Monday, October 1, 2012

138. එක්තරා දඩයක්කාරයකුගේ කතාව...........The Saga of A Hunter.....20

,.,

ගම්මානයට ගිය පසුගිය කිහිපවරම අනෙකුත් දැරියනට වඩා ගම් නායකයාගේ දියණිය ඔහු සමඟ ඉඟි බිඟි පෑමෙහි අනලස් වූ බව දඩයක්කාරයාට සිහියට නැඟිනි.

එසේම ඇය සම වයස් අන් සියළු දැරියනට වඩා පැහැපත් වූවා මතු නොව සිරුරෙන් ද වැඩුනේ වී දඩයක්කාරයාගේ උරහිස පමණට උස් වූවාය.

එදවස කටාක්ෂ නිරීක්ෂනයෙහිදී* ඇගේ දිගු නෙත් යුගලයෙන් නික්මුනු මහ වැසි සමය ඇරඹීමට පෙර පෙරදිග වෙරල ඉහලින් අහස් කුස සිසාරා විහිදයන විදුලි ධාරාවන් බඳු මදහස හා මුසු වුනු සරාගී බැල්ම දඩයක්කාරයාගේ තුරුණු සිත් විලට වැද ඒ කළඹාලූයේ ඔහු අන්ද මන්ද කරවමිනි.

( *කටාක්ෂ නිරීක්ෂණය - ඇස් කොණින් බැලීම, ogle, side glance )

අවසන් වරට ඇය හමුවුනු දිනය ඔහුට කිසිසේත්ම අමතක කල නොහැක.එදින ගනුදෙනු පිළිබඳ එකඟතාවයකට එලඹි ඉක්බිති හුවමාරු භාණ්ඩ ගෙන එනු වස් ගම් නායකයා ගෙතුලට වන් වහා ජලය පිරවූ ලබු කැටයක් ද රැගෙන පසුපස ද්වාරයෙන් නික්මුණු ඕ තොමෝ දෙතුන් වරක් සංවිභාගශීලීවැ අවට නීරීක්ෂනයෙන් අනතුරුව යුහු යුහුවැ කඩුල්ල අසල වූ සුවිසක් පළු රුක් සෙවණෙහි ඇණ තබාගෙන හුන් දඩයක්කාරයා වෙත එලඹියාය.

( * සංවිභාගශීලීව - පරීක්ෂාකාරීව )

'' අයියට දිය පිපාසෙ හේමයි? මම මේ දිය ඇබිත්තක් ඇන්න ආව..''

රත් වන් දෙතොල් විවර කොට එසේ පවසමින් ඈ ඔහු වෙත දිය බඳුන පාමින් නැමී සිටියාය. ඇගේ තොල් වෙව්ලනු හා සමඟම උඩු තොල මත නැඟි දා බිඳු පෙල ද දුටු දඩයක්කාරයා ඒ දෙස බලා සිටියේ දෑස ඉවතට ගත් නොහුනු පරිද්දෙනි.

ඔහුගේ බැල්ම කොතෙකුත් ඉවසනු නොහුනු ඈ දෙනෙත පහතට යොමුවූයේ ද කන්පෙති වලින් ඇරඹී ගෙල පෙදෙස පසුකොට පිරුණු ලැම කරා ලේ පුරා ආවේද එක්වරමය.

ජීවිතයේ කිසිදිනෙක අත් නොවිඳි උණුසුම් හැඟුම් සමුදායකින් සපිරුණු සිතක් මෙන්ම ගතකින්ද ඔදවැඩී ගිය දඩයක්කාරයා සිය දෑතම දිගුකොට දිය සපිරි ලබු කැටය රැගත් ඇගේ දෑත තරව ග්‍රහණය කොට ගත්තේය.

ඇගේ ආශ්වාස ප්‍රශ්වාස වේගය එක් වරම වේගවත් විය. ඒ සමඟම වෙලෙවිව ගිය ඇගේ දෑතින් උගේ* ගිලිහුනු ලබු කැටය බිම පතිත වූයේ එහි රැඳි දිය වියළි පොළොව මත විසිරුවා හරිමිනි.

( * උගේ යනු ලබු කැටයක ආරක්ෂාව උදෙසා මෙන්ම දිය හෝ වෙනත් ධාන්‍ය වර්ගයක් පිරවූ පසු ඔසවාගෙන යාමේ පහසුව සඳහා ඒ වටා හැර කිහිපයක් වෙලා ඔසවා ගැන්මට කාදුවක් ද සහිතව සකස් කරගන්නා සැකිල්ලක් වැනි යමකි. වියලා පදම්කරගත් වේවැල් හෝ එවන් අනෙක් සවිමත් වැල් වර්ගයක් මේ සඳහා භාවිතා කෙරේ. )

ඒ ශබ්දය ඔවුන් දෙදෙන දැහැනින් මිදවීමට සමත් විය. වහා පහත නැමුනු ඔහු ලබු කැටය ගෙන නැඟී සිටියේ ද මහත්සේ කලබල වූ ඇය කෙලින් වී සිටගත්තේද ගෙතුලින් අඩක් පිරුණු කඩ වැස්මක් සහිත ගෝණි පඩංගුවක් ද උරයේ රුවාගෙන ගම් නායකයා ඉදිරි දොරින් මිදුලට බසින්නා හා සමඟමය.

මිදුල මධ්‍යයෙහි නැවතී ඇය දිවයන දෙස මොහොතක් බලාසිටි ගම් නායකයා ඉනික්බිති සෙමෙන් පියනගමින් දඩයක්කාරයා වෙත එලඹියේ දැඩි කල්පනාකාරී බවකිනි.

කිසිදු කතාබහකින් තොරව ගණුදෙනු හමාර වූ ඉක්බිති දඩයක්කාරයා ආපසු යනු පිණිස කඩුල්ල පනිද්දී එක්වරම හදිසියේ මතක් වූවා මෙන් ගම් නායකයා ඔහු ඇමතීය.

'' මට බොහොම දොහකට සිදාදිය අහ කරක් ගහන්ට වෙන්නෙ නැතුං, ....ආයෙම අඩුම කුඩුම ගෙනාහම මං කොල අත්තක් එල්ලඤ්ඤා*.....''

( * දඩයක්කාරයා බොහෝවිට ගෙපැලෙහි නොවූ බැවින් හුවමාරුවට භාණ්ඩ රැගෙන ආ පසු ගම් නායකයා හෝ ඔහුගේ අත වැසියෙක් ඒ බව දැනුම් දීම උදෙසා ගෙපැල ඉදිරියේ වූ කොහොඹ ගසෙහි අත්තක් එල්ලා තබන සිරිතක් පැවතිණි. )

ඒ පණිවිඩයේ නොකියා කියවුණු ඇඟවීම දඩයක්කාරයා හොඳින් වටහා ගත්තේය. එනම් එතෙක් ගම් නායකයා හමුවීමට පැමිණීමෙන් වැළකිය යුතුය යන්නය. සුපුරුදු ලෙස මුවින් නොබැන ගම් නායකයා පැවසූවට සවන් දුන් දඩයක්කාරයා මඳක් හිස සලා ආපහු හැරී කඩුල්ලෙන් පැන්නේ හුවමාරු කල භාණ්ඩ පිරි ගෝණි පඩංගුවද කර තබාගෙන වන පෙතට වැද නොපෙනී ගියේය.

ඉනික්බිති කෙසේවත් ඇය අමතක කරනු නොහුනු දඩයක්කාරයා, එදිනට පසු කිහිප දිනක්ම ගම් නායකයාගේ ගෙපැල අද්දර වනයෙහි සැඟව හුන් නමුදු ඇය දැකගැන්මට හෝ අවස්ථාවක් නොලද්දේය.වන වාසී දැරියන් බොහෝ විට නිදැල්ලේ තම සිතැඟි පරිදි දවස මුලුල්ලේ සරන අතර වැඩිහිටියන්ගෙන් ඊට බාධාවක් එල්ල වනු නැති තරම්ය. එබැවින් ගම් නායකයාගේ දියණිය දින කිහිපයක් මුලුල්ලේ නිවසින් බැහැරව නොයාම වනාහී ඈ පිළිබඳව ඇතිවූ සැකය නිසාම ඇගේ පියා විසින් පැනවූ තහංචියක් නිසාම වන්නට ඇතැයි අවසන දඩයක්කාරයා තීරණය කලේය. සත්‍ය වශයෙන්ම ඔහුගේ ඒ තීරණය නිවැරැදි විය. ඒ එසේම විය.

පූර්වෝක්ත සිද්ධිය වූ දින දඩයක්කාරයා පිටත්ව ගිය වහාම ගෙතුලට පිවිසි ගම් නායකයා දියණිය ඇමතුවේය.

'' තී මිං මනත මේ ගෙයිං එක අඩියක් එලියට බැස්සොත් බලාගං..... තිගෙ මහ එකී මියෑදුනු දා ඉඳල මම තී ලොකු මහත් කලේ කැලේ ඉන්න සතෙක් වගෙ එකෙකුට දෙන්ට නෙවෙයි බොල, හෙටම මම නිල්ගල ඉන්න මයෙ නගාට පයිංඩයක් යවනව ඒකිගෙ පුතංඩියට තී සහේ ගන්ට කටයුතු සූජානං කරන්ටෙයි කියල ''

ඇය මුවින් නොබැන ඔහු කියන්න අසා සිටියේ ඉරිඟු කරල් කිහිපයක ඇට ගලවා මඩක්කුවකට දමනා අතරය.එහෙත් ගම් නායකයාට පිටුපා සිටි ඇගේ යටි තොල සැපෙනු මෙන්ම දෑත් මිට මෙලවෙනුද දෙනෙත් විශාලව දීප්තිමත් වනුද ඔහු නොදුටුවේය.

ඒ මීට සතියකට පමණ ඉහතදීය. එදිනට පසු ඇය ඔහු නෙත ගැටුනේ මේ මොහොතේදීය.මේ හිරු බැස යන සමයෙහි ඇය මෙතැන කුඹුක් ගස සෙවනෙහි කුමක් කරන්නේද යන්න පිළිබඳ කුකුස දඩයක්කාරයාගේ සිතට නැඟුනු නමුදු ඒ මොහොතකට පමණි. ඇය මෙහි පැමිණි හේතුව ඔහුට සක් සුදක් සේ වැටහිණි.

ඇගේ වත රත්පැහැයෙන් ගැන්වී තිබුණු බව සැබෑය. එහෙත් ඒ කුඹුක් වනස්පතියට පසුබිම්වැ නිල් අහසට නැඟුනු, තුඟු විසල් වාළිඹේගල පර්වතය පසුපස සැඟව අස්තංග ගතවන සූර්යයාගේ අවසන් රන්පැහැ කිරණ කදම්බයන් හේතු කොටගෙනද, එසේත් නැතහොත් සිත් කළඹවනසුලු ආවේගයන් සමුදායක් එකිනෙක පරයා නැඟී සිටීමට තැත් දරණ කල්හි නිතැනින්ම සිදුවන්නාවූ ලේ පුරාඒම නිසා වූවක්ද යන්න අවිනිශ්චිතය. ඒ කෙසේ වුවද ඇගේ වතෙහි රත් පැහැය හෝ එක්වනම වනයේදී මඟට කඩා පිණූ දරුණු වන මෘගයකු වෙතින් දිවි රැකගෙනැ ගැලැවී ගනු වස් පවනට බඳු වේගයෙන් දිවගිය පසුව අශ්වාස ප්‍රශ්වාසයෙහි නිතැනින්මැ සිදුවන වේගවත් බව මෙන් වූ ඇගේ තුඟු ලය මඬලෙහි උච්චාවචනය පිළිබඳ කල්පනාවෙහි යෙදීමට දඩයක්කාරයා හට කිසිදු ඉඩ ප්‍රස්ථාවයක් උදක්ම නොලැබිණි.ඒ එකෙනෙහිම ඔහු වෙත දෙපියවරෙකින් ළඟා වූ ඇය ඔහු ගෙල වටා යුගත් පටලා තරව වැළඳ ගත් හෙයිනි.

දඩයක්කාරයාට කිසිවක් සිතාගැන්මට හෝ කාලවේලාවක් නොතිබිණි. එසේ කාල වේලාවක් තිබුණ ද කුමක් සිතාගන්නටදැයි නොදැන ඔහු විපිලිසර වීම ඒකාන්ත හෙයින් එයින් කිවයුතු අන්දමේ වෙනසක්ද නොවිනි.

අව්‍යාක්තවූ කෙඳුරුම් හඬකින් මුමුණන වදනක් හෝ දෙකක් ඇගේ මුවඟින් නිකුත් විය.ඒ සමඟම ඈ ඔහුහේ දෙතොල තම වෙව්ලන දෙතොලින් සිප ගත්තීය. තරව දෑස් පියාගත් දඩයක්කාරයාද තම සිතැඟි වලට ඉඩ දී මේ මොහොතේ චමත්කාරය විඳීමට ගත සිත දෙකම කැප කලේය.

ඇගේ උණුසුම් සුසුමෙක පහස දැනුනු තම ගෙල පෙදෙස රතු වී ලේ පුරායනු දැනුනු ඔහු තව සවිමත් දෑතින් ඈ උඩුකය සිරකොට ඈ තම ළයට තෙරපා ගත්තේ ඇය තම සිරුරේම කොටසක් කර ගැන්මට අදිටන් කර ගත් සෙයකිනි.

මොහොතකට ඔහු මුවින් මිදුනු ඈ දෙතොලගින් කෙඳුරුමක් පිටවූයේ ඔහුගේ දැඩි ග්‍රහණය නිසා වූ වේදනාවෙන් ද එසේත් නැතහොත් ඒ අනුරාගයෙහි පිවිසුම් දොරටුවෙන් ඇතුළුවන කල්හි නිරායාසයෙන් නැඟෙනා ධ්වනිතාර්ථයක් ද? නැතහොත් මේ සංජානනයන් දෙකෙහිම සම්මිශ්‍රණයක් නිසාවෙන්ද?...ඒ පිළිබඳව සිහි එලවීමට ඔහුට හෝ ඇයට කිසිදු අවශ්‍යතාවයක් හෝ ඉඩ ප්‍රස්ථාවයක් එකෙලාම නොවීය.ඔවුහු අනුරාගයේ පරතෙර වෙත යුහුවැ ලඟා වෙමින් සිටියෝය.

ඇගේ ආක්‍රමණශීලී ආගමනය නිසා නිතැනින්ම පසුපසට පිය මාරුකිරීමට සිදුවූ දඩයක්කාරයා අවසන කුඹුක් ගසට පිටදී ඊටම වාරු වී සිට ගත්තේය. නිරුවත් පිටි උරය ප්‍රදේශයේ තරව දැවෙටෙනා කුඹුක් කඳෙහි වියළි රළු පොතු සුඹුල් හේතු කොටගෙන පිට ප්‍රදේශය පුරා පැතිර යන වේදනාව පවා කිසිසේත් නොදැනෙනා මානසික තත්වයකට ඔහු පත්ව සිටියේය.

ආශාවේ ගිණිදැලින් වෙලී රාගයේ මං පෙතෙහි සක්මනෙහි යෙදෙනු වස් නිරායාසයෙන්ම යොමු වූ තරුණිය සහ තරුණයා එක් වරම සිහිල් දිය දහරකින් හිසෙහි සිට දෙපතුල් දක්වා නැහැවී ගිය බඳුව පියවි ලොවට පැමිණියේ ඒ ආසන්නයෙන්ම ඇසුණු මිනිස් හඬකිනි.

එකෙණෙහිම තරුණයාගෙන් මිදුනු හෝ තරුණයා මුදා හැරි තරුණිය... ... මේ කෙසේ පැවසුවද එහි සැලකියයුතු වෙනසක් නොමැති අතරම මෙහිදී සිදුවූයේ ඉහත කරුනු දෙක අතරින් කුමක්ද යන්න දෙවියන් පවා හරිහැටි දැන සිටියේද යන්න ද විවාදාපන්නය......වහ වහා විසුරුණු දල රෙදිකඩින් උඩුකය වසාගත්තී දෙවුර පුරා විසිරුණු අවුල් වූ කෙහෙරල හිස් මුදුනට කොට බැඳ ගනිමින් කුඹුක් සෙවණින් පිටමංව ගම්මානය කරා දිවෙන මංපෙතට අවතීර්ණ වන්නට සූදානම් වූවාය.එහෙත් මේ සියළු අපකලංචි මධ්‍යයේ වුවද පුරා ජීවිත කාලයක් පුරුදු පුහුණු කල ශිල්පය ඔහු අතැර නොගිය හෙයින් උඩු සුළඟ හමනා දිශාව අනුව ඒ අනපේක්ෂිත මිනිස් හඬ නිකුත් වූයේ මංපෙත ඔස්සේ ගම්මානය දෙසින් පැමිණෙන්නෙකු හෝ දෙදෙනෙකුගෙන් බවට දඩයක්කාරයා හොඳින් දැන සිටියේය.

යුවතියගේ දසරුවට තම සුරත තැබූ හෙතෙම වමතේ දබරැඟිල්ල ඇගේ දෙතොල මත තබා නිශ්ශබ්ද වන ලෙස සංඥාකලේ කුඹුක් ගස ඉහත්තාවේ හීං ඇල ඉවුර ඔස්සේ ගොස් මෙදෙසට පැමිණෙන මිනිසුන් මඟ හරවා යලි ගම්මානය කරා දිවෙන මංපෙතට පිවිසිය හැකි මාර්ගය ඇයට දක්වා ලූයේය.තම දෙතොල් මත වූ දඩයක්කාරයාගේ දබරැඟිල්ල එක්වරක් තදින් සැපූ ඒ යුවතිය යලිත් රත්වන් දෙතොල් මෑත්කොට ඔහු හා එක් වරක් සිනාසුනී කුඹුක් ගස වටා මුවැත්තියකගේ කඩිසර පියවරින් දුවහොස් වනපෙතට වැද අතුරුදන් වූවාය.

ඇය දිවගිය දෙස මන්දස්මිතියකින් යුතුව මොහොතක් බලා සිටි දඩයක්කාරයාට ආපසු හැරීමට සිදුවූයේ මංපෙත ඔස්සේ පැමිණි මිනිසුන් දෙදෙනා මේ අවස්ථාවෙහිදී මේ ජවනිකාව රඟ දැක්වෙන රංග භූමිය වෙත පිවිසි හෙයිනි. මැදිවියේ පසුවූවද හැඩි දැඩි රළු පරළු පෙනුමකට උරුමකම් කී ඔවුන් ගම් නායකයාගේ බව බෝග වගා කටයුතු මෙන්ම වෙළඳාම කටයුතු වලදී ඔහුට සහාය වන්නා වූ අන්තේවාසිකයින් දෙදෙනා බව දඩයක්කාරයා එකෙනෙහිම හඳුනා ගත්තේය.

එකෙකු මංපෙත අසල රැඳී සිටියදී දඩයක්කාරයා ඉදිරියට, ඔවුන් අතර පරතරය පියවර දහයකට පමණ සීමාවනතෙක් ඉදිරියට පැමිණි ඔවුනතරින් වඩාත් හැඩි දැඩි දේහධාරියා ඔහුගේ ඝණ ඇහිබැමින් වැසීගිය බොර පැහැ දෑස දඩයක්කාරයාගේ දෑස දෙස එක එල්ලේ යොමුකොට මොහොතක් දෙකක් තුනක්...බලා සිටියේය. ඇසිපිය හෙලීමකිනුදු තොරව දඩයක්කාරයා ද ඒ බොර පැහැ දෑස දෙසම බලා සිටියේ පළමුව දෑස ඉවතට ගන්නා වු අය කවරකු හෝ ඔහු පරාජයට පත්වන අන්දමේ ක්‍රීඩාවක යෙදෙන ලෙසිනි.

අවසන බොර පැහැ දෑස් හිමියා පරාජය භාරගත්තේ, දෑස් ඉවතට ගෙන සෙමෙන් ඉවතට ගොස් තම සඟයා හා එක්වූයේය. ඔවුන් දෙස තවත් මොහොතක් බලාසිටි අප තරුණයා වනයට වැදෙනු පිණිස එතැන පියමං කරනට සැරසුනා පමණි. මිනිසුන් දෙදෙනාගෙන් එකෙකු නැඟි විස්මයාහව රාවයක් හේතු කොටගෙන හිටිපියම නැවතුනේ ආපසු හැරී බැලීය.හැඩි දැඩියා නොව අනෙකා තම සුරත දිගුකොට කුඹුක් ගසෙහි මුල් අතර සැඟවී අඩක් පමණක් දිස්වන යමක් අනෙකාට පෙන්වූයේය. ඒ ඔසේ දෑස් යොමුකල ඔහුට දැකගත හැකිවූයේ ලබු කැටයකි. ඒ පෙර දින ඇය තමාට දිය ගෙන ආ ලබු කැටයම බව ඔහු එක පැහැර හැඳින ගත්තේය.

ඒ ලබුකැටය ගම් නායක අන්තේවාසිකයින් දෙදෙනා ද හඳුනා ගත් බවට සැකයක් නොවීය. මෙවර ඔවුන් දෙදෙනාම ඉදිරියට පැමිණියෝය.පහතට නැවී ලබුකැටය අසුලාගත් සඟයාගේ අතින් ඒ උදුරාගත් හැඩි දැඩියා කෝප දීප්ත නේත්‍රයෙන් යුතුවූයේ දඩයක්කාරයා දෙසට ලබු කැටය ඔසවා පා බිරුසන් දුන්නේය.

'' කොහොමද යකෝ මේ ලබුකැටේ මෙතෙංට ආවෙ? ''

හැඩි දැඩියාගේ කෝපය හෝ ඔහුගේ බිරුසන් දීම කිසිදු ගනනකට නොගත් දඩයක්කාරයා සුපුරුදු ලෙස නොසැලී බලා සිටියේය.

තවත් මොහොතකට පසු තම සඟයා පහත් හඬින් පැවසූ යමකට සවන් යොමුකල හැඩි දැඩි දේහ ධාරියා තවත් වරක් දඩයක්කාරයා දෙස ගිණි පුළිඟු නික්මෙන දෑසින් බලාසිට මංපෙතට ප්‍රවිෂ්ඨ වූයේ ගම්මානය දෙසට ගමන් කරන්නට වූයේය. ඔවුන් නොපෙනී යනතෙක් හිටි දාරනයේම රැඳී හුන් දඩයක්කාරයා තම ගෙපැල බලා යනු උදෙසා වන පෙතට වැදුණේය.

ඉන්පසු කිසිම දිනෙක දඩයක්කාරයාට ඒ සොඳුරු යුවතිය හමු නොවීය. ඉනික්බිති ගෙවීගිය සති කිහිපයක් පුරාවට ඔහු ගම් නායකයාගේ නිවෙස අසල වන ගහනයෙහි සැඟවී හුන්නද කිසි දිනෙක ඇගේ ඡායා මාත්‍රයක් හෝ දැක ගැන්මට ඔහුට භාග්‍යයක් නොවීය.

එම සදානුස්මරණීය සිද්ධියෙන් කලක් ගතවන තුරු දඩයක්කාරයා කුඹුක පසුකරන කල්හි එතැන මඳක් නැවතී ඈ හා ගෙවූ ඒ ක්ෂණික සොඳුරු නිමේෂය යලි ආවර්ජනය කිරීමෙහි යෙදුනේය. එහෙත් කාලයක් ගතවන විට මිනිස් සිත් සතන්හි අනිවාර්යයෙන්ම සිදුවන්නාසේම ඒ සොඳුරු මතකයද දඩයක්කාරයාගේ සිතෙහි අගු පිලෙක අඳුරු සෙවනැලි අතර සැඟව ගියේය.

සැඩ පහරින් බේරාගත් මේ නාදුනන යුවතියගේ නිරුවත් දේහය විසින් දඩයක්කාරයාගේ සිත තුල අවදි කරවනු ලැබූයේ ඒ කාලයේ අඳුරු සෙවණැලි තුල සැඟව ගිය අතීත සොඳුරු මතකයන්ය.

ඇය එක වරම සිහින් කෙඳිරියක් නඟා නැඟී සිටීමට උත්සාහ කලාය. එහෙත් උඩුකය මඳක් හෝ ඔසවා ගැන්මට තරම් සවියක් නොතිබුණු හෙයින් ආපසු මුව සම මතටම ඇද වැටුනු ඕ තොමෝ අවසිහියෙන් මෙන් කොඳුරන්නට වූවාය.

අතීතාවර්ජනයෙන් එකෙනෙහිම බැහැරවූ දඩයක්කාරයා වහා පහත්ව ඇගේ හිස සෙමෙන් අතගා දෙදණ කෙලින් කොට නැඟී සිටියේය.

මතු සම්බන්ධයි........

17 comments:

  1. හා...ප්පා!!!! ලොමු ඩැහැගැන්වෙන සරාගී ජවනිකාද රැගෙන මෙ ඇවිල්ල තියෙන්නෙ....
    අනේ මන්දන්නෙ නෑ මොකකිං මොකක් වෙයිද කියල ඊ ලඟට...

    ඇයි අයියෝ දඩයක්කාරය අර ගෑනු ළමයට ආපහු යන්ඩ දුන්නෙ??

    ReplyDelete
    Replies
    1. / හා...ප්පා!!!! ලොමු ඩැහැගැන්වෙන සරාගී ජවනිකාද රැගෙන මෙ ඇවිල්ල තියෙන්නෙ....අනේ මන්දන්නෙ නෑ මොකකිං මොකක් වෙයිද කියල ඊ ලඟට.../

      ඉඳපංකො බලාගෙන ..මේ දඩ්ගෙ මුල්ම සීන් එකනෙ...සැඩ පහරේ ගසාගෙන ආ යුවතිය එක්ක සීන්ස් ටික බලාපංකො උඹ.....හෙහ්, හෙහ්,

      නිදහස් සිතුවිලි බොලොග්ගෙ සිංඩියෙනුත් දොට්ට දම්මල රංදිල්ට යන එන මං නැතිකරල තමයි මම පස්ස බලන්නෙ...ලියාගනිං කොලේකුයි පැංසලකුයි අරගෙන මම අද කිව්වය කියල...එහ්හෙන්නං....

      මාවයි මයෙ දඩයක්කාරයයි මේ විදිහට නරක් කලේ අන්න අර තකුඹියො දෙන්න...පොඩි කුමාරිස් සහ අමාරිස්....කොයි බොල සොප්ට් පෝං, කොයි බොල සොප්ට් පෝං කියාල කොයිවෙලාවෙ බැලුවත් අඬහැරේ....මෙතන උදේ හවස තිබ්බෙ නෑ කනක් ඇහෙන්ට....

      / ඇයි අයියෝ දඩයක්කාරය අර ගෑනු ළමයට ආපහු යන්ඩ දුන්නෙ?? /

      යන්ඩ දුන්නෙ කවුද බං...බය වෙච්ච පාර ඒකි පැනල දිව්වනෙ....දඩයක්කාරයගෙත් ඔය හා හා ළඳේ කියල පලවෙනි අත්දැකීම නෙව ඔය අංසයෙං..ඉතිං ඌටත් අඳෝ සංසාරයක් තිබ්බෙ නෑ මොකද කොරන්නෙ කියල....

      Delete
  2. අලුත් වචන රැසක් ඉගෙන ගත්ත . සික් මන් හිතුවේ ඒ දැරිවි මයි මේ පාවෙලා ඇවිත් දඩ්ට අඳුනගන්න බැරි වෙලා කියල . දැන් බලපල්ලකො මේක සමකෝණී ත්‍රිකෝණයක් වෙන්නයි යන්නේ . දැන් මුන්ද අලුත් කෙල්ලක් එක්ක ඉන්නවා දැක්කොත් අර කලින් දැරිවිගේ කඳුළු පිහිනන දඩ්ට බුල් තුවාය සොයන්න වෙනවා

    ReplyDelete
    Replies
    1. / අලුත් වචන රැසක් ඉගෙන ගත්ත /

      අඩේ බින්දි...අනුරාගය කියන වචනෙ කලින් දැනගෙන හිටියෙ නැද්ද?....:) :)

      / සික් මන් හිතුවේ ඒ දැරිවි මයි මේ පාවෙලා ඇවිත් දඩ්ට අඳුනගන්න බැරි වෙලා කියල . දැන් බලපල්ලකො මේක සමකෝණී ත්‍රිකෝණයක් වෙන්නයි යන්නේ /

      නෑ බොලේ...මේ වෙන යුවතියක්..හෙහ්, හෙහ්, ගම් නායකයගෙ කෙලී නෙවෙයි මේ....සමකෝණී ත්‍රිකෝනයක් වෙන්නෙ නෑ අනේ....

      / දැන් මුන්ද අලුත් කෙල්ලක් එක්ක ඉන්නවා දැක්කොත් අර කලින් දැරිවිගේ කඳුළු පිහිනන දඩ්ට බුල් තුවාය සොයන්න වෙනවා /

      හෙහ්, බින්දිට බූල් බූල් තුවාය අල්ලල ගියා නේද?....කෝ, ගත්තැයි තෝත මල් තියන ලොකු බූල් බූල් තුවායක්?

      දඩයක්කාරය ගාව කොහෙන්ද බොලේ බූල් තුවා?...අර අම්මණ්ඩි ඇඬුවොත් එහෙම ඉතිං කඳුලු පිහින්ට වෙන්නෙ ඇඳං ඉන්න අමුඩ කෙටිය ගලෝලා තමයි...හෙහ්, හෙහ්,

      පිල මත ඔහුගෙන් හැකි පමණ දුරස්ව හිඳිනා ඇය ඉකි බිඳ හඬන බව දුටු දඩයක්කාරයාගේ සිත ශෝකයෙන් වෙලී ගියේය.

      '' අපිට කොහෙන්ද ඉතිං බූල් බූල් තුවා?'

      තමාටම සෙමින් තොල මතුරාගත් හෙතෙම හැඳ සිටි අමුඩා කෙටිය ගලවා ලා පියා ඈ වෙත ලංව එයින් ඇගේ දෙනෙතින් ගලා යන කඳුලැලි පිසදමන්නට විය.

      Delete
    2. එකෙනෙහිම ඇය සිහි මුර්ජා වුවාය

      Delete
    3. සික් මං දාන්ඩ හිටිය කෙමන්ට් ඒක බින්දිය දාල

      Delete
    4. @ Bindi & Januu,

      මේ, ඔය වගෙ තව කතාවක් තියනව...මට කෙලිම්ම කියන්ට නම් ලැජ්ජයි වගෙ...ඔන්න මෙහෙමයි කතාව...

      ඉස්පිරිතාලෙ ලෙඩෙක් ඔන්න ඔපරේසං කරන්ටයි ලෑස්තිය...අප්පට සිරි අන්තිම මොහොතෙනෙ දන්නෙ නිර්වින්දන ගෑස් ඉවරයි කියල...ඔපරේසන් එක කල් දාන්ටත් බෑ...

      ඉතිං ජොස්තර දහ අතේ කල්පනා කොරනකොට එතන හිටපු නේස් නෝන කිව්ව '' ඩොක්ට, කලබල වෙන්ට එපා. මේ මනුස්සය සිහිනැතිකරන එක මම බාරගන්නං '' කියල

      එහෙම කියල ඔන්න පොඩි වැඩක් කලා...හෙහ්, හෙහ්, වැඩේ අන්තිම සාර්තකයි...ඔපරේසං එකත් නියමෙට කෙරුනා.

      ඕකෙ තව වර්ෂන් දෙකක් තියනව..හෙහ්, හෙහ්, එව්වනං මේ නාහෙට අහන්නෙ නැති කොල්ලො කුප්ප කමට හදාපුව.....

      Delete

  3. මේක කියවන්න ගිහින් ඇහෙත් පොට ගිහින් දිවත් තුවාල වුනා බං දත් වලටම හැපිලා. මට තාම කර කැවිල්ල වගේ අර ගැට පද විවරණයට දීලා තිබ්බ වචන සෙට් එකට. උඹ කොහොම මේ භාෂාව ලියනවද කියලා මට හිතාගන්න බෑ.

    උඹ අර ඇහැ කොනින් බලන එකට කිව්වා වගේ මට මේ වට ගැලපෙන සිංහල වචන ටිකක් කියාපං. මේ උඹව ටෙස්ට් කරන්න නෙවෙයි. නොදන්න නිසා හරි?

    hitchhiker වාහනයකට අත අල්ලා ලිෆ්ට් එකක් ඉල්ලන මගියා හරි නෑ බං.
    she rolled her eyes මේ අර ඔලුව එකතැන තියෙද්දි හයියෝ කියලා උරහිස් හකුලුවලා shrug කරලා ඇස් බෝල දෙක උඩට කරකවන එක. helpless gesture. rolled her eyes කියන කෑල්ලයි ඕනෙ

    මේ දෙක කිව්වොත් තව තියෙනවා අහන්න.

    henryblogwalker (මට භිතෙන හැටි) the Dude (HeyDude) and මගේ ඩෙනිම My Blue Jeans

    ReplyDelete
    Replies
    1. Hitchhiker කියන එකට හරියටම වචනයක් නෑ බං කොහෙවත්...රයිට් මෙහෙම කරමු....කොහොමද?......වචන නැත්නම් අපි වචන හදමු, එච්චරනෙ කරන්න තියෙන්නෙ...ඔය හැම වචනයක්ම බාං උඹල අපි වගෙ කවුරු හරි කවදක හරි නිර්මාණය කරපුව තමයි....ඊට පස්සෙ බහුතරයක් ඒ වචනෙ පාවිච්චි කරන්න ගත්තම ඒක ඉබේම සම්මත වචනෙ වෙනව...එච්චරයි...

      Hitchhiker කියන්නෙ බලාපොරොත්තු නොවුනු මඟියෙක් නේද? ( An unintentional passenger )...මම මේ කියන්නෙ රියදුරා බලපොරොත්තු නොවුනු කියන අදහසින්..රයිට් අපි මෙහෙම කියමු Unintentional කියන එකට සිංහලෙන් කියනව අනධ්‍යාශයික කියල..unintentional passenger එතකොට කියන්නෙ අනධ්‍යාශයික මගියා...

      ඒ නිසා හෙන්රි කියන Hitchhiker එකටත් අනධ්‍යාශයික මගියා කියල කිව්වැකි...මොකද ඔබ තුමාගෙ අදහස?

      Before entering interstate 55 he promised to himself that he won't stop for any hitchhiker whatever the circumstances are..

      අංක 55 දරණ අධිවේගී මාර්ගයට පිවිසීමට පෙර කිසිදු කරුණක් හේතුකොටගෙන අනධ්‍යාශයික මඟියකු වෙනුවෙන් රථය නොනවත්වන බවට ඔහු ස්වයං සපථයක යෙදුණේය.

      ඊලඟට Rolling eyes.....ඒකටත් එහෙම තමයි. නියමිත සිංහල වචනයක් හොයාගන්න බැරිඋනානෙ...අක්ෂි භ්‍රමක අභිනය කියල නම් කිව්වැකි...

      Even before the evening was halfway on I was tired of her constant eye rolling...

      සන්ධ්‍යා සමය අඩක් ගෙවීයාමට පෙරතුවම ඇගේ නිරතුරු අක්ෂි භ්‍රමක අභිනය මා සිත වෙහෙසට පත් කරලීය.

      Delete
    2. හොඳ වෙලාවට ඔබා දැන් නැත්තෙ.. නැත්තං මේ රවියා හදන වචන කියවන්ට ගොහිල්ලා බුවා මැරෙනවා දිව උඩු තල්ලෙ ඇලිලා..



      පලි: අනේ ඔබා අයියා, තාමත් උන්දෑ නැති පාළුව එහෙමමයි.. :(

      Delete
    3. තවම දඩයක්කාරයා ඉන්නවා . මේ වචන හරඹේ කරන්න ඔබා මාම විතරක් නැහැ
      ..we miss him dearly

      Delete
    4. @ Buratheno & Bindi,

      ෂිහ්, ඔබා මටත් කොයිවෙලෙත් මතක් වෙනව අප්පා...මම හරිම ආසාවෙන් හිටි දෙයක් තමයි ඔබ්ස් එක්ක ගිහිල්ල නුවර වික්ටරි බාර් එකේ සැට් වෙන්න...ඔය ඔබාලගෙ අපේ කාලෙ තිබ්බ වලින් දැං වැදගත් විදිහට තියෙන්නෙ එතන විතරයි...මොකදෑ කොරන්නෙ ඉතිං?...ජීවිතේ සහසක් බලාපොරොත්තු වගෙ ඒකත් දියපිට ඇඳි ඉරක්ම උනානෙ...:( :(

      අද හිටියනං මොනවා නං නොකියයිද?

      '' අපබ්‍රංස කියල බාසාවක් තියනවයි කියල අහල තිබ්බට මම ජීවිතේට හිතුවෙ නෑ අපබ්‍රංස කියවන්ටත් මට සිද්ද වෙයි කියල....''

      '' රවී. ...මේ,..... සිංහලෙන් ලියන දවසක මටත් ඊ මේල් එකක් එවහං..එදාට ඇවිල්ල කමෙන්ට් එකක් දාන්නං...හරිද? ''

      '' මොකක්ද බොලේ අර අනධ්‍යාශයික කියන්නෙ...මම ඔබීගෙනුත් ඇහුව..උන්දැනං කිව්වෙ පොඩි කාලෙ සෞඛ්‍යය පාඩමට ඔහොම ගැජට් එකක් බඩේ තියනව කියල ඉගෙන ගත්ත වගෙ නම් මතකයි කියල...හැබෑටම ඒක ගැනද උඹ ඔය කියන්නෙ? ''

      Delete

    5. ඔය කිව්ව එකේ යුෂ වගේකුත් ගලනවා තමයි අග්න්‍යාශයික යුෂ කියලා. තැංකූ කිව්ව උඹේ වචන වලට, නමුත් ඒ වචන උඹේ දඩ්ට හරි ගියාට මම ලියන්න යන එකේ රිදම් එකට හරියන්නෙ නෑ මචං. ඒක හරියට වීදුරු ඇලුමීනියම් කොන්ක්‍රීට් බිල්ඩිමක කවිච්චියක් තිබ්බා වගේ තියෙයි. :D

      henryblogwalker (මට භිතෙන හැටි) the Dude (HeyDude) and මගේ ඩෙනිම My Blue Jeans

      Delete
    6. වඩා සරලව 'තාවකාලික මගියා' කිව්වොත් මොකද?

      Delete
    7. ස්තුතියි තිසර. තව ටිකක් කල්පනා කරලා බලමුකො. :)
      henryblogwalker (මට භිතෙන හැටි) the Dude (HeyDude) and මගේ ඩෙනිම My Blue Jeans

      Delete
    8. @ එච්. ආර්.එච්. කිං හෙන්රි ද නයින්ත්,

      මම උඹේ වැඩේ ගැන තවදුරත් ...වැඩි දුරටත් ඒ වගේම බොහෝ දුරටත් කල්පනා කලා...අන්තිමට ආව මෙහෙම අයිඩියානන්ද එකක්...කොහොමද?

      Hitch hiker ගැන මට ආව මෙහෙම අදහසක්...

      වාහක කියන්නෙ මචං Carrier කියන තේරුමනෙ..රෝග වාහක...ඒ කියන්නෙ රෝගයක් රැගෙන යන්නා...එතකොට රැගෙන යනු ලබන්නා කියන්නෙ වාහිත..පාලක, පාලිත වගේම තමයි.

      Hitch hiker කියන්නෙ නොමිලේ යන කෙනෙක්...නොමිලේ කියන්නෙ Costless...ඒ කියන්නෙ නිර්වැය...වෙතකොට නොමිලේ ගමනේ යෙදෙන්නා ඇවිල්ල නිර්වැය වාහිත මගියා කියල කියන්න නම් පුලුවන්. ඒක දිග වැඩියි කියල හිතෙනව නම් නිකම්ම වාහිත මගියා කිව්වත් කමක් නෑ කියල මට හිතෙනව...

      Delete
    9. ස්තුතියි රවියා. දැන් ඕක අල්ලලා දාහං සිංහල භාෂාවේ මරුවා හැටියට උඹ සම්මාන ලබන්න ඉස්සර. ඒක නෙවෙයි බං. ආයෙම ගිහිං මගේ ඩෙනිමෙ අරපෝස්ට් එකේ යට හරියයි, උඹේ කමෙන්ට් එකට මගේ රිප්ලයි එකයි කියවපංකො හොඳ එකා වාගේ.

      Delete

මගේ සිතුවිලි ගැන ඔබේ සිතුවිලි

LinkWithin

Related Posts Plugin for WordPress, Blogger...