530. පුවක් එෂැණිං 30 - සාහිත්තිය මාසේ හොයාගෙන කියවන්න සුදුසු පොත්...........

සැප්තැම්බර් 15 වන දිනසිට 24 වන දින දක්වා පැවැත්වෙන
කොළඹ ජාත්‍යන්තර පොත් ප්‍රදර්ශනය පිළිබඳ
දැන්වීමක් ඉහත ඡායාරූපයෙහි දැක්වේ.

අර ගාතකයගෙ කතන්දරේ ඉතුරු හරිය ලියන්ටත් තියනව. පහුගිය බ්‍රාස්පතින්දට එපිට බ්‍රාස්පතින්දයි මම ඒකෙ මුල් කොටස ලිව්වෙ. දෙවෙනි කොටස ඒ හෙනහුරාදම ලියඤ්ඤම්ය කිව්වට ඒ වැඩේ උනේ නෑ. එව්ව එහෙම තමයි. සන්සාරේ බවේ දුකා...සම්බෝලයි බතුයි කකා.... ගාතකයයෙ කතන්දරේ ඉවරකරන්ට පොරමාද වුනේ මේකයි. 

අර සිල් රෙදි හොරු දෙන්න උසාවියෙං හිරේට දැම්මනෙ. ඒ ගැන ලියන්ට වුනා. කාලීන පුවක් නෙව. ඊට පස්සෙ අපේ ගනින්නාන්සෙල රොත්තක් සැට් වුනානෙ ඒ සිල් රෙදි එකතු කරල ආපහු ගෙනුහුං බාර දෙන්ට. ඒ පාර ඒ ගැනත් ලියන්ට උනා. 

ඉතිං දැං ඔන්න හෙට පටං ගන්නව අර පොත් පෙදස්සනේ. ඒකත් ඇවිල්ල කාලීන පුවක් වලට අයිති වෙන හින්ද සහ මේ සාහිත්තිය මාසෙ හින්ද කියවන්ට සුදුසු පොත් කීපයක් රෙකමදාරු කරල මොකවත් ලිව්වනම් හොඳා නෙවද කියල මට හිතුන. ඊලඟට නොවැරදීම ගාතකයගෙ කතන්දරේ ලියනව. දෙයියම්පල්ල...

මෙන්න මෙහෙමයි මම රෙකමදාරු කරන පොත්....

1. ඩිෆෙන්ඩර් රථවල නැවත තීන්ත ආලේපකිරීමේදී සැළකිය යුතු කරුණු - කර්තෘ සිරන්ති රාජපස්ස 

2. ඩාට්මත් නාවික විද්‍යාලයේ සියලුම විභාග අසමත්වීමේ නොවරදින මඟ - කර්තෘ යෝසිත රාජපස්ස 

3. රජයේ වියදමෙන් පැරීසියේ දින තුනක් - (දේශාටන සටහන්) - සම කර්තෘවරියන් සිරන්ති රාජපස්ස සහ ඩේසි පොරස් 

4. එයා ලංකා ගුවන් සේවිකාවන් සමඟ මගේ ජීවිතය - කර්තෘ නිසාන්ත වික්කරමසිංහ 

5. නුවර වැව වටේ රේස් පැදීමේදී වැදගත්වන සුරක්ෂිතතා පූර්ව උපක්‍රම - කර්තෘ නාමෝල් රාජපස්ස

6. අභ්‍යාවකාශ පද්ධති ඉංජිනේරු විද්‍යාවේ මූල ධර්ම - කර්තෘ රෝහිත රාජපස්ස 

7. නීතිවිද්‍යාල අවසාන විභාගය ඉතා පහසුවෙන් සමත්වීමට උපදෙස් - සම කර්තෘවරුන් ඇම්. රාජපස්ස සහ ජේ. ප්‍රනාන්දුපුල්ලේ

8. භාවනා කිරීමට මැලිවන්නන් ගලග්‍රහයෙන් ගෙන හෝ භාවනා කිරීමට පෙළඹවීමේ වැදගත්කම - කර්තෘ කූජිත ජයසුන්දර

9. මුදල් සිඟා පිණ්ඩපාතයේ වැඩීමේ ආනිසංස - කර්තෘ මැදමුලන නිකායේ චෞර ආරක්ෂක පාර්ශ්වයේ මහානායක ඇම්. අබේතිස්ස හිමි

10. ක්‍රි.පූ. විසි එක්වන සියවසේ ඊජිප්තුවේ ඊශ්‍රායල්වරුන්ගේ සිට වර්තමාන ශ්‍රීලංකාවේ බයියන් දක්වා - ලෝකයේ වහල් ක්‍රමයේ විකාශය පිළිබඳ තුලනාත්මක අධ්‍යයනයක් (A Comparative Study) - අග්නිදිග ආසියානු වහල් පර්යේෂණ මධ්‍යස්ථානය

11. ලෝක ඉතිහාසයේ සදා අමරණීය විශිෂ්ඨ දේශන අංක 6 - කාල්ටන් බංගලාවේ ජනේලය උඩ දේශනය - සංස්කරණය - සමස්ත ලංකා යාවජීව බයියන්ගේ සංසදය

12. උසස් තනතුරු ලබාගැනීමේ නොවරදින ක්‍රමවේදය - දේවපූජා පැවැත්වීම - කර්තෘ කූජිත් ජයසුන්දර

13. දෙවියන්ට කල අපහාසයකට වසර හතළිහකට පසු දේවසාපයෙන් සිහිවිකල විය හැකිද? - කාලෝ පොන්සේකා පිළිබඳව පූර්ණ කාරක අධ්‍යයනයක් (A Comprehensive Case Study) - දේව සාප අධ්‍යයන කේන්ද්‍රය

14. අධිකරණ වෛද්‍ය විද්‍යාවේ මූලධර්ම - පරීක්ෂණයකට වැදගත්වන අස්ථි සංරක්ෂණය කල යුත්තේ කෙසේද ? - කර්තෘ විශේෂඥ වෛද්‍ය ආනන්ද සරමසේකර.

15. හෙයාර් ජෙල්, ලෙමන් පෆ්, පාස් පෝට්, සීගිරිය හා සමඟ මහල්ලා සහ මුහුද - (මගේ ජීවන සැමරුම්) - කර්තෘ වී. මෝඩවන්ස

16. සම්පූර්ණ ගුවන් යානයක් වෙන්කොට බල්ලන් ගෙන්වීමේදී ඔබ දතයුතු කරුණු - කර්තෘ ජී. රාජපස්ස

17. යුද හමුදා භටයින්ගේ කාර්ය පටිපාටිය සංශෝධනය - (සාරි කටු ගැසීම සහ බල්ලන් නෑවීම ඇතුලත් කිරීම) - සංස්කරණය බී. රාජපස්ස

18. මගේ දියුණුවේ රහස් - (රක්ෂණ නියෝජිතයෙකුගේ සිට කෝටිපති නිවෙස් හිමියකු දක්වා) - කර්තෘ ඇම්. අලුත්ගමගේ.

19. ගුණමකු රජෙකු නිසා සිපිරිගෙයි තපිමි - නූතන සිපිරිමාලයේ කවි - කර්තෘ ඇල්. වීරතුංග

20. හෝටලයක යාබද කාමරයට පිවිසීමේ නවතම ක්‍රම පිළිබඳව අත්පොතක් - කර්තෘ කේ. රඹුක්වැල්ල

21. කිසිදු වියදමකින් තොරව මව්පිය අනුස්මරණ කෞතුකාගාරයක් ඉදිකිරීමේ ක්‍රමවේදය මුල සිට සරලව  - සම කර්තෘවරු ඇම්. රාජපස්ස සහ ජී.රාජපස්ස

22. මට මගේ නොවන මගේම මන්දිරයක් තිබුණා - ගීත සාහිත්‍ය  ග්‍රන්ථය - කර්තෘ බී. රාජපස්ස