Friday, March 16, 2012

108. එක්තරා දඩයක්කාරයකුගේ කතාව...........The Saga of A Hunter.....6


දඩයක්කාරයාගේ වෘත්තාන්තය රචනා කිරීමෙහිදී සාමාන්ය එදිනෙදා භාවිතා වන බස් වහර වෙනුවට ආදේශකයක් ලෙස විදග්ධ වූත් ලිඛිත භාෂාවට බොහෝසෙයින් සමාන වූත් බස් වහරෙක් මවිසින් යොදාගැනුනේ මෙවන් වෘත්තාන්තයක් පෙළගැසීමෙහිලා එවන් වහරක් වඩාත් ගැලපෙතැයි හැඟීගිය බැවිනි.එවන් බස් වහරක් යොදා ගැනීමෙහිදී ඒ හා සමඟම ආවේණික ලක්ෂණයක් වන්නේ ඉතා දීර්ඝ වන්නා වූ වාක්යයන්ය.දඩයක්කාරයාගේ වෘත්තාන්තයෙහි ගූඪ සහ ගුප්ත භාවය ඉස්මතු කිරීමෙහිලා යොදාගත් මේ බස් වහර හේතු කොටගෙන ඔබ කිසිවෙකුහට කියැවීමෙහිදී අපහසුවක් වී නම් ඒ වෙනුවෙන් මා හට සමා වන මෙන් උදක්ම ඉල්ලා සිටින්නෙමි.

මේ පිළිබඳව සිදුවූ කතිකාවතෙහිදී කවදත් මහරු මිණි වන් විදග්ධ අදහස් පළකරන මා හිතවත් බූරාභිධාන කෙළෙඹි පුත්රයානෝ මෙසේ පැවසූහ.

" අයියණ්ඩිය...මෙසේ කරව....තොපගේ වෘත්තාන්තයහි සංස්කරණයන් දෙකක් ලියව. විදග්ධ භාෂාවෙන් එක් සංස්කරණයෙකුත් ලිහිල් භාෂාවෙන් තවත් සංස්කරණයෙකුත් ලියා පළ කල හැකි නම් මැනවි''

ඔහු විසින් මෙසේ පවසන්නට යෙදුනේ ජිහ්වය කපෝලාභ්යන්තරයෙහි රැඳි මුවින් බව උදක්මැ පැහැදිළි වූ වද '' වන්නාටය, බූරාගේ අදහස ද මනායැ, ලිවීමෙහි ව්යායාමයක් ලෙස හෝ එසේද කල හැකි නම් අගනේය '' සිතූ මම මෙවර දඩයක්කාරයාගේ වෘත්තාන්තය සංස්කරණයක් දෙකක් ලෙස රචනා කලෙමි.

මුලින් ඔබට ලිඛිත භාෂාවෙන් ලියූව ද දෙවනුව ලිහිල් භාෂාවෙන් ලියූව ද කියවනු හැකිය.

***********************************************************

එළිමහනෙහි, දෙවකක් පමණක් ක්ෂය වී තිබූ, චන්ද්ර මණ්ඩලයෙන් නිකුත් වූ ශ්වේතවර්ණ ආලෝක ධාරාවනට හුරු වී තිබුණු දෑස, ගෙපැල අභ්යන්තරයෙහි හාත්පස වසා පැතිරී ගිය කාලවර්ණ ඝන අන්ධකාරයට හුරුවන තෙක්, තදින් පියාගත් වනම නිමේශයක් දොරටු එළිපත්ත මතම රැඳුනු දඩයක්කාර තෙමේ, ක්රමයෙන් දෑස් හැර පියා ඇසිපිය කිහිප විටක් වේගයෙන් සලමින්, පියවර දෙකක් හෝ තුනක් ගෙපැලට ඇතුළු වූයේය.

ගෙපැල තුල පැවති ඝන අඳුර දුරුකරමින්, සැලෙන, කහ වන් සිලෙන් මන්දාලෝකයක් නිකුත් කරමින් දැල්වුණු, පොල්තෙල් පහන් යුවලකි, අඳුරට හුරුවුණු ඔහුගේ දෑසට මුලින්ම දර්ශනය වූයේ.

කිසි දිනෙක මේ ගෙපැල තුල දී පොල්තෙල් පහනක් දුටු අයුරක්, දඩයක්කාරයාගේ මතකයේ නොමැත. පොල්තෙල් පහන් ඔහු දුටු පුරුදු ඇත්තේ, වනය මධ්යයෙහි සිට ඔවුන්ගේ වාසස්ථානය වූ ගෙපැල පෙනෙනා තෙක් මානයෙන්, අසල වූ එකම ගම්මානය කරා දිවෙනා අඩි පාරෙහි පසෙක; ඒ සැබැවින්ම අඩි පාරක් නොව මුවන් ගෝණුන් සහ ඌරන් වැනි වන මෘගයන්, ගම්මානය අද්දර වූ, අධික වර්ෂා සමයෙහි වැසි දියෙන් පිරීගොස් නියං සමයෙහි මධ්යයේ රැඳුනු දිය කඩිත්තක් දක්වා සිඳීයන වැව කරා, නිතොර පිය නැඟීම නිසාම නිමවුණෙකි, ගම්මානයට සහ ඔවුනගේ ගෙපැලට සම වූ දුරකින් පිහිටි, මහ නුගය සෙවනෙහි සතියකට දෙවරක් පමණ ගම්මානයේ වැසි කිසිවකු හෝ විසින් දල්වන්නා වූවකිනි.

පොල්තෙල් පහන් කෙරෙහි ඇදී ගිය ඔහුගේ නෙත් යුවල, ඒ සැනෙකින් ආපසු යොමුවූයේ පහනෙන් නිකුත්වන දුබල ආලෝකයෙන් දුටු අනපේක්ෂිත සහ හද කම්පාකරවන සුළු දර්ශනයක් දෙසටය. ඔහුගේ මෑණියෝ පසුපස බිත්තිය අසල රළු පොළවෙහි එලන ලද , ගෝණි පඩංගු දෙකක් මත වැතිර සිටියාය.දෑස් තදින් පියා සහ යටි තොල් පට තදින් උඩු දත් ඇන්දට සිරකොට විකා සිටි අයුරු ඈ දැඩි වේදනාවකින් පෙලෙන බව මොනවට කියා පෑවේය.

අධික වේදනාව ඉවසිය නොහුණු නිසාම සැපුණු තොල් පටින් නිකුත්ව ගලාගිය රක්තවර්ණ රුධිරය බිඳු කිහිපයක්, ඇගේ අඩක් නිරාවරණය වූ ලය පෙදෙස තෙත් කරමින් ගලා ගිය දහදිය හා මුසුව සැඟව ගියේය.

ඔහුගේ පියා, එනම් මහ දඩයක්කාරයා, සිය ඇඹේණිය අසල ඇණ තබාගත් වනම නොසෙල්වී සෙල් රුවක් මෙන් හුන්නේ, ඇගේ බොහෝසේ නෙරාගිය කුසය සුරතින් සෙමින් ස්පර්ශ කරමින් වේගවත් එමෙන්ම රිද්මයානුකූල වූ ස්වරයකින් කුමක් දෝ තොල මතුරමින් සිටියේය.

මේ දසුනින් කම්පිත වූ දඩයක්කාරයා තම මව අසල දණින් වැටී ඇගේ සුරත තම දෑතින්ම තදින් ග්රහණය කොට ගත්තේය. ඔහුගේ ග්රහණයෙන් දෝ තමන් එළඹ සිටි අඩ සිහි තත්වයෙන් මඳක් මෑත් වූ මෑණියෝ යටි තොල වැරෙන් සපා සිටි තොල් පට විවර කොට ඉතා අසීරුවෙන් දසන් දක්වා මඳ සිනහවක් පෑවාය.

ඉන්පසු ඔහුගේ දෑතින් සෙමින් මුදාගත් සිය සුරත ඔසවා, තම එකම පුත්රයාගේ වම් කොපුල් තලය ඉතා මෘදුව ස්පර්ශ කලාය. සංවේගය වාවා ගත නොහුණු දඩයක්කාරයා ඇගේ සුරත තම වමතින් කොපුල් තලයට තද කරගනිමින්, නික්මෙන්නට තැත් කරනා කඳුලු බිඳක් වළකා ගනු වස් දෑස තදින් පියා ගත්තේය.

දාරක ප්රසූතිය උදෙසා දරනා මහත් වූ උත්සාහය නිසාම දැඩි වෙහෙස පත් වූ ස්ත්රිය, එනම් මහ දඩයක්කාරයාගේ ඇඹේණිය, දඩයක්කාරයගේ මව, අර්ධ සිහිසුන් භාවයත් දැඩි නිද්රාවත් අතර වූ අවිනිශ්චිත තත්වයක නිමග්නව හෝරා කිහිපයක්ම ගෙවා දැමුවාය. එනමුදු එලෙස අවසිහි තත්වයෙක පසුවෙමින් වුවද ස්වභාව ධර්මයෙන් තමනට නියම වූ කාර්යය ඉෂ්ඨ කරනු උදෙසා මහත් වූ වෑයමෙක් දැරුවාය.

අවසන දැඩි වෙහෙසට පත් වූ හෙයින්ම, දඩයක්කාරයාගේ දකුණු අත තරයේ ග්රහණය කොටගෙන තිබූ ඇගේ සුරත අප්රාණිකව ගිලිහී ගිය ඉක්බිති, සෙමින් නැඟීසිටි හෙතෙම මවගේ අනෙක් පස ඇණ තබාගෙන හුන් පියා අසලට ගොස් දකුණත ඔහුගේ උරහිසෙහි තබා තදින් මිරිකා ගත්තේය.

ජීවිතයේ ප්රථම වරට, යටත් පිරිසෙයින් ස්මරණයෙහි රැඳී ඇති අයුරින් ජීවිතයේ ප්රථම වරට ඒ දඩයක්කාරයා තම පියාණන් ස්පර්ශ කල අවස්ථාවයි. මේ සුවිශේෂී අවස්ථාවෙහි වූ වැදගත් කම දැන සිටියාක් මෙන් දඩයක්කාරයා ද තම උරහිස මතවූ පුත්රයාගේ දකුනත ඒ මත තැබූ තම වමතින් දැඩි ලෙස මිරිකා ගත්තේ, හිස සෙමින් ඔසවා ඔහුගේ දෑස දෙස එක එල්ලේ බලමිනි.

දෙපස වූ පහන් යුවලින් විහිදුනු දුබල කහවන් ආලෝකයෙන් දිලිසුණු මහ දඩයක්කාරයාගේ නෙත් පිරී තිබුණේ කෙවෙනි අග්රයෙන් නික්මී කොපුල් තල ඔස්සේ ගලා යාමට ඉතාම ආසන්න වූ මහත් කඳුලකිනි.ඒ දුටු දඩයක්කාරයා නැවත වරක් තම නෙතට නැඟි කඳුල වළකා ගනු වස් දෙනෙත් තදින් පියාගෙන ඉවතට හැරුණේය.

තම පියාණන් නොකඩවා සිහින් හඬින් මතුරන ගීතිකාවක් වන් වූ මන්ත්රයේ රිද්මයානුකූල ස්වරය, මවගේ හිස අද්දර මැටි බිත්තියට වාරු වි පපුව මත බැඳ ගත් දෑතින්, පියවුණු නෙතින් සහ බිමට හැරවුණු හිසින් යුතුව වාඩි වී හුන් දඩයක්කාරයාගේ සිත නිද්රාවට පත් කරවන නැලවිලි ගීතයක් බඳු වී.

මෙසේ නිදි ලොවට වරෙක පිවිසෙමින්, නැවත අවදි වෙමින්, ගෙවූ කාලය කොපමණක්දැයි පැවසීමට ඔහු ද නොදන්නා කාලාන්තරයකට පසු හදිසියේ ඔහු එක්වනම අවදි වූයේ කිසිවකු උරහිස මත අත තබා කල සෙලවීමකිනි.

එක්වරම තමා මේ සිටිනුයේ කොහේදැයි නිශ්චය කරගත නොහුණු දඩයක්කාරයා, හිස කිහිපවරක් සොලවා නිදි අඳුර දෙනෙතින් පළවා හරිමින් හිස එසවීය. ඔහුගේ දෙනෙතට එක වරම ලක් වූයේ, තමා වෙතට නැවී සිටිනා පියාණන් ගේ දෙනෙතයි.තම දෙනෙතට ඉතාම ආසන්නයේ තමාගේ දෑස දෙසම එක එල්ලේ බලා සිටිනා පියාගේ දෙනෙතයි. මතක ඇති දිනෙක පටන් නිශ්චල තරු කැටමෙන් දිලිසුණු ඒ දෙනෙත කුමක්දෝ වටහාගත නොහැකි ශෝකී හැඟීමකින් හෝ අවිනිශ්චිත හිස් බවෙකින් මේ අවස්ථාවේ පීඩිත වී තිබෙණු දුටු දඩයක්කාරයා එක් වනම සිදු වී ඇත්තේ කුමක් ද යන්න නොවලහා අවබෝධ කර ගත්තේය.

***********************************************************

පෝය පහුවෙල ගෙවිල තිබ්බෙ දවස් දෙකයි.ඒ නිසා පිටත සෑහෙන පමණ පැතිරිලා තිබ්බ හඳ එලියට හුරුවෙලා තිබුනු ඇස් ගෙපැල ඇතුලෙ කෑලි කැපිය හැකි ගණ අන්දකාරෙට හුරුවෙනකල් දඩයක්කාරය ටික වෙලාවක් එලිපත්ත ළඟම ඇස් තදින් පියාගෙන හිටිය.ඊට පස්සෙ ඇස් ඇරල දෙතුන් පාරක් වේගයෙන් ඇහිපිය ගසමින්ම පියවර දෙක තුනක් ගෙපැල ඇතුලට ගියා.

දෑස් අඳුරට හුරු උනහම දඩයක්කාරය මුලින්ම දුටුවෙ කහපාට පහන් සිලෙන් දුබල ආලෝකයක් විහිදුවමින් දැල්වෙන පොල්තෙල් පහන් දෙකක්.

ගෙපැල ඇතුලෙ පොල් තෙල් පහනක් පත්තුවෙනම මේ දඩයක්කාරය දැක්කෙ මුල් වතාවට.මහ වනය මැදින් ගෙපැල පෙනෙන තෙක් මානයෙන් ගම්මානය දක්වා දිවෙන අඩි පාර; ඇත්තටම නම් ඒක අඩි පාරක් නම් නෙවෙයි, ගම්මානය අසල තිබ්බ වැවක්; මහ වැස්ස කාලෙට පිරිල උතුරල ගිහිල්ල නියං කාලෙට වැව මැද්දෑවෙ දිය කඩිත්තක් බවට පත්වෙන මේ වැවට මුවෝ, ගෝන්නු, ඌරො එහෙම යන්ට එන්ට හදා ගත්තු පාරක්, ඒ අඩි පාර අද්දර ගෙපැලට සහ ගම්මානයට සම දුරින් වගෙ තිබ්බා මහ රූස්ස නුගයක්. ඔය නුගේ යට සතියකට දෙපාරක් වගෙ ගම්මානෙ කවුරු හරි ඇවිල්ල පොල්තෙල් පහනක් පත්තු කරන සිරිතක් තිබුනා.දඩයක්කාරය මීට කලින් පොල්තෙල් පහනක් දැකල තිබුනෙ එතැන විතරමයි.

පොල්තෙල් පහන් වෙත යොමුවෙච්ච දඩයක්කාරයගෙ දෑස ඒ එක්කම යොමු උනේ ඒ පහන් වල දුබල ආලෝකයෙන් දැක්ක හිත කීරි ගැහෙන දර්ශනයක් දිහාට.ගෙපැලේ පිටිපස්සෙ බිත්තිය අද්දර එලාපු ගෝණි පඩංගු දෙකක් මත වැතිරිල හිටියෙ දඩයක්කාරයගෙ අම්ම.දෑස තදින්ම පියාගෙන යටි තොල්පොට උඩු දත් ඇන්දට හිරකරගෙන තදින් හපාගෙන හිටපු විදිහෙන්ම ඈ දරුණු වේදනාවකින් පෙලෙනව කියල දඩයක්කාරයට තේරුනා.

හැපිච්ච තොල් පොටෙන් ගලාගියපු රතු ලේ බිංදුවක් නැත්නම් දෙකක් ඇගේ බාගෙට නිරාවරණය වී ළය ප්රදේශයේ දහදියත් එක්ක මුසු වෙලා සැඟවුනා.

දඩයක්කාරයගෙ පියා, ඒ කියන්නෙ මහ දඩයක්කාරය ඒ ළඟම ඇණ තියාගෙන හිටියෙ ගල් පිලිමයක් වගේ නොසෙල්වී. තම බිරිඳගේ නෙරා ගිය කුස සෙමින් පිරිමදින අතරෙ ඔහුගෙ තොල් අතරින් නොනවත්වාම පිට උනේ වේගවත් ඒ වගේම රිද්මයානුකූල මැතිරිල්ලක්.

කිසිදිනක දකින්නට බලාපොරොත්තු නොවූ මේ දර්ශනයෙන් ඔලුව විකාර වුනු දඩයක්කාරය අම්ම ළඟ දණ ගහගෙන ඇගේ සුරත අත් දෙකෙන්ම අල්ලගෙන තදින් මිරිකා ගත්තේය. දඩයක්කාරයගෙ පහස දැනුනු නිසාදෝ වේදනාවෙන් මුසපත් වී සිටි ගැහැණිය තදින් යටි තොල සපාගෙන සිටි දත් විදහා දැඩි ආයාසයෙන් වේදනාබර මඳ සිනහවක් පෑවාය.

ඊට පස්සෙ දකුණු අත පුත්රයාගෙ දෑතින් මුදාගෙන ඔහුගෙ වම් කම්මුල හෙමිහිට පිරිමැද්ද. සංවේගය දරාගත නොහැකිවූ දඩයක්කාරයා ඇගේ දකුණත තමන්ගෙ වමතින් කම්මුලට තද කරගෙන දෑසේ නැඟෙන කඳුලු වලකාගැනීමට දෑසම තදින් පියාගත්ත.

දරු ප්රසූතිය වෙනුවෙන්ම දරූ දැඩි උත්සාහය නිසාම අධික වෙහෙසට පත්වූ දඩයක්කාරයාගේ මව නැතහොත් මහ දඩයක්කාරයාගේ බිරිඳ අඩක් සිහිසුන් එමෙන්ම අඩක් නිද්රාවට පත් තත්වයකට පත් වූවාය. එහෙත් ඇය ඒ අවසිහියෙන් පසුවන විටදී පවා විට පවා ස්වභාව ධර්මය විසින් තමනට නියම වූ කාර්යය ඉටු කිරීමට නොමඳ උත්සාහයක් ගත්තීය.

අවසානයේ දැඩි වෙහෙසට පත් ඇගේ සුරතින් දඩයක්කාරයාගේ සුරත ගිලිහී ගියේය. ඉන්පසු සෙමින් නැඟී සිටි ඔහු මවගේ අනෙක් පස මෙතෙක් ඇණ තබාගෙන උන් පියා වෙතට ගොස් ඔහුගේ උරහිස දැඩිව තම දකුණතින් මිරිකා ගත්තේය.

ඒ ජීවිතයේ පලමු වතාවට, අවම වශයෙන් මතක ඇති පමණ පලමු වතාවට ඔහු තම පියා ස්පර්ශ කල අවස්තාවයි. මේ මොහොතේ සුවිශේෂී වැදගත්කම වටහාගත් නිසාදෝ මහ දඩයක්කාරයා ද තම උරහිස මත රැඳි පුත්රකයාගේ දකුණත ඒ මත තබූ තම වමතින් මිරිකා ගනිමින් හිස ඔසවා ඔහුගේ දෑස දෙස එක එල්ලේ බැලීය.

දෙපැත්තෙ පහන් වැටි දෙකෙන් නිකුත් වූ දුබල ආලෝකයෙන් පියාණන්ගේ දෙනෙත් අග දිලිසෙන කඳුලු දුටුව පුත්රයා ආයෙම අහකට හැරුනෙ තම නෙත් වලට නැඟුනු කඳුලු වලකා ගන්නට දැරූ අසාර්ථක උත්සාහයක් හැටියට,

පියාගේ මුවින් නොකඩවා නික්මෙන රිද්මයානුකූල මැතිරුම මවගේ හිස අද්දර මැටි බිත්තියට පිට දී පපුව මත බැඳගත් දෑතින් සහ බිමට හැරවුණු නෙතින් පසුවන දඩයක්කාරයාගේ සිත නින්දට පත් කරවන නැලවිල්ලක් වුනා.

මෙසේ වරෙක නිදි ලොවට පිවිසෙමින් සහ යලි අවදිවෙමින් කොපමන කාලයක් ගෙවූවා දැයි හරි හැටි ඔහුම නොදන්නනා කාලාන්තරයකට පස්සෙ එක වරම ඔහු අවදි වූයේ කිසිවකු උරහිස මත අතක් තබා කල සෙළවීමකින්.

එක්වරම තමා මේ සිටිනුයේ කොහේදැයි නිශ්චය කර ගත නොහැකිවූ දඩයක්කාරයා නිදි මත පලවා හැරීම සඳහා දෙතුන් වරක් හිස ඒ මේ අත සොලවල දෙනෙත් විවෘත කලා. ඔහුගේ දෙනෙතට ලක්වූයේ තමාගේ මුහුණට එබී තම දෙනෙත් දෙස ඇසි පිය නොහෙලා එක එල්ලේ බලා සිටිනා තවත් දෙනෙතක්.ඒ තම පියාණන් ගේ දෙනෙතයි. මතක ඇති කාලෙක ඉඳල නිශ්චල තරු කැට වගෙ දිලිසුණු ඒ දෙනෙත කුමක් දෝ වටහාගත නොහැකි හිස් බවකින් නො එසේනම් ශෝකී බවකින් පිරී තියෙනව දුටු දඩයක්කාරය කිසිම සැකයකින් තොරව වටහා ගත්ත සිදු වී ඇත්තෙ මොකක්ද කියල.

මතු සම්බන්ධයි........

56 comments:

  1. Replies
    1. ස්තූතියි යසිරු....හෙහ්, හෙහ්, :)

      Delete
  2. හ්ම්...දඩයක්කාරයට ජීවිතේ පළමු වතාවටද සංවේගය කියන එක පහළ වුනේ ?

    ReplyDelete
    Replies
    1. ඔබ නිවැරදියි , ඔබ්, දඩයක්කාරයා සංවේගය යනු කුමනාකාරයේ හැඟීමක්ද යන්න මුල් වරට සැකයකින් තොරව දැන ගනුයේ එදාමය.

      Delete
  3. //බූරාභිධාන කෙළෙඹි පුත්රයා//

    නිකම් 'බූරු පුතා' වගේ තෙරුමක්ද එන්නෙ ?

    ReplyDelete
    Replies
    1. එවන් ඇඟවීමක් ස්වප්නයෙනුකුද මසිතෙහි පැන නොනැඟි බව උදක්මැ පවසමි :(

      නීරීක්ෂකය, තොප වනාහී හරිතවන් වනාන්තරයන් ගිනි තැබීමෙහි ලා මහත් සමතෙකු බව සක්සුදක් සේ පැහැදිලි වන බව මෙහිලා නොපවසාම නොහැක්කේමය. :) :)

      Delete
    2. නාකියා වුනාට ඔබාට තාම හරියකට සිංහලවත් බෑ නෙවැ.. කොහොමද බොල 'බූරාභිධාන කෙළෙඹි පුත්‍රයා' කියන එකෙන් 'බූරු පුතා' කියලා තේරුමක් එන්නෙ..!!?? අර ඔබී උගන්නන්ට යන දහම් පාසලටවත් ගොහිල්ලා සිංහල ටිකක් ඉගෙනගන්න ට්‍රයි කොරා නං..

      Delete
    3. @ 'බූරාභිධාන කෙළෙඹි පුත්‍රයා' aka 'බූරු පුතා'
      ඔබී උගන්නන්නෙ දහම් පාසැලේ නෙමේ බොළ සිංහළ ඉස්කෝලෙ.

      සිංහළ බැරි මොකෝ මට. බලහං පාසැල කියන වචනෙ 'ඇ' කාරය දාල, සිංහළ කියන වචනෙ කැපිටල් 'ල' යන්න හෙම දාල නියමෙට ලියල තියෙන ලස්සන කොමෙන්ට් එක වුනත්.

      @ Ravi,
      නොපවසාම නොහැක්කේමය = නොකිය බෑ කියනෙක වෙන්නැති :-))

      Delete
    4. ඔබී මේ කමෙන්ට් දැක්කානං හෙම සුවර් එකටම පැන්සොන් ගන්නවා සිංහල ඉගැන්නිල්ලෙන්.. ඇයි ඉතිං 'මෙච්චරකල් අනිත් අයට සිංහල උගන්නගන්න ගියා, ගෙදර ඉන්න එකාට හරියකට සිංහල ටිකක් උගන්නන්ට බැරුව ගියා නෙවැ' කියාලා හිතිලා සංවේග ඉපදිලා.. :p

      Delete
    5. @ ඔබ්,

      එසේමැයි ඔබ, එසේමැයි, නොපවසාම නොහැක්කේය යනු නොකියාම බැහැ යනු මැයි.....

      නොකියා බෑ කියූ කලැ මා සිතට නැඟුනේ Nokia දුරකථන පිළිබඳව මීට කලකට පෙර ගැයුණු සුප්‍රසිද්ධ සිංහල ගීතයකි. ඔබ ඊට සවන් දී ඇති බවට මසිත කිසිදු සැකයෙක් නැත.

      '' Nokiaම එදා ඇහැල මහේ සඳ ඇති පායා....''

      Delete
    6. //Nokiaම එදා ඇහැල මහේ සඳ ඇති පායා....//
      අම්මප අහල තියෙනව නේන්නං...

      Delete
  4. ඔය තියෙන්නෙ.. රවි අයියෙ ඕනනං මෙහෙමත් කොරාන්ට පුළුවන්ය, උඹ බර වචනෙන් ලියාලා සිත්තමීට දෙන්ට ඒක කාටත් තේරෙන බාසාවට පරිවර්තනේ කොරාන්ට.. එතකොට උඹට මෙච්චර කට්ටක් කන්ට වෙන්නෑ.. කොහොමද නිකං පාළිධම්මපදට්ඨ කතාවට අටුවා ලිවුවා වගේ තියෙයි නෙවැ.. :D

    ReplyDelete
    Replies
    1. අහ්, සිත්තමිය ලවා ලිහිල් බසට පරිවර්තනය කරවා ගැනීමට?.....අහෝ බූර, තොපට දිව්‍ය පුත්‍රයින්ගේ සහල් අනුභව වී ඇති සැටියකි. එවන් කුල කතක් ලවා මෙවන් සිල්ලර කාර්යයක් කරවා ගැනු වස් තැත් කිරීමම ඇයට කල හැකි සුවිශාලම අපහාසයක් අවමානයක් නොවන්නේද? මා දිවි ක්ෂය වු වද එවන් නොපනත් කමෙක් නොකරමි.

      Delete
    2. / උඹ බර වචනෙන් ලියාලා සිත්තමීට දෙන්ට ඒක කාටත් තේරෙන බාසාවට පරිවර්තනේ කොරාන්ට.. /

      තවද කිවයුත්තෙක්මැ ඇත්තේය.මෙහි ඇති ගැටළුව නම් සිත්තමී කුමරියට භාෂා විලාසය ගෝචර නොවීමයි. එබැවින් එතුමිය ලවා ලිහිල් බසට පරිවර්තනය කරවාගැනීමක් පිළිබඳව තොපගේ යෝජනාව උදක්මැ අප්‍රායෝගිකය.ඒ කෙසේද යත් ඉදිබුවෙක්ගෙන් පියාපත් ඉල්ලීමක් හා සමානය.මෙයද තොපගේ තවත් එක් T.I.C. උපදෙසක් යයි හඟිමි... හෙහ්යැ, හෙහ්යැ,

      Delete
    3. @Buro Ayya

      අයියා හිතනවද මට එහෙම දෙයක් කරගන්න පුළුවන් වෙයි කියලා? ගොඩාක් ස්තූතියි හොඳද ඒ වගේ දෙයක් මට කරන්න පුළුවන් වෙයි කියලා හිතුවට. ඔන්න මේ අඩවියෙ පාලක තැන මටත් එක්කම උත්තර දීලා තියෙන්නේ. මං හිතන්නේ උන්දෑ කියලා තියෙන කතාව හරි.

      Delete
  5. "ජිහ්වය කපෝලාභ්යන්තරයෙහි " මේ මොකක්ද අය්යා මේ? මගේ දශක තුනක් වෙච්ච ජීවිතේට මේ වචන දෙක දැක්කමය් බොලේ.. කොහෙන්ද අප්පා මෙහෙම වචන හොයාගන්නේ? මොන උනත් මේ වැඩේනම් නියමය් අප්පා. අද නම් දෙකම කියෙව්වා. ඊළඟ පාර ඉඳන් කෙලින්ම ලිහිල් වර්ෂන් තමා :)මොකටෙය් නිකන් මොලේ උලුක් කරගන්නේ

    ReplyDelete
    Replies
    1. ජිහ්වය යනු දිවයි. කපෝලය යනු කම්මුලයි.

      එබැවින් නැඟනියනි Tongue in Cheek යනු දිව කම්මුලෙහි තබා කරන කථාවයි. ඉන් අදහස් වනුයේ එසේ පවසන්න පූර්ණ වශයෙන් විශ්වාස නොකල යුතු බවකි.Tongue in Cheek යන යෙදුමට පූර්ණ වශයෙන් පර්යාය වන සිහල යෙදුමෙක් සොයා ගත නොහැකි වූ බැවින් ඉංගිරිසි යෙදුම අනුසාරයෙන් මෙසේ යෙදුවෙමි.

      බුරතීනෝ සොයුරා මවෙතින් කල ඉල්ලීම එනම් සංස්කරණයන් දෙකක් ලියන ලෙස කල ඉල්ලීම හුදෙක් කවට කමට කල දෙයකි. මාහට පැවසිය ඇවැසි වූයේ එයයි.

      Tongue in Cheek

      Meaning - In an ironic manner, not meant to be taken seriously.

      Origin - This phrase clearly alludes to the facial expression created by putting one's tongue in one's cheek. This induces a wink (go on - try it), which has long been an indication that what is being said is to be taken with a pinch of salt. It may have been used to suppress laughter. 'Tongue in cheek' is the antithesis of the later phrase - 'with a straight face

      Delete
    2. බොහොම ස්තුති පැහැදිලි කිරීමට.. වෙලාවට අය්ය රට ඉඳන් මේක ලියන්නේ , නැත්තන් පුරුද්දට මේ භාෂාවෙන් ගෙදරදී අක්ක එක්කත් කතා කරලා පුස්තකයක් ශීර්ෂයට වට්ටගන්න තමය් වෙන්නේ... :)

      Delete
    3. සත් සමුදුරෙකින් එපිට වාසය කල ද වෙනසෙක් උදක් මැ නැත්තේමය.

      එපමණ කාලයක් ගත නොවීයැ, මේ දෙහෝරාවෙකට පලමු වූවක් අසාපන්න මා නැඟනියනි......

      ඇය ස්කයිප් මාර්ගයෙන් මා අමතන තෙක් නොඉවසිල්ලෙන් බලා සිට අවසන දුරකථනයෙන් ඈ ඇමතීමි.

      '' හෙලෝ ...'' ඒ ඇගේ හඬයි.

      '' අහා, මා ප්‍රියම්බිකාවිය,..... මා සොඳුර, .....තොපගේ හඬ මා සවනත මී ඕනාවන් බඳුය.මෙතෙක් තොප හා සමඟ පිළිසඳෙරෙහි යෙදෙනු වස් ස්කයිප් ක්‍රියාත්මක කොට පොරොත්තුවැහිඳ අවසන මෙසේ දුරකථනයෙන් ඇමතීමි. ''

      '' මොකද අනේ මේ විකාරෙ?...අද නිවාඩු දවසෙ මට පේන්නෙ කණ් පාත් වෙන්නම ගහල වගේ?....නැත්තං මොනවද හැබෑට මේ කියවන සමයං?..''

      '' අහෝ තොපගේ චෝදනා බස් මා සිත් සොවින් පුරවාලයි. මෙපමණ වේලා තොප හා සාමීචියෙහි යෙදීමට පුල පුලා සිටි මාහට තොප අමතන අන්දම නම් ඉතාම නොහොබී. ''

      '' මොන සාමීචියක් ගැන කියවනවද මංද...මම මේ සපුමලී බලල ඉවර වෙලා ඔයාට කතාකරන්නයි හිතුවෙ.....සික්.... අනික මොකක්ද මේ කතා කරන විදිය?...තොප.....මොකක්ද ඒ වචනෙ...තොප....හරිම නරකයි.....''

      '' අහා.... තොප පවසන්නෙන් ගම්‍ය වනුයේ මට වඩා තොපට සපුමලිය අගනා බවයි...ඒ එසේ නොවන්නෙහිද? ''

      '' හරි, හරි ,ඉන්න මම එන්නම්......දැන් කොහොමත් සපුමලී ඉවරයි...හැබැයි මේ විකාර නවත්තල සිංහලෙං කතා කරනව නම් විතරයි...හොඳද? ආයෙම මේ අපබ්බ්‍රංස කතා කලොත් මම කට් කරල නිකං ඉන්නව ....නොකිව්වයි කියන්න එපා...හරිද? ''

      මේ නොදැමුණු දඩයක්කාරයා හේතුකොටගෙන මට සිදුවන හෙයියම්මාරු නම් නිමෙක් නැත. හිතවත් මෙකුවියනි.......හෙහ්, හෙහ්,

      Delete
    4. බ්ලොග් කියැවන ගෑල්ලමයින්ගේ පමණක් නොවැ තම බිරින්දගේද පික්ෂු ඩබල් කොරන බවක්මැ පෙනී යැයි. කොහොමද මගෙ 'ඇ'කාරය. බූරාභිධානයා දැක්කොත් ඌට ත් පික්ෂු ඩබොල් වේමැය.

      Delete
    5. සපුමලි නෙමෙඉ අය්ය ඔය කියන්නේ සන්දමලි ගැන වෙන්ටති.. අපේ මනුස්සයත් කට ඇරගෙන ඕක බලනවා, මට නම් tv අරහන්.. ඉතින් මන් ඒ වෙලාවට බොල්ග් කියෝනවා :) ... එකනේ මන් කිව්වේ වෙලාවට ඔහොම කතා කරද්දී ළඟ නොහිටියේ...


      @ ඔබා මාමා
      හපොඉ දෙය්යනේ යසට හිටිය ඔබා මාමටත් ලෙඩේ බෝ කරලා හැඩය් ...ඔබා මාමා කුමාරතුංග මුනිදාස වගේ වෙලානේ

      Delete
    6. .@ Mekuvi,

      අහෝ මෙකුවිය තොප හා මා දන්නා සඳමලි....තොප නොදන්නේනම් සදාදරණීය ස්වාමියාණන් බණවා අසාපන්න, එම මාලා නාටකයේ නාමය නම් සපුමලීමයැ., ස්වාධීන රූපවාහිනියෙහි සතියෙහි දින පහේම විකාශය වන්නාවූ එහි ප්‍රධාන චරිතය වූ සපුමලී ලෙස රඟනුයේ අවිහිංසක සිහල කුල කතුන්ගේ ප්‍රතිමූර්තිය වන් මංජුලා කුමාරි යුවතියයි.

      මීට වසර කිහිපයකෙට පෙරැ ඉතා ජනප්‍රිය වූ '' ඕළු " වෘතාන්තයේ ද රඟපෑවේ ද ඇයමය.එකල ඇගේ රඟපෑම් බලා මම ද කඳුළු සලා හැඬුවෙමි... :( :(

      ඔබා මාමණ්ඩියට කිමෙක්දැ සිදු වී ඇත්තේ?....මෙපමණ වසස්ගතවූ පසු හෝ හෙතෙම අප වන් පාණ්ඩිත්‍යයෙන් සපිරි වියතුන් ඇසුරින් බොහෝ ඇසූ පීරූ තැන් සහිත උගතෙකු වනවාට තොප ඊර්ෂ්‍යාවෙන් පෙලෙනා සෙයක් මට දිස්වේ. අහෝ මෙකුවිය..ඒ නම් කිසිසේත්මැ සමාධිය භජනය කල නොහෙන වරදක්මැයි. වහා ඔබා මහත්මාගෙන් සමාධිය අයැද සිටියහොත් යෙහෙකි.

      / හපොඉ දෙය්යනේ යසට හිටිය ඔබා මාමටත් ලෙඩේ බෝ කරලා හැඩය් ...ඔබා මාමා කුමාරතුංග මුනිදාස වගේ වෙලානේ /

      මේ සුපුරුදු ග්‍රාම්‍ය වදන් භාවිතය අතැර දමා මෙකුවියනි, තොපද ඔබාවන්, බූරාභිධානයන්, නවමුන් වැනි වියතුන් සේ විදග්ධ බස් වහරෙක් භාවිතා කිරීම අරඹනු මැනවි.

      බලව, ඉහත වැකිය විදග්ධ වහරින් ලියූ කල්හි කෙතරම් මනරංජනීය සහ කන්කළු වේද?

      '' අහෝ, දිව්‍ය පුත්‍රයිනි,කිසිදු අතුරු අන්තරායෙක් නොමැතිව දිවිගෙවූ අපගේ ඔබාභිධාන මයිලණුවන්ට ද රෝගය වලඳවා ඇති සෙයකි. ඒ කෙසේද යත් ඔබාවෝ කුමරතුඟු මුනිදසුන් මෙන් වී සිටිත්...''

      Delete
  6. මෙතුවක් කල් සාතිශය ගැඹුරු වූ ද මහත් වූ ගැලපුමක් ඇත්තාවූ ව්‍යක්ත බස් වරෙකින් පබඳින ලද්දාවූ මෙම වෘත්තාන්තයේ කථානායක, දඩයක්කරුගේ ගූඪ චරිත විග්‍රහයෙන් පාඨක මනැසෙහි චිත්‍රණයකලා වූ මහාමේරුව මෙන් විසල්, ක්ෂීර සාගරය මෙන් ගැඹුරු මහා චරිත විග්‍රහය කතෘ විසින් හුදු ව්‍යක්ත බස්වහරකට ආගන්තුක වූ කුළස්ත්‍රීන් සුළුතරයක යැදීමට කන් දීමක අනි‍ටු විපාකයක් වශයෙන් සරළ වීම පිළිබඳව පැවසිය හැකි වන්නේ; චණ්ඩ හිරු‍රැසින් මඬිනාලදුව යවටක් මෙන් ගිණියම්වී ඇති පාෂාණ ස්ථලයක් මතුයෙහි කුස ලිහිල් වූ බිළාලයෙකුගේ සතර අතට ගලාගොස් එතැන්හිම පාෂාණීභූත වූ පැහැරුමක් දු‍ටු විට සිත පලවූ අපුලත්වයක් පහල වූ බවයැ.

    අ‍ටුවාවෙහි සිටි දඩයක්කරු පෙර හුන් එකා මෙන් නොව නොඋස් වූ මෙන්ම කෙසඟ වූ ශරීර ඇති මුග්ධ බැල්මකට උරුමකම් කියනා හීන පෞර්ශයකට හිමිකම් කියනා පුඟුලෙකි !! අහෝ ප්‍රෞඪ දඩයක්කරුට ස්ත්‍රීන් විසින් මහත් හාණි පමුණවා ඇත්තේයැ. ස්ත්‍රීන් අභිමුව කේසර සිංහ රාජයෝද මූසිකයන් වන බවට මෙය නැවත නැවතත් සාක්ෂි යැ.. අහෝ !!

    මෙයට සියළුම කුලස්ත්‍රීන් මවෙත කමත්වා. [සියතින් ගෙල සිඳවා ගැනීම නොමැනවැයි චිත්ත ඇණවුමක් පහලවීමෙන් මෙය සටහන් කර තබනා ලදී]

    ReplyDelete
    Replies
    1. අහෝ මා ප්‍රාණසම කණිටු සොයුර, නවමාභිධාන හිතවත, තොපගේ දෝෂාරෝපණය මසිතට කටු සැමිටියකින් තලන්නාක් බඳු වූ මහත් වේදනා ගෙනදෙයි.

      පරම වූ සත්‍යයක්මැ තොපට පවසන්නෙමි මලඬ, මා පත්වූයේ තොපට ස්වප්නයනෙකුදු වටහාගත නොහැකි පමණ වූ දැඩි අසීරු තත්වයෙකටමැයි.

      සිත්තමිය ප්‍රමුඛ ජනූ, පොඩ්ඩි සහ මෙකුවි යන සුකුමාල සහ රූමත් ලලනාවියන් මා ඉදිරිපිට පසඟ පිහිටුවා වැඳ වැටුණේ, මෙසේ එක හඬින් බැගෑපත්ව ඉල්ලා සිටියෝයැ.

      " අහෝ අයියණ්ඩිය, අප කෙරෙහි අනුකම්පා කොට මේ දඩයක්කාර තෙමේගේ කතා වස්තුව ලිහිල් බසින් ලියනු මැනව,තොප ලියන්නාවූ අති දීර්ඝ වාක්‍යයෝ අපගේ අන්නස්‍රෝත්‍රයෙහි හරස් වැ සිරවීම කරණකොටගෙන අපි බොහෝ අපහසුවට පත් වීමු. එසේම තොප භාවිතා කල අතිශය බරසාර වදන් ජීර්ණය කොට ගත නොහී අප අස්ථිරඹ අනුභවයේ යෙදුනු කාලව්‍යාධීන් මෙන් වූයෙමු.එසේ හෙයින් අප කෙරෙහි තොපගේ කරුණාක්ෂිය උදක් යොමු කොටැ මේ වෘතාන්තයෙහි ඉදිරි කථාංගයන් ලිහිල් බසින් සහ ලඝු වාක්‍යයන්ගෙන් සැදුම් ලත් රටාවකින් රචනා කරන මෙන් උදක්මැ ඉල්ලා සිටිමු.''

      වනිතාවන් රැසක් මා ඉදිරිපිට එසේ යදිමින් වැළපෙනා කල්හි මා කුමක් නම් කරන්නද මා හිතවත?...මගේ හදවත පමණක් නම් කම් නැතැ. පිත්තාශය, යාකෘතය මතුදු නොව අග්න්‍යාශය සහ වෘක්කයෝද හුණු වී වැගිරෙන්නට වූ යේ සැඩ හිරු රැසට නිරාවරනයවූ වෙඬරු පදාසයක් මෙනි.

      ලාබාල වියේ සිටමැ මා හට ඉතිරින්ගේ කඳුළු බලා සිටිය නොහැක. ඒ සුගුණයක්දැයි ද එසේත් නොමැත්තේනම් දුර්වලතාවයක්දැයි මම නොදන්නෙමි. මා තිරව දනුයේ එකකි. ඉතිරියක් හැඬූ කඳුලින් ඉල්ලා සිටින්නේ යමෙක්ද මම ඒ නොවළහා ඉෂ්ඨ කරන්නෙමි.

      එසේ හෙයින් දඩයක්කාර තෙමේගේ වෘත්තාන්තයද ලිහිල් බසින් ලිවීමට හැර අන් විකල්පයෙක් මාහට ශේෂ නොවුනු බැව් මේ ඉතාමත් අවංක වූ කරුණු පැහැදිලි කිරීමෙන් පසු තොප වටහා ගන්නා බවට මම උදක්මැ විශ්වාස කරමි.

      Delete
  7. // ස්ත්‍රීන් අභිමුව කේසර සිංහ රාජයෝද මූසිකයන් වන බවට මෙය නැවත නැවතත් සාක්ෂි යැ.. අහෝ !! //

    වන්නාටයැ, ලෝ දහම එයයි නවමුවානෙනි.. උදක් පහන්-සංවේග උපදවා සත්‍යාවබෝධය සාක්ෂාත් කරගනු මැනැවැ..!!!

    ReplyDelete
    Replies
    1. අහා, බූර, මා මලණුව, තොපට විචාර බුද්ධිය හා සමඟ ඥාණාක්ෂිය ද එකවර පහළ වූ සෙයක් පෙනී ගියේයැ....එළයැ, එළයැ, මහත්මැ එළයැ....

      එනු , මා දයාබර සොයුර එනු, සුරත ඔසවා පංචමයක් දමනු වස් එනු,

      පෙර කලෙකැ විසූ එක් කේසර සිංහ රාජයකු වසර සොළොසක්මැ මුළුල්ලේ ප්‍රීතිමත් මූසිකයකුවැ දිවි ගෙවනා අන්දම සිහිවීමෙන් මසිත ආහ්ලාදයෙන් පිරී ගිය බැව් ද සටහන් කරන්නෙමි.

      Delete
  8. "ජිහ්වය කපෝලාභ්යන්තරයෙහි "කෙසේ වෙතත් ජිහ්වය විකාගෙන වත් හිනාව නවතා ගත නොහැකිව සිටිමි .

    ReplyDelete
    Replies
    1. එම්බා අරවින්ද පොක්ඛරණියෙහි අධිපතිනිය,

      මා විසින් මෙතරම් වෙහෙස ගෙන හෘදයාංගමව රචනා කල දඩයක්කාර තෙමේ ගේ අනුවේදනීය වෘතාන්තය කියවා තොප සිනාසෙන්නෙහුද?.. :( :(....අහෝ, අහෝ,

      Delete
  9. //පෙර කලෙකැ විසූ එක් කේසර සිංහ රාජයකු වසර සොළොසක්මැ මුළුල්ලේ ප්‍රීතිමත් මූසිකයකුවැ දිවි ගෙවනා අන්දම සිහිවීමෙන් මසිත ආහ්ලාදයෙන් පිරී ගිය බැව් ද සටහන් කරන්නෙමි//

    අරවින්ද පොක්ඛරණියෙහි අධිපතිනියට, අධිපති සිංහය ගැන වෙන්නැති මේ කියන්නෙ

    ReplyDelete
    Replies
    1. අරවින්ද පොක්ඛරණියෙහි අධිපතිනියට අධිපති සිංහය දුෂ්කර ක්‍රියා කලේ වසර දොළසයි කියලා එතුමියම මේ ඊයෙ-පෙරේදා පැවසුවා.. මේ ඔබාට නං මඤ්ඤං!! බොලං මේ කියන්නෙ රවි කෙළෙඹි පුත්‍රයා ගැනයි.. :)

      Delete
    2. @ ඔබ්,

      එසේමය ඔබාවෙනි, බූරාභිධානයන් විසින් නිවැරදිව වටහාගත් පරිදි මවිසින් පවසන්නට යෙදුනේ අරවින්ද පොක්ඛරණාධිපතිනිය පිළිබඳව නම් නොවේමය.එතුමිය සිය සිහ රදානන් මූසිකයකු බවට පත්කොට ගෙවී ඇත්තේ වසර එකුන් තුදුසෙක් පමණක්මැ බැව් ඈ විසින්ම තෙපලූ බැව් මා ස්මරණයට් නැඟෙයි.

      Delete
    3. @ බූරාභිධාන,

      අහා, තොප නම් මහා සමතෙක, මවිසින් පවසන්නට යෙදුනේ කවුරුන් පිළිබඳව දැයි තොප එකෙණෙහිම වටහා ගත්තෙහිය,

      එකල්හි උදක්මැ දුහුණන් දැනුම් උදෙසාමැ සූර්ය නම් වූ ඒ බහුශ්‍රැත පුරුෂයෝ එකල සිහරදකුව විරාජමාන වූයේද ඒ වගත් මෙසේමැ පශ්චාත් කාලීනවැ සොළොස් වසරක් මුලුල්ලේ මූසිකයෙකුව දිවි ගෙවන්නාවූයේත් වර්තමානයෙහි සූර්ය නමින් සුපතළ මෙ මම්ම වේදැයි පවසා පූර්වාපර සන්ධි ගලපා වැදෑරූ සේක....සාධූ! සාධූ!! සාධූ!!!

      Delete
    4. //බූරාභිධාන//

      හී හී හී හී ඊඊඊඊඊඊ.........
      අපොයි මීට පස්සේ මම හිනාවෙන්ට එන්නේ මෙතන්ටයි.

      Delete
  10. මෙවන් විද්වත් සංවාදයක් අන් නෙත් නොගැටී යති අප්‍රමාන සංවේගයට පත්ව මාගේ පොක්ඛරනියෙහි මේබැව් දන්වා සබැඳියක් ඇති කළ බැව් දන්වා සිටිමි .

    ReplyDelete
    Replies
    1. මාගේ හෘදයාංගම නොවක් තුති කුසුම් කලඹ ඔබ තුමියට සාදරයෙන් පිළිගන්වන්නෙමි, රත් අරවින්ද සහසක් නිතොර සුපිපි නීල පොක්ඛරනීයාධිපති තුමියනි......:) :)

      Delete
  11. මේ බ්ලොග් අඩවියේ කොටමින් පවතිනා, කැලෑ කතාව, අපබ්‍රංශ භාෂාවෙන් ලියවීමට පටන් ගත් පසු, ඇතිවූ අපහසුතාවෙන් මිදීම සඳහා, කෙටියෙන් කිවහොත් අප වැනි සිංහල පරතෙරට පැමිණ සිටිනා හුදී ජනයාගේ හිත සුව සහ පහන් සංවේගය උදෙසා නැවත ව්‍යවාහාරික භාෂාවෙන් එය ලිවීම ගැන රවිපාණන්ට, මගේ, කුරුතඤඤතාව (හී හී ) සහ හෘදයාංගම ස්තූතියද මින් පල කර සිටිමි.

    මොකක්ද බොලේ මේ පොක්ඛරනියෙහි කියන්නේ? :D:D:D

    ReplyDelete
    Replies
    1. අහා, පරවීණාවනි නොහොත් නොහොත් දේස දීපංකරයන්හි පරසිදු ලෙස චුල්ල කුමරියනි,

      තොප දැකුමින් අප පින් කල බැව් හැඟුනි,කෙසේද බාණකොක්ඛ නුවර පිළිබඳ තොරතුරු? අධික වර්ෂාව පතිත වන්නේද? නැතහොත් චණ්ඩ සූර්ය රශ්මියෙන් නැහැවෙන්නේද?

      තොපගේ චාරිකා වලදී ප්‍රමුඛස්ථානයෙක් ලැබෙණුයේ ඛාද්‍ය භෝජ්‍යයන්හට සක්සුදක්සේ දන්නා බැවින් මෙසේ විචාරන්නෙමි. එහි වීථීන් මුලුල්ලෙහි තෛලයෙහි ලා බදිමින් විකුණනා කදෝපැණියන්හෝ පළා පෙත්තන් තොප රස බැලුවෙහිද?

       / රවිපාණන්ට, මගේ, කුරුතඤඤතාව (හී හී ) සහ හෘදයාංගම ස්තූතියද මින් පල කර සිටිමි. /

      ස්තූතියි, පරවීණාවෙනි, ඔබට මාගේ නොවක් ස්තූතිය මින් පළ කරන්නෙමි. :)

      / මොකක්ද බොලේ මේ පොක්ඛරනියෙහි කියන්නේ? :D:D:D /

      පොක්ඛරණිය යනු පොකුණ යන්නයි, නැතහොත් විලයි. අරවින්ද යනු නෙළුම් යන්නට පර්යාය පදයෙකි. එබැවින් අරවින්ද පොක්ඛරණිය යනු නෙළුම් විලයි. ඒ නයින් අරවින්ද පොක්ඛරණියෙහි අධිපතිනිය යනු නෙළුම් විලේ ලොක්කී යන අරුත් ගෙන දෙයි. මේ ගෞරව නාමය වනාහී විවාහ දිවිය නම් වූ අති දුෂ්කර චාරිකාවෙහි එකුන් තුදුස් වසරක මඟ ගෙවා සාර්ථකව නිම කිර්‍රිම වෙනුවෙන් බින්දියට මවිසින් ප්‍රධානය කරන්නට යෙදුනක් බව සැලකුව මනාය. :) :) :)

      Delete
  12. අයියෙ උඹ පියවි සිහියට එනකල් මං ආයෙ එන්නෙ නෑ මේ පැත්තෙ....(ඔය කිව්වට හොරෙං ඇවිල්ල අර ලිහිල් එක කියවල යනව)

    ReplyDelete
    Replies
    1. / (ඔය කිව්වට හොරෙං ඇවිල්ල අර ලිහිල් එක කියවල යනව)/

      මා සදාදර මෑණියන් නාමයෙන් දිවුරන්නෙමි,තී මේ කවර මංගල්‍යයෙක් නම් තෙපලන්නෙහිද?

      අහෝ , හසකිකිණිය නොහොත් ජනූව නො එසේනම් යජිත්පතිනිය, තොපගේ අපේක්ෂාවන් බිඳ දැමීමට සීදුවීම ගැන කමන්න,

      සංස්කරණයන් ද්විත්වයෙක් රචනා කිරීම පසෙක තිබියේවා මාගෙ උණ්ඩුක පුච්ඡය පවා වැසී යන තෙක් ගොඩ ගැසී ඇත්තාවූ සහස් සංඛ්‍යාත හදිසි රාජකාරි මධ්‍යයේ එක් සංස්කරණයෙක් රචනා කිරීමට මතු දු කාල වේලා සොයාගත නොහැකිව උකටලීවැ හිඳිමි.

      ඒ කෙසේද යත් එකලාම සදිසි උපමාවෙක් පැවසුමහොත් බාළතෘණ පැළෑටියෙහි ශරීර කෘත්‍යය කලා මෙනි

      එමතුදු දඩයක්කාරයාණන් ගේ ඉදිරි කටයුතු දැනපියා ගනු වස් පුල පුලා සිටිනා ඔබ සැම වෙනුයෙන් පතලා වූ මහා කරුණාගුණය කරණ කොට ගෙන මධ්‍යම රාත්‍රිය දක්වා නිද්‍රා වර්ජිතව හෝ අනුයාත කථාංගය රචනා කොටැ වියුණුවෙහි පලකිරීමට උදක්මැ තැත් කරන්නෙමි.

      Delete
  13. අහෝ, මා අතුරුදන්ව හෝරා කිහිපයක් ගෙවීමට මත්තෙන් සිදුවී ඇති විජ්ජුම්බරයක්..

    සුපිරියැ.

    ReplyDelete
    Replies
    1. එසේමය සිතුවම, එසේමය, තොප අතුරුදන් වූ කාල සීමාවෙහි මෙහි සිදුවූ දේ ගැන කෙසේ නම් විස්තර කරම්ද?....:) :)

      ඔබට ස්තූතියැ....

      Delete
  14. මම මේ කොටස කියවපු දවසෙම මේ වගේම තව කතාවක් කියෙව්වා. ඒක ඇත්ත කතාවක්. ඒක ලියපු පුතාත් එයාගෙ අම්මා මරණාසන්නව සිහි විසඥ වෙලා ඇඳේ ඉන්න කොට ඒ අම්මා ලඟට ගිහින් මේ දඩයක්කාරයා වගේම අම්මාගෙ අතින් අල්ලගන්නවා.

    When no one was in the room, I entered and closed the door behind me. All at once, my eyes welled with tears. I reached for her hand and felt the warmth I always had. I kissed the back of her hand. My voice was ragged, and though I’d already cried for most of the afternoon, I simply couldn’t stop when I was with her. Despite the swelling, she looked beautiful, and I wanted—with all my heart and soul, and more than I’ve ever wanted anything—simply for her to open her eyes.

    “Please, Mama,” I whispered through my tears. “Please. If you’re going to come out of this, you’ve got to do it soon, okay? You’re running out of time. Please try, okay . . . just squeeze my hand. We all need you . . .”

    I lowered my head to her chest, crying hard, feeling something inside me begin to die as well.

    මේ අපි හැමෝම දන්න, ආදරේ කරන ලෝක ප්‍රසිද්ධ Nicholas Sparks ගේ ජීවිත කතාව. උපුටා ගත්තේ Three Weeks with My Brother පොතෙන්. මේක කියවලා ඒ දුක පිට මෙතනට ඇවිත් කමෙන්ට් කරන්න බැරුව මම හිටියේ.

    මට දැනෙන විදිහට රවි අයියා තාම කතාව කියන්න පටන්ගෙන නෑ.තාම අයියා කතාව කියන්න ප්‍රවිෂ්ට වෙනවා විතරයි, තාම කතන්දරේ කියන්න පටන්ගන්න හිතලාවත් නෑ කියලයි මට හිතෙන්නේ. මන්දා, ඒ මට තේරෙන හැටි.

    ReplyDelete
    Replies
    1. //මට දැනෙන විදිහට රවි අයියා තාම කතාව කියන්න පටන්ගෙන නෑ.තාම අයියා කතාව කියන්න ප්‍රවිෂ්ට වෙනවා විතරයි, තාම කතන්දරේ කියන්න පටන්ගන්න හිතලාවත් නෑ කියලයි මට හිතෙන්නේ// මටත් එහෙම හිතෙනවෝ...

      Delete
    2. @ Siththami,

      අහෝ, නිකලස ස්පාකස වියතාණන් වනාහී මා ඉතා ප්‍රිය ගත් කතුවරයෙකි. ඔහුගේ '' මා සොයුරු සමඟ තෙසතියක් '' කෘතිය මා සිත් සොවින් පිරැවූ බව එකහෙලා පැවසිය හැක.නිකලසුන් තම සදාදර මෑණියන්ගේ වියොව එසේම දයාබර එක්මැ සොයුරියගේ පිළිකාවෙක් කරණ කොටගෙනැ වියොව අක්ෂර සිත්තම් කරනුයේ ඇසට මතු නොව හදටමය.ඒ සිදුවීම් එතරම් අප හද සසළ කරනුයේ මා සිතන අයුරු ඒ ප්‍රබන්ධයෙක් නොව සත්‍ය වශයෙන්ම මේ ළොව කුමන ස්ථානයක හෝ කෙදිනක හෝ සත්‍ය වශයෙන්ම සිදුවූවෙක් බව අප දන්නා නිසාම විය යුතුය.

      එසේම ඒ හැඟීම තවත් තීව්‍ර වනුයේ ඒ සිදුවීම් අප හොඳින් හඳුනන, අප හදට ආසන්න තැනැත්තකුට හෝ තැනැත්තියකගේ ජීවිතයේ ඔහුට හෝ ඇයට සත්‍ය වශයෙන්ම අත්විඳීමට සිදුවූ සිදුවීම් බවට අප නිසැකවන දන්නා විටදීය.

      නිකලසුන් ඔබට සහ මට හෘදයාංගම මිතුරෙකි. නො එසේද මා නැඟනියනි? එබැවින් ඔහුගේ මව මරණ මංචකයෙහි වැද හෝනා කල්හි ඔහු හා සමඟ ඔබ ද මම ද හඬන්නෙමු. ඔහුගේ සොයුරියගේ අකල් මරණය අවස්ථාවෙහිදී ඔහු හා එකව ඔබ ද මම ද කඳුළු සලන්නෙමු.

      කලා කෘතියක් රස විඳීමෙහිදී එක් ලොව පිළිගත් න්‍යායක් වනුයේ දුරස්ථ කරණයයි (Epic Theatre) සුප්‍රසිද්ධ ජර්මානු නාට්‍යවේදියකු වූ බර්ටෝල්ට් බ්‍රෙෂ්ට් විසින් ප්‍රචලිත කල මේ න්‍යායෙන් කියවෙනුයේ කලා කෘතියක් රස විඳීමෙහිදී එහි පාත්‍ර වර්ගයා සමඟ ආධ්‍යාත්මිකව(Spiritually ) සහ භාවාත්මකව (Emotinally )බැඳීම එම කලා කෘතිය නිවැරදිව විශ්ලේෂණය කිරීමට සහ රස විඳීමට ප්‍රබල බාධකයක් වන බවයි.

      දුරස්ථ කරණ න්‍යාය හා සපුරා එකඟවන අතර මම ද ඒ න්‍යාය පිළිපැදීමට ඒ පිළිබඳව දැනුවත් වූ දා සිට අසාර්ථක උත්සාහයක නිරත වෙමි.

      Well, Siththami Nangi ..what I wanted to say is that may be '' Epic theory '' is what we should adhere to when enjoying an artistic creation whether it's a novel, a painting , a film or a drama but nevertheless as we are all human beings and human beings being inherently emotional we more often than not identify ourselves with characters of creation. when we know they are/were actual people who lived/breathed the same air as us, this becomes more so and we get even closer to them,

      Sorry, for going off on a tangent but nevertheless I had to say this. Your comment was so inspirational that I simply could not help it....sorry again :( :(

      Delete
    3. @ Siththami & Nisupa,

      / මට දැනෙන විදිහට රවි අයියා තාම කතාව කියන්න පටන්ගෙන නෑ.තාම අයියා කතාව කියන්න ප්‍රවිෂ්ට වෙනවා විතරයි, තාම කතන්දරේ කියන්න පටන්ගන්න හිතලාවත් නෑ කියලයි මට හිතෙන්නේ. මන්දා, ඒ මට තේරෙන හැටි. /

      එසේමය නැඟනියනි, තොප පවසන්න උදක්මැ සත්‍යයමවේයැ.

      කථාංග සයෙක් රචනා කල නමුදු මේ අප රැඳී සිටිනුයේ හුදෙක් පූර්විකාවෙහිය.සවිස්තර ලෙසැ පවසන්නේනම් දඩයක්කාර තෙම තවමත් ගෙපැල පසුපස වූ සුවිසල් නුගරුක සෙවණෙහි ඇණ තබා හිඳගත් ඉරියව්වේ පසුවන්නේය.

      තම ජීවිතය පිළිබඳව සාතිශය වැදගත් වූ තීරණයකට එළඹීමට පෙර අප කථානායක තෙමේ සුපුරුදු වනස්පතිය සෙවණෙහි හිඳ ස්වකීය ජීවිතය පිළිබඳව අතීතාස්මරණයෙහි යෙදෙන්නාහ.මෙම වෘත්තාන්තයෙහි සියයට අනූවෙක්ම ඒ අතීතාස්මරණයයි.වර්තමාන කථාව බොහෝ කල්හි එක් කථාංගයකින් නිම කල හැකි වේයයි උපකල්පනය කරමි.( එම්බා සිත්තමිය ,තොපගේ මුව කෙලවරට මන්ද හාසයෙක් නැඟුනේ මන්දැයි මම එකහෙලා දනිමි. එහෙත් දනුව, මෙවර නම් මාගේ වදන් ඒ එසේම ඉටු කරන්නෙමි.)

      Delete
  15. කදිමය.කතාව වගේම ප්‍රතිචාර කියවන්න ගිහින් හිනාව ඉස්මොල්ලෙ ගියා.

    මොනවා වුනත් මං ඉස්සෙල්ලා විදිහට කැමතියි.කතාවෙ ගතිය තියෙන්නෙ එතන..:))

    ReplyDelete
  16. / කදිමය.කතාව වගේම ප්‍රතිචාර කියවන්න ගිහින් හිනාව ඉස්මොල්ලෙ ගියා. /

    එසේනම් නැඟනියනි, මින් මතු කථාව කියවන කල්හි තොපගේ පිටි කොඳු ප්‍රදේශයට වැරෙන් තඩි බෑමට සමත් මනා ශක්තිසම්පන්න පුරුෂයෙකු ඔබ පසුපසින් රඳවා තබා ගැනීමට සැලකිලිමත් වන්නේ නම් මැනවි.

    / මොනවා වුනත් මං ඉස්සෙල්ලා විදිහට කැමතියි.කතාවෙ ගතිය තියෙන්නෙ එතන..:)) /

    අහෝ මේ ඉතිරින් වනාහී අපගේ මස්තිෂ්ක මඤ්ඤමානුකූල කිරීම තම එකම පරමාර්ථය කොට ගත් සත්වයින් විශේෂයකි. එකියකට ලිහිල් බසින් ඇවැසි බැව් පවසන කල්හි තව එකියක් මුලින්මැ ලියැවුණු බසට මනාපය දක්වයි....අහෝ මට සිදුවූ විපතක මහත.....මට ඉතිරි වී ඇත්තෙ විකල්ප ත්‍රිත්වයකි.

    1. උග්‍ර හලාහල විෂක් අනුභව කොටැ වනගත වී මියයාම.
    2. දෙකට නැවී පශ්චාත් භාගය විකාගෙනමැ මියයාම
    3. සුවිසල් වූ මහා සමුද්‍රයට පැනැ එහි ලවණ ජලය කුස පුරා පානය කොටැ මියයාම.

    මෙයින් මවිසින් අනුගමනය කලයුත්තේ කුමන විකල්පයදැයි සිතමින් සිටින්නෙමි.

    ReplyDelete
    Replies
    1. මන්ද අයියණ්ඩිය, තොපට මෙසේද කල හැක.. උග්‍ර හලාහල විෂක් අනුභව කොටැ, දෙකට නැවී පශ්චාත් භාගය විකාගෙනමැ සුවිසල් වූ මහා සමුද්‍රයට පැන දිවි තොර කරගැනීම..

      Delete
    2. අහා, තොපගේ උවදෙස නම් කෝටියෙක් වටීයැ, මෙවන් මහරු උපදෙස් දෙන්නට සමතෙක් වේනම් ඒ තොපම විනා අන් කවුරුන්ද?

      නිබ්බුතා නූන සා මූරා,
      නිබ්බුතා නූන සා බූරා,

      මූරා වර්ගයේ ගවයකු ලබෙනුයේ යමෙක්ද හේ නිවුනේ වෙයි,
      බූරා වර්ගයේ සොයුරකු ලබනුයේ යමෙක්ද හේ ද නිවුනේ වෙයි.

      Delete
    3. /1. උග්‍ර හලාහල විෂක් අනුභව කොටැ වනගත වී මියයාම.
      2. දෙකට නැවී පශ්චාත් භාගය විකාගෙනමැ මියයාම
      3. සුවිසල් වූ මහා සමුද්‍රයට පැනැ එහි ලවණ ජලය කුස පුරා පානය කොටැ මියයාම./

      මා ප්‍රිය සූර්ය දිව්‍යරාජයාණන් වහන්ස, මාගේ චුල්ල මොළයට වැටහී යන පරිදි මේ උපායයන් අතුරින් පළමුවැනි හා තුන් වැනි උපායයන් ක්ෂීර වෘක්ෂයට මහා කඩුපතකින් කෙටුවා සේ මහත්ඵල ලබා දෙනු ඇත.. නමුත් දෙවැනි උපාය නම් එසේ වේ දැයි දැක සහිතය....මක් නිසාද යත් දෙකට නැවී පශ්චාත් භාගය විකා ගන්නේ කෙසේද යන්නම ගැටලුවක් වන්නාවූ නිසාය...දෙකට නැවී විකා ගැනීමෙන්ම මිය යාම ඔබගේ අභිප්‍රාය වන්නේ නම් එසේ විකා ගැනීම සදහා වෙනත් පශ්චාත් භාගය හැර වෙනත් ශරීරාංගයක් තෝරා ගැනීම යහපති..!!!

      Delete
    4. @ hansakinkini,

      / මක් නිසාද යත් දෙකට නැවී පශ්චාත් භාගය විකා ගන්නේ කෙසේද යන්නම ගැටලුවක් වන්නාවූ නිසාය.../

      ප්‍රිතියි, මා නැඟනිය, හසකිකිණිය , ඉතාමත්මැ ප්‍රීතියි,

      දෙකට නැවී පශ්චාත් භාගය විකා ගැනීම කල නොහැක්කක් බව තොපට සක්සුදක්සේ පැහැදිලිවූයේ කෙසේදැයි උදක්මැ දනිමි.

      දිනය : 2012 මාර්තු 20

      ස්ථානය : බොරැල්ල මංසන්ධිය අසල පෞද්ගලික ආයතනයක ප්‍රධාන කාර්යාලය

      උදෑසනම ආයතන ප්‍රධානියා පසුවූයේ බලවත් කෝපයකිනි. පෙරදින පිළියෙල කොට ග්‍රාහක සමාගමකට යැවිය යුතු වූ විමර්ශන වාර්තාවක් තවමත් පිළියෙල වී නොමැත.

      මේසය මත වූ විදිලි බොත්තම ඔහු වැරෙන් තද කලේ සිතෙහි උපන් කෝප වේගය ඉන් පිට කර හැරීමට මෙනි.

      කැඳවීම් සීනුව නාදවූ ආකාරයෙන්ම ප්‍රධානියා තද බල කෝපයකින් පෙලෙන බව දත් ඔහුගේ පෞද්ගලික සහකරු කාමරයට ඇතුළු වූයේ බලවත් චකිතයකිනි.

      '' සර්.............''

      '' සර්..තමයි කෝ අයිසෙ අද දොළහට කලින් යවන්න තියෙන රිසර්ච් රිපෝට් එක? තමුසෙ මේව බලන්නෙ නැද්ද?....මම කියන කල්ම ඉන්න ඕනද? ''

      '' නෑ සර් ඔය රිපෝට් එක හදන්නෙ මේ....ජනනි මිස් නෙ.....''

      '' ඔව් ඉතිං මොකක්ද ප්‍රශ්නෙ?....ජනනිට සනීප නැද්ද? ''

      '' නෑ සර් මේ....මේ ....එහෙමට අසනීපයක් නම් පේන්ට තියන පාටක් නම් නෑ....''

      '' මොකක්ද අයිසෙ තෙපර බාන්නෙ?.... කියනවකො කෙලිං කියන දෙයක්....ළඟදි ජනනි බැන්දනෙ...මොකෝ මැරේජ් එකේ ප්‍රොබ්ලම් එකක් වත්ද? ''

      '' අනේ නෑ සර්....අර යජිත් කියන්නෙ දාහකින් හොයා ගන්න බැරි හොඳම ලමයෙක්..ඒත් අපි කතා උනේ ජනනිගෙ පූරුවෙ වාසනාවකට තමයි...''

      '' මේ අයිසෙ..... මට මෙතන යජිත්ගෙ ගුණ ගායනා අහගෙන ඉන්ට වෙලා නෑ දවසම..තේරුණාද...මට ඕන අර රිපෝට් එක.ඉතිං කියනව සිංහලෙං, ජනනිට ඒ රිපෝට් එක හදන්න බැරි හේතුව මොකක්ද? ''

      '' ඒක තමයි සර් මම මේ කියන්න යන්නෙ....මට තේරෙන්නෙ නෑ...මේක සර්ට කොහොම කියන්නද කියල..ඊයෙ ඉඳලම ජනනි කිසිම වැඩක් කරන්නෙ නෑ...''

      '' මොනවා?....කිසිම වැඩක් කරන්නෙ නෑ?...එතකොට මොනවද එයා කරන්නෙ? ''

      '' සර් මේ....ජනනි ජනනි...මට මේක සිංහලෙන් කියන්න බෑ සර්...ඉංග්‍රීසියෙන් කියන්නම්...''

      එවර නම් ප්‍රධානියාගේ මුව ද බාගෙට ඇරිණි.

      '' මොකක්ද මනුස්සයො ඔය ජනනි කරන සිංහලෙන් කියන්ට බැරි වැඩේ..හරි හරි ඉංග්‍රීසියෙන් හරි කියනවකො එහෙනම්....''

      ප්‍රධානියා මෙසේ පැවසූයේ අසුනෙහි හරි බරි ගැසෙමිණි.

      තම ප්‍රධානියා වෙත ආසන්න වූ පෞද්ගලික සහකරු ඔහුගේ කණට කෙඳිරීය.

      '' Sir, since yesterday Janani is doing nothing but trying to bite the arse.....''

      ප්‍රධානියා අසුනෙන් නැඟී සිටියේ අසුන ද බිම පතිත කරවමිනි.

      '' What....? She is trying bite the arse?....whose arse? ''

      '' My goodness , Sir, what are you saying?...she is trying to bite her own arse, not anyone else's arse, she is bending down and trying to bite her own arse ''

      බිම පතිත වූ අසුන කෙලින් කොට එහි ඇද වැටුණු ප්‍රධානියා මේසයට බරවූ දෑත මත රැඳවූ හිසැතිව මොහොතක් ගත කලේය.

      ඉක්බිති හිස එසවූ ඔහු කතාකලේ බෙහෙවින් පරාජිත හඬකිනි.

      '' ගිහිල්ල ජනනි මිස් ගෙන් අහගෙන එනව වැඩේ හරි ගියාද කියල.. ''

      '' ඒ මොකටද සර් ? ''

      '' වෙන මොකටවත් නෙවෙයි ඕයි...දොලහට කලින් අර රිපෝට් එක දෙන්න බැරි උනොත් මටත් පුක හපාගෙන මැරෙන්න තමයි වෙන්නෙ.. ''

      Delete
    5. හක් හක් හක්!!!!
      එම්බා අයියණ්ඩිය,
      ප්‍රීතී ප්‍රීතී!!! පස්වනක් ප්‍රීතී!!!
      තොප සිහිනයක් දැක ඇතිසෙයක් හැගේ!!
      මාගේ කාර්යාලය ඇත්තේ ඔය තොප සිතන පරිද්දෙන් බොරැල්ල මංසන්ධියේ නොවේය..
      එපමණකුදු නොව දැන් ඔබගේ මේ පබැදුම පරිදි එසේ කරණායුරු දැන සිටීම මා හට පමණක් නොව මාගේ ලොක්කාටද එක සේ වැදගත් වෙනු නිසැකය. එබැවින් මේ සා මහරු දිවි නසාගැනීමේ උපක්‍රමයක් හදුන්වාදුන් අප රිවිසුරාණ, එසේ පුක වැරදුණා!! පශ්චාත් භාගය හපාගෙන ජීවිතක්ෂයට පත් වන ආකාරය රූප සටහන් අනුසාරයෙන් ඉදිරිපත් කරන්නේ නම් එය හුදී ජන පහන් සංවේගයට හේතු කාරණා වනු ඇත්තේමය.
      (රවී අයියගෙං රහසින්: රවී අයියෙ.. කියහංකො බං ඇයි මේ පශ්චාත් භාගය විකන්නෙ?? ඇයි බාගයක්??? විකපංකො මුලු එකම?? )

      Delete
    6. එම්බා හසකිකිණිය,

      / තොප සිහිනයක් දැක ඇතිසෙයක් හැගේ!! /

      / මාගේ කාර්යාලය ඇත්තේ ඔය තොප සිතන පරිද්දෙන් බොරැල්ල මංසන්ධියේ නොවේය.. /

      තොපගේ පිළිතුර වනාහී කොහි යන්නෙහිද? පැසෙහි නෙරළු වර්ගයේ පිළිතුරෙකි. ඒ කෙසේදයත් මවිසින් ඉදිරිපත් කල කාරණාවන්ට තර්කානුකූල පිළිතුරු සැපයීම පසෙක තබා කිසිදු ඵලක් නොමැති තොපගේ කාර්යාලය බොරැල්ලෙ හි නොපිහිටි බව පවසමින් පාඨකයින් නොමඟ යැවීමටය තී මේ තැත් කරනුයේ...අහා තිගේ එක්සිය විසිඅටෙක් වූ ඉතිරි මායමට මා වැනි වියත්හු කිසිසේත් නොරැවටෙන්නාහුය. ඒ තරයේ සිහි තබාගත හොත් ඉතා යෙහෙකි.

      මා සිතට මෙහිදී එකවරමැ පිවිසියේ කලකට පෙරැ ඇසූ එක් කථාවෙකි.

      දුර බැහැර රැකියාවෙක නියුතු එක් පුඟුලෙක. දිනෙක හෙතෙම දින කිහිපයෙක් නිවාඩු දමා ගෙදර පැමිණියේය. ඊට පෙර දින තමා පැමිනෙන බව දන්වා බිරිඳට විදුලි පණිවිඩයෙක් එවීමට ද හේ අමතක නොකෙළේය.

      අහෝ ඛෙදයෙකි. මහත් ප්‍රීතියෙන් නිවෙසට පැමිණි ඔහු දුටුවේ කුමක්ද?...සිය බිරිඳ වෙනත් පුරුෂයෙකු හා සමඟ ආලිංගනයේ පසුවන අන්දමයි. මින් බලවත් කලකිරීමට පත් හෙතෙම ඒ අසලම විසූ බිරිඳගේ පියා හමු වීමට ගොස් මෙසේ පැවසීය.

      '' අහෝ මාමණ්ඩිය... බලනු මැන මම අද පැමිණෙන බව දන්වා ඇයට ඊයේ දින විදිලි පණිවිඩයක් ද එවීමි.එහෙත් මම අද නිවෙසට පැමිණෙන කල ඇය පර පුරුෂයකු හා ආලිංගනයේ පසුවෙයි. මම මේ කසාදය අවලංගු කරනු කැමැත්තෙමි. ''

      එබස් ඇසූ මාමණ්ඩිය ඔහු අසවසන්නේ මෙසේ පැවසීය.

      '' කලබල නොවනු පුත.මෙහි කොතැනක හෝ වැරදීමෙක් ඇත. මා දියණිය එවන් ස්වාමි ද්‍රෝහී කතක් නොවන බව මම උදක්මැ දනිමි. මම ඈ විමසා එනතෙක් මෙහි රැඳෙනු මැන '' පවසා නික්ම ගියෝය.

      පුරුෂයා ද බොහෝ සෙයින් සංවේග ප්‍රාප්ත වූයේ මාමණ්ඩියගේ පුනරාගමනය බලාපොරොත්තුවැ උකටලීවැ එහිමැ රැඳී සිටියේය.

      ගත වූයේ ස්වල්ප වේලාවකි. මාමණ්ඩිය ආපසු පැමිණියේ මහත් ජයග්‍රාහී ලීලාවෙනි.

      '' පුත මම තොපට නොපැවසුවෙම්ද? මා දියණිය අත වරද නැති බව...අප දරුවන් ඇති දැඩි කලේ බොහෝ ප්‍රවේශමෙනි..ඒ දැන ගනු යෙහෙකි ''

      එබසින් විශ්මය පත් වූ පුරුෂ තෙමේ මෙසේ පිළිවිසීය.

      '' මා දෑසින් දුටු දේ මුසාවෙක් යයිද තොප මේ පවසනුයේ?..ඇය පර පුරුෂයෙකු හා සිටිනු මා දෑසින්ම මම දුටුවෙමි... ඒ අසත්‍යයක්ද? ''

      එබසට මාමණ්ඩිය තෙමේ මෙසේ පිළිතුරු දුන්නේ ජයග්‍රාහී ලෙස සිනාසෙමිනි.

      '' එසේනම් පුත අසාපන්න, ඒ අවුලට හේතුව නම් තොප එවූ විදිළි පණිවිඩය ඈ හට නොලැබීමයි, එසේ හෙයින් ඈ අත කිසිදු වරදෙක් නැත්තේමය.''

      (රවී අයියගෙං රහසින්: රවී අයියෙ.. කියහංකො බං ඇයි මේ පශ්චාත් භාගය විකන්නෙ?? ඇයි බාගයක්??? විකපංකො මුලු එකම?? )

      ජනූටද රහසිං.....ඕක වෙන්නෙ මෙහෙමනෙ බොල...උඹ දැං ඔය දෙකට නැවිල පස්ස විකා ගන්ට ෆුල් ට්‍රයි එක දෙනවනෙ..එතකොට එක පාරට උඹ විසිවෙල ගිහිල්ල උඹේ පස්ස වදිනව ඉස්සරහ තියෙන යකඩ මේසෙ අග්ගිස්සෙ, ඒ වැදිච්චි පාරට පස්සෙං බාගයක් ගැලවිල යනව. ඔන්න එතකොට ඉතුරු වෙන්නෙ කොච්චරයිද?....බාගයයි නේද?....ගනං හරි නේද ජනූ?....පැටළුනෙ එහෙම නෑනෙ...හරි...ඔන්න ඔය බාගෙ තමයි අන්තිමට උඹට විකාගන්ට ඉතුරු වෙන්නෙ....පැහැදිලියි නෙවද?

      අන්න නඟේ මම උඹේ හරිම කැමති ගති ගුණයක්..යමක් ගැන විචිකිච්චාවක් තියනව නම් සද්ද නැතුව නොඉඳ අහනව...බොහොම හොඳයි එහෙම තමයි ඉන්ට ඕන...බොහොම දියුණු වෙන ලක්සන මේ ළමය පෙන්නුම් කොරනව...හෙහ්, හෙහ්, මේ ඇත්තමයි...

      Delete
  17. කරුණාකර ගසේ අත්තක කැමරාවක් අටවා තබන්න . මන්ද මෙවන් දිවිතොර කර ගැනීමක් මින් පෙර අප දැක නැත්තේමය . වෙසෙසින්ම පශ්චාත්භාගය විකාගන්නා අයුරු යු ටියුබයෙන් නැරඹීමට සියල්ලෝ කැමති වනු ඇත . අවැසි නම් මුණු පොතෙන් බෙදා ගත හැක .

    ReplyDelete
    Replies
    1. කොහේ තියෙන ගහක්ද බොල? ඔහෙ ඇති ගහක් නෑ...

      පශ්චාත් භාගය විකාගන්නා උද්වේගකර අවස්ථාව සිතුවමට නැඟීමට මවිසින් සිත්තමියගේ දයාබර සැමියානන් වූ සිත්තරා මහතා නිල සිත්තරා වශයෙන් පත් කරන්නට යෙදුනු බැව් ඔබ සැමට මෙයින් දැනුම් දෙමි.

      Delete

මගේ සිතුවිලි ගැන ඔබේ සිතුවිලි

LinkWithin

Related Posts Plugin for WordPress, Blogger...