527. සන්ක්සිප්ත කයි ලිවීමට උපදෙස් ...Becoming a poet was never so easy …Anyone can be a poet in just two minutes flat…

යෝවන් මස්ක් පර්ෆියුම් එකේ ඡායාරූපයක්
ඉහත දැක්වේ.

ඊයෙ හවස හයට වගෙ කුස්සියට ගියා රෑට මක්කවත් තම්බ ගන්ට කියල හිතල. ගෑස් ලිප ඔන් කලම මෙන්න බොලේ ලිප පත්තු වෙන්නෙ නෑ. බලනකොට ගෑස් ඉවරයි. මොකද දන්නවයි මම කලේ? කෝල් එකක් දීල හන්දියෙ සුපර් මාකට් එකට කිව්වනං උං පැය බාගයක් ඇතුලත ගෑස් සිලින්ඩරයක් එවනව. මම කල්පනා කලා මෙහෙම . අවුට් ඔෆ් බොක්ස් තිංකිං ඒකට කියන්නෙ. ගෑස් එක ගෙන්න ගන්ට කොයි වෙලාවෙ බැරිද? ලියමු නවීන පන්නයේ කයියක්..එව්වට කියන්නෙ සංක්සිප්ත කයි....

ඒ වගේ සංක්සිප්ත කයියක් පිලිබඳව විශ්මිත අයිඩියාස් ආපු වෙලාවෙම සෙනිකව ලියල තියාගන්ට ඕමනයි. නැත්තං අමතක වෙනව. මයෙ හොඳ වෙලාවටද කොහෙද සතියකට සැරයක් එපාට්මන්ට් එක සුද්ද බුද්ද කරන්ට එන නේපාල් බුවාට ෆ්‍රිජ් එකේ දූවිලි පිහදාන්ට අමතක වෙලා. ඕකා සාමාන්‍යයෙන් එහෙම කරන්නෙ නම් නෑ. වෙරි එෆිෂන්ට් බුවා. හරි කොහොම හරි ඒකත් ජයසිරි මංගලම් කියල දකුණු අතේ දබරැඟිල්ලෙන් ලිව්ව ෆ්‍රිජ් එකේ දොරේ දූවිල්ලෙ කයියක්.

ඉවරවී ඇත ගෑස්,

උයනු නොහැක මට, 

එබැවින් සාගින්දරේ ඉන්නෙම්ද? 

ඊටින් ද රෙස්ටොරන්ට් කරමිද?

දැම්මේ නවීන පන්නයේ කෙටි කවිවල යටිපෙල තේරුමක් තියෙන්නෙ ඕනයි කියනවනෙ. අන්ඩර් වෙයාර් මීනිං නොහොත් අන්ඩර් වර්ල්ඩ් මීනිං නොහොත් අන්ඩර් හෑන්ඩ් මීනිං ..සිංහලෙං කිව්වොත් නම් යටි පෙළ අරුත… දුහුණන් දැනුම් උදෙසා මේ කයියෙ යටි පෙල මෙහෙමයි.

ජීවිතේ අපි බොහෝ දුර ගෙවනව. සමහරවෙලාවට අපිට ජීවිතේ ගෙනියන්ට ගැම්මක් නැත්තං හයියක් නැතිවෙනව. අර මයෙ කයියෙ ගෑස් ඉවරවෙනව කිව්වෙ ඒකට. එතකොට අපිට කරන්ට විකල්ප දෙකක් තියනව. එකක් ඔක්කොම අතෑරල දිවි නහගන්න එක. අර මම සාගින්දරේ ඉන්නව කිව්වෙ ඒකට. එහෙම නැත්තං වෙන කොහෙන්හරි ජීවිතේට ගැම්මක් අරගෙන ඉස්සරහට යන එක. කඩේකට ගිහිල්ල මොනවහරි කන එක නොහොත් ඊටිං ද රෙස්ටොරන්ට් කිව්වෙ ආන්න ඒකට. කොහොමද ඒක? හෙණ සිරානේ? මම ඕන ඔට්ටුවක් අල්ලනව මේ වගෙ සිරා කෙටි කයියක් ලියන්ට බෑ ඔබ තමුන්නාන්සේලා කාටවත්...හෙහ්..හෙහ්...වොන්න බෙට්?

ඉතිං මම තීරණය කලා රෑට ඔය රෙස්ටොරන්ට් එහෙකිං මොනවහරි කනව කියල. ඒ කරල කාමරේට ගියා මගේ සුපුරුදු දුඹුරු පාට ටී ෂර්ට් එක ඇඳ ගන්ට. අම්මට උඩු...ටී එක අතට ගත්ත විතරයි දාඩිය ගඳ ආව නහය කඩල යන්ට. මොකද මේ දවස්වල මෙහෙ ලේ උනුවෙන්ට තරමට රස්නෙ හින්ද මර දාඩිය. කොටිම්ම ෂවර් එක යට නාන කොටත් දාඩිය දානව. 

ඒත් මේ ටී එක ඇවිල්ල හිට මගෙ ෆේවරිට් ටී එක. ඒ හින්ද හුස්ම නාල්ලා ටී එක ඔලුවෙන් දාල ඇඳගෙන මයෙ තියනව සිරා පර්ෆියුම් එකක් නම ඇවිල්ල හිටං යෝවන් මස්ක්. ඒක ගහ ගත්ත ටිකක් වැඩිවෙන්ට අර බෝංචි කොටුවකට ග්‍රමොක්සෝන් ගහන්නැහෙ. එතනම තිබ්බ මගෙ ලියන මේසෙ. ඒකෙ ඉඳගෙන ගත්ත ඒ ලඟම තිබ්බ ඊයෙ බඩු ගෙනාපු තුණ්ඩුව. තුණ්ඩුවෙ පිටිපස්සෙ ලිව්ව කවියක්. 

බැරිය ගඳ ඉවසනු,

මගෙම දහදිය වුනත්,

මටම ඉවසනු නොහැකිනම්,

කෙසේ ඉවසන්නෙම්ද අනෙකෙකු?

දැං මේ කයියෙ අන්ඩර්වෙයාර් මීනිං එක මෙහමයි. ඔය සමහර අපි කරන දේවල් ඇත්තටම අපිටම අප්පරසන්නයි.. එහෙම උනහම වටපිට මිනිස්සුන්ට කොහොම ඇද්ද? 

ටී එකත් දාගෙන මයෙ කෝකටත් තයිලය වගෙ තියන ඩෙනිමත් ජොක්ලස් ඇඳගෙන නොහොත් සිවිල් පිට මම එලියට බැස්ස. ජොක්ලස් අන්සය ගැන ලියපු සන්ක්සිප්ත කයිය මෙහෙමයි. 

ඩෙනිමක් ඇඳ ඇත යටිකයට, 

එහෙත් යටටනම් නැත ඇඳ, 

හුළං සර වැදේ නිතියෙන, 

ආතල් ද බොහොමයි කිරිපල්ලට. 

දැං ඔය කවියෙ තියන හතර පදේ ඔන්නම් දෙකට බෙදල සන්ක්සිප්ත කවි දෙහෙකට ලියන්ටත් ඇහැකි මෙන්න මෙහෙම කිසිම ගේමක් නැතුව……

ඩෙනිමේ ඇරුනු කකුල් අතරින් 

ගලා එන සුලඟ අහා සනීපය..

අහා..අහා..අහා…

දෙවෙනි කයිය මෙහෙමයි…

කිරිපලු තෙමේ සුවවිඳී... 

සුළඟේ ආතලය විඳගෙන....

ඉස්සරහ දොර ඇරගෙන ඔන්න දොට්ට බැස්සයි කියමුකො. මම ඉන්නෙ හතරවෙනි තට්ටුවක. මලා ජෝන්...ලිෆ්ට් එක ගාව බිත්තියෙ පොඩි නෝටිස් එකක්. "Lift out of order... Sorry for the inconvenience …"

ඉතිං මොකේදැයි දං වළඳන්නෙ කියල ඇහුවලු ලොකු හාන්දුරුවො පොඩි හාන්දුරුවංගෙන්...එහෙම්මම නෙවෙයි ඒ ප්‍රස්නෙ ඇහුවය කියන්නෙ...තාලෙට කවියෙන් ගායනා කර කර..අපි අද කතා කරන්නෙ කවිගැන හින්ද මම ඒ කතාවත් ලියන්නම්කො එහෙනං..ඔන්න මෙහෙමලු..

ඔය පොඩි හාංදුරුවොයි ලොකු හාංදුරුවොයි දෙන්නම කවි කාරයොලු. නිකම් මේ සාමාන්‍ය කතාබහක් උනත් කරනවයි කියන්නෙ තාලෙට ගායනා කරකර ඒ මදිවට නට නට. ඉතිං දවසක් ලිඳ ලඟ පොඩිනම ලොකු හාංදුරුවංගෙ පාත්තරේ සෝදද්දි ඇති වීරියෙං අතුල්ලලද කොහෙද පතුලෙ හිලක් හැදුනලු. පොඩි නම ඒ පාර පාත්තරෙත් ඔලුවෙ තියාගෙන මෙහෙම තාලෙට කිය කිය නට නට පන්සලට ආවලු . 

ලොකු හාමුදුරුවනේ..

හරි වැඩක් උනානේ….

පාත්තරෙ හිලක් උනානේ…. 

මේක අහල ලොක්කට මල පැන්නලු. ඒත් උන්දැ තරහ නොපෙන්නා මෙහෙම තාලෙට කිය කිය නට නට මිදුලට බැස්සලු.

පොඩිනම XXX තියෙන්නේ,

අම්මගෙ XXXX දං වලඳන්නේ?

ඉතිං ඔය ලිෆ්ට් එක නොහොත් උත්තෝලකය කැඩිල තිබ්බ එක ගැනත් මම ලිව්ව ඔන් ද සපෝට් කයියක්. මොකේද ලිව්වෙ ඇහුව? හෙහ්.....මම ඔය එලියට බහිනවනම් බහින්නෙ අනිවා කලසං සාක්කුවෙ පොඩි නෝට් පොතකි කමිස සාක්කුවෙ පෑනකි සහිතව. ඔය දකුණෙ පෙලක් ඈයො කතා කරන්නෙ එහෙම. උදේට බතකි සම්බලකි හරි ගැස්සුවම ඇත? ඒ අහන්නෙ උදේ කෑමට බතකුයි පොල් සම්බලේකුයි හැදුවම ඇති නේද? කියල.

ඉතිං මෙන්න උත්තෝලකේ ඉස්සරහ ඉඳගෙන (ඉඳගෙන නෙවෙයි ඇත්තටමනම් හිටගෙන) මම ලියපු කයිය. 

උත්තෝලකය නොසැලෙයි,

එහෙත් මම සැලෙමි, 

තරප්පුවෙන් බසිමි,

උත්තෝලකය පරදමි.

ඒ කියන්නෙ සරලව නොහොත් සිම්ප්ලි කිව්වොත් ලිෆ්ට් එක කැඩිල හින්ද මම පඩි පෙළෙන් බැස්ස කියල. ඒත් ඔය සමහර අයට එහෙම සරළ තේරුං හරියන්නෙ නෑ. යටි පෙළක් නොහොත් අන්ඩර්වෙයාර් එකක් ඕනමයි. ඒ අන්ඩවෙයාර් බවතුන්ට සහ බවතියන්ට ඕනම නම් මෙන්න යටි පෙළක්. උත්තෝලකය කැඩිල කියන්නෙ මගෙ ගමනට දෛවය විසින් කරන බාදාවක්. ඒත් මම පසුබට වෙනවද? වට් නොන්සන්ස්..මම අදිස්ටාන පූර්වකව පඩිපෙලෙන් බැහැල මගෙ අරමුන ඉස්ට සිද්ද කරගන්නව. That's the Underwear...You underskirt guys & gals?

දැං ඔන්න පඩි පෙලෙන් පහලට බැහැල පාරට ගියාය කියමුකො. පාරෙං එහා පැත්තෙ තියෙන්නෙ හද්ද පරණ ගෙදරක්. ඒකෙ තාප්පෙ සිදුරක හැදිල තියන බෝ ගහක්. අඩි හත අටක් වගෙ උසයි. ඕකෙ බෝ කොළ වේලිල තිබ්බට මම කිසිම දවසක දැකල නෑ පාරෙ එහෙම වැටිල තියනව. 

සතියකට වගෙ ඉස්සර දවසක් ඒත් මම ඔතනිං යනකොට වේලිච්ච කොළයක් ගහෙං වැටිල හුළඟෙ පාවෙලා ඇවිල්ල මගෙ ඉස්සරහම වැටිල ඒක මට පෑගුනා. අපි ඇවිල්ල බක්තිමක් බවුද්දයො නෙව. ලංකාවෙදි නම් මැරූකොට බෝ කොලයක් පාගන්නෙ නෑ. මෙහෙදිත් එහමම තමයි. ඒත් වැඩේ වුනේ මේ බෝ කොලේ පෑගෙන එක මට වලක්ව ගන්ට බැරිවුනා. පුදුම වැඩේ කියන්නෙ ඊයෙත් ඒ වැඩේ එහෙම්මම උනා කියමුකො. අර කලින් දවසෙ වගේම වේලිච්ච බෝ කොළයක් හුළඟෙ පාවෙලා ඇවිල්ල මගෙ කකුලට කකුලට කිව්වට ඇත්තටම නම් සෙරෙප්පුවට පෑගුනා.

ඔන් ද ස්පොට් එතනම නැවතුනා. නෑ..නෑ..බෝ කොලේ උඩම නෙවෙයි. එතනින් අඩියක් ඉස්සරහට ගිහිල්ල නැමිල බෝ කොලේ අතට අරගෙන බෝ ගහෙන් සමාව ඉල්ලල බෝ කොලේ ඒ ගහේම දෙබලක රැඳෙව්ව. මම බක්තිමත් බවුද්දයෙක් හින්ද අවුලක් නෑ. ඒත් අන්නියාගමිකයින්ට බෝකොල පාගන්ට දෙන්ට ඇහැක? නැද්ද? ඊට පස්සෙ බෝගහට පිට දීල හිටගත්ත. මයෙ කලසං සාක්කුවෙං නෝට් පොත ගත්ත. කමිස සාක්කුවෙං පෑනගත්ත. ඔන් ද ස්පොට් ලිව්ව සන්ක්සිප්ත කයියක්.

බෝ රදුන් වැලිකතරේ.. 

හෙලන්නට වියළි බෝ පත්...

බලාහිඳී එනතෙක්...

බැතිමත් බොදුනුවෙක්.

මේ ඊමම තියනව ලංකාවෙ මනුස්සයෙක් කරන රෙස්ටෝරන්ට් එකක්. මම ගියෙ ඒකට. මම රෑට කන්ට අරං එන්ට ගියේ බීෆ් රයිස් එකක්. ඒත් බීෆ් ඉවරයි කියල කියාපි රෙස්ටොරන්ට් එකේ මල්ලි. ඒ පාර සී පුඩ් රයිස් එකක් අරගෙන ආව. යද්දි සහ සී පුඩ් රයිස් එක අරගෙන එද්දි සිද්ද වෙච්චි සිද්දීන් ගැන මම ලියපු සන්ක්සිප්ත කවි ආය දවසක දාන්නම්කො. 

ආ...මේ පල්ලෙහායිං තියෙන්න්නෙ මම කලින් දවසක ලියපු සන්ක්සිප්ත කවි කීපයක් සහ සම්බාව්ය කවි ලිවීමට උපදෙස් මාලාවක්..

හැපී පොයං රයිටිං ඕල් ඔෆ් යූ ...ඉටීස් වෙරි වෙරි ඊසි..ලයික් ඊටිං කජු....

සුට්ටං කවි හතක්…

සම්භාව්‍ය කවි ලිවීමට උපදෙස්….