය වාරිමාර්ග ඉදිකිරීමේ සහ ඉඩම් අහිමි මහජනයාහට ඒ ඉඩම් ලබාදී ඔවුන් එහි නැවත පදිංචිකිරීමේ ව්‍යාපෘතියකට අනුබද්ධව සේවය කළෙමි.

වෙසෙසින් පැවසිම කිසිසේත්ම අවශ්‍ය නොවන බව මම දනිමි. එදවස යොවුන් විය පසුකරමින් හුන් මම අත්දැකීම් රහිත වූවකු මෙන්ම එලෙසම රළු පරළු නුපුරුදු පරිසරයක පයගසා ජීවත්වන අයුරු ඉගෙන ගන්නෙකු ද වූයෙමි. අලි මදිවට හරක් යන ගැමි උපහැරණය ඔබ අසා ඇත. එළෙසම එවකට මම මගේ ජීවිතයේ එතෙක් මුහුණදීමට සිදුවූ උග්‍රතම අර්බුදයටද මුහුණ දී විපිලිසරව සිටියෙමි. "වල්මත්වී හසරක් නොදිටිමි"' යනු සරච්චන්ද්‍ර වියතුන්ගේ ප්‍රකට නවකථාවෙකි.ප්‍රස්තුත කාල වකවානුවෙහි මගේ දිවිය ගතවූයේද උදක්ම එළෙසිනි.

මවිසින් ඉහත සඳහන් කල අර්බුදය මගේ චිත්ත සන්තානයට මතු නොව ආත්මභාවයටද මහත් බලපෑමක් කල බව පමණක් පවසා මේ අවස්ථාවෙහිදී නිහඬ වන්නට ඔබගේ අවසර පතමි.

ඒ අර්බුදය පිළිබඳ වැඩිමනත් විස්තර පැවසීම පසුවට තබා අද මම ලියන්නට අදහස් කරන මැය එනම් ස්වභාව ධර්මයේ අසිරිය පිළිබඳව ඒ අදාල වන අයුරු මෙතැන් පටන් විස්තර කරමි.

ලාබාල ගැටවර වියෙහිදී මුහුණ දීමට සිදුවූ ඒ අර්බුදය හමුවේ මම කොපමණ භාවාතිශය , ආවේගාත්මක සහ බොළඳ වූයේද යත් මගේ මිතුරන් අතර මා දිවි හානි කොට ගනිතැයි ප්‍රබල සැකයක් පැවතිබව මට කිසිසේත් රහසක් නොවිනි. එම සැකය අහේතුක බව ඔවුනට ඒත්තු ගැන්වීමට මට මහත් වෙහෙසක් දැරීමට සිදුවිය.

පුනරාවලෝකනයේදී එවන් නිශ්ඵල ක්‍රියාවක ඡායාවක් හෝ මගේ තුන්සිතක හෝ නොපැවති බව මට සහතික කොට පැවසිය හැක. එහෙත් එදවස මා කල්ගත කල කිසිදු අරමුණක් නොමැති ගන්ධබ්බ ස්වභාවය අනුව මගේ මිතුරන් සිත්හි එවන් සැකයක් හටගැන්ම කිසිසේත්ම විශ්මයට කරුණක් නම් නොවේමය.

මා හිතවත / හිතවතිය, ඉදින් මා ඔබට පවසන්නට මේ සැරසෙනුයේ එලෙස උකටලීව,කිසිදු කටයුත්තක් හෝ කාර්යයක් පිළිබඳව ආශාවක් උනන්දුවක් රහිතව ගතකල දිවියෙන් මා මිදුනු අන්දම පිළිබඳවය.

එසේ විය හැක්කේ සැකයකින් තොරව ගෞරවනීය වැඩිහිටි ඥාතියකුගේ උපදෙස් මත හෝ එසේ නැතහොත් හදවතට සමීප ප්‍රිය මිත්‍රයකුගේ කරුණු පැහැදිලි කිරීම් මත බව ඔබ සිතන බව මම දනිමි. එහෙත් ඒ ගෞරවය; මා ඒ නරාවළින් ඉකුත්කොට ගොඩ ගැනීමේ ගෞරවය හිමිවනුයේ ඉතාමත් සාමාන්ය සහ එමෙන්ම නොවැදගත් වස්තුවකටය. එසේය, ඔබ කිසිසේත්ම යලිත් වරක් ඒ දෙස බැල්මක් හෙලීමට හෝ උනන්දු නොවන මාදිලියේ ඉතාමත් සාමාන්ය සහ එමෙන්ම නොවැදගත් වස්තුවකටය. 

ඒ වනාහී.... මකුළු දැළකි. සාමාන්‍යයෙන් ඔබ නිවසෙහි අහුමුළු අසල කොතෙකුත් ඔබ දැක පුරුදු ඉතාමත් සාමාන්‍ය මකුළු දැලකටය. "මොකක් කිව්වා?.... මකුළු දැලක්?" ඔබගේ විශ්මයෙන් දල්වා ගත් දෑස සහ කම්පිත හඬ මට මේ ලියන මොහොතේද ඇසෙන්නාක් බඳුය. "මකුළු දැලක්? මොන පිස්සුවක්ද ඒ?" ඔබ යලිත් අසනු ඇත. නැත මා දයාබරය, මම හුදෙක් සත්‍යයක්ම පවසමි. සත්‍යය මිස අන් කිසිවක් නොපවසමි. ඒ වනාහී මකුළු දැලකි. කිසිදු විශේෂත්වය නොමැති ඔබට නිතර දෙවේලේ නිවසෙහි හෝ කාර්යාලයෙහි දක්නට ලැබෙනා ඉතාම සාමාන්ය මකුළු දැලකි.

සිත් සතන් එක පැහැර ඔද්දල් කරවන අපමණ දුක් සෝ සුසුම් මැඩපවත්වා ගැන්ම උදෙසා, සියලු දුක් කම්කටොලු වලට ඒකායන ප්‍රතිකර්මය බවට ප්‍රචලිත ක්‍රියාමාර්ගයෙහි රාත්‍රියෙහි පශ්චිම යාමය වනතෙක් නිරතව සිට නින්දට වන් මම උදෑසන දහයට පමණ අවදිවූයේ සිත වෙලාගත් හිස් බව එලෙසම නොවෙනස්ව පවතිද්දීය.

අඩක් විවරවූ කුටියේ කවුළුව තුලින් ගලා ආ හිරු රැසින් දසත ආලෝකවත් වී තිබිණි.සයනයෙහි හිඳගත්වනම දෑත් හැකිපමණ විදහා ඇඟ මැලි කැඩූ මම පෙනහළු පුරවා ගැඹුරට ආශ්වාස කොට යලි හැකිපමණ සෙමෙන් ප්‍රශ්වාස කලේ රාත්‍රියෙහි නිරතවූ අවසාන සිල්පදය බිඳීමේ ක්‍රියාවලියෙහි පශ්චාත් ඵලයන් (After effects) හැකිපමණ අවම කොට ගැනීම උදෙසාය. ඒ සමඟම සෙමෙන් දෙපසටම හැකිපමණ දුරට ගෙල හරවා ගෙලෙහි මස්පිඩු පෙලෙන වේදනාව ද සමනය කොට ගැන්මට උත්සාහයක් දැරුවෙමි.

එසේ වම් පසට උපරිම වශයෙන් ගෙල හරවා කුටියේ කවුළුව දෙස එක එල්ලේ බලා සිටිද්දී එක් නිමේශයකදී ඇස ගැටුනු දසුනින් මම විශ්මය පත්වීමි.නීල, පීත, ලෝහිත සහ ස්වර්ණමය වර්ණයන්ගෙන් දිදුලන යමක් කවුළුව මධ්‍යයේ විය.

මා විශ්වාස කල මැන මා හිතවත / හිතවතිය, එම අවස්ථාවේ මම කොපමණ විශ්මය පත්වූයේද යත් ඒ චමත්කාරජනක වර්ණයන් නිකුත් වූ ස්ථානය දෙස එක එල්ලේ ඇසිපිය නොහෙලා මිනිත්තු කිහිපයක් බලා සිටියෙමි. එහෙත් ඒ ආශ්චර්යමත් සංසිද්ධිය ඉනික්බිති දක්නට නොලැබුණු හෙයින් මගේ ඒ පිළිබඳව උනන්දුව ද කෙමෙන් වියැකිණි.

ඉන්පසු මවිසින් විසඳියයුතු ගැටලුව වූයේ සයනයෙන් නැඟිට දවස ඇරඹීම හෝ යලිත් සයනයෙහි දිගාවී නින්දට පිවිසීම හෝ යටත් පිරිසෙයින් සයනයෙහි දිගාවී සිටීම යන කර්තව්‍යයන් දෙකෙන් එකක් තෝරාගැනීමය. අතීරණාත්මකවම මම එක් මොහොතකට හිස් හරවා යලි කවුළුව දෙස නෙත් යොමු කලෙමි.බොහෝවිට අචේතනාන්විතව මට අවශ්‍ය වන්නට ඇත්තේ මොහොතකට පෙර දුරු ඒ අසිරිමත් දසුන යලි දැක ගැන්මට විය හැක.

දෛවෝපගතව නියමවූවක් හෝ එසේ නොවන්නේනම් තවමත් මට වටහාගත නොහැකි යම් දෙයක් විය හැක. ඒ කුමක් හෝ වේවා මම කවුළුව දෙස නෙත් යොමුකල ඒ මොහොතේම නිමේශයකට පෙර මා දුටු ඒ අසිරිමත් දසුන යලි දිස්වන්නට වූයේය. වියයුතු ලෙසම තවදුරටත් මට මගේ ක්‍රමයෙන් වර්ධනය වන කුතුහලය මැඩපවත්වා ගත නොහැකිවිය.එදෙස යොමුකොටගත් දෙනෙත් ඉවත් කොට නොගෙනම මම සයනයෙන් නැඟීසිට කවුළුව වෙත සෙමෙන් පියවර තැබුවෙමි.

කවුළුව වෙත කුතුහලයෙන් පිරි සිතින් යුතුව ළඟාවූ මම දුටුවේ විශේෂයෙන්ම වඳුරන් වන් කරදරකාරී සතුන් කුටියට ඇතුළුවීම වළක්වනු වස් ජනෙල් රාමුවට සවිකොට තිබූ යකඩ කොටු දැලෙහි (Welded mesh) ඉහළ සිට පහලට ඇද තිබූ මකුළු දැළකි. එසේය එහි වූයේ ඔබ නිතර දෙවේලේ දැක සුපුරුදු කිසිදු විශේෂත්වයක් නොමැති සාමාන්‍ය මකුළු දැළක් පමණකි.

මකුළු දැළෙහි වූ අරීයව විහිද ගිය සිහින් හුය සහ ඒ හා බැඳුනු හරස් හුය සියල්ලෙහිම කුඩා මුතු ඇටවන් පිණි බිඳු එල්ලී තිබිණි.ඒ පිණි බිඳු හුයෙන් ගිලිහී පහතට වැටෙන්නට ඉතා ආසන්න, එහෙත් මකුළු හුය අතහැර ගිලිහෙම්දෝ නැතහොත් තවත් නිමේෂයක් හුයෙහිම එල්ලී සිටින්නෙම්දෝයි තීරණයක් ගත නොහැකිව විපිලිසරව පසුවන්නාක් මෙන් මට සිතිණි.

සෙමෙන් සැලන පිණිබිඳු දෙස දැඩි උනන්දුවකින් මම බලා සිටියදී මෙම සංකීර්ණ නිර්මාණයෙහි හිමිකරු මෙන්ම නිර්මාපක ද වූ ඒ කුඩා සත්වයා තව දුරටත් සැඟව සිටීමෙන් ප්‍රයෝජනයක් නොවන බව එක්වනම වැටහුනු නියා සෙමෙන් ඉදිරියට ඇදී ආවේය. ඕ තොමෝ පළමුව කෝල බවකින් යුතුවද පසුව ස්ථිර සාර පියවරින් යුතුවද මකුළු දැලට පිවිසියාය. (මකුළු දැල් වියනුයේ බොහෝවිට ගැහැණු මකුළුවන් එනම් මැකිලියන් විසිනි )

ඇගේ සියුමැලි පාද මකුළු හුය මත ගැටෙද්දී දැල පුරා විහිද ගිය කම්පනය ඉතාමත්ම සුළු වූවද ඒ ඉතා අඩමාන ලෙස එල්ලී සිටි පිණි බිඳු හුයෙන් ගිලිහීමට තරම් ප්‍රමාණවත් විය. පහතින් පිහිටි හුය මතට ඇද වැටුනු ඒ පිණිබිඳු හේතුකොටගෙන ඒ හුයෙහි රැඳී තිබූ පිණිබිඳු ඊටත් පහළින් පිහිටි හුය මතට ඇද වැටිණ.

මේ චමත්කාර ජනක සිදුවීම මෙසේ රඟ දැක්වෙද්දී හිරු දෙවි තෙමේද ඒ නැරඹිය යුතුයැයි ඉටාගත් සෙයකි. මෙතෙක් වළාකුලක් පසුපස සැඟව හුන් හෙතෙම එක්වරම ඊට ඉහළින් එබී බැලීය. හිරුමඬලින් නිකුත්වුණු කිරණ කදම්බයක් අපරිමේය දුර කතර ගෙවා සැණෙකින් රිදීවන් හුයෙන් හුයට පතිත වෙමින් ඔවුනටම ආවේණික සරඹ ක්‍රීඩාවක නිරතව හුන් පිණිබිඳු මත පතිත වූයේ පිණිබිඳු විනිවිද ගොස් ඒ නොයෙක් වර්ණයන්ගෙන් බැබලවූයේය.

"හෙහ්..එතකොට අර ඉස්සෙල්ල මම දැක්කෙ මේකයි එහෙනං" විශ්මයපත්ව හිස දෙපසට සොළවමින් මම මටම කොඳුරා ගතිමි.

මා දයාබර හිතවත/ හිතවතිය ඔබට සත්‍යයක්ම පවසමි. ඒ අපූර්ව මැකිලිය මා ඈ දෙස බලා හිඳිනා බව මතු නොව මගේ සිත පෙලනා දුක් සන්තාපයන් පිළිබඳව හොඳින් දැන ඒ අරභයා යම් පිළියමක් යෙදීමට ඉටාගත්තාක් මෙනි. ඇය මකුළු හුය මත නර්තනයක යෙදෙන්නන්ට වන්නීය.ඒ නර්තනයක් ලෙස හඳුන්වනු විනා වෙනත් විකල්ප සුකර නාමයක් මම නොදනිමි හිතවතුනි. ඒ වචනයේ පරිසමාප්ත අර්ථයෙන්ම නර්තනයකි. එසේය, ඇය කරකැවෙමින් පාද සලමින් නර්තනයේ යෙදුනීය.අයාගත් දෑසින් යුතුව මම ඇය දෙස බලා හුන්නෙමි.

මකුළු හුය එදින ඇගේ රංග පීඨිකාව විය. හිරු එළිය පතිතව නානා වර්ණයන් ගෙන් සමලංකෘතව සුදිලෙන පිණි බිඳු කුඩා මරකත, නිල්කැට,රතුකැට සහ පද්මරාග බඳුව දිලිසෙමින් හුයෙන් හුයට ඇද හැලෙද්දී ඇය නර්තනයෙහි යෙදුනාය.

මම සිටි පියවර වශීකෘතව ඇගේ චිත්තාකර්ශනීය රංගනය නැරඹීමි. හිතවත / හිතවතිය, මා විශ්වාස කරනු මැන, වදනින් විස්තර කල නොහැකි හැඟුම් සමුදායකින් මසිත කෙමෙන් පිරෙද්දී මෙතෙක් මා පෙලූ උකටලී භාවය නොහොත් ජීවිතය ගැන වූ ආශාවන් ප්‍රහීන කල ස්වභාවය ඉන්දරජාලයකින් මෙන් මවෙතින් උක්තව ඉවත්ව යනු මට සැබැවින්ම දැණිනි.

එසේය එම මොහොතේ මට නුවණැස පහළ විය. අතීතයේ සිදුවූවක් වේද ඒ නිසැකව අතීතයට අයත්ය. කුමක් වූවද එය සිදුවී අවසානය. කල්පාවසානය තෙක් ඒ පිළිබඳව දුක්වුවද එය කෙසේවත් වෙනස් කල නොහැක. එබැවින් මම මේ කුමක් කරන්නේද? දෙවියන් විසින් දුන් ත්‍යාගයක් බඳු මගේ ජීවිතය මලගිය අතීතයක් වෙනුවෙන් වැළපෙමින් ගෙවා දමන්නේ මන්ද? ජීවිතයේ අපට විඳින්නට තව කොපමණ දේ පවතීද? එසේ හෙයින් ජීවිතය විඳීම වෙනුවට විඳවීම තෝරාගන්නේ කුමන හෙයින්ද? 

ඉතින් මාගේ හිතවතුනි / හිතවතියනි කථාවේ අවසානයට අප පැමිණ සිටින්නෙමු. එදින ඒ මොහොතේ සිට මට කිසිවිටෙක යලි මකුළු දැලක රැඳි පිණි බිඳු රැසකින් පාඩම් ඉගෙන ගැන්මට සිදු නොවීය. මගේ හිතවත් ඒ මැකිලිය පළමුවරම ඒ පාඩම මසිත ගලේ කෙටූ අකුරක් මෙන් නොමැකෙන පරිදි කියාදුන්නාය. එලෙසම ඉන්පසු එවන් අර්බුදයන්ට මුහුණ දීමට මට සිදුවූ සෑම මොහොතකම මම ඇය සහ ඇගේ නර්තනය සිහිපත් කොට ගතිමි. ඔබට බොහෝසේ ස්තූතියි. මා හිතවතිය.

එම කුටියෙහි මම ඉන් අනතුරුව ද වසර දෙකක පමණ කාලයක් වාසය කල මුත් කිසිම දිනක මගේ හිතවතියගේ නර්තනය හෝ පිණිබිඳු මිණි කැට මෙන් උදෑසන හිරු එළියේ දිළිසෙමින් හුයෙන් හුයට ඇද වැටෙනු නොදුටුවෙමි. බොහෝවිට එම සිද්ධිය ජීවිතයේ එක වරක් පමණක් දක්නට ලැබෙන්නක් විය හැක. එකවරක් දුටුවහා ඉන් පාඩමක් ඉගෙන ගත නොහැක්කෙකු හට නැවත නැවත එම දර්ශනය පෙන්වීමෙන් පලක් නොමැතිබව මේ සියල්ල මෙහෙයවන්නකු කොතනක හෝ සිටීනම් ඔහු හෝ ඇය සිතනු විය හැක. යටත් පිරිසෙයින් මම එසේ සිතන්නෙමි. 

එලෙසම මේ සියල්ල මගේ සිතේ මැවුනු සංකල්පනා ද විය හැක. සිතට / මනසට එපමණ විශ්මය ජනක පෙළහර පෑ හැකි බව මම පළමෝත අත්දැකීමෙන් දනිමි. කෙසේ හෝ එයින් අපේක්ෂිත ප්‍රථිඵලය එළෙසම ලැබුණු බව නිසැකය. ඉතින් මගේ හිතවතුනි / හිතවතියනි ඒ හොඳහැටි ප්‍රමාණවත් නොවේද?

63 comments:

  1. රාස්සිගෙ අව්ව ගැන ඔබ කියල තියෙන්නෙ එක තැනක. ඔබ කිව්ව විදියෙ පිං ඇති ඇස් දෙකක් මට තියෙනව ඔන්න.

    ReplyDelete
    Replies
    1. ලේ පාට හීන,

      / රාස්සිගෙ අව්ව ගැන ඔබ කියල තියෙන්නෙ එක තැනක. …/

      රාස්සිගෙ අව්ව වෙලාවෙ රාස්සියො වී වේලනව ....

      රාස්සිගේ අව්ව වැටී දඹරන්වූ ඔබ කෙහෙරැළි සුළං සමඟ පොර බැදුවා,
      ඔබට මතක නැතිවුනාට අද වාගේ මතකයි මට ,

      එක යායට මල් පීදුනු........

      මගෙ ඉස්සර යාලුවෙක් හිටිය ඒකා ඔය සිංදුව කියන්නෙම රෑස්සිගේ අව්ව වැටී කියල. කොච්චර කිව්වත් හරියන්නෙ නෑ. ඔය වගෙ සිංදු සංශෝධනය කරල කියන මගෙ යාලුවො බොහොම දෙනෙක් ඉන්නව. ඒ ගැන වෙනම දවසක ලියන්නංකො.

      / ඔබ කිව්ව විදියෙ පිං ඇති ඇස් දෙකක් මට තියෙනව ඔන්න. /

      ප්‍රීතියි. ප්‍රීතියි...කොච්චර දෙයක්ද ඒක....:)

      Delete
  2. නියමයි! මේක පරිවර්තනයක් නේද? ඉංග්‍රිසි එක කලින් කියවලා තියෙනවා වගේ මතකයි :)

    ReplyDelete
    Replies
    1. උදය,

      හැබෑට කිව්වත් වාගෙ මටත් එහෙම මතකයි මතකයි වාගෙනෙ...හෙහ්,හෙහ්,

      Delete
  3. නියම භාශාව බොලේ...
    ජයවේවා..!!

    ReplyDelete
  4. දීර්ඝ වුනත් රසයෙන් නොඅඩු පබැඳුමක්

    අස්තගතවීමට? අංස්තගත ද? මට මතක අංස්තගත වගේ.

    ReplyDelete
    Replies
    1. විචාරක,

      ස්තූතියි ඔබටත්...

      අස්තගත තමයි මම හිතන්නෙ හරි වචනෙ...

      Delete
    2. අස්තානගත වීම නෙමේද ?

      Delete
    3. @රවී/විචා/සෙන්නා........ඔබ තිදෙනාම වැරදියි..හිරු විවේකයට යන අරුතෙන් නම් මෙය ' අස්තංගත' බව මධුරයා කියනවා. උඹලත් අහලා බලපන්.

      Delete
    4. අරූ,

      එහෙනං බොලේ උඹ අඩුම ගානෙ ලියපංකො පෝස්ට් එකක් " මා අරූගෙ අඩවිය ලිවීමෙන් අස්තංගත වූයේ ඇයි?" කියල...:)

      Delete
    5. ඒක මචං අස්තංගත නෙමේ අන්ත්‍රස්දාන

      Delete
  5. කමෙන්ට් ටිකත් ට්‍රාන්ස්ලේට් කරල දාන්නකො බොස්.

    ReplyDelete
    Replies
    1. //විල්පත්තු වනෝද්යානය තුල ඉතා කුඩා cobwebs දරණ පිනි තැනිතලාවේ පූර්ණ විශාල තණ එරෙහිව පාන්දර හිරු - කෙසේ වෙතත්, cobweb සම්බන්ධ ප්රතිරූපය සදහටම (ලබා ඩිමෙන්ශියාව එය ප්රකාශ නොකරයි) මගේ සිතේ වියළි කලාපයේ සිට පැමිණි ඇත්තේ එලෙසින්. මම අර අඳින බව 'ඒ දවසේ වචනය සැබෑ අරුත වටහා!// :-DDDDD

      මගෙ කමෙන්ට් එකේ එක ඡේදයක් ගූග්ල් ට්‍රාන්ස්ලේට්කරන්නෙ ඔහොමයි. මං පලවෙනිවතාවට ඕක ට්‍රයිකලේ . නිම\ම් ඉන්නවෙලාවට හොඳ එන්ටටේන්මන්ට් එකක් වගේ

      Delete
    2. Pra,

      / Colombo sunsets are supposed to be the most colorful in the country due to its polluted air. I think it must be true because the spectra of reds and purples are truly spectacular nowadays.

      About cobwebs - Once I managed to capture a beautiful image of a long-legged spider on a dew bedecked web highlighted by the sun in Bodhinagala (Horana-Ratnapura Rd) 

      However, the cobweb related image etched forever (provided dementia doesn't claim it)in my mind came from the dry zone - Early morning sun against a vast grassy plain full of dew bearing tiny cobwebs in Wilpattu. I realized the true meaning of the word 'ethereal' that day! /

      පරිසර දූෂණය හේතුකොටගෙන ඉතාමත් චමත්කාරජනක හිරුබැසයෑම් දක්නට ලැබෙනුයේ කොළඹ අවට බවට ප්‍රචලිත මතයෙහි යම් සත්‍යතාවයක් ඇති බව මට සිතෙනුයේ මේ දිනවල සවස්යාමයෙහි බටහිර අහසෙහි දිදුලන රක්ත සහ ජම්බූල වර්ණයන් එපමණ විචිත්‍රවත් බැවිනි.

      මකුළුදැල් පිළිබඳව කථාකරන්නේනම් වරක් මම හොරණ-රත්නපුර මාර්ගයෙහි බෝධිනාගල අසලදී හිරුඑළියෙන් පසුබිම්වූ පිණිබිඳු රැඳුනු මකුළු දැලක් මත හිඳිනා දිගැති පා සහිත මකුළුවකුගෙ අගනා ඡායාරූපයක් ගත්තෙමි.

      එහෙත් මසිතෙහි සදා රැඳී තිබෙනු බවට මට නිසැක මකුළු දැල් හා සම්බන්ධ මතකය ( චිත්ත වික්ෂේපය වන් මතකය අහිමිවන රෝගයක් ඊට පළමු නොවැළඳිනිනම් ) වියළි කලාපය හා සම්බන්ධවූවකි. විල්පත්තුවෙහි සුවිසල් තණ පිටියක බැඳි කුඩා මකුළුදැල් සහසක රැඳි පිණිබිඳු මත උදෑසන හිරු එළිය පතිතව මැවුනු මනස්කාන්ත දර්ශනයයි ඒ. දිව්යමය සුන්දරත්වය යනුවෙන් අදහස් කරනුයේ කුමක්දැයි මම එදින නිසැකවම වටහා ගතිමි.

      Delete
  6. ඉර ගැන චමත්කාරජනක කතා කියවන්න බෑ මේ කාලෙ. සරමෙං $ට දෙකට හුලං ගහ ගහ ඉර ගැන කොහොම කියවන්නද බං?

    ReplyDelete
    Replies
    1. සරමට යටිං ෆෑන් එකක් හයිකරගනිං

      Delete
    2. රාජ්,

      ඒකත් එහෙම තමයි නේද?....:)

      Delete
    3. Prasanna,

      ෂෙක් බැත හුළංකරන්නෙත් නෑනෙ දැං නේද බං? එහෙමනං එතනට ගිහිල්ල සරම උස්සල අල්ලගෙන ඉන්ට තිබ්බ...:)

      Delete
  7. කලින් කියවපු මතකයක් එකපාරටම හිතට ආවා.බලපුවම මේ උඹේ ඉස්සෙල්ල පෝස්ට් එකේ පරිවර්තනය නොවැ.
    මචං මම නං වැටි හිටපු නරාවලෙන් ගොඩගත්තේ තවත් අංගනාවක්මැයි.

    ReplyDelete
    Replies
    1. හැලප,

      උඹ කියපු හින්දමයි පරිවර්තනය කලේ...:)

      Delete
  8. උතුරැමැද පළාත් කතා වලින් කියවපු වෙනස්ම විදියෙ කතාවක් ලියපු භාෂාවත් ඒකටම යනවා.ජය!!

    ReplyDelete
  9. භාෂාව ඉස්තරම් !

    දැකුළු මලත් ජීවිතයට පාඩමක් වෙලා එහෙනං,
    ගෙදර මගෙ කාමරේ ඉද්දි මට පාඩම්ම කීයක් මිස් වෙලාද එතකොට :)

    ReplyDelete
    Replies
    1. කසුන්,

      අඩේ පාඩං ඉගෙන ගන්ට අවශ්යතාවයක් නැත්තං ආය කලබල වෙන්ට ඕන නෑ....:)

      Delete
  10. රවිගේ කම්පැනියට ජය වේවා. තව තව අඩන ලියුං ලියවේවා.. ෆන්ඩ් ලැබේවා එක්සෙටෙන්ෂන් ලැබේවා..

    බය නැතිව කියන්න පුළුවන්,, උඹ මට වැඩිය ටිකක් විතර සිංහල දන්නවා කියලා.. හැක් හැක්..

    චියර්ස් රවි.. ද රාස්සයා..

    ReplyDelete
    Replies
    1. හෙහ්..හෙහ්..ස්තූතියි දේශා....:)

      Delete
  11. ගද්‍යාඛ්‍යානයක්
    ළයාන්විත භාෂා රටාවක්.. අපූරුයි රවි අයියා...

    ReplyDelete
  12. ////Where have you seen the most amazing sun set of your life? If you are not sure or can't remember let me describe the most breathtaking sun sets I have ever seen. /////

    පලවෙනි ඡේදය මම ඉංග්‍රීසියට පරිවර්තනය කරා. හොඳද බලපන් මචෝ.
    මුලු පෝස්ට් එකම ට්‍රාන්ස්ලේට් කරලා ඕන් නම් කියපන්.

    ReplyDelete
    Replies
    1. අරූ,

      එක පාරක් හෙන්රිය පරිවර්තනය කරපු අර ඇන්ඩිගෙ කතාවක් කොච්චර මගෙ හිතට ඇල්ලුවද කිව්වොත් මම ඒකෙ ඡේද හතර පහක්ම ඉංග්‍රීසියට පරිවර්තනය කරන කොටයි මීටර් වුනේ යකෝ මේක පරිවර්තනයක් නේද කියල...හෙහ්..හෙහ්..

      Delete
  13. නෙළුම එක්ක මුලින්ම ගෝල්ෆේස් එකට ගිය දවසෙ ඉර බහින හැටි බලාගෙන හිටියා එයාව තුරුළු කරගෙන...
    ඒ තමයි ලස්සනම හිරු බැසයෑම

    ReplyDelete
    Replies
    1. උඩුවා,

      ඔබ හා එකඟයි..ඒ තමයි ලස්සනම මොහොත...:)

      Delete
  14. මම මේ කල්පනා කළේ භාෂා දෙකේ තියන වෙනස ගැන... රවීගේ ලිවීමේ ශෛලිය නිසාද එහෙම නැත්නම් මගේ තේරුම් ගැනීමේ හැකියාව අනුවද මංදා මට සිංහලෙන් ලියවුනු එක වඩාත් කාව්‍යමයි කියලා හිතෙනවා..

    ඇත්තටම ඔය වගේ එක නිමේෂයක සංසිද්ධියකින් යූ ටර්න් ගහලා මුලු ලෝකයම වෙනස කරපු, වෙනස් කරගත්තු ඈයෝ කොච්චර ඇත්ද නේද ?

    මේ ලෝකෙ තියන දූවිලි අංශුවකට පවා නිශ්චිත කාර්‍යයක් තියනවා කියලා මට හිතෙන එක ඇත්ත කියලා හිතුනා මේක කියවපුවම...

    ReplyDelete
    Replies
    1. ඉංග්‍රීසියෙන් කොච්චර කාව්‍යාත්මකව ලියන්න පුලුවන්කම තිබුණත් ඒක තෙරුං ගන්න පුලුවන් සුද්දන්ට විතරයි. අපටනං ඉතිං අපේ භාෂාවෙන්ම තියෙන්න ඕන.

      Delete
    2. Senna,

      / රවීගේ ලිවීමේ ශෛලිය නිසාද එහෙම නැත්නම් මගේ තේරුම් ගැනීමේ හැකියාව අනුවද මංදා මට සිංහලෙන් ලියවුනු එක වඩාත් කාව්‍යමයි කියලා හිතෙනවා.. /

      ඒක එහෙම වෙන්නම එපාය බං..සිංහල කියන්නෙ අපෙ මව් භාෂාව. අම්මගෙ බඩේ ඉන්දැද්දි ඉඳල ඇහෙන්නෙ සිංහල. ඒ හින්දම සිංහල අපට වඩාම කාව්‍යමයව හැඟෙන වඩාත්ම අපේ හැඟීම් සවිස්තරව ප්‍රකාශ කල හැකි භාෂාව නිසැකවම.

      / ඇත්තටම ඔය වගේ එක නිමේෂයක සංසිද්ධියකින් යූ ටර්න් ගහලා මුලු ලෝකයම වෙනස කරපු, වෙනස් කරගත්තු ඈයෝ කොච්චර ඇත්ද නේද ? /

      මේ මාතෘකාව ගැන ලිව්වැහැකි බං පොතක්ම ...:)

      Delete
  15. දැන් තමා තේරුම් ගියෙ බොහොම සොඳුරු ලියවිල්ලක් ! ඇත්තටම ගිය පාර පොස්ටුව තේරුම් ගියෙ නෑනෙ . පහළ කමෙන්ටුව විතරයි තේරුණේ ...

    She doesn't read blogs regularly and that includes what I write. If I want her to read something I have to inform her. " See my blog today , I have written something that I want you to read " something like that.

    Well when I write about my old flames I don't tell her. No. not because of what you think,that she would be jealous and start being difficult..No..my dears ..the problem is she is totally opposite..and believe me it is more difficult to come to terms with that than she being jealous.

    Know what she would do? She would tell me all in her innocence " No, problem Ravi, I understand perfectly. I know how you feel about your old flame, so..and so…That's because I feel the same when I think of my ex……." Then She would go on and on and on about her old boy friends non stop. Naturally that drives me crazy enough to bite my own butt .

    හික්ස් ! අනේ අපේ අම්මට හච්චිං යයිද දන්නේ නෑ දැන් ....

    ReplyDelete
    Replies
    1. Methu,

      / හික්ස් ! අනේ අපේ අම්මට හච්චිං යයිද දන්නේ නෑ දැන් .... /

      අනේ බං ඒ අහිංසක උන්දැට වගපල කියල අය අහවල් දේකටද? එතුමී වැරැද්දක් කරානං කරේ ඉතිං උඹ වගෙ කිසිම අංගපුලාවකට නැති එකියක් ජාතක කරපු එක විතරයිනෙ. ඒකත් ඉතිං නොදැන කොරාපු වැරැද්දක් නෙව. ඒ හින්ද ඒ වගෙ වැරදි නිකම්ම අහෝසිවෙලා යනව...:)

      Delete
  16. I'd rather remember the English version. This is Ravi we mostly know. But the previous one is a precious little gem to me.

    ReplyDelete
  17. Moo marenna lanwelada koheda? Manghan liyanne

    ReplyDelete
    Replies
    1. ඇනෝ,

      කියන්ටත් බෑ තමයි...:)

      Delete
  18. ඔය කොච්චර ලොකු ලොකු දේවල් තිබුණක් ජීවිතේ ඇසිල්ලකින් කණපිට හරවන් පුලුවන් බොහොම සුළු දේකට තමයි.
    ඔහේ ඒ පැත්තට වෙලා ගතකරපු ජීවිතේ ගැන යම් වැටහීමක් මේකෙන් ඇති කරන්න පුලුවන්.
    අගේ ඇති ලියවිල්ලක් රවී අයියා..

    //ඉන්පසු මවිසින් විසඳියයුතු ගැටලුව වූයේ සයනයෙන් නැඟිට දවස ඇරඹීම හෝ යලිත් සයනයෙහි දිගාවී නින්දට පිවිසීම හෝ යටත් පිරිසෙයින් සයනයෙහි දිගාවී සිටීම යන කර්තව්‍යයන් දෙකෙන් එකක් තෝරාගැනීමය// මෙතන තුනක් නැද්ද?

    ReplyDelete
    Replies
    1. Prasanna,

      //ඉන්පසු මවිසින් විසඳියයුතු ගැටලුව වූයේ සයනයෙන් නැඟිට දවස ඇරඹීම හෝ යලිත් සයනයෙහි දිගාවී නින්දට පිවිසීම හෝ යටත් පිරිසෙයින් සයනයෙහි දිගාවී සිටීම යන කර්තව්‍යයන් දෙකෙන් එකක් තෝරාගැනීමය// මෙතන තුනක් නැද්ද? /

      ආයෙම ඇඳේ දිග ඇදිල නිදාගන්න එක හෝ එහෙමම පෙරලිල ඉන්න එක මම සැලකුවෙ එකම කාර්යයක වර්ෂන් දෙකක් විදිහට. ඒකයි එහෙම දෙකක් කියල ලිව්වෙ...:)

      Delete
  19. //එකවරක් දුටුවහා ඉන් පාඩමක් ඉගෙන ගත නොහැක්කෙකු හට නැවත නැවත එම දර්ශනය පෙන්වීමෙන් පලක් නොමැතිබව මේ සියල්ල මෙහෙයවන්නකු කොතනක හෝ සිටීනම් ඔහු හෝ ඇය සිතනු විය හැක// මේ ටික කියෝනකොට මට මතක් උනේ 2001 කතාවේ ඩේව් බෝමන් සහ හල් 2000 පරිගණකයේ බුද්දීය පාලනය කරපු කලු කුළුණ.

    ReplyDelete
    Replies
    1. අඩේ උඹට කියන්න මටත් ඕක මතක් උනානේ. ආයේත් පොත හොයාගෙන කියවන්න ඕනෑ.

      Delete
    2. Prasanna,

      / මේ ටික කියෝනකොට මට මතක් උනේ 2001 කතාවේ ඩේව් බෝමන් සහ හල් 2000 පරිගණකයේ බුද්දීය පාලනය කරපු කලු කුළුණ. /

      අන්න පරිවර්තන. එස්.එම්. බන්දුසීල මහත්මයාගෙ 2001 අභ්‍යාවකාශ වීර චාරිකා...ඩේව් බෝමන්, ෆ්‍රෑන්ක් පූල් සහ හල් 2000

      2001 සීරීස් එකේ පොත් හතරම මම කියෙව්ව.දෙකක් විතරයි මම හිතන්නෙ සිංහලට පරිවර්තනය වුනේ..

      උඹට කියන්ට බං අර මම ලියපු ඩවුන්ස් සින්ඩ්‍රෝම් එක ගැන ලිපියට කරුණු හොයද්දි වර්ණදේහ ගැන මම පොඩි රිසර්ච් එකක් කලා. වර්ණදේහ වලින් අපි අනාගතයෙ මොනවගෙ පුද්ගලයෙක් වෙයිද? අපෙ ගතිගුණ දේහ ලක්ෂන මොනවගෙ වෙයිද? කියල තීරණයවෙන ඉතාම සංකීර්ණ ක්‍රියාවලිය ගැන කියවද්දි මගෙ හිතේ කාලෙක ඉඳල තියෙන දෙයක් ආයෙම ඔප්පු වුනා වගෙ කියල මට හිතුනා.

      ඒ කියන්නෙ මෙච්චර සංකීර්න ක්‍රියාවලියක් ඉටුකරන වර්ණ දේහ වගෙ දෙයක් ස්වාභාවික පරිණාමයෙන් ඇතිවෙන්න පුලුවන්ද? කියන ප්‍රශ්ණෙ. එහෙම නැත්තං 2001 සීරීස් එකේ ක්ලාක් කිව්ව විදිහට මනුෂ්ය වර්ගයා වෙනත් ඉතා දියුණු ජීවීන් කොට්ඨාශයක නිර්මාණයක්ද?...ඒ ගැනත් මොනව හරි ලියන්ට වෙනව...:)

      Delete
    3. පොත් හතරම ඒ කියන්නේ 2001,2010,2061 සහ 3001 ඔක්කොම සිංහලට පරිවර්තනය කරලා තියෙනවා..

      Delete
  20. [මම හුදෙක් සත්‍යයක්ම පවසමි. සත්‍යය මිස අන් කිසිවක් නොපවසමි.]
    මෙන්න මේ කෑල්ල හින්ද අපි මේ කතාව විශ්වාස කරනවා.. හෙහ් හෙහ්

    නියමයි රවී අයියේ, නියමෙට ලියල තියෙනවා.. ඔය වගේ අමුතු සීන් එකක් මට වෙලා තියෙනවා... මං ඒක බොහොම සිල්ලර විදියට ලියල දැම්මා..

    හැබැයි ඔයා වගේම තමයි ඊට පස්සේ ඉඳන් ඒ වගේ දේවල් ගැන මම ජිවිතේට වොරි වෙන්නේ නෑ.. හෙහ් හෙහ්

    මේ තියෙන්නේ මම ලියපු සීන් එක..

    http://biththiya.blogspot.my/2012/07/blog-post.html

    මට මේ වෙලාවේදී දැනුන දේ විස්තර කරන්න තරම් සිංහල මම දන්නේ නෑ.. මේක කියෙව්වට පස්සේ මට ඒක ලියන්න තිබුනේ.. හෙහ් හෙහ්

    ReplyDelete
    Replies
    1. පැතුම්,

      කියෙව්වා...කියෙව්වා..හෙහ්..මාර අත්දැකීමක් ඒකත් නේද?

      ස්තූතියි මල්ලි....:)

      Delete
  21. බලහං රවි අයියෙ මම බොහොම අමාරුවෙන් ඉංගිරිසි එක කියවල ඉවර කලා විතරයි.
    ඉංගිරිසි එකේ වචන මලලසේකර එකෙන් බලල ආයෙත් ඔක්ස්පර්ඩ් එකෙන් බලල ඉගෙන ගත්ත කියල ලැජ්ජ නැතිව කිවුව හැකි, මේකෙ තියන සමහර වචන හොයා ගන්ඩ එයිට වඩා අමාරුයි .

    ReplyDelete
    Replies
    1. මාත් මේ යාන්තං වචන ගැට ගහගෙහ අර ලියුම කියවලා හති ඇර ඇර හිටියේ. මේක නිකං ඔලුවට පොල්ලෙං ගැහුවා වගේ.

      Delete
    2. කම්මල,

      / මේකෙ තියන සමහර වචන හොයා ගන්ඩ එයිට වඩා අමාරුයි /

      මොනවද බං ඔච්චර අමාරු වචන?...ඇත්තටම අමාරුයි කියල හිතෙන වචන වල තේරුම් අන්තිමට වෙනම ලියන්නම් කියල හිතාගෙන හිටියෙ. ඒත් අමාරුයි කියල හිතෙන වචන එහෙමකට අහුවුනේ නෑනෙ බං....

      Delete
    3. හෙන්රි,

      පලයං බං බොරු නොකිය...:)

      Delete
  22. පරිවර්තනයත් පරණ පෝස්ටුව වගෙම ඉස්තරම්..!!

    මැකිලිය කියල වචනයක් තියෙනවද.. ඇහුවමයි. ශබ්දකෝසෙවත් බලන්න ඕනෙ..))

    පහුගිය ටිකේ කොහෙ මකබෑ වෙලාද උන්නෙ හැබෑටම..??

    ReplyDelete
    Replies
    1. වැසි දැරිය,

      / පරිවර්තනයත් පරණ පෝස්ටුව වගෙම ඉස්තරම්..!! /

      ස්තූතියි!!!

      / මැකිලිය කියල වචනයක් තියෙනවද.. ඇහුවමයි. /

      මකුළුවගෙ ගෑණු සතාට මැකිළිය කියල කියනව නේද? මම දෙතුන් තැනක එහෙම කියවල තියනව. එහෙම නැතිනම් අපි එහෙම වචනයක් හදා ගමු. වචන කියන්නෙ අපි හදාගත්තු එව්වනෙ. කාලයක් භාවිතා වෙනකොට බහුජන සම්මතයෙන් ඒ වචන ස්ථිරවෙනවා.

      හැබැයි මැකිලිය කියල කියනව තවත් දේකට. මේසන් බාස්ලා පාවිච්චි කරන ලඹේ දන්නව නේද? ඒකෙ ඉහලින් තියනව හතරැස් ලී ඝනකයක්. බිත්තියක් සිරස්ද කියල පරීක්ෂාකරන්ට බ්ත්තියට තියන්නෙ ඒක. අන්න ඒ ලී ඝනකයට කියන්නෙත් මැකිලිය කියලයි.

      / පහුගිය ටිකේ කොහෙ මකබෑ වෙලාද උන්නෙ හැබෑටම..?? /

      බොහෝසේ කාර්යබහුල වීමි පින්වතිය..බොහෝ සේ කාර්ය බහුල වීමි...:)

      Delete
  23. ඉංග්‍රීසි ලිපිය කියවලා හිතේ ඇඳුන චිත්‍රය ඒ විදිහටම තාමත් හිතේ සටහන් වෙලා තිබුණ නිසාද මන්දා මේ ලිපියෙන් ඒ දැනුණ අපූර්වත්වය ඒ විදිහටම දැනුණේ නෑ. ඒත් මේකත් හරියටම වෛවර්ණ වදන් ඵලකයකින් ඇඳපු ලස්සනම ලස්සන සිතුවමක් වගේ. Nostalgic moments ගැන තදින්ම හිතට වදින්න ලියන්න හොඳම භාෂා විලාෂය මේක වෙන්න ඇති. :)

    ReplyDelete
    Replies
    1. සිත්තමී,

      බොහොසෙයින්ම ඔබට ස්තූතියි!!!

      Delete
  24. අපූරුයි රවිඳුනේ, මෙහෙමෙ කතාවක් කියෙනවා //A push in the right direction// ඒ විදියට සොබාදහම මුදු උගුලක් වගේ පෙනුනත් ආශීර්වාදයෙන් පිරුණ අලංකාර මකුළු දැලක් ඔබේ හැරවුම් ලක්ෂය බවට පත් කර ඇත්තේ වාසනාවට.

    ඔබේ ලිවිම බොහෝ සේ රසවින්ඳෙමි, අනර්ගයි!

    මගේ කතාවේ එය, පුංචි ස්ප්‍රින් එකක්://එතුන ලෝහ දඟරයකි ස්ප්‍රිනය, එසතු හැකියාවකි පෑගීමට ලක්වූ සෑම වරකදීම ඇති වන තෙරපුම නිහඬව දරාගෙන ශක්තියක් සේ ගැබ් කරගැනීම හා පීඩනය ඉවත් වූ සැනින් පෙර තත්වයට පත්වීම. මට හැඟුන අන්දමට නම් පෑගෙන සෑම වරකදීම ලද්දේ තවත් වැඩි ශක්තියකි. කටුක මාවතක ඉදිරියට එන්න ලද ශක්තිය සුළුපටු නොවේ, එබැවින්ම විශ්මිත දඟරයකි.//

    මගේ මුල්ම බ්ලොග් එක එනමින්ම:
    http://amazingspring.blogspot.com/

    ReplyDelete
    Replies
    1. ඩීන් මහත්මයා,

      බොහොමත්ම ස්තූතියි..ඔබේ මුල් බ්ලොගයත් කියෙව්වා. බොහොම අගෙයි....:)

      Delete
  25. රවී අතිශයින් අනර්ඝයි. කොපමණ ආස හිතුනද කියනවා නම් ගූගල් එකේ පින්තුර හොයාගෙන ගියා.
    https://uk.pinterest.com/pin/41095415321015863/?from_navigate=true
    https://uk.pinterest.com/vlervin21/spiderwebs/

    ReplyDelete

මගේ සිතුවිලි ගැන ඔබේ සිතුවිලි

LinkWithin

Related Posts Plugin for WordPress, Blogger...